#Update

በደበሶ ከተማ በመኪና አደጋ የሞቱ ምእመናን ዛሬ ሥርዓተ ቀብራቸው ተፈጽሟል።

በምዕራብ ሐረርጌ ደበሶ ከተማ ትላንት ጥር 12/05/2016 ዓ/ም የቃና ዘገሊላ ክብረ በዓል ዕለት ታቦታትን አጅበው በመጓዝ ላይ የነበሩ ምእመናን ላይ ከድሬደዋ የሚመጣ ከባድ የጭነት መኪና ባደረሰው አደጋ የ7 ሰዎች ሕይወት ማለፉን የምዕራብ ሐረርጌ ሀገረ ሰብከት ማሳወቁ ይታወሳል።

ሕይወታቸው ያለፈው ምእመናን ዛሬ ልባቸው በሀዘን የተሰበረ እጅግ በርካታ ምእመናን በተገኙበት ከቀኑ በ7:45 ላይ ሥርዓተ ቀብራቸው ተፈጽሟል።

ሀገረ ስብከቱ ፤ " ከተቀበሩት መካከል ሦስቱ ጨቅላ ህጻናት ሲሆኑ አንዱ ሕይወቱ ያለፈው ግለሰብ የቀበሌው ሚኒሻ ሃይማኖቱ #ሙስሊም ስለሆነ በወገኖቻችን በሙስሊሞች የቀብር ስፍራ ተቀብሯል። " ሲል አሳውቋል።

ቲክቫህ ኢትዮጵያ መረጃውን ከምዕራብ ሐረርጌ ሀገረ ሰብከት ማግኘቱን ያሳውቃል።

@tikvahethiopia

#አክሱምኤርፖርት

የኢትዮጵያ ኤርፖርቶች ድርጅት የአክሱም ሃፀይ ዮሃንስ አውሮፕላን ማረፍያ ለማደስ በጨረታ ላሸነፈው የኮንስትራክሽን ድርጅት ይፋዊ የርክክብ ስነ-ሰርዓት አላካሄደም ተብሏል።

ይህ ሁኔታ ደግሞ የእድሳት ሰራው በፍጥነት በሙሉ አቅም እንዳይሰራና እንዲዘገይ ምክንያት እየሆነ ነው በሚል ነዋሪዎች ቅሬታቸውን ገልጸዋል።

መምህር ሙሉወርቅ ኪዳነማርያም የኢትዮጵያ የንግድና ዘርፍ ማህበራት ምክር ቤት ምክትል ፕረዚደንት ለአንድ ጊዜ ፤ ከ7 ዓመታት በላይ ድግሞ የትግራይ የንግድና የዘርፍ ማህበራት ምክር ቤት ፕረዚደንት በመሆን አገልግለዋል።

መምህሩ ከሽረ ከተማ መልስ ወደ ሃፀይ ዮሃንስ አውሮፕላን ማረፍያ አክሱም ጎራ ብለው ባዩት ነገር ባለመደሰታቸው የሚከተለው አስተያየት በማህበራዊ የትስስር ገፃቸው ላይ አጋርተዋል።

" በአካል ሄጀ እንዳረጋገጥኩት የአክሱም ሃፀይ ዮሃንስ አውሮፕላን ማረፍያ የመሬት (site) ርክክብ አስከ አሁን አልተተገበረም።

ርክክቡ የሚያከናውኑው የኢትዮጵያ ኤርፖርቶች ድርጅትን ኮንሰልታንቱ እስከ አሁነን ቦታው ላይ አልተገኙም። ርክክቡ ስላልተፈፀመ ደግሞ የእድሳት ስራው በተሟላ መልኩ አልተጀመረም።

እርግጥ ነው እድሳቱ ለማካሄድ ጨረታው ያሸነፈው የኮንስትራክሽን ድርጅት ቦታው የማጥራት የመሰለ ቀላል ስራ እየሰራ ነው። ይፋዊ የርክክብ ስነ-ስርዓት ሳይካሄድ ግን ስራው አይጀመርም። እና አስረካቢው አካል ለምን ዘገየ ? " ብለዋል። 

የመምህሩ አስተያየት ደግፈው አስተያየት የሰጡ ሰዎች ደግሞ ፤ " እድሳቱ በይፋ መጀመሩ በሚድያ መስማታቸው እንዳስደሰታቸው አስታውሰው ፤ ዜና ከተነገረ አንድ ወር አስቆጥሮ ስራው በጊዜው አለመጀመሩ አሳዝኖናል " ብለዋል።

አስተያየት ሰጪዎቹ አክለው የኢትዮጵያ ኤርፖርቶች ድርጅትና ኮንሰልታንቱ ለምን ርክክቡ እንዳልፈፀሙ እንዲጠየቁላቸው ጥያቄ አቅርበዋል።

ዘግይቶ ከምንጮች በተገኘ መረጃ ታህሳስ 2016 ዓ.ም አጋማሽ እድሳቱ እንደሚጀመር በሚድያዎች የተነገረለት አውሮፕላን ማረፍያው ፤ ጥር 14/2016 ዓ.ም የመሬት (site) ርክክብ ተፈፅሞ በሙሉ እቅም ወደ ስራ ይገባል መባሉ የመቐለ የቲክቫህ ኢትዮጵያ ቤተሰብ አባል ዘግቧል።
                                       
@tikvahethiopia            

#CPJ

ኤርትራ 16 #ጋዜጠኞችን_በማሠር ከአፍሪካ ቀዳሚውን ሥፍራ እንደምትይዝ በጋዜጠኞች መብት ላይ አተኩሮ የሚሠራው ሲፒጄ ያለፈውን የፈረንጆቹ 2023 ዓ/ም በተመለከተ ባወጣው ሪፖርት አስታውቋል።

16 ጋዜጠኞችን አሥራ የያዘችው ኤርትራ፣ በዓለም 7ኛ ደረጃን እንደምትይዝም ሲፒጄ ገልጿል።

አንዳንዶቹ ጋዜጠኞች በዓለም ለረጅም ግዜ የታሠሩ እንደሆነም ሪፖርቱ አመልክቷል።

በሁሉም ጋዜጠኞች ላይ ክስ ተከፍቶ እንደማያውቅም ሪፖርቱ ጠቁሟል።

እስካለፈው ወር ድረስ በአፍሪካ የታሠሩት ጋዜጠኞች ቁጥር 47 እንደነበር ያመለከተው ሪፖርት፣ ኢትዮጵያ 8 ጋዜጠኞችን በማሠር፣ ካሜሩን ደግሞ 6 በማሠር የሁለተኛና እና ሶስተኛ ረድፍ ላይ እንደሚገኙ ገልጿል።

" በኢትዮጵያ በእሥር ላይ የሚገኙት ጋዜጠኞች ቁጥር፣ በአገሪቱ የሚገኙ መገናኛ ብዙሃን የሚገኙበትን አስቸጋሪ ሁኔታ ያስያል ሲል " ሲፒጄ በሪፖርቱ አመልክቷል።

ባለፈው ዓመት በሰሜን ኢትዮጵያ የነበረውን ጦርነት ያስቆመ የሠላም ስምምነት ቢፈረምም፣ በአማራ ክልል በአካባቢው በሚገኙ ኃይሎች እና በፌዴራሉ ኃይሎች መካከል የሚካሄደው ግጭት አሁንም እንደቀጠለ ነው ያለው ሲፒጄ፣ ስምንቱም ጋዜጠኞች የታሠሩት ግጭቱን በተመለከተ ዘገባ ካወጡ በኋላ መሆኑን አስታውቋል።

ባለፈው ዓመት በመላው ዓለም ላይ የታሠሩ ጋዜጠኞች ቁጥር እስከአሁን ከታዩት ከፍተኛ ሆኑ ከተመዘገበው ዓመት ጋር እንደሚቀራረብ ያመለከተው ሲፒጄ፣ የእስራኤል እና ሐማስ ጦርነት ባለፈው ጥቅምት መጀመሩን ተከትሎ፣ እስራኤል ጋዜጠኞችን በብዛት ካሰሩ አገራት ጎራ መቀላቀሏን አስታውቋል።

➡ ቻይና 44 ጋዜጠኞችን በማሠር ቀዳሚውን ሥፍራ ስትይዝ፣
➡ ሚያንማር 43 በማሠር ሁለተኛ
➡️ ቤላሩስ 28 ጋዜጠኞችን በማሠር ሶስተኛ ሥፍራን ይዘዋል።

#VOA #CPJ

@tikvahethiopia

" ለገንዘብ ተብሎ በግብረሰዶማውያን እና በስደተኞች ጥገኝነት ጥየቃ (asylum) ጉዳይ ሀገሪቱ ያላት ፖሊሲ አይቀየርም " - ሀንጋሪ

በመጪው ሰኔ የአውሮፓ ፓርላማ ምርጫ ይደረጋል ተብሎ እቅድ ተይዟል።

ከምርጫው ጋር ተያይዞ ስለ ግብረሰዶማውያን እና ስለስደተኞች እንዲሁም ስለሌሎች ጉዳዮች የሀንጋሪው ጠቅላይ ሚኒስትር ቪክቶር ኦርባን ከአንድ የሀገር ውስጥ ሬድዮ ጣቢያ ጋር ቃለምልልስ አድርገው ነበር።

በዚህም ወቅት ፤ ብዙ የአውሮፓ ፖለቲከኞች ይህንን ወቅት እንደምንም ብለው መትረፍ ይፈልጋሉ ብለዋል።

" ምርጫ በሌለበት ጊዜ ማስመሰል ትችላላችሁ " ያሉት ጠቅላይ ሚኒስትሩ ፤ " ምርጫ ሲደረግ ግን ከህዝቡ ጋር መነጋገር አለባችሁ። ነገር ግን ሰዎች ብራስልስ ውስጥ የሚጠቀሙትን የሌቦች ቋንቋ አይረዱም። የህዝብን ቋንቋ መናገር መጀመር አለብን " ሲሉ ተናግረዋል።

ንግግራቸውን ቀጠል አድርገው፤ " የአውሮፓ ኮሚሽን ፕሬዝዳንት ኡርሱላ ፎን ደር ሌየን ፤ የብራሰልስ አካላት በሃንጋሪውያን ላይ ያላቸውን ነገር ማለትም ስደተኞችን ወደ ሀገር ውስጥ እንደማናስገባ እና የግብረሰዶማውያን አክቲቪስቶችን ወደ ትምህርት ተቋማት እንዲገቡ እንደማንፈቅድ በመጨረሻ አምነዋል " ብለዋል።

ጠቅላይ ሚኒስትሩ ፤ " የግብረሰዶማውያን ፕሮፓጋንዲስቶችን ወደ ትምህርት ቤቶቻችን እንድናስገባ እንዲሁም ስደተኞችን ወደ ሀገራችን እንድናስገባ የሚያደርግ በዓለም ላይ ምንም አይነር ገንዘብ የለም " ሲሉ አስረግጠው ተናግረዋል።

ለገንዘብ ተብሎ በግብረሰዶማውያን እና በስደተኞች ጥገኝነት ጥየቃ (asylum) ጉዳይ ሀገሪቱ ያላት ፖሊሲ እንደማይቀየር የሀገሪቱ መንግሥት አሳውቋል።

የአውሮፓ ህብረት ከግብረሰዶማውያን እና ከስደተኞች መብት እንዲሁም #ከአካዳሚክ_ነፃነት ጋር በተያያዘ ብዙ ለሀንጋሪ ሊሰጥ የሚገባውን ብዙ ቢሊዮን ዩሮ (20 Billion EUR) ይዞባታል።

እ.ኤ.አ. ከ2010 ጀምሮ በስልጣን ላይ የሚገኙት ጠቅላይ ሚኒስትር ኦርባን ግብረሰዶማዊነትን እና የፆታ ለውጥን በትምህርት ቤቶች ውስጥ #ሊያስተዋውቁ ይችላሉ የሚባሉ ነገሮችን የሚከለክል ህግ በ2021 አጽድቀዋል።

ህጉ ከገንዘብ ቅጣት እስከ እስር ቤት መወርወር ያደርሳል።

ይህ ህግ የፀደቀው ህፃናትን ከ " ከግብረሰዶማውያን ፕሮፓጋንዳ " መጠበቅ በማስፈለጉ ሲሆን በዚህ ህግ ምክንያት ከአውሮፓ ህብረት ጋር አለመግባባት ውስጥ እንዲገቡ አድርጓቸዋል። የአውሮፓ ህብረቱም ከዚህና ከሌሎች ጉዳዮች ጋር በተያያዘ 20 ቢሊዮን ዩሮ ገንዘብ ይዞባታል።

#ቲክቫህኢትዮጵያ
@tikvahethiopia

#GeneneMekuria

አንጋፋው ጋዜጠኛ ገነነ መኩሪያ (ሊብሮ) ከዚህ ዓለም በሞት ተለይቷል።

አንጋፋው ጋዜጠኛ ገነነ መኩሪያ የሀገራችንን ስፖርታዊ ክንውኖችን በማቅረብ እንዲሁም ከስፖርታዊ ክንዋኔዎች በተጨማሪ በጠቅላላ እውቀቱና መረጃ አያያዙ በርካታ እውቀቶችን ያስጨበጠ ጋዜጠኛ ነበር።

በተለያዩ የፅሁፍ ስራዎች ፣ የራዲዮና ቴሌቭዥን ፕሮግራሞች ላይ ታሪኮችንና ወጎችን በማቅረብም በሚዲያው ላይ ከአርባ አመታት በላይ አገልግሏል።

ለአብነት በቀድሞ ዛሚ ኤፍ ኤም፣ በኤፍ ኤም አዲስ ፣ በብስራት ኤፍ ኤም ፣ በአሻም ቴሌቪዥን ላይ የተለያዩ የታሪክና የስፖርት ዝግጅቶችን ባማረና ቀልብን በሚስብ አቀራረብ ሰርቷል።

የሀገር ውስጥ ስፖርት ላይ ባለው አስተዋጽኦ ካፍ በ2009 ዓ.ም የ60 ዓመት ጎንደል ኦፍ ሜሪት ሽልማትም ሸልሞታል። ስድስት ጋዜጠኞች ብቻ ያገኙትን ሽልማት በመውሰድ ከምስራቅ አፍሪካ ብቸኛው ነው። 

መጋቢት 5/1957 ዓ.ም በይርጋለም የተወለደው ጋዜጠኛ ገነነ ፤ ስፖርትና ታሪክ አጣምሮ የሚወድ ፣ ለሚናገራቸውም ወይም ለሚያቀርባቸው የጽሁፍ ስራዎች በቂ ማስረጃ እና ሰነድ ይዞ የሚቀርብ በመሆኑ " ተንቀሳቃሹ ቤተ መፅሐፍት " የሚል ስያሜንም አግኝቷል።

ባደረበት ህመም ምክንያት በህክምና ሲረዳ ቢቆይም ዛሬ ህይወቱ አልፏል።

Via Ethio FM & Tikvah Sport

@tikvahethiopia    

#ትግራይ

ትግራይ ክልል ውስጥ በ5 መጠለያ ጣቢያዎች ከ900 በላይ ሰዎች ከምግብ እጦት እና ከመድሃኒት እጥረት ጋር በተያየዝ ሞተዋል ሲል የኢትዮጵያ ሕዝብ ዕንባ ጠባቂ ተቋም አሳውቋል።

የተቋሙ የመቐለ ቅርንጫፍ ፤ ረሃብ የሰው ህይወት መንጠቅ ከጀመረ ወራቶች መቆጠሩንም ገልጿል።
* በሽረ
* አክሱም
* በአብይአዲ
* በመቐለ
* ዓዲግራት ባሉ መጠለያ ጣቢያዎች የሰው ህይወት በረሃብ እና በመድሃኒት እጥረት እያለፈ መሆኑን የሚገልጸው ተቋሙ አንድ ዓመት ከሁለት ወር ምንም እርዳታ ያላገኘ ተፈናቃይ መኖሩንም አሳውቋል።

የዕንባ ጠባቂ ተቋም የመቐለ ቅርንጫፍ ፤ ከህዳር በፊት ማስጠንቀቂያ ሰጥተን ነበር ግን መንግሥት እርምጃ ባለመውሰዱ የከፋ ችግር ደርሷል ብሏል።

በሽረ የተፈናቃዮች ጣቢያ ፤ 309 አረጋዊያን እና 118 ህፃናት የሚገኙበት 849 ሰዎች ሞተዋል ይህ ሁሉ ሰው በአንድ IDP የሞተው በረሃብ እና በመድሃኒት እጦት ነው ሲል አሳውቋል።

በአክሱም 93 ሰዎች፣ በአብይአዲ 35 ሰዎች፣ በአይደር 4 ሰዎች፣ በሞሞና 2 ሰዎች ህይወታቸው ማለፉንም ተቋሙ አደረኩት ባለው ክትትል ማረጋገጡን ገልጿል።

በአጠቃላይ ክትትል በተደረገባቸው መጠለያዎች 980 ሰዎች ላይ ሞት ማጋጠሙን አክሏል።

ከመጠለያ ጣቢያ ውጭም ያሉ በርካታ ዜጎችም በድርቅ ምክንያት እየተሰቃዩና በተከሰተው የምግብ እጥረት ህይወት እየጠፋ ነው ብሏል።

ፅ/ቤቱ በረሃብ ምክንያት በሺዎች የሚቆጠሩ ተማሪዎች ትምህርት አቋርጠው እንዲሰደዱ ፣ ከ600 ሺህ በላይ የሚሆኑ ተማሪዎች ከትምህርት ገበታቸው ለመራው ጫፍ ላይ ደርሰዋል ሲል ይፋ አድርጓል።

" አሁንም በርካታ ትምህርት ቤቶች በተፈናቃዮች ተሞልተዋል እዛ ያሉ ተማሪዎችም ድንኳን ሰርተው ለመማር ተገደዋል " ብሏል።

ምንም እኳን የፌዴራል መንግሥት በትግራይ ረሃብ አልተከሰትም ቢልም የህዝብ ዕንባ ጠባቂ የመቐለ ቅርንጫፍ ረሃብ መከሰቱን አረጋጫለሁ ብሏል። በፌዴራልም ይሁን በክልል እየተሰጠ ያለው ትኩረትና ድጋፍም የሞተ በመሆኑ በቀጣይ አደጋው የከፋ ይሆናል ሲል አስጠንቅቋል። ህዝቡ ቀጣይ ክረምት አምርቶ እራሱን እስኪመግብ እርዳታ ማግኘት አለበትም ብሏል።

የኢትዮጵያ ህዝብ፣ባለሃብቶች፣ድጋፍ አድራጊ ተቋማት፣ አቅም ያላቸው ክልሎች ድጋፍ እንዲያደርጉ ጠይቋል።

የትግራይ ጊዜያዊ አስተዳደር በክልሉ በድርቅ ምክንያት ረሃብ አንዣቧል ፌዴራል መንግሥት እና ዓለም አቀፍ ተቋማት የህግና የሞራል ግዴታቸውን ይወጡ ማለቱ ይታወሳል።

የፌዴራል መንግሥት ኮሚኒኬሽን ጉዳዮች ደግሞ በትግራይ ረሃብ ስለመከሰቱ አለመከሰቱ በመዘኛ መስፈርቶች መዝኖ መናገር የሚችለው የፌዴራል መንግሥት ተቋም ነው "ረሃብ የሚባለው ሀሰት ነው" ማለቱ አይዘነጋም።

ከቀናት በፊት ደግሞ የአደጋ ስጋት ሥራ አመራር ኮሚሽን፤ 'ድርቁ ወደ ረሃብ እየተቀየረ ነው' የሚለው ሃሳብ የተሳሳተ ድምዳሜ መሆኑን በማስረዳት ሠብዓዊ ድጋፍን በራስ አቅም በመቻልና የልማት ስራዎችን በማስፋፋት፣ ትርፍ አምራች ለመሆን ይሰራል ብሏል።

በተጨማሪ ከሳምንታት በፊት ኮሚሽኑ በሰጠው ቃል በረሃብ ምክንያት የሰው ህይወት ስለመጥፋቱ ማረጋገጫ እንደሌለው አሳውቆ ነበር።

የድርቅ አደጋ ወደ ረሃብ ተቀይሮ የሰውን ህይወት የሚያጠፋበት ደረጃ ላይ እንዲደርስ የሀገሪቱ መዋቅራዊ አደረጃጀት የሚፈቅድ እንዳልሆነም ነው የገለፀው።

የሕዝብ ዕንባ ጠባቂ ተቋም ዋና ዕንባ ጠባቂ ዶ/ር እንዳለ ኃይሌ ከድርቅ ጋር ተያይዞ በክልልና በፌዴራል መንግሥት መካከል አለመግባባት እንዳለ ጠቁመው፤ በድርቅ ምክንያት ስለደረሰ ጉዳት ቁጥጥር እንዳካሄዱና በቅርብ እውነቱን ለህዝብ ይፋ እንደሚያደርጉ ተናግረዋል።

ቲክቫህ ኢትዮጵያ መረጃውን ከሸገር FM ነው የወሰደው።

@tikvahethiopia