የካራማራ ድል !

የካቲት 26 ቀን 1970 ዓ/ም የሱማሊያን ዚያድባሬ ጦር ለመመከት በካራማራ ጀግኖች የኢትዮጵያ የቁርጥ ቀን ልጆች የህይወት መሰዋዕትነት ከፍለው ወራሪውን ጦር ከሀገር ያባረሩበትና የሀገራቸውን ሰንደቅ ያውለበለቡበት ቀን ነው።

ዘንድሮ ይህ ድል 44ኛ አመት ሞልቶታል ቀኑም እየታሰበ ነው።

ከጦርነቱ በፊት ለረጅም ጊዜ የሶማሊያ ጦር በሶቪዬት ኅብረት ይደገፍ ነበር። የኢትዮጵያ መንግሥት ደግሞ ከአሜሪካ ጋር ወዳጅነት ነበረው። በወቅቱ አሜሪካ እና የሶቪየት ህብረት በቀዝቃዛ ጦርነት ውስጥ ነበሩ።

በቅድሚያ በሶቪየት ህብረት ከፍተኛ ድጋፍ የመጣው የዚአድባሪ ጦር የእናት ሀገር ጥሪ እያለ በተሰበሰበው የኢትዮጵያ ጦረኛ ካራማራ ላይ ድባቅ ተመትቶ ወደ መጣበት ተመልሶል፡፡

በጦርነቱ መጀመሪያ ሶማሊያን ስትደግፍ የነበረችው ሶቪየት ህብረት ወደ ኢትዮጵያ አዘንብላ ለኢትዮጵያ ከፍተኛ እገዛ አድርጋለች ፤ አሜሪካ ደግሞ ወደ ሶማሊያ ፊቷን አዙራለች።

በጦርነቱ ኩባ፣ ሰሜን ኮሪያ፣ የመንና ምሥራቅ ጀርመንን ጨምሮ ሌሎች አገራት አጋርነታቸውን ለኢትዮጵያ አሳይተዋል።

ከ16 ሺ በላይ የኩባ ወታደሮች በውጊያው እንደተሳተፉ መዛግብት ያሳያሉ። ደቡብ የመንም ጦሯን ለኢትዮጵያ አሰልፋ ነበር።

በተለያየ የፖለቲካ የትግል ሁኔታ፣ በተለያየ ቅራኔ ውስጥ የነበሩ የኢትዮጵያ ሀይሎች ሁሉ ስለ ሀገር አንድ ሆነው የዚያድባሬን ጦር የመከቱበት የካራማራ ጦርነት የኢትዮጵያ አንድነት ዳግም በጉልህ የታየበት ስለመሆኑ ይነገርለታል፡፡

በየአመቱ የካቲት 26 ቀን የሚታሰበው የ " ካራማራ ድል " ዘንድሮም ለ44ኛ ጊዜ እየታሰበ ይገኛል፡፡

https://telegra.ph/Ethiopia-03-05

@tikvahethiopia

#EthiopianAirlines

የኢትዮጵያ አየር መንገድ ' ቦይንግ 777-8 Freighter ' የተሰኘውን አዲስ የጭነት ማጓጓዣ አውሮፕላን ምርት ለመግዛት የሚያስችለውን የመግባቢያ ስምምነት ከቦይንግ አውሮፕላን አምራች ካምፓኒ ጋር መፈራረሙን አሳውቋል።

ስምምነቱ አየር መንገዱ በዓለም አቀፍ ደረጃ እያደገ ከመጣው የካርጎ ጭነት አገልግሎት ፍላጎት ይበልጥ ተጠቃሚ የሚያደርገው ሲሆን እያስመዘገበ የሚገኘውንም ዕድገት ቀጣይነት የሚያረጋግጥ መሆኑ ተገልጿል።

የኢትዮጵያ አየር መንገድ ግሩፕ ዋና ስራ አስፈፃሚ አቶ ተወልደ ገብረማርያም ስምምነቱን አስመልክተው “በአፍሪካ አቪየሽን መስክ ቀዳሚ አየር መንገድ እንደመሆናችን መጠን ይህንን አዲስ ፣ ዘመናዊና ነዳጅ ቆጣቢ የጭነት አውሮፕላን ከቦይንግ ካምፓኒ ለመግዛት የመግባቢያ ስምምነት በመፈራረማችን ደስታ ይሰማናል” ብለዋል።

አቶ ተወልደ ፥ “ይህ አዲሱ ቦይንግ777-8F የጭነት አውሮፕላን እያደገ የመጣውን የአየር መንገዱን የካርጎ ጭነት አገልግሎት በማስፋፋት አሁን ያሉትን 66 ዓለም አቀፍ መዳረሻዎች ለማሳደግ በእጅጉ ይረዳዋል” ሲሉም አክለዋል።

ምንጭ፦ የኢትዮጵያ አየር መንገድ

@tikvahethiopia

አቶ እስክንድር ነጋ በፖሊስ ተይዘው ተወሰዱ።

የባልደራስ ለእውነተኛ ዴሞክራሲ ፓርቲ ፕሬዘዳንቱን አቶ እስክንድር ነጋን ጨምሮ አባላት እና ደጋፊዎቹን፤ ፓሊስ በ3 መኪና ጭኖ እንደወሰዳቸው ገለፀ።

ፓርቲው " ክስተቱ የተፈጠረው በሰላማዊ መንገድ የካራማራን የድል በአል ለማክበር በሄዱ ሰላማዊ ሰዎች ላይ ነው " ብሏል።

ከዚህ ክስተት ቀደም ብሎ ፕሬዚደንቱ አቶ እስክንድርን ጨምሮ የባልደራስ አመራሮች የካራማራ የድል በዓልን እንዳያከብሩ ተከልክለው እንደነበረ ፓርቲው ገልጿል።

አቶ እስክንድር ነጋን ጨምሮ አባላትና ደጋፊዎቹ በአሁን ሰአት በልደታ ክ/ከተማ ፖሊስ መምሪያ እንደሚገኙም ፓርቲው አሳውቋል።

ክስተቱን በተመለከተ በፖሊስ የሚሰጥ ማብራሪያ ካለ ተከታትለን የምናሳውቅ ይሆናል።

@tikvahethiopia

#Update

" ፕሬዜዳንቱ እስክንድር ነጋ ብቻ ሲለቀቁ ሌሎቹ በሙሉ ለእስር ተዳርገዋል " - ባልደራስ ፓርቲ

ባልደራስ ለእውነተኛ ዴሞክራሲ ፓርቲ (ባልደራስ) ከ25 በላይ አባላቱ እንደታሰሩ አስታወቀ።

ይህን ያሳወቀው ከደቂቃዎች በፊት ባወጣው አስቸኳይ መግለጫ ነው።

ዛሬ የካቲት 26 የሚከበረውን የ " ካራማራ የድል " በዓል ለማክበር በ " ድላችን ሀውልት " የተገኘው የባልደራስ ቡድን ወደ አደባባዩ እንዳይገባ ከተደረገ በኋላ፣ የቡድኑ አባላት በሙሉ ወደ ልደታ ክፍለ ከተማ ፖሊስ ጣቢያ ተወስደዋል ሲል አመልክቷል።

ባልደራስ ፓርቲ ፤ ፕሬዘደንቱ እስክንድር ነጋ ብቻ ሲለቀቁ ሌሎቹ በሙሉ ለእስር ተዳርገዋል ሲል አሳውቋል።

አባላቱ ምንም አይነት የህግ ጥሰት ሳይፈጽሙ፣ ከህግ ውጭ መታሰራቸውን የገለፀው ባልደራስ አጠቃላይ ታሰሩብኝ ያላቸውን አባላት ስም ዝርዝር ይፋ አድርጓል።

ከእነዚህ መካከል የፓርቲው ከፍተኛ አመራሮች ስንታየሁ ቸኮል ፣ አስቴር ስዩም ፣ አስካል ደምሌ ይገኙበታል።

(ሙሉ የስም ዝርዝር ከላይ ተያይዟል)

@tikvahethiopia

#Update

የባልደራስ ለእውነተኛ ዴሞክራሲ ፓርቲ (ባልደራስ) ከተያዙበት አመራሮች እና አባላት መካከል ከፓርቲው ፕሬዜዳንት አቶ እስክንድር ነጋ በተጨማሪ ፣ አቶ ስንታሁ ቸኮል፣ ወ/ሮ ቀለብ ስዩም እና ወ/ሪይ አስካል ደምሌ ከእስር የተለቀቁ መሆኑን አሳውቋል።

ፓርቲው በአሁን ሰዓት 33 አባለቱ በእስር ላይ እንዳሉ ገልጿል።

ቢኒያም ታደሰ እና ሳሙኤል ዲሚትሪ የሚባሉ አባላቱ ሰግሞ ከሌሎቹ እስረኞች ተነጥለው ጊዮርጊስ የሚገኘው አዲስ አበባ ፖሊስ መወሰዳቸውን አመልክቷል።

በሌላ በኩል በፖሊስ ቁጥጥር ስር ያሉት እስረኞች እህልና ውሃ እንዳይገባላቸው ተከልክለዋል ሲል ገልጿል። ፖሊስ ይህን ለምን እንደሚያደርግ ሲጠየቅም " ከላይ በመጣ ትዕዛዛ ነው " የሚል ምላሽ እንደሰጠው ባልደራስ ለእውነተኛ ዴሞክራሲ ፓርቲ ባወጣው አስቸኳይ መግለጫ ጠቅሷል።

(ባልደራስ በአሁን ሰዓት በእስር ላይ ይገኛሉ ያላቸው አባላቱ ከላይ የተዘረዘሩት ናቸው)

@tikvahethiopia

#BAANKII_GADAA

የኢትዮጵያ ብሔራዊ ባንክ ለ " ገዳ ባንክ " በመስራች ባለአክሲዮኖች ጠቅላላ ጉባኤ የተመረጡትን 11 የቦርድ አባላት ሹመት አጽድቋል።

በዚህም፦
1. ዶ/ር ብርሃኑ አሰፋ
2. አቶ ዋስይሁን አመኑ
3. አቶ ሐምዲኖ ሜዴሶ
4. አቶ ሀይሉ ኢፋ (የኦሮሚያ ክልል የልማት ድርጅት ተቆጣጣሪ ባለሥልጣንን በመወከል)
5. ኢ/ር አብዶ ገለቶ
6. ዶ/ር ሀሰን ሁሴን
7. አቶ ሙለታ ደበል
8. አቶ ሽፈራው ሩፌ
9. ወ/ሮ ሰሚራ አብደላ
10. አቶ አላዛር አዱላ
11. ዶ/ር ደገፋ ዱሬሳ የቦርድ አባላትነታቸው ጸድቋል።

ብሔራዊ ባንክ የቦርድ አባላቱ ሥራ መጀመር የሚችሉ መሆኑን ያስታወቀ ሲሆን በተቻለ ፍጥነት በባንክ የሥራ አመራር፤ በኮርፖሬት አስተዳደር፤ በውስጥ ቁጥጥር፤ በስጋት አስተዳደር፤ በባንክ ህግ ማዕቀፍ ላይ ተገቢውን ስልጠና እንዲወስዱ አሳስቧል።

More : @tikvahethmagazine

የጋራ ግብረ ኃይሉ ማሳሰቢያ ሰጠ።

የኢ.ፌ.ዲ.ሪ የፀጥታ እና ደህንነት የጋራ ግብረ ኃይል አንዳንድ የፖለቲካ ፓርቲዎች፣ ቡድኖችና ግለሰቦች ሰሞኑን በሀገሪቱ በታላቅ ድምቀት በተከበሩ የአድዋ ድል በዓልን እና በዛሬው ዕለት ተከብሮ በዋለው የካራማራ ድል በዓል ላይ በመገኘት በሀገራችን ብሄር ብሄረሰቦችና በህዝብ መካከል ግጭት ለመቀስቀስ ሞክረዋል አለ።

ይህን ያለው ዛሬ ማምሻውን ባወጣው መግለጫ ነው።

ግብረኃይሉ ፥ " ደከመን ሰለቸን ሳይሉ የህዝቡን ሰላምና ደህንነት ሌት ተቀን የሚጠብቁ የፀጥታ አካላትን ክብር አስፀያፊ ስድቦችን በመሳደብ ደፍረዋል " ብሏል።

ከፀጥታ ኃይሎች ጋር አላስፈላጊ ግጭት ውስጥ ለመግባት ያልፈነቀሉት ድንጋይ አልነበረም ሲል ገልጿል።

ነገር ግን የፀጥታ ኃይሎች ሁሉንም ትንኮሳዎች በትግስት በማለፍ በዓላቱ በሰላምና በድምቀት እንዲከበሩ ማድረጋቸውን ገልጿል።

ግብረ ኃይሉ ውስን የፖለቲካ ፓርቲዎች፣ ቡድኖች እና ግለሰቦች የሚፈልጉትን በግልፅ ህግና ስርዓት ተከትለው ማድረግና ሐሳባቸውን በነፃና በዴሞክራሲያዊ መንገድ በተፈቀደላቸው ስፍራ ማራመድና መፈፀም ሲችሉ ብሄርን ከብሄር፣ ሀይማኖትን ከሀይማኖት ጋር ለማጋጨት ስራዬ ብለው ሌት ተቀን በህቡዕ እና በግልጽ ጭምር እየተንቀሳቀሱ መሆናቸውን ደርሼበታለሁ ብሏል።

እነዚህ ውስን የፖለቲካ ፓርቲዎች፣ ቡድኖችና ግለሰቦች ከዚህ ድርጊታቸው እንዲቆጠቡ ሲል ግብረ-ኃይሉ አሳስቧል።

ማንም ከህግ በላይ ስላልሆነ ህግ ጥሰን ድርጊታችንን እንቀጥላለን የሚሉ ከሆነ ህጋዊ እርምጃ እንደሚወሰድ እንዲሁም በህግ ተጠያቂ እንደሚያደርጋቸው የጋራ ግብረኃይሉ አስጠንቅቋል።

የጋራ ግብረ ኃይሉ በመግለጫው ላይ ውስን የፖለቲካ ፓርቲዎች፣ ቡድኖችና ግለሰቦች ያላቸውን በስም አልገለፀም።

@tikvahethiopia