#WFP

የዓለም የምግብ ፕሮግራም ከመደበኛ እርዳታ ውጪ ለ62,900 አባዋራዎች የምግብ እርዳታ አቀርባለሁ ብሏል።

ከቀናት በፊት የሶማሊ ክልል ፕሬዜዳንት አቶ ሙስጠፋ ሙሁመድ ከዓለም ምግብ ፕሮግራም ኃላፊዎች ጋር ውይይት አድርገው ነበር።

ውይይቱ በሶማሊ ክልል ውስጥ በአንድ አንድ ቦታዎች የተከሰተዉን ድርቅ ለመቋቋም ያለመ ነው።

በዉይይቱ ላይ አቶ ሙስጠፋ ፥ በተለይ ዳዋ ዞን ከፍተኛ የድርቅ አደጋ የተከሰተባቸዉ ቦታዎች አንዱ መሆኑን በመግለፅ በአሁኑ ወቅት የዓለም ምግብ ፕሮግራሙ ከሚሰጠው መደበኛ እርዳታ ዉጪ አስቸኳይ እርዳታ ለማቅረብ ዝግጁ መሆናቸዉ የሚመሰገን ስራ ነዉ ብለዋል።

በኢትዮጵያ የዓለም የምግብ ፕሮግራም ኃላፊ ዶ/ር ስቲቨን ዌር ኦማሞ ከክልሉ መንግሥት ጋር በድርቁ ሁኔታ ዙሪያ ለመስራት ዝግጁ መሆናቸውን ገልፀው የሶማሊ ክልል መንግስት ድርቁን ለመቋቋም ላደረገው ቁርጠኝነትና 200 ሚሊዮን ብር በመመደብ የሰራዉን ስራ ምስጋና በማቅረብ ድርሻቸዉን ለመወጣት ቁርጠኛ መሆናቸውን አሳውቀዋል።

ኃላፊው በዳዋ ዞን ውስጥ ለሚገኙ የድርቁ ተጎጂዎች ለሆኑ 62,900 አባዋራዎች በአስቸኳይ የምግብ እርዳታ እንደሚያደርሱ ተናግረዋል።

#SomaliRegionCommunication

@tikvahethiopia

#ALERT🚨

የዓለም ምግብ ፕሮግራም አሁኑኑ ተጨማሪ የገንዘብ ድጋፍ የማያገኝ ከሆነ በኢትዮጵያ ሶማሊ ክልል በተከሰተው ከባድ ድርቅ ምክንያት በሚቀጥሉት 3 ወራት ውስጥ እስከ 3.3 ሚሊዮን ሰዎች ለከፍተኛ ረሃብ ይጋለጣሉ ብሏል።

ከቀናት በፊት የዓለም ምግብ ፕሮግራም ኃላፊዎች ከሶማሊ ክልል ፕሬዜዳንት አቶ ሙስጠፋ ሙሁመድ ጋር ውይይት ካደረጉ በኃላ ያወጡት የጋራ መግለጫ ከላይ ተያይዟል።

@tikvahethiopia

#NDAA

በኢትዮጵያውያን፣ ትውልደ ኢትዮጵያውያን እንዲሁም በኢትዮጵያ ወዳጆች የተጀመረው ዘመቻ በሁሉም የዓለም አካባቢዎች ተጠናክሮ መቀጠሉን የመንግስት ኮሚኒኬሽን አገልግሎት ዛሬ በሰጠው መግለጫ አሳውቋል።

መግለጫውን የሰጡት ሚኒስትር ዴኤታ ከበደ ዴሲሳ ሲሆኑ በዚህ ሳምንት በዲፕሎማሲው መስክ ከፍተኛ ውጤቶች የተገኘበት ነው ሲሉ ተናግረዋል።

ሚኒስትር ዴኤታው ፥ " ... በተለያዩ አካላት አንድ የተቀነባበረ ሰነድ ለአሜሪካ ኮንግረስ እንዲቀርብ ተደርጎ ነበር ፤ ክሱ በትግራይ ክልል ውስጥ በኢትዮጵያ መንግስት ዘርን የመጨረስ /የማጥፋት/ ተግባር ተፈፅሟል የሚል ነበር። ክሱ ከመነሻው መሰረተ ቢስ ነበር። ምክንያቱም የተመድ ከፍተኛ ሰብዓዊ መብት ኮሚሽን ፅ/ቤት እና የአትዮጵያ ሰብዓዊ መብቶች ኮሚሽን ባደረጉት ምርመራና ባገኙት ውጤት የሰብዓዊ መብት ጥሰቶች ቢኖሩም አንዳችም ዘርን የመጨረስ /Genocide/ ድርጊት እንዳልተፈፀመ አረጋግጠዋል " ብለዋል።

" ይህንን ወደጎን በመተው የተለያዩ ግለሰቦችና አካላት ተባብረው የኢትዮጵያ መንግስት የዘር ጭፍጨፋ አድርጓል ፣ የዘር መጨረስ ተግባር ፈፅሟል በማለት ያቀረቡትን ክስ ኢትዮጵያውያን እና የኢትዮጵያ ወዳጆች በመተባበር የኮንግረስ ሰዎች በመቅረብ ፣ ሌሎችንም አካላት በማግኘትና ጫና በማሳደር እውነታውን በማስረዳት ውድቅ እንዲሆን አድርገዋል " ሲሉ ተናግረዋል።

" የታሰበው National Defense Authorization Act ሆኖ እንዲፀድቅ በሰነዱ ምክንያትም የወታደራዊ ጣልቃ ገብነት የህግ መሰረት እንዲያገኝ ታስቦ የተደረገ ነበር፤ ነገር ግን ውድቅ ተደርጓል ፤ ለኢትዮጵያውያን፣ ለትውልደ ኢትዮጵያውያንና የኢትዮጵያ ወዳጅ ሀገራት ዜጎች ላደረጉት አስተዋፆ ምስጋና እናቀርባለን " ብለዋል ሚኒስትር ዴኤታው።

@tikvahethiopia

#Update

የኢትዮጵያ ጠቅላይ ሚኒስትር ለተወሰኑ ጊዜያት ወደ ቢሮ መመለሳቸውን አሳወቁ።

ጠ/ሚኒስትር ዶክተር ዐቢይ አህመድ ዛሬ በተረጋገጠ የማህበራዊ ትስስር ገፃቸው ላይ ባሰራጩት መልዕክት ፤ የመጀመሪያውን ምእራፍ አጠናቀው ለተወሰኑ ጊዜያት ወደ ቢሮ መመለሳቸውን ገልፀዋል።

" ዛሬም ሆነ ወደፊት ጠላቶቻችን ጉልበታቸው ዝሎ የጥላቻና የጠበኝነትን መንገድ ጥለው የፍቅር እና የሰላምን መንገድ እስኪመርጡ ትግላችን ይቀጥላል " ብለዋል።

ጠቅላይ ሚኒስትሩ ፥ " ያቀረብኩትን ጥሪ ተቀብላችሁ ህይወታችሁን ፣ ጉልበታችሁን ፣ ሀብታችሁን ፣ እውቀታችሁን ፣ጊዜያችሁንና ሞያችሁን ለሰጣችሁ ሁሉ በኢትዮጵያ ስም ላመሰግናችሁ እወዳለሁ " ሲሉ ገልፀዋል።

* ሙሉ መልዕክቱ ከላይ ተያይዟል።

@tikvahethiopia

የUNICEF እገዛ በአማራ እና ኦሮሚያ ክልል ፦

• UNICEF በኦሮሚያ ክልል ፣ ቦረና ዞን ዲሎ ወረዳ በድርቅ የተጎዱ 78 ሺህ ዜጎችን ለመርዳት የውሃ አቅርቦት / ውሃ ማመላለሻ አገልግሎት / እየሰጠ ይገኛል።

🚨በቦረና ዞን ብቻ ከ500 ሺ በላይ ሴቶች፣ ወንዶችና ህጻናት በድርቅ ተጎድተዋል።

• UNICEF ከአማራ ክልል የተለያዩ አካባቢዎች ተፈናቅለው ደብረ ብርሃን ከተማ ለተጠለሉ ወገኖች 13 ነጥብ 5 ሚሊዩን ብር የተገመተ የዓይነት ድጋፍ አድርጓል።

ድጋፉ ለህክምና አገልግሎት የሚውሉ ጄነሬተሮች ፣ የንጽህና መጠበቂያ እና ሌሎች ግብዓቶች ያካተተ ነው። ይህ ድጋፍ ካለፈው የቀጠለ ሲሆን ድጋፉ እናቶችንና ህፃናትን ባሉበት ሆነው ለመደገፍ ታሳቢ ያደረገ ነው።

@tikvahethiopia

#እንድታውቁት

የፌደራል መንጃ ፈቃድ እድሳት ይመለከታል ፦

በአዲስ አበባ ከተማ አስተዳደር የትራንስፖርት ቢሮ የፌደራል መንጃ ፈቃድ እድሳት አገልግሎት መስጠት መጀመሩን አስታውቋል።

በአዲሱ የተቋማት አደረጃጀት መሰረት ቀደም ሲል በፌደራል ትራንስፖርት ባለስልጣን ሲሰራ የነበረው የፌደራል መንጃ ፈቃድ እድሳት ከጥቅምት 5/2014 ዓ.ም ጀምሮ ለአዲስ አበባ ከተማ የትራንስፖርት ቢሮ በውክልና ተሰጥቶ ነበር።

በዚህም መሰረት ቢሮው ከህዳር 23/2014 ዓ.ም ጀምሮ የፌደራል መንጃ ፈቃድ እድሳት አገልግሎት መስጠት ጀምሯል።

ተገልጋዮች አገልግሎቱን ማግኘት እንደሚችሉ ተገልጿል።

አዲስ የፌደራል መንጃ ፈቃድ አገልግሎት ደግሞ በቅርቡ ይጀምራል ተብሏል።

ምንጭ፦ በአዲስ አበባ ከተማ አስተዳደር የትራንስፖርት ቢሮ ኮሚዩኒኬሽን ጉዳዮች ዳይሬክቶሬት

@tikvahethiopia

ሆቴሎች ለእንግዶች የ30% ቅናሽ አደረጉ።

አንድ ሚሊየን ዲያስፖራዎች ወደ ሀገር ቤት መምጣት አስመልክቶ ሆቴሎች በሀገር አቀፍ ደረጃ የ30% ቅናሽ (Discount) እንዳደረጉ የኢትዮጵያ ሆቴል እና መሠል አገልግሎት አሰሪዎች ፌዴሬሽን ፕሬዝደንት ዶ/ር ፍትህ ወልደሰንበት አሳውቀውናል።

@tikvahethiopia