" ወይ የሆነ መፍትሄ ተወስዶ እንዲቆዩ አልተደረጉ ፤ ከሄዱ ደግሞ በስነሥርዓት እንዲሸኙ ማድርግ ይገባ ነበር " - ስሙ እንዲጠቀስ ያልፈለገ ዶክተር (በባህር ዳር ዩኒቨርሲቲ፣ ጤና ሳይንስ ኮሌጅ ሌክቸረር)

በባህር ዳር ዩኒቨርሲቲ የጤና ሳይንስ ኮሌጅ ፤ ትላንት ምሽት 2:45 ሰዓት ገደማ ታጣቂዎች ተኩስ ከፍተው እንደነበር አንድ በተቋሙ ውስጥ በመምህርነት የሚሰራና ስሙ እንዳይጠቀስ የፈለገ ዶክተር ለቲክቫህ ኢትዮጵያ አሳውቋል።

" ከሰሞኑን በዩኒቨርሲቲው ጥሪ ተማሪዎች ገብተው ነበር " ያለው ይኸው ዶክተር ፤ ትላንት ምሽት በተማሪዎች ዶርም አካባቢ ታጣቂዎች ገብተው ከባድ ተኩስ ከፍተው ነበር ብሏል።

" የተማሪዎች ዶርም አካባቢ ነው ከባድ ተኩስ እና ፍንዳታ የነበረው ፤ እኔ በወቅቱ ለሪሰርች ስራ ላይብረሪ ነበርኩ ፤ ተኩሱና ፍንዳታው የተሰማበት ትክክለኛ ሰዓት ደግሞ ምሽት 2:45 ላይ ነው " ሲል ገልጿል።

" በኃላ ላይ ስንጠይቅ ታጣቂዎቹ ተማሪዎቹን ' እኛ እናተን ልንጎዳ አይደለም ግን ከነገ ጀምሮ ግቢውን ለቃችሁ እንድትወጡ ስለምንፈልግ ነው ' ብለዋቸዋል " ያለው ዶክተሩ ፤ " የነበረው ተኩስ ከ10 ደቂቃ በኃላ ከቆመ በኃላ እኛም ከላይብረሪ ወጥተን ወደየቤታችን ገባን " በማለት የትላንት ምሽቱን ሁኔታ አስረድቷል።

" ዛሬ ከጥዋት ጀምሮ ተማሪዎች ሲሄዱ ነበር ፤ ይሄን መረጃ ለእናተ በምሰጥበት ወቅት (ከሰዓት ላይ) ብዙ ተማሪ ሻንጣውን ጭኖ ፣ እየጎተተ እየወጣ ነው " ሲል የገለፀው ዶክተሩ ፤ " እኔ እንዳየሁት አስተዳደር አካባቢ ያሉ ሰዎችም አላነጋገሯቸውም ፤ ተማሪዎቹ ሰብሰብ ብለው ነው በራሳቸው ሲሄዱ የነበሩት፤ ከስንት ጊዜ በኃላ እድሜያቸው እንዳይሄድ ብለው ለመማር የመጡ ተማሪዎች ወይ የሆነ መፍትሄ ተወስዶ እንዲቆዩ አልተደረጉ ፤ ከሄዱ ደግሞ በስነሥርዓት እንዲሸኙ ማደርግ ይገባ ነበር " ብሏል።

" ተማሪዎች በዚህ መንገድ ከግቢ መውጣታቸው በጣም ስላሳሰበኝ ነው ይሄን ለናተ የምናገረው ፤ ትላንት ማታ ላይብረሪ ውስጥ የነበሩበት ሁኔታ አሳዛኝ ነበር ፣ ሲያልቅሱ ነበር ፤ አንዳንዶቹ ድምፅም ሰምተው የሚያውቁ አይደሉም ብቻ ያሳዝናል " ሲል ገልጿል።

በህክምና ኮሌጁ ሌክቸረር የሆኑት እኚህ ዶክተር ፤ " ለተማሪዎች ስነልቦና የሚያነጋግራቸው አካል ሊኖር ይገባ ነበር ፣ ተረጋጉ የሚላቸው አካልም መኖር ነበረበት ፤ ከጥዋት ጀምሮ ይሄን መረጅ እስከሰጠሁበት ሰዓት ያነጋገራቸው አካል የለም ፤ የግቢ ጥበቃዎችም መሳሪያ ተነጥቀናል ምንም ማድረግ አልቻልንም ነው የሚሉት ፤ ብቻ ተማሪዎቹ መፍትሄ ቢፈልጋላቸው " ሲሉ ድምፃቸውን አሰምተዋል።

ቲክቫህ ኢትዮጵያ በዩኒቨርሲቲው በኩል ስለጉዳዩ ምን አይነት ምላሽ እንዳለ ለማወቅ ጥረት አድርጓል፤ ነገ ጥዋት ይቀርባል።

@tikvahethiopia

#Update

" ከስራ የታገድኩበትን የኢየሱስ ይመጣል ስብከት ወደፊት በስፋት የምሰራበት ጊዜ ይመጣል ፤ አሁን ግን ጊዜው ህዝብን የማገልገያ ነው " - ኢንስፔክተር ተስፋዬ ደምሴ

ከወራት በፊት የደንብ ልብስ በመልበስና የፖሊስ መኪና በመያዝ  " ኢየሱስ ይመጣል !! " በሚል ሃይማኖታዊ ቅስቀሳ እና ስብከት በማካሄዳቸው ከስራ የታገዱት ኢንስፔክተር ተስፋዬ ደምሴ እግዱ ተነስቶላቸው ወደስራዉ መመለሳቸውን ቲክቫህ ኢትዮጵያ ሰምቷል።

ዛሬ ምሽቱን ከቲክቫህ ኢትዮጵያ ለቀረበላቸዉ ጥያቄ ምላሽ የሰጡት ኢንስፔክተር ተሰፋዬ ደምሴ ፤ አሁን ላይ ፍጹም ደስታ ውስጥ መሆናቸዉን በመግለጽ ባሳለፏቸዉ ጊዜያት በጸሎት እና በተለያየ መልኩ ከጎናቸዉ ለነበሩት ሁሉ ምስጋናቸውን አቅርበዋል።

ኢንስፔክተሩ " የክልሉ አመራር መክሮ እና ይቅርታዬን ተቀብሎ ወደስራ ስላስገባኝ አመሰግናለሁ " ያሉ ሲሆን " ሙስሊም ክርስቲያን ሳልል በቅንነትና በትጋት ለማገልገል ዝግጁ ነኝ " ብለዋል።

" ከስራ የታገድኩበትን የኢየሱስ ይመጣል ስብከት ወደፊት በስፋት የምሰራበት ጊዜ ይመጣል " ያሉት ኢንስፔክተር ተስፋዬ ደምሴ " አሁን ግን ጊዜው ህዝብን የማገልገያ ነው " ብለዋል።

መረጃውን አዘጋጅቶ የላከው የሀዋሳው የቲክቫህ ኢትዮጵያ ቤተሰብ አባል ነው።

@tikvahethiopia

#Update

የቅዱስ ሲኖዶስ ዋና ጸሐፊ እና የኒውዮርክና አካባቢው ሀገረ ስብከት ሊቀ ጳጳስ  ብፁዕ አቡነ ጴጥሮስ (ዶ/ር) ዛሬ አሜሪካ ገብተዋል።

ብፁዕ አቡነ ጴጥሮስ (ዶ/ር) አሜሪካ ሲደርሱ አቀባበል ተደርጎላቸው።

ማክሰኞ ጥር 28 / 2016 ዓ/ም በአሜሪካ የነበራቸውን አገልግሎት አጠናቀው ወደ ኢትዮጵያ ቢመለሱም በቦሌ ዓለም አቀፍ ኤርፖርት ከደረሱ በኃላ ወደ #ኢትዮጵያ መግባት እንደማይችሉ ተነግሯቸው ዛሬ ወደ አሜሪካ ለመመለስ ተገደዋል።

የኢትዮጵያ ኦርቶዶክስ ተዋሕዶ ቤተክርስቲያን ፤ ብፁዕነታቸው ወደ አሜሪካ ከመመለሳቸው በፊት የሚመለከተው የመንግስት አካል የቤተክርስቲያኗ ከፍተኛ  የሥራ ኃላፊና የቅዱስ ሲኖዶስ ዋና ጸሐፊ  መሆናቸውን ከግምት ውስጥ በማስገባት ወደ አገር እንዲገቡ  እንዲፈቀድላቸው እንዲያደርግ ብትጠይቅም የመፍትሄ ምላሽ ባለመገኘቱ ወደ መጡበት አሜሪካ ተመልሰዋል።

መንግሥት እስካሁን ስለጉዳዩ የሰጠው ማብራሪያ የሌለ ሲሆን በቀጣይ የሚሰጠው ማብራሪያ ካለ ተከታትለን እናቀርባለን።

@tikvahethiopia

#Update

ከየካቲት 6-9/2016 ዓ.ም የሚሰጠውን የመውጫ ፈተና ለመፈተን በመጠባበቅ ላይ የምትገኙ የድጋሚ (Re-exam) ተፈታኞች በሙሉ የመፈታኛ የይለፍ-ቃል (Password) ከስር በተገለፁት አማራጮች ማግኘት የምትችሉ መሆኑን ትምህርት ሚኒስቴር አሳውቋል።

1. በምዝገባ ወቅት በሞላችሁት email በኩል፣
2. https://exam.ethernet.edu.et ላይ በመግባት የከፈላችሁበትን Transaction Number በማስገባት፣
3. ከተመደባብችሁብት የመፈተኛ ተቋም ማግኘት ትችላላችሁ።

ማሳሰቢያ፦

ለመጀመሪያ ጊዜ የመውጫ ፈተና የምትፈተኑ እጩ ተመራቂዎች የይለፍ-ቃል የምታገኙት ከምትማሩበት ወይም ከተመደባብችሁበት የመፈተኛ ተቋም ብቻ መሆኑ ተገልጿል።

ተፈታኞች የሞዴል ፈተና እስከ የካቲት 5/2016 ዓ.ም መውሰድ እንዳለባችሁ ሚኒስቴሩ አሳስቧል።

@tikvahuniversity

#Update

አቶ ተመስገን ጥሩነህ ምክትል ጠቅላይ ሚኒስትር ሆነው ተሾሙ።

6ኛው የሕዝብ ተወካዮች ምክር ቤት 3ኛ ዓመት የስራ ዘመን በ15ኛ መደበኛ ስብሰባው የአቶ ተመስገን ጥሩነህን ሹመት አጽድቋል፡፡

ጠቅላይ ሚኒስትር ዐቢይ አሕመድ (ዶ/ር) የአቶ ተመስገንን የሥራ ልምድ ዘርዝረው ለምክር ቤቱ ባቀረቡት መሰረት ምክር ቤቱ በሙሉ ድምጽ ሹመቱን ማጽደቁን ብሔራዊ የቴሌቪዥን ጣቢያ / etv ዘግቧል።

@tikvahethiopia

#NewsAlert

አምባሳደር ታዬ አፅቀሥላሴ የውጭ ጉዳይ ሚኒስትር ሆነው ተሾሙ።

6ኛው የሕዝብ ተወካዮች ምክር ቤት 3ኛ ዓመት የስራ ዘመን በ15ኛ መደበኛ ስብሰባው አምባሳደር ታዬ አፅቀሥላሴ ሹመት አጽድቋል፡፡

ጠቅላይ ሚኒስትር ዐቢይ አሕመድ (ዶ/ር) የአምባሳደር ታዬ አፅቀሥላሴ የሥራ ልምድ ዘርዝረው ለምክር ቤቱ ባቀረቡት መሰረት ምክር ቤቱ በሙሉ ድምጽ ሹመቱን ማፅደቁን ብሔራዊ የቴሌቪዥን ጣቢያ (etv) ዘግቧል።

@tikvahethiopia

#NewsAlert

ዶክተር መቅደስ ዳባ የጤና ሚኒስትር ሆነው ተሾሙ።

6ኛው የሕዝብ ተወካዮች ምክር ቤት 3ኛ ዓመት የስራ ዘመን በ15ኛ መደበኛ ስብሰባው የዶክተር መቅደስ ዳባ ሹመትን አጽድቋል፡፡

ጠቅላይ ሚኒስትር ዐቢይ አሕመድ (ዶ/ር) የዶክተር መቅደስ ዳባን የሥራ ልምድ ዘርዝረው ለምክር ቤቱ ባቀረቡት መሰረት ምክር ቤቱ በሙሉ ድምጽ ሹመቱን ማፅደቁን ብሔራዊ ቴሌቪዥን ጣቢያ (etv) ዘግቧል።

@tikvahethiopia

#Update

" ተማሪዎች ላይ የደረሰ ጉዳት የለም " - የባሕር ዳር ዩኒቨርሲቲ የጤና ሳይንስ ኮሌጅ ሁነኛ አካል

በአማራ ክልል ባሕር ዳር ዩኒቨርሲቲ ጥበበ ግዮን ጤና ሳይንስ ኮሌጅ የሚገኙ ተማሪዎች ማክሰኞ ጥር 28 ቀን ከምሽቱ 2፡30 ገደማ ታጣቂዎች በካምፓሱ ውስጥ ተኩስ መክፈታቸውን፣ ተማሪዎቹ ከግቢው እንዲወጡም ማስጠንቀቂያ መስጠታቸውን ለቲክቫህ ኢትዮጵያ ገልጸው፣ የሚመለከተው አካል ሰላም ወዳለበት ግቢ እንዲቀይርላቸው ጠይቀዋል።

በኮሌጁ የጸጥታ ችግር አለ የሚል መረጃ ደርሶናል እውነት ነው ? ሲል ቲክቫህ ኢትዮጵያ ጥያቄ ያቀረበላቸው ስማቸው እንዲጠቀስ ያልፈለጉ አንድ የኮሌጁ ሁነኛ አካል ፣ " ተማሪዎቹ የነገሯችሁ #እውነት ነው። ችግሩ ተፈጠረ፣ ግቢው ተደበደበ። ተማሪዎች ወጡ " ሲሉ አረጋግጠዋል።

በተማሪዎች ላይ የደረሰ ጉዳት አለ ? ተብሎ ለቀረበላቸው ጥያቄ ፤ " ተማሪዎች ላይ የደረሰ #ጉዳት የለም። ከግቢው ገቡ፣ ከዚያ ተኩስ ተጀመረ፣ ከዚያ #ቦምብ አፈነዱ፣ ጥይት ተተኮሰ " ሲሉ አስረድተው፣ " ‘ተማሪዎች መውጣት አለባችሁ የሚል ነገር ተናገሩ እነርሱ (ታጣቂዎቹ) " ብለዋል።

ታጣቂዎቹ ተማሪዎቹን ከግቢ መውጣት እንዳለባቸው ይህን ካላደረጉ ግን በቀጥይ እርምጃ እንደሚወስዱ እንዳስጠነቀቁ ገልጸዋል።

የሴቶች ብሎክ 1 እና 3 ሕንጻ የተወሰነ በታጣቂዎች መመታቱን የገለፁ ሲሆን " ተማሪ ግን #አልጎዱም  " ብለዋል።

" ተማሪዎች ላይ ታርጌት አላደረጉም ሕንጻውን ነው የደበደቡት። ቦምቡ ደግሞ ከተማሪዎች ወደ ካፌ መሄጃ በኩል እዚያው ከግቢው ውስጥ ፈንድቷል። የፈነዳበት ቦታ ይታወቃል " ሲሉ አክለዋል።

ተኩስ የከፈቱት ታጣቂዎች ፍላጎታቸው ምንድን ነው ? ለሚለው ጥያቄ እኚሁ ግለሰብ " ‘ዩኒቨርሲቲ በቃችሁ፣ ከመጀመሪያውስ ለምን መጣችሁ?’ እያሉ ሲናገሩ ነበር " ያሉ ሲሆን " ‘አሁንም ግቢውን ለቃችሁ ውጡ። ዛሬ አንጎዳችሁም። ቀጣይ ግን ስንመጣ ብናገኛችሁ ቀጥታ እርምጃ እንወስዳለን’ የሚል እንድምታ ነበር ብለዋል።

በግቢው አጠቃላይ ከ1,500 እስከ 2,000 ተማሪ የሚገኝበት ሲሆን ከትላንት ጠዋት ጀምሮ #አብዛኞቹ ተማሪዎች ግቢውን ለቀው መውጣታቸውን ተናግረዋል።

" ወደ ቤት የሚሄዱ አሉ (ምክንያቱም በጣም ጭንቅ ነበር በተለይ ሴቶች፣ ሌሊትም #ሲያለቅሱ ነበር) ዘመድ ጋ ወደ ከተማ የሚጠጉም አሉ። #ሆቴል ይዘው ያደሩ ልጆችም አሉ። ቤተሰብ ሩቅ የሆነባቸው፣ ገንዘብ የሌላቸው ተማሪዎች አሉ ግቢ ውስጥ ቁጭ ብለው በጭንቀት " ሲሉ የሁኔታውን አሳሳቢነት አስረድተዋል።

ታጣቂዎቹ ወደ ካምፓሱ ሲገቡ ጥበቃዎች አልነበሩም ? ሲል ቲክቫህ ኢትዮጵያ ላቀረበው ጥያቄ ፣ " የእኛ ካምፓስ አዲስ ስለሆነ አጥር የለውም። በዙሪያው ጥበቃዎች አሉ። ግን ጥበቃዎች በኮማንድ ፓስቱ ምክንያት መሣሪያ አይዙም። መሣሪያ ቢይዙም የመጣው ኃይል በጣም ብዙ ነው " ብለዋል።

የተማሪዎቹ ፍላጎትስ ምንድነው ? ለሚለው ጥያቄም፣ " ተማሪዎች መማር ይፈልጋሉ። ምክንያቱም በኮሮና ጊዜ፣ በጦርነት ምክንያት አማራ ክልል ላይ ብዙ ታሹ። አብዛኛው ተማሪ መማር ይፈልጋል፣ ግን ደግሞ ከሕይወት የሚበልጥ ነገር የለም " የሚል ምላሽ ተሰጥተዋል።

የካምፓሱ ከፍተኛ ባለስልጣናት በጉዳዩ ዙሪያ ረቡዕ ጥር 29 ቀን 2016 ዓ/ም አስቸኳይ ስብሰባ እንደነበራቸው፣ በዚህም " በጥበቃ (በመከላከያ) ተጠብቀው ይማሩ ወይስ ሌላ ግቢ እናመቻችላቸው ? " በሚለው ጉዳይ እንደተወያዩና ውሳኔው ግን እንዳልታወቀ ተመላክቷል።

መረጃው የተዘጋጀው በአ/አ ቲክቫህ ኢትዮጵያ ቤተሰብ አባል ነው።

@tikvahethiopia

#ETHIOPIA

ላለፉት 12 ዓመታ የኢትዮጵያ ምክትል ጠቅላይ ሚኒስትር ሆነው ባገለገሉት አቶ ደመቀ መኮንን ምትክ አቶ ተመስገን ጥሩነህ ምክትል ጠቅላይ ሚኒስትር ሆነው ዛሬ ተሹመዋል።

ጎጃም ብቸና ተወልደው ያደጉት አቶ ተመስገን በርካታ ዓመታትን በደህንነት እና ወታደራዊ ዘርፎች ውስጥ ሰርተዋል።

አቶ ደመቀ ከምክትል ጠቅላይ ሚኒስትርነት በተጨማሪ የውጭ ጉዳይ ሚኒስትር ቦታንም ደርበው ይዘው የነበረ ሲሆን በዚህም ቦታ አምባሳደር ታዬ አፅቀስላሴ የውጭ ጉዳይ ሚኒስትር ሆነው ተሹመዋል።

አምባሳደር ታዬ በተባበሩት መንግሥታት ድርጅት (UN) ኢትዮጵያን ወክለው ያገለገሉ ሲሆን ኢትዮጵያ ውስጥ አሉ ከሚባሉ በዘርፉ የረጅም ጊዜ የስራ ልምድ ካላቸውና ስመጥር ከሆኑ ዲፕሎማት አንዱ ናቸው።

የቀድሞው ምክትል ጠቅላይ ሚኒስትር እና የውጭ ጉዳይ ሚኒስትር አቶ ደመቀ መኮንን ከመንግስታዊ ኃላፊነታቸው ተሸኝተዋል።

@tikvahethiopia