#ነዳጅ

የነዳጅ ድጎማን የተመለከተ ዝርዝር መረጃ !

የትራንስፖርት እና ሎጅስቲክስ ሚኒስቴር ፤ ከመጪው #ሃምሌ 2014 ዓ/ም ጀምሮ የነዳጅ ድጎማ እየተደረጉ የሚቀጥሉ ተሽከርካሪዎችን ዝርዝር መረጀ ክልሎች ለይተው እንዲልኩ አዟል።

መረጃው ተሰብስቦ ወደ ማዕከላዊ ቋት የሚገባ ሲሆን ለሁሉም ነዳጅ ማደያዎች የተደጓሚ ተሽከርካሪዎች ዝርዝር ይሰጣቸዋል ተብሏል።

የማይታይም እና ሎጅስቲክስ ማስተባበሪያ ዳይሬክተር አቶ ሰይፉ እልፉ ለሸገር ኤፍ ኤም 102.1 በሰጡት ቃል ፤

" ምን ያህል ተሽከርካሪዎች በኢትዮጵያ ውስጥ አሉ ? የሚለውን ነገር አዋጁን መሰረት በማድረግ ዝርዝር መረጃዎችን አደራጅተን ለክልሎች በሙሉ ስልጠና ሰጥተን መረጃዎች ከክልል እየተሰበሰቡ ነው።

ትክክለኛ የሆነ መረጃ ፣ መደጎም ያለባቸው መኪኖች እነዚህ ናቸው ብለው ክልሎች ለይተው ያሳውቃሉ፤ እኛ ወደ ዳታ እናስገበ እና መደጎም ያለባቸው መኪኖች ተለይተው ይታወቃሉ።

ዝርዝር መረጃ ውስጥ በምንገባበት ወቅት የጠራ የመረጃ የለም የጠራ መረጃ እንዲኖር ነው እየተሰራ ያለው።

ይህን በአጭር ጊዜ ልንጨርስ ክልሎች ኃላፊነት ወስደው እየሰሩ ያሉ አሉ አንዳንዶቹ ክልሎች በከፊል መረጀዎችን ጨርሰዋል " ብለዋል።

ለተመረጡ የትራንስፖርት ሰጪዎች ብቻ የሚደረገው የነዳጅ ድጎማ በምን አይነት መልኩ ነው አሰራሩ ላይ ቁጥጥር የሚደረገው ለሚለውም አቶ ሰይፉ ተከታዩን ማብራሪያ ሰጥተዋል ፦

" ድጎማው ከማንዋል ወጥተን በቴክኖሎጂ የተደገፈ ነው የሚሆነው።

GPS ይገጠማል Speed Limit ጋር የተጣመረ ነው የሚገጠመው ፤ በሌላ በኩል የሚገጠመው GPS ፤ የነዳጅ ሴንሰር አለው ፤ በኪሎ ሜትር ምን ያህል ሄደ ? ስንት ኪሎ ሜትር ላይ ምን ያህል ተጠቀመ የሚለው በሙሉ ይታወቃል።

ይሄን በምናደርግበት ሰዓት የሚደጎሙ መኪኖች በሙሉ ልዩ መታወቂያ ይሰጣቸዋል፤ ታግ ይለጠፋል።

ማደያዎች ያውቃሉ ዝርዝራቸው እነሱ ጋር ስለሚሰጠ፤ ኢትዮጵያ ውስጥ ያለ ማደያ በሙሉ ይሰጣቸዋል፤ እነሱ ያን ታግ አሳይተው ነው የሚቀዱት።

አሮጌና አዲስ መኪኖች አሉ ። እነዚህ በሙሉ ይለያሉ ደረጃ 1፣ 2፣ 3 የሚባለው የነዳጅ አጠቃቀምና የኪ/ሜትር ሽፋናቸው ይታወቃል። ስለዚህ በዛ መሰረት እያንዳንዱ ተለይቶ ነው የሚሰጠው።

ለምሳሌ ፦ አዲስ አበባ ላይ ከፒያሳ - መገናኛ የሚሄድ ታክሲ ኪ/ሜትሩ ይታወቃል ፤ ስንት ጊዜ ተመላለሰ የሚለው ይታወቃል ይህን ሂሳብ ተሰርቶ በቀን ስንት ኪ/ሜትር ሸፈነ ፤ በአንድ ሊትር ስንት ኪ/ሜ ይሄዳል የሚለው ስለሚታወቅ በሱ መጠን ነው ነዳጅ የሚቀዳው።

ከዚህ ውጭ ነዳጅን ባልተሰጠው ነገር ሄጄ እቀዳለሁ ካለ ገበያው ባስቀመጠው ዋጋ ነው የሚቀዳው እንጂ በታሪፉ አይካተትም።

አሁን GPS ገጣሚዎችን በሙሉ ስልጠና ሰጥተናል። እራሳቸውን እንዲያዘጋጁ አድርገናል መንግስት በራሱ በኩል አስፈላጊ ቅድመ ዝግጅት አድርጓል " ብለዋል።

👉 ታክሲዎች
👉 ሃይገሮች
👉 ባጃጆች
👉 የሃገር አቋራጭ አውቶብሶች የነዳጅ ድጎማው የማይነሳባቸው ሲሆን ነገር ግን ለመደጎም በማህበር መደራጀት ግዴታቸው ነው ተብሏል።

ባለንብረቶች በማህበር ካልተደራጁ በግለሰብ ደረጃ ማንም ሊደጎም እንደማይችል አቅጣጫ ተቀምጧል።

በሌላ በኩል ፤ ከፌዴራል እስከ ክልል ባለው መዋቅር ለመንግስት ስራ የሚያስፈልጉ መኪኖች ድገማው የማይመለከታቸው ሲሆን በወቅታዊ የገበያ ዋጋ እየገዙ ይጠቀማሉ ተብሏል።

አቶ ሰይፉ ፤ " መንግስት አይደጎምም ፤ መንግስት ከድጎማው ይወጣል ፤ አይደጎምም በነፃው ገበያ ነው መቅዳት ያለበት። ምክንያቱም መደጎም ያለበት ድሃው የህብረተሰብ ክፍል ነው። " ሲሉ ለሬድዮ ጣቢያው ተናግረዋል።

Credit : ሸገር ኤፍ ኤም 102.1

@tikvahethiopia

የሲዳማ ክልል ወጣቶች ጥያቄ  💬

(የድምፅ ባለቤት ዶቼ ቨለ ሬድዮ ሲሆን - ለቲክቫህ ቤተሰብ አባላት በሚሆን መልኩ በፅሁፍ የተዘጋጀ)

በሀዋሳ ከተማ ፤ የብልፅግና ፓርቲ ከሲዳማ ወጣቶች ጋር ለመምከር የውይይት መድረክ አዘጋጅቶ ነበር።

በዚህ መድረክ የተሳተፉ አብዛኞቹ የከፍተኛ ትምህርት ተቋማት ተመራቂዎች ሲሆኑ ለበርካታ አመታት ያለ ስራ መቀመጣቸውን በመግለፅ ጠንካራ ጥያቄዎችን አንስተዋል።

ከውይይቱ ተሳታፊዎች መካከል ፦

" አሁን ወጣቱን አደራጅተን እንደዚህ እያደረግን ነው ብላችሁ እያወራችሁ ነው። የትኛውን ነው ?

ለምሳሌ ፦ ኮንቴነር በየክፍለ ከተማው ፈትሹ ያለውን ነገር ታያላችሁ ፤ አመራሩ እጅ ነው ያለው ኮንቴነር። አደራጅ እና አስተባባሪ ተብሎ የተቀመጡ ሰዎች እነሱ እጅ ነው ያለው ኮንቴነር ለወጣቱ ይሰጥ ተብሎ የተሰራው ፤ የምን ብልፅግና ነው እናተ ምትመሩት ?

ይህንን ወጣት ፤ በቀን 3 ጊዜ መብላት ያልቻለን ህዝብ እየመራችሁ እንዴት ነው ? እናተ በV8 እና በተለያየ ላንድክሩዘር መኪኖች እየዘነጣችሁ የምትሄዱት ? በምን አግባብ ነው ? "

ከውይይቱ ተሳታፊዎች መካከል ፦

" ... ብልፅግና ፓርቲ መነፅር ብቻ ነው የቀየራችሁት ። ሙሉ ኢህአዴግ የነበሩ ናቸው። እነዚህ ሰዎች ደግሞ ለውጡን ለመቀበል ዝግጁ አይደሉም። በሌብነት ፣ በዘረኝነት የተጠመዱ ሰዎች ናቸው።

ብልፅግና ፓርቲ ቢያንስ ወጣቱን የሚሰማ ከሆነ እኛ በትዕግሥት መንግስቱ አልተረጋጋም ፣ ጫና አለበት የውስጥም የውጭም ብለን በትዕግስት ጠብቀናል ሶስት ዓመት ሙሉ አሁን 4ኛ ዓመት ልንይዝ ነው ሁሌ በዚህ ይቀጥላል ? የኛም ዝምታ በዚህ ይቀጥላል ? እሱን ጊዜ የሚፈታው ነገር ነው። "

ከዚህ በተጨማሪ የውይይት ተሳታፊዎች ጥያቄያቸውን በሰላማዊ ሰልፍ ለመጠየቅ ቢጥሩም እንዳልቻሉ ፤ በክልላቸው ዴሞክራሲና ነፃነት የለም ሲሉ ምሬታቸውን ገልፀዋል።

እንዲሁም በክልሉ ፦

👉 ሰብአዊ መብቶች ይጥሳሉ፣
👉 የመልካም አስተዳደር ጉድለት አለ፤
👉 ሙስና ተንሰራፍቷል ፤
👉 ባለስልጣናት ለወጣቶች መገልገያ የተገነቡ ተቋማትን ለዘመዶቻቸዉና ለቤተሰቦቻቸዉ ሰጥተዋል፣
👉 ባለስልጣናት ዉሳኔዎችን የሚያሳልፉት ለእነሱና ለወዳጅ ዘመዶቻቸዉ በሚጠቅም መልኩ ነዉ ብለዋል።

በወጣቶች ለተነሱት ጥያቄዎች በመድረኩ ከተገኙት አንዱ የሲዳማ ብልፅና ፓርቲ ፅ/ቤት የአደረጃጀት ዘርፍ ኃላፊ አቶ ዘማች እርጥባ ተከታዩን ብለዋል ፦

" ቁጥር ብዙ ለሆነ ወጣት ስራ እድል ያልተፈጠረለት ሁኔታ አለ። እየተፈጠረም ያለው እራሱ የባለሃብት ቤተሰብ ፣ የአመራር ቤተሰብ የሚለው ትክክል ነው።

ምን እያደረጋችሁ ነው ያላችሁት ? ቢሚል ለነሳችሁት መጀመሪያ የሚሆነው ይህን ሲፈፅም የነበረው ሊመራ ኃላፊነት የተሰጠው አመራር በአግባቡ ያልመራውን እርምጃ ወስደናል አሁን።

በዚህ ዓመት አሁን እስካለንበት ከ80 በላይ በሆኑት ላይ እርምጃ ተወስዷል። ይሄ ብቻም አላቆመም ቀጥሎም በኃላፊዎች ላይ እርምጃ እየተወሰደ በከተማ ፓርቲ ደረጃ ፤ በመንግስት ደረጃ የሚኬድበት ሁኔታ ይቀጥላል "

የብልፅግና ወጣቶች ሊግ አመራር አንዱ ታረቀኝ ለገሰ ፦

" የምታነሷቸው ጥያቄዎች በሰፊው አሉ። ስራ አጥነት አለ። የ3 ዓመት ብቻ አይደለም ፤ የ7 ዓመት ስራ ያልተቀጠረ ወጣት ፤ ስራ ያላገኘ ወጣት ያለው እኛ ጋር በዝርዝር አለ። እያንዳንዱን ጥያቄ በዝርዝር ይዘናል ፤ እንደተባለው ቀጥታ ይሄ ለፌዴራል ብልፅግና ፓርቲ ግብአት ሆኖ የሚሄድ ነው። "

@tikvahethiopia @tikvahethiopiaBOT