#የመንግስት_ማስጠንቀቂያ

የፀጥታና ደኅነት የጋራ ግብረ–ኃይል ዛሬ ምሽት ባወጣው መግለጫ በኢትዮጵያ ኦርቶዶክስ ተዋህዶ ቤተክርስቲያን የተከሰተውን ወቅታዊ ሁኔታ መገምገሙን ገልጿል።

አለመግባባቱን ለመፍታት የሚደረገው ጥረት በሰላማዊ መንገድ ብቻ እንደሚፈጸም የጸና እምነት አለኝ ብሏል።

ከዚሁ ጋር በተያያዘ " በእምነቱ አባቶች በተመሳሳይ ቀንና ቦታ ሕገወጥ የሰልፍ ጥሪ በማድረግ የዜጎች ህይወት የሚቀጠፍበት አጋጣሚ እንዲፈጠር ቅስቀሳዎች እየተደረጉና ሌሎችም ግጭት ቀስቃሽተግባራት እየተፈፀሙ መሆኑን ማረጋገጥ ችያለሁ " ብሏል።

ግብረሃይሉ ሰልፎቹ በሃይማኖቱ ሽፋን የሚደረጉ እና ሕገወጥ ሰልፎች ናቸው ያለ ሲሆን " በሚመለከተው አካል የተፈቀደ ሰልፍ የሌለ መሆኑ ታውቆ ኅብረተስቡ ከዚህ ሕገ ወጥ ሰልፍና ግጭት ቀስቃሽ ተግባራት ራሱን ይጠብቅ " ብሏል።

የጋራ ግብረ-ኃይሉ " ከዚህ ውጭ ሰልፍ አደርጋለሁ ብሎ በሕገ ወጥ መንገድ የሚንቀሳቀስ ማንኛውም ኃይል እንዲሁም ሰልፎቹን ለማስተባበር እና ለመሳተፍ የሚሞክሩ አካላት ለሚደርሰው ማንኛውም ጉዳት ተጠያቂ ናቸው " ያለ ሲሆን " ለዜጎችና ለሀገር ሰላምና ደኅንነት መረጋገጥ ሲባል ሕጋዊእርምጃ ይወሰዳል " ሲል አስጠንቅቋል።

ግብረ ኃይሉ " በየክልሉ የምትገኙ የፀጥታ ኃይሎችም በአካባቢያችሁ ሕገወጥ ሰልፎች እንዳይካሄዱ አስፈላጊውን ክትትልና ቁጥጥር እንዲሁም ለቤተ ክርስቲያኗ፣ለእምነቱ አባቶች እና ተከታዮች በአጠቃላይ ለሕዝቡ ተገቢውን የደኅንነት ጥበቃ እንድታደርጉ " ሲል አዟል።

(ሙሉ መግለጫው ከላይ ተያይዟል)

@tikvahethiopia

#Update

በቱርክ እና ሶሪያ የሟቾች ቁጥር 11,600 በላይ ሆኗል።

አስከፊ በሆነው የመሬት መንቀጥቀጥ ቱርክ ከ9 ሺህ በላይ ዜጎቿ የሞቱባት ሲሆን ዛሬ ሩቡዕ የቱርክ ፕሬዜዳንት ሬሲፕ ጣይፕ ኤርዶጋን የመሬት መንቀጥቀጡ ከፍተኛ ጉዳት አድርሶባቸዋል የተባሉትን ስፍራዎች በአካል ሄደው ተመልክተዋል።

ኤርጎዳን እና መንግስታቸውን ለእንዲህ መሰል አስከፊ አደጋ ቅድመ ዝግጅት አላደረገም ፤ ከአደጋውም በኃላ የታየው ምላሽ ደካማ ነው በሚል በተቃዋሚ ኃይሎች እንዲሁም በሌሎች ትችት እየተሰነዘረባቸው ይገኛል።

አንዳንድ የተቃዋሚ አመራሮች ለዚህ ሁሉ ከፕሬዜዳንት ኤርዶጋን ውጭ ማንም ተጠያቂ አይደለም እስከማለት ደርሰዋል።

ነገር ግን ፕሬዜዳንቱ ይህንን ትችት የማይቀበሉት ሲሆን " ይህ ጊዜ የአንድነት እና የአብሮነት ጊዜ መሆን አለበት " ብለዋል።

በዚህ ጊዜ ለፖለቲካ ጥቅም ሲሉ አሉታዊ ዘመቻዎችን ለሚያደርጉ ሰዎች ቦታ እንደሌላቸው ተናግረዋል።

የመሬት መንቀጥቀጡ ከተከሰተ በኃላ በመንግስት በኩል የተሰጠው የአደጋ ጊዜ ምላሽ ከተቃዋሚ ኃይሎች ባለፈ በርካቶችን እንዳስቆጣ የተነገረ ሲሆን ኤርዶጋን ከአደጋው በኃላ የመጀመሪያ ቀን ምላሽ ወቅት ችግሮች /መዘግየት እንደነበሩ አምነዋል፤ ነገር ግን መዘግየቱ በተበላሹ መንገዶች እና የአውሮፕላን ማረፊያዎች ምክንያት የተፈጠረ መሆኑን አስረድተዋል።

ሁለተኛው ቀን እና ዛሬ ችግሮች ታርመው ሁሉም ነገር በቁጥጥር ስር መሆኑን ተናግረዋል።

ኤርዶጋን የሀገሪቱ ዜጎች የባለስልጣናትን መልዕክት እንዲያዳምጡ ከዛ በዘለለ ለራሳቸው ጥቅም ሲሉ አሉታዊ መልዕክት የሚያሰራጩትን ችላ እንዲሉ ጥሪ አቅርበዋል፤ የሀገሪቱ መንግስት መስራት ያለበትን ስራ እየሰራ ነው " ብለዋል።

@tikvahethiopia

" ለመውጫ ፈተና ራሳችሁን አዘጋጁ " - ትምህርት ሚኒስቴር

ትምህርት ሚኒስቴር ፤ የከፍተኛ ትምህርት ተማሪዎች ለዩኒቨርስቲ መውጫ ፈተና ራሳቸውን እንዲያዘጋጁ አሳሰበ።

የዩኒቨርስቲ መውጫ  ፈተና በመጪው ሀምሌ ወር በሁሉም የትምህርት መስኮች እና መርሀግብሮች በግልና በመንግስት ዩኒቨርስቲዎች ይሰጣል።

የትምህርት ሚኒስትር ዴኤታ ሳሙኤል ክፍሌ (ዶ/ር) በመውጫ ፈተና ዙሪያ ከተማሪዎች ህብረት ተወካዮች  ጋር ተወያይተዋል።

በውይይቱም የመውጫ ፈተና በመጪው ሀምሌ ወር በኦንላይን ለሁሉም የመንግስትና የግል ዩኒቨርስቲ ተማሪዎች እንደሚሰጥ ገልፀዋል።

ለሚሰጠው የመውጫ ፈተና ብቁ ለመሆንም ተማሪዎች በየዩኒቨርስቲዎቹ የሚሰጠውን የመጨረሻውን ሰሚስተር ፈተና መውሰድና ኮርሶችን ማጠናቀቅ እንደሚገባም ሚኒስትር ዴኤታው አስገንዝበዋል፡፡

ለፈተናው በሁሉም የትምህርት መስኮች ላይ የተመረጡ ኮርሶች የብቃት ልየታ ተደርጎላቸው ዩኒቨርስቲዎች እንዲያውቁት መደረጉን የጠቆሙት ዶክተር ሳሙኤል በአሁኑ ወቅትም የፈተና ንድፈ ማሳያና / Blueprint / የፈተና ዝግጅት ስራ በመከናወን ላይ መሆኑን አስታውቀዋል፡፡

በመሆኑም ተማሪዎች በቀሪዎቹ አምስት ወራት ተገቢውን ዝግጅት በማድረግ ራሳቸውን ለፈተናው ብቁ ማድረግ እንዳለባቸው አሳስበዋል፡፡

በመድረኩ የተገኙ የተማሪዎች ህብረት ተወካዮችም ወደ ዩኒቨርስቲዎቻቸው ሲመለሱ ተማሪዎች ለፈተናው በቂ ዝግጅት እንዲያደርጉ ማድረግ እንደሚጠበቅባቸው  ሚኒስትር ዴኤታው ተናግረዋል፡፡

በውይይቱም ከሁሉም ዩኒቨርስቲዎች የተውጣጡ የተማሪዎች ህብረት ፕሬዚዳንቶች ተገኝተዋል፡፡

ምንጭ፦ ትምህርት ሚኒስቴር

@tikvahethiopia

#ማስታወሻ

የዩኒቨርሲቲ መግቢያ ያመጡ ተማሪዎች የተቋም ምርጫቸውን የማስተካከያ ጊዜ ዛሬ የካቲት 2 ቀን 2015 ዓ.ም ያበቃል።                        

በ2014 የትምህርት ዘመን የ12ኛ ክፍል ብሔራዊ ፈተና ወስደው 50 ከመቶና ከዚያ በላይ ያመጡና በመንግስት ተቋማት ገብተው መማር የሚፈልጉ ተማሪዎች የተቋም ምርጫቸውን በየት/ ቤታቸው በተወከሉ መምህራን በኩል እንዲያስተካክሉ በትምህርት ሚኒስቴር በኩል የተቀመጠው የጊዜ ገደብ ዛሬ ያበቃል።

በምደባ ወቅት አዎንታዊ ድጋፍ የሚሹ ተማሪዎች ማመልከቻቸውና እና ደጋፊ ሰነዶቻቸውን በቀጣዩ ሊንክ ብቻ መላክ ይችላሉ 👇

https://student.ethernet.edu.et

More : @tikvahuniversity

#Update

በቱርክ እና ሶሪያ የሟቾች ቁጥር 16,000 አልፏል።

በቱርክና ሶሪያ በተከሰተው የመሬት መንቀጥቀጥ ሳቢያ ህይወታቸው ያለፈ ሰዎች ቁጥር ከ16,000 በላይ መድረሱ ተነግሯል።

ባለስልጣናት እና የህክምና ሰዎች እንዳሉት ከሆነ ከቱርክ በኩል 12,873 ሰዎች ሲሞቱ ከሶሪያ በኩል 3,162 ሰዎች ሞተዋል።

ሰዎችን ከህንፃዎች ፍርስራሾች ውስጥ የመፈለጉ ሂደት እና የነፍስ አድን ስራው አሁንም መቀጠሉ የታወቀ ሲሆን የሟቾች ቁጥር ከዚህም ሊጨምር እንደሚችል ተነግሯል።

ፎቶ፦ AFP

@tikvahethiopia

#Update

ከኢትዮጵያ ኦርቶዶክስ ተዋሕዶ ቤተክርስቲያን ጋር በተገናኘ የተከሰተው ክስተት ዛሬም በተለያዩ አካባቢዎች ውጥረት እንዲፈጠር አድርጎ መቀጠሉን ለማወቅ ተችሏል።

የቤተክርስቲያኗ መገናኛ ብዙሃን  ፤ " በኦሮምያ ክልል ባሉ የተለያዩ አካባቢዎች ላይ ዛሬም ኦርቶዶክሳውያንን የማሰር ተግባር እንደቀጠለ ነው " ብለዋል።

ለአብነት የምዕራብ ሸዋ ሀገረ ስብከት መቀመጫ በሆነችው አምቦ ከተማ የሀገረ ስብከቱ የሚዲያና የሕዝብ ግንኙነት ኃላፊ የሆኑት አባ ጴጥሮስ ከጠዋቱ 2:00 ሰዓት አካባቢ በሀገረ ስብከቱ ውስጥ ከሚገኘው ማረፊያቸው በጸጥታ ኃይሎች መወሰዳቸውን ገልጸዋል።

በአዲስ አበባም ትላንት ረቡዕ " በወቅታዊ ጉዳይ ወጣቶችን ታነሳሳላችሁ " ተብለው የቀጨኔ መድኃኔዓለም ቤተክርስቲያን የአካባቢ ወጣቶች የሆኑ ዘካርያስ ዓለማየሁ እና ጸጋ ደምሴ መታሰራቸውን ጠቅሰዋል።

በተጨማሪም ፤ ዛሬ በወለቴ እና በዓለም ገና አካባቢዎች የጸጥታ አካላት በሕዝቡ ላይ ከፍተኛ ማዋከብ እና ድብደባ እያሳደሩ መሆኑን የቤተክርስቲያኒቱ መገናኛ ብዙሃን ገልጸዋል።

በወለቴ ቅዱስ ዮሐንስ ቤተክርስቲያን በመሳሪያ የታገዘ ድብደባ እየተፈፀመ መሆኑን የገለፁት የቤተክርስቲያኒቱ መገናኛ ብዙሃን እስከ አሁን ሁለት ሰዎች በፀጥታ ኃይል እንደተመቱ አስረድተዋል።

እስካሁን ግን ከፀጥታና ደኅንነት የጋራ ግብረ ኃይል የታየ ምላሽ የለም ሲሉም ወቅሰዋል።

ከዚህ ባለፈ በደቡብ ምዕራብ ሸዋ ሀገረ ስብከት ወሊሶ ከተማ ምእመናን፣ ወጣቶች በፀጥታ ኃሎች እየታፈሱ መሆኑን የቤተክርስቲያኗ መገናኛ ብዙሃን አሳውቀዋል።

በዚሁ ቀጠና ውጥረት ሊፈጠር የቻለው ቅዱስ ሲኖዶስ አውግዞ የለያቸው አካላት ወደ ምዕራብ ሸዋ ሀገረ ስብከት " ወሊሶ ከተማ " ይመጣሉ መባሉን ተከትሎ መሆኑ ተነግሯል።

@tikvahethiopia

#Update

ከሰሞኑን ከጥቁር ልብስ ጋር በተገናኘ በአንዳንድ ተቋማት ጫናዎችን የማሳደር ሁኔታ ተፈጥሮ እንደነበር መግለፁ ይታወሳል።

በተለያዩ የማህበራዊ ሚዲያዎችም ሰራተኞች ጥቁር ለብሰው እንዳይገቡ ከልክለዋል የተባሉ መስሪያ ቤቶች ትችት ተሰንዝሮባቸዋል።

በማህበራዊ ሚዲያ ስማቸው ከተነሳው ውስጥ አንዱ " አዋሽ ባንክ " ከጉዳዩ ጋር በተያየዘ ከፍተኛ የስም ማጥፋት ዘመቻ ተከፍቶብኛል ብሏል።

" ሠራተኞቼ ጥቁር እንዳይለብሱ አልከለከልኩም " ሲል ባንኩ ለቲክቫህ ኢትዮጵያ በፎቶ አስደግፎ መልዕክት ልኳል።

ባንኩ " በተለያዩ ማህበራዊ መገናኛ ብዙሃን ላይ የስም ማጥፋት ዘመቻ ተከፍቶብኛል " ያለ ሲሆን ማንኛውንም ቀለም የሆኑ ነገር ግን #የባንክ_ሠራተኛ_ፕሮቶኮል የጠበቁ አለባበሶችን ሠራተኞቼ ለብሰው እየሰሩ ነው ሲል ገልጿል።

@tikvahethiopia