#Tigray

" የኤርትራ ሰራዊት በራሱ ግዛት ነው ያለው የሚለው የኤርትራ መንግስት መግለጫ ራስን ከማሞኘት ያለፈ ትርጉም የለውም " - አኒና የኢሮብ  ማህበረሰብ መብት ጠባቂ ማህበር

አኒና የተባለው የኢሮብ ሲቪክ ማህበረሰብ  ማህበር መጋቢት 1/2016 ዓ.ም ባወጣው መግለጫ ፤ የኤርትራ ሰራዊት በትግራይ ኢትዮጵያ በሚገኙ 3 ዞኖች የሚገኙ በርካታ አከባቢዎች ተቆጣጥሮ ነዋሪዎች እያንገላታና ግፍ እየፈፀመ ይገኛል ብሏል።

ስቪክ ተቋሙ የኤርትራ መንግስት የካቲት 28/2024 ያወጣው መግለጫን በተመለከተ " የኤርትራ መንግስት የትግራይ ኢትዮጵያ መሬቶች መያዙ በዚህ በሰለጠነ የመረጃ ዘመን ፈፅሞ መካድ አይቻልም " ብሎታል።

የኤርትራ መንግስት የሰጠው መግለጫ ከእውነት የራቀና በፍፁም መወገዝ ያለበትን ነውም ብሏል።

የኤርትራ ሰራዊት በትግራይ ምስራቃዊ ዞን ፦
- የዛላኣንበሳ ከተማ
- በጉሎመኸዳ ወረዳ ማርታ ፣ አዲስ ተስፋ ፣ አዲስ ዓለም ፣ ሸዊት ለምለምና ሰበያ
- በኢሮብ ወረዳ እንዳልጌዳ ፣ ወርዓትለ ዓገረ ሎኽማና ዓሊቴና የተባሉ የኢትዮጵያ አከባቢዎች ተቆጣጥሮ ይገኛል ሲል ገልጿል።

በትግራይ ሰሜናዊ ምዕራብ ዞን በታሕታይ ኣድያቦ የኩናማ ማህበረሰብና ሌሎች የሚኖሩባቸው ገማህሎ ፣ አደመይቲ ፣ የባድመ ከተማና አከባቢው ፣ ዓዲ ፀፀር ፣ ለምለም ሸዊት ፣ ሸምበሊና ፣ መንጠብጠብ ፣ ዓዲ ኣሰር ፣ ሰየምቲ አድያቦ በኤርትራ ስራዊት ስር እንደሚገኙ ፀሃይ የሞቀው ሃቅ ነው ሲልም አክሏል።

የኤርትራ ሰራዊት በትግራይ ማእከላዊ ዞን የእገላና ራማ አከባቢዎች ሙሉ በሙሉና በከፊል ተቆጣጥሮ የአከባቢው ህዝብ የመንግስት አገልግሎት እንዳያገኝ በማድረግ ለበርካታ ችግሮች እንዳጋለጠው  ያመለከተው አኒና የኢሮብ ስቪክ ማህበረሰብ መግለጫ ፤ የኢትዮጵያ መንግስት በፕሪቶሪያ የሰላም ስምምነት መሰረት ህዝቡ ከእንግልትና መከራ እንዲታደገው ጥሪ አቅርቧል።

አኒና የኢሮብ ሲቪክ ማሕበረሰብ ያወጣውን መግለጫ የተከታተሉ የመቐለ ነዋሪዎች ለመቐለ የቲክቫህ ኢትዮጵያ ቤተሰብ አባል በሰጡት አስተያየት የፕሪቶሪያ የሰላም ስምምነት ፈራሚዎች የፌደራል መንግስትና ህወሓት ፣ የአሜሪካ ፣ የአውሮፓ ፣ ኢጋድና የተባበሩት መንግስታት ድርጅት ተዛቢዎች በተገኙበት በአፍሪካ ህብረት መሪነት ዛሬ መጋቢት 2/2016 ዓ.ም በአዲስ አበባ በሚካሄደው የፕሪቶሪያ የሰላም ስምምነት ውል አተገባበርና አፈፃፀም አስመልክቶ በሚካሄደው ግምገማ በኤርትራ ሰራዊት ስር ስላሉ የትግራይ ኢትዮጵያ ግዛቶች ጉዳይ የውይይቱ አካል ይሆናል የሚል ተስፋ እንዳላቸው ተናግረዋል።

መረጃው ተዘጋጅቶ የተላከው በመቐለው የቲክቫህ ኢትዮጵያ ቤተሰብ አባል ነው።
                           
@tikvahethiopia            
 

" ገዳሙ የ2016 ዓ/ም የማህበር ቀለብ መሸመት እስከማይችል ድረስ ኢኮኖሚያዊው ተጎድቷል " - ዝቋላ ደብረ ከዋክብት አቡነ ገብረመንፈስ ቅዱስ አንድነት ገዳም

በመላው ዓለም የሚገኙ የኦርቶዶክስ ተዋሕዶ ቤተክርስቲያን ምዕመናን በሙሉ ለዝቋላ ደብረ ከዋክብት አቡነ ገብረመንፈስ ቅዱስ አንድነት ገዳም የእርዳታ እጃቸውን እንዲዘረጉ ጥሪ ቀረበ።

ጥሪውን ያቀረበው ገዳሙ ነው።

ይህ ጥንታዊ እና ታሪካዊ ገዳም ከቅብር አመታት ወዲህ የመነኮሳትን ህይወት መስእዋትነት እስከማስከፈል የደረሰ ለዘርፈ ብዙ ጥቃት መጋለጡን ገልጿል።

ገዳሙ ከዚህ ቀደም በገንዘብ ከተፈፀመበት ዝርፊያ ባለፈ በቅርቡ ለገዳሙ አይን የሆኑ 4 መነኮሳት አባቶች አሰቃቂ በሆነ መንገድ መገደላቸውን ይህም የመነኮሳትን ልብ የሰበረ እንደሆነ አመላክቷል።

በ2012 የተከሰተው የኮሮና ወረርሽኝ በሀገሪቱ በየትኛው ተቋም ላይ ያደረሰው አሉታዊ ተፅእኖ በገዳሙም ላይ እንዲሁ መድረሱ የተገለጸ ሲሆን አሁን ላለበት እጅግ ዘርፈ ብዙ ችግር መጋለጥ የጀመረው ግን ህገወጥ ታጣቂዎች አካባቢው ላይ መንቀሳቀስ ከጀመሩ ጊዜ አንስቶ ነው ብሏል።

ገዳሙ ፤ ህገወጥ ታጣቂዎች በተደጋጋሚ ወደ ገዳሙ በመግባት የጥበቃ ትጥቅ በመንጠቅ ገዳሙን በመዝረፍ አራቁተውታል ሲል ገልጿል።

ይህ ሁኔታ የ2016 ዓ/ም የማህበር ቀለብ መሸመት እስከማይችል ድረስ ኢኮኖሚያዊ አቅሙን እንደጎዳው አስረድቷል።

በተለያዩ መስኮች እና አገልግሎቶች መንፈሳዊ ግዴታውን እየተወጣ እንደሚገኝ የገለጸው ገዳሙ አሁን እየደረሰበት ያለው ጥቃት ሁለንተናዊ ችግር ላይ ስለጣለው የህዝበ ክርስቲያኑን ትብብር ግድ የሚልበት ደረጃ ላይ መደረሱን በይፋ አሳውቋል።

በመሆኑን በመላው ዓለም ላይ የሚገኙ የቤተክርስቲያኒቱ ልጆች አቅማቸው በፈቀደ በገንዘብም ፣ በቁሳቁስ፣ በሞያ፣ በሃሳብ የእርዳታ እጃቸውን ለገዳሙ እንዲዘረጉ ጥሪ አቅርቧል።

የገዳሙ የባንክ ሂሳብ ቁጥር 1000011282222 (የኢትዮጵያ ንግድ ባንክ) ወይም 31905877 (አቢሲንያ ባንክ) መሆኑን የተገለጸ ሲሆን ከዚህ ውጭ ገዳሙ የመደበውም ሰው ይሁን ማህበር ስለሌለ ከተጠቀሰው አካውንት ውጭ #እንዳታስገቡ ተብሏል።

ቲክቫህ ኢትዮጵያ መረጃው ከገዳሙ አስተዳደር ነው ያገኘው።

@tikvahethiopia

" የ114 ተፈታኞች ውጤት ሙሉ በሙሉ ተሰርዟል " - ትምህርት ሚኒስቴር

ትምህርት ሚኒስቴር በመውጫ ፈተና ላይ ኩረጃና ሌሎች የፈተና ስነምግባር ጥሰት የፈጸሙ 114 ተፈታኞችን ውጤት ሙሉ በሙሉ እንደሰረዘ አሳወቀ።

በመውጫ ፈተና ፦
- ሞባይል ስልክ ይዞ መግባት፣
- መኮረጅና የተለያዩ የፈተና ስነምግባር ጥሰት የፈጸሙ 114 ተፈታኞች ውጤት ሙሉ በሙሉ መሠረዙን የትምህርት ሚኒስቴር ዛሬ መጋቢት 2/2016 ዓ.ም ለሁሉም ዩኒቨርሲቲዎች በጻፈው ደብዳቤ አሳውቋል።

የፈተና ስነምግባር ጥሰት የፈጸሙት 114 ተፈታኞች ውጤታቸው ሙሉ በሙሉ መሠረዙንና የሚወሰዱ ተጨማሪ  እርምጃዎች በቀጣይ ይገለጻል ብሏል።

ከየካቲት 6-11/2016 ዓ.ም  በመላ ሀገሪቱ በሚገኙ የመንግስት ተቋማት በተሰጠው ሁለተኛ ዙር የመውጫ ፈተና 119, 145 ተፈታኞች መፈተናቸው ይታወሳል።

@tikvahethiopia

#Update

የቤቶች ጨረታ ሰነድ ማስገቢያ ጊዜ ተጠናቀቀ።

የአዲስ አበባ ዲዛይንና ግንባታ ስራዎች ቢሮ እና የቤቶች ልማት ኮርፖሬሽን ያስገነቧቸውና ለጨረታ ያቀረቧቸው 3,146 የመኖሪያና 306 የንግድ ባጠቃላይ 3,452 ቤቶች የጨረታ ሰነድ ማስገቢያ ጊዜ በዛሬው ዕለት መጋቢት 02/2016 ዓም ከቀኑ 11፡00 ሰዓት መጠናቀቁ ተገልጿል።

ከጥር 27/2016 ዓ/ም ጀምሮ ሲከናወን የቆየው የሰነድ ሽያጭ በዛሬው ዕለት መጠናቀቁን ተከትሎ በነገው ዕለት መጋቢት 03/2016 ከጠዋቱ 3፡00 ሰዓት የጨረታ ሳጥን ይከፈታል ተብሏል።

በተያዘው የጊዜ ሰሌዳ መሰረት በንፋስ ስልክ ላፍቶ ክፍለከተማ ለጨረታ የቀረቡት 935 የመኖሪያና 15 የንግድ ቤቶች ላይ ተጫራቾች ያስገቧቸው ሰነዶች በታዛቢዎች ፊት የሚከፈት ይሆናል ተብሏል።

መረጃው የቤቶች ልማት ኮርፖሬሽን ነው።

@tikvahethiopia

የቤቶቹ ጨረታ ላይ የተነሳው ጥያቄ ምንድነው ?

የኢትዮጵያ ሕዝብ ዕንባ ጠባቂ ተቋም የ1997 ዓ.ም. የ20/80 የጋራ መኖሪያ ቤቶች (ኮንዶሚኒየም) ዕጣ ያልወጣላቸው ቆጣቢዎች ያቀረቡለትን አቤቱታ መሠረት በማድረግ፣ የአዲስ አበባ ከተማ ቤቶች ልማት ኮርፖሬሽን ከ3 ሺህ ቤቶች በላይ በሽያጭ ለማስተላለፍ ያወጣው ጨረታ ላይ የሕጋዊነትና የፍትሐዊነት ጥያቄ አንስቷል።

የቤቶች ልማት ኮርፖሬሽን አጋጠመኝ ያለውን የፋይናንስ አቅም ችግር ለመፍታትና ተጨማሪ ወጪ ቆጣቢ ቤቶችን ለመገንባት፣ ከከተማው የዲዛይንና ግንባታ ቢሮ ጋር በጋራ በመሆን 3,146 የመኖሪያ ቤቶችንና 306 የንግድ ሱቆችን በጨረታ ለመሸጥ ማቀዱን መግለጹ ይታወሳል።

በ1997 ዓ.ም. ተመዝግበው ከስቱዲዮ እስከ ባለ3 መኝታ ቤት ድረስ ቤቶች ለማግኘት እየቆጠቡ ያሉ 959 ነዋሪዎች፣ እያንዳንዳቸው ምን ያህል እንደቆጠቡ የሚገልጽ ሙሉ ስማቸው ከፊርማቸው ጋር ያረፈበትና በድምሩ 144,820,085.43 ብር መቆጠባቸውን ከሚያሳይ ሰነድ በማያያዝ፣ ኮርፖሬሽኑ የጋራ መኖሪያ ቤቶቹን ለመሸጥ የጀመረውን ሒደት #እንዲያሳግድላቸው የሚጠይቅ ደብዳቤ ለዕንባ ጠባቂ ተቋም ጨረታው ይፋ በተደረገበት ዕለት አስገብተው ነበር።

አቤቱታቸውን የተቀበለው ዕንባ ጠባቂ ተቋም የካቲት 22 ቀን 2016 ዓ.ም በዋና ዕንባ ጠባቂ እንዳለ ኃይሌ (ዶ/ር) ተፈርሞ በወጣ ደብዳቤ፣ የአዲስ አበባ ቤቶች ልማት ኮርፖሬሽን በ7 የሥራ ቀናት ውስጥ ምላሹን እንዲያሳውቀኝ ሲል 4 ጥያቄዎችን አቅርቧል። 

1ኛ. ኮርፖሬሽኑ የመኖሪያ ቤቶችን ገንብቶ በሽያጭ የማስተላለፍ ሕጋዊ መሠረት ያለው ስለመሆኑ በማስረጃ ተደግፎ እንዲቀርብ ብሏል። 

2ኛ. መኖሪያ ቤቶቹ በጨረታ ለሽያጭ ሲቀርቡ የ1997 ዓ.ም. እና የ2005 ዓ.ም. የጋራ መኖሪያ ቤት ተመዝጋቢዎችን ቅድሚያ በመስጠት፣ በልዩ ሁኔታ ተሳታፊ ያልተደረገበት ምክንያት እንዲገለጽ ጠይቋል። 

3ኛ. ኮርፖሬሽኑ የመኖሪያ ቤቶችን ከዕጣና ከምደባ ውጪ በጨረታ ሽያጭ ለማስተላለፍ ሲወስን፣ በ1997 ዓ.ም. እና 2005 ዓ.ም. ተመዝግበው ቤት እየተጠባበቁ ያሉ ነዋሪዎች ጉዳይ ላይ ግልጽና የመጨረሻ ውሳኔ ያልተሰጠበትን ምክንያት እንዲገለጽ የሚል ጥያቄ አቅርቧል። 

4ኛ. ኮርፖሬሽኑ ቤቶችን በጨረታ ለመሸጥ ሲወስን ዝቅተኛና መካከለኛ ገቢ ያላቸው የከተማው ነዋሪዎችን አቅም ባገናዘበ መንገድ የጨረታ መነሻ ዋጋና የአከፋፈል ሥርዓት ሊታይ ያልቻለበትን ምክንያት በመግለጽ፣ ኮርፖሬሽኑ ምላሹን በሰባት የሥራ ቀናት ውስጥ እንዲሰጥ ሲል በደብዳቤ ጠይቋል። 

ያንብቡ ፦ https://telegra.ph/Reporter-03-11-2

Credit ➡ Ethiopian Reporter

@tikvahethiopia