#Update

በጸጥታ ችግር ከኦሮሚያ ክልል የተለያዩ ዞኖች ተፈናቅለው በአማራ ክልል የሚገኙ ተፈናቃዮችን ወደዬ ቄያቸው ለመመለስ የቅድመ ዝግጅት ሥራዎች እየተሰሩ እንደነበር የኦሮሚያና አማራ ክልል የኮሚዩኒኬሽን ቢሮዎች በተደጋጋሚ ለቲክቫህ ኢትዮጵያ መግለጻቸው አይዘነጋም።

የክልሎቹ የኮሚዩኒኬሽን ቢሮዎች ከሁለት ወራት በፊት ሲገልጹ የነበረው፣ የጸጥታ ችግር የነበራቸውን የኦሮሚያ ክልል አካባቢዎች በቅድሚያ ሰላምን መስፈኑን በማረጋገጥ ተፈናቃዮቹ እንዲመለሱ የማድረግ ሥራ እንደሚከናውን ነበር።

ይህን ተከትሎም ከተፈናቃዮቹ መካከል በአማራ ክልል በሰሜን ሸዋ ዞን ደብረ ብርሃን መጠለያ ጣቢያ የሚገኙ ተፈናቃዮች አንዳንዶቹ “ ተገደን ” ነው፣ ሌላኛዎቹ ደግሞ “ በፈቃዳችን ” ነው ባሉት ንግግር ወደ ወለጋ እየተመለሱ መሆኑን ሰሞኑን ሲገልጹ ተስተውለዋል።

ለጉዳዩ ምን ምላሽ እንዳላቸው ከቲክቫህ ኢትዮጵያ ጥያቄ የቀረበላቸው የሰሜን ሸዋ ዞን አደጋ መከላከል ምግብ ዋስትና ጽሕፈት ቤት ኃላፊ አቶ አበባው መለሰ፣ “ ከኦሮሚያ ክልል ወደ አማራ ክልል የመመለስ ስለሆነ ፕሮግራሙን የያዘው፣ አመራርም መድቦ ሲያወያይ የቆዩት የፌደራልና የሁለቱ ክልሎች መንግሥታት ናቸው ” ብለዋል።

የኦሮሚያ ክልል ኮሚዩኒኬሽን ቢሮ ኃላፊ አቶ ኃይሉ አዱኛ ስልክ ለማንሳት ፈቃደኛ ባይሆኑም፣ “ አጠቃላይ መልሶ ማቋቋምን አስመልክቶ ሁለቱ ክልሎች በቅርቡ ይፋዊ መግለጫ ይሰጣሉ ” ሲሉ አጭር የፅሑፍ ምላሽ ሰጥተዋል።

የአማራ ክልል ቢሮ ኃላፊ መንገሻ ፈንታው (ዶ/ር) እና ምክትል ኃላፊ አቶ ወንድወሰን ለገሰ ተደጋጋሚ ስልክ ለማንሳት ፈቃደኛ ባለመሆናቸው፣ ተፈናቃዮች ከፊሎቹ " ተገደን ነው እየተመለስን ያለነው "፣ ከፊሎቹ ደግሞ " በፈቃዳችን ነው እየተመለስን ያለነው " የሚሉ ሀሳቦች ማቅረባቸውን በተመለከተ ምላሽ እንዲሰጡ ከቲክቫህ ኢትዮጵያ ለተላከላቸው የፅሑፍ መልዕክትም ምላሽ ለመስጠት ፈቃደኛ አልሆኑም።

በተጨማሪ ስለ ተፈናቃዮቹ ቅሬታ ምላሽ መስጠት ይችሉ እንደሆን ቲክቫህ ኢትዮጵያ ጥያቄ ያቀረበላቸው የአማራ ክልል አደጋ መከላከልና ምግብ ዋስትና ማስተባበሪያ ኮሚሽን የሕዝብ ግንኙነት ኃላፊ ወ/ሮ ፍቅሬ ሙሉጌታ በበኩላቸው፣ “ ተፈናቃዮች ከኦሮሚያ ክልል ከተለያዩ ዞኖች፣ ከሱዳንም፣ ከተለያዩ ቦታዎች ሰዎች እየተፈናቀሉ በመጠለያ እንዲሁም Host community ሆነውም የሚኖሩ አሉ ” ብለዋል።

“ ይሄን ደግሞ መንግሥት ትኩረት አድርጎ እየሰራበት ያለ ጉዳይ ነው” ያሉት ኃላፊዋ፣ “እናም ይሄ ከብዙ አካላት ጋር በቅንጅት የሚሰራ ጉዳይ፣ በከፌተኛ የሥራ ኃላፊዎች ተይዞ እየተከናወነ ያለ ጉዳይ ስለሆነ፣ እኛ በቂ ክልትትል ስሌለን፣ አሁንም ደግሞ ይሄ ነው ብለን ለሕዝብ የምንነግረው ያን ያክል ዝርዝር መረጃ ለእናንተ የምናደርሰው በአሁኑ ሰዓት አይኖረንም” ነው ያሉት ኃላፊዋ።

መረጃውን ያዘጋጀው የአ/አ ቲክቫህ ኢትዮጵያ ቤተሰብ አባል ነው።

@tikvahethiopia

ሳልሳይ ወያነ ትግራይ የፓለቲካ ፓርቲ ህጋዊ እውቅና አገኘ።

የፓርቲው ከፍተኛ አመራር አቶ ዓብለሎም መለስ ዛሬ በማህበራዊ ትስስር ገፃቸው ፤ "ሳልሳይ ወያነ ትግራይ የክልላዊ ፓለቲካ ፓርቲ የምዝገባና ህጋዊ ሰውነት ማረጋገጫ የምስክር ወረቀት አግኝቷል " ብለዋል።

ፓርቲው የምዝገባና ህጋዊ ሰውነት ማረጋገጫ የምስክር ወረቀት ለሰጠው የኢትዮጵያ ብሔራዊ ምርጫ ቦርድ ያመሰገኑት ከፍተኛ አመራሩ ፣ ፓርቲው ለሚያካሂደው ፓለቲካዊ ትግል እውቅናው ምቹነት ይፈጥርለታል ብለዋል። 

ብሄራዊ ባይቶና ዓባይ ትግራይ ( ባይቶና ) የተባለ የትግራይ ተፎካካሪ ፓርቲ ባለፈው ጥር ወር 2016 ዓ.ም ከኢትዮጵያ ብሔራዊ ምርጫ ቦርድ የክልላዊ ፓለቲካ ፓርቲ የምዝገባና ህጋዊ ሰውነት ማረጋገጫ የምስክር ወረቀት ማግኘቱ መረጃ መለዋወጣችን ይታወሳል።
                
@tikvahethiopia            

" ... በተደጋጋሚ የማስፈራሪያ ዛቻና ገዳሙን ለቃችሁ ውጡ የሚባሉ መልእክቶች ይደርሱ ነበር " -  መጋቤ ካህናት ቆሞስ አባ ሃብተ ጊዮርጊስ አስራት

በኢትዮጵያ ኦርቶዶክስ ተዋሕዶ ቤተ ክርስቲያን የገዳማት አስተዳደር መምሪያ ኃላፊ መጋቤ ካህናት ቆሞስ አባ ሃብተ ጊዮርጊስ ዓሥራት የዝቋላ ደብረ ከዋክብት አቡነ ገብረ መንፈስ ቅዱስ ገዳም አባቶች ግድያ ዙሪያ ለተዋሕዶ ሚዲያ ማዕከል ቃላቸውን ሰጥተው ነበር።

ምን አሉ ?

- ከጥቃቱ በፊትም በተደጋጋሚ የማስፈራሪያ ዛቻና ገዳሙን ለቃችሁ ውጡ የሚባሉ መልእክቶች ይደርሱ ነበር።

➡ " ሁል ጊዜ ዛቻው ልቀቁልን ነው፤ ልቀቁልን ነው የሚሉን። ገዳሙን መነኮሳቱ ለቀው እነሱ ገብተው ሊቀድሱበት ይሁን ፣ሊያስተምሩበት ይሁን ፣ ሊያቆርቡበት ይሁን ምንም አይገባኝም "

- ከዚህ ግድያ ክስተት ቀደም ብሎ የገዳሙ መጠበቂያ መሣሪያና የመናንያኑ እህል በኃይል ተወስዷል። ገዳሙም እንዲራቆት ተደርጓል። የሚመለከተው አካል ለጉዳዩ ትኩረት ካልሰጠ ወደ ፊትም ከዚህ ያልተናነሰ ወንጀል በገዳሙ ሊፈጸም የማይችልበት ምክንያት አይኖርም።

- ምንም እንኳ ለቤተክርስቲያን አባቶች መደብደብ መሰደድና መገደል የነበረ ቢሆንም የአሁኑ ግን መሞታቸው ብቻ ሳይሆን አሟሟታቸውም ዘግናኝ ነበረ አስከሬናቸው እንኳ ተለቃቅሞ እንዲቀበር ነው የሆነው።

- ገዳማትን መጠበቅ የቤተክርስቲያኗ ኃላፊነት ብቻ ሳይሆን የመንግሥትም ኃላፊነት ነው መንግሥት ከፌደራል እስከ ክልል ባሉት የጸጥታ መዋቅሮቹ  ገዳማትን እንደማንኛውም ተቋም ሊጠብቅ ይገባል።

- በሀገር ውስጥም ሆነ ከሀገር ውጭ ያሉ ምእመናን በአስከፊ ሁኔታ ውስጥ ለሚገኙት የዝቋላ ደብረ ከዋክብት አቡነ ገብረ መንፈስ ቅዱስ ገዳም መናንያን በገዳሙ ሕጋዊ አካውንት የኢትዮጵያ ንግድ ባንክ 1000011282222 (የዝቋላ ደብረ ከዋክብት አቡነ ገብረ መንፈስ ቅዱስ አንድነት ገዳም)  ድጋፍ እናድርግ።

ቲክቫህ ኢትዮጵያ መረጃው የተ.ሚ.ማ መሆኑን ይገልጻል።

@tikvahethiopia

ፎቶ፦ ጠ/ሚ ዶ/ር ዐቢይ አሕመድና ባለቤታቸው ቀዳማዊት እመቤት ዝናሽ ታያቸው ለ2 ቀናት መንግሥታዊ ጉብኝት ኬንያ ናይሮቢ ገብተዋል።

ጠቅላይ ሚኒስትሩ እና ባለቤታቸው ናይሮቢ በጆሞ ኬንያታ አውሮፕላን ጣቢያ ሲደርሱ በፕሬዝዳንት ዊልያም ሩቶ አቀባበል ተደርጎላቸዋል።

በመቀጠል ፕሬዝዳንት ዊሊያም ሩቶ የወጣቶችን የአርቴፊሻል ኢንተለጀንስ ተሳትፎ የሚያሳይ የአይሲቲ ፓርክ ለጠቅላይ ሚኒስትር አስጎብኝተዋል።

መረጃው የጠ/ሚ ፅ/ቤት ነው።

@tikvahethiopia

#Update

የጨረታ መክፈቻው ተራዘመ።

የአዲስ አበባ ቤቶች ልማት ኮርፖሬሽን ከአዲስ አበባ ዲዛይንና ግንባታ ስራዎች ቢሮ ጋር በመተባበር ያስገነቧቸውን 3,452 የመኖሪያና የንግድ ቤቶችን በሽያጭ ለማስተላለፍ የጨረታ ሰነድ በመሸጥ ላይ ይገኛል።

ኮርፖሬሽኑ ፤ ከሕብረተሰቡ መጣልኝ ባለው ጥያቄ መነሻነት የጨረታ መክፈቻ ጊዜው ለ10 ቀናት የተራዘመ መሆኑ አሳውቋል።

በጨረታው መሳተፍ የሚፈልግ ማንኛውም ተጫራች እስከ መጋቢት 02/2016 ዓ/ም ድረስ ዘወትር ከሰኞ እስከ ቅዳሜ ከጠዋቱ 1፡30 እስከ ምሽቱ 1፡30 እንዲሁም እሁድ ከጠዋቱ 1፡30 እስከ ቀኑ 6፡00 በሁሉም ክፍለከተሞች ዲዛይንና ግንባታ ስራዎች ቢሮ በአካል በመቅረብ የጨረታ ሰነዱን መግዛት ይችላል ተብሏል።

@tikvahethiopia