#SUDAN #RUSSIA

የሱዳን ሉአላዊ የሽግግር ም/ ቤት ምክትል ፕሬዝዳንት ጄነራል መሐመድ ሃምዳን ዳጋሎ (ሄሜቲ) ሩስያ ሞስኮ የሚገኙ ሲሆን ከሀገሪቱ ባለስልጣናት ጋር ውይይት አድርገዋል።

ሄሜቲ ከሩስያ ምክትል ጠ/ሚ አሌክስአንደር ኖቫክ፣ የውጭ ጉዳይ ሚኒስትር ሰርጌ ላቭሮቭ ጋር ተገናኝተው መክረዋል።

ይኸው ጉዧቸው ሀገራቸውና ወታደራዊ መንግስታቸው ከምዕራብ ሀገራት ያገኝ የነበረው የገንዘብ ድጋፍ ስለተቋረጠ ከሩሲያ ድጋፍ ለማግኘት እየጣረ መሆኑ ማሳያ ተደርጎ ተወስዷል።

ሳመህ ሳልማን የተባሉ የምጣኔ ኃብት ተንታኝ ለቪኦኤ በሰጡት ቃል የሄሜቲ የሞስኮ ጎብኝት በምጣኔ ሃብት ቅውስ ውስጥ ከምትገኘው ሱዳን ወቅታዊ ሁኔታ አንጻር እንደሚታይ ያስረዳሉ።

አሜሪካ እና ምዕራብ ሀገራት ይሰጡት የነበረውን የገንዘብ ድጋፍ ካቋረጡ እና የሱዳንን ብድር ለመሰረዝ ያስተላለፉት ውሳኔ ከሰረዙ ወዲህ የሱዳን ምጣኔ ኃብቷ ይዟታ በእጅጉ እንደተዳከመ ገልፀዋል።

የሀገሪቱ መገበያ ገንዘብ #ከዶላር ጋር ያለው ንጽጽር እየሰፋ በመጣበት በአሁኑ ሰዓት በሀገሪቱ ውስጥ ያለው የሸቀጦች ውድነት ከቀዳሚዎቹ መካከል ሆኗልም ብለዋል።

አሜሪካ በጀነራል ሄሜቲ እና ሌ/ ጄኔራል አብድል ፈታ አልቡራንን በመሰሉ የጦር አመራሮች ላይ ድንገት ማዕቀቦች ከጣለች በሚል ሱዳን የሩሲያን ድጋፍ ለማግኘት እየጣረች ሊሆን ይችላል ሲሉ ሳማህ ሳልማን ጠቁመዋል።

ካሜሮን ሀድሰን የተባሉ አትላንቲክ ካውንስል ውስጥ የሚሰሩ የአፍሪካ ጉዳዮች ተንታኝ በበኩላቸው የአሁኑ የሱዳንና ሩሲያ ግንኙነት ከኢኮኖሚ ፍላጎት በዘለለ የስትራቴጂ ሽግሽግ ማሳያ ሊሆን እንደሚችል ለቪኦኤ ጠቁመዋል።

ፎቶ ፦ የሄሜቲ ትዊተር ገፅ

@tikvahethiopia

#Japan

ንብረትነቱ የጃፓን የሆነ የእቃ መጫኛ መርከብ ከዩክሬን በስተደቡብ በሚገኘው ጥቁር ባህር ላይ በሚሳኤል መመታቱን ጃፓን ታይምስ ዘግቧል።

አንድ የመርከቡ አባልም ቆስሏል።

ሮይተርስ እንደዘገበው የሩስያ ሚሳኤል የመርከቧን የኋላ ክፍል በመምታቱ መርከቧ በእሳት እንድትያያዝ ሆናለች።

የዩክሬን መከላከያ ሚኒስቴር በይፋዊ ፌስቡክ ገፁ ላይ በፓናማ የተመዘገበችው የጭነት መጓጓዣ " Namura Queen" አርብ እለት በጥቁር ባህር ላይ መመታቷን አሳውቋል።

መርከቧ በምዕራብ ጃፓን ኢሂሜ ግዛት ኢማባሪ ከተማ የሚገኘው የመርከብ ድርጅት ስትሆን አንድ የኩባንያው ባለስልጣን ሁሉም 20 አባላት ፊሊፒናውያን እንደሆኑና አንደኛው በትከሻው ላይ መቁሰሉን ቀሪዎቹ 19 ሰዎች ምንም እንዳልተጎዱ ተናግረዋል።

የጃፓን የመሬት፣ የመሠረተ ልማት፣ የትራንስፖርት እና የቱሪዝም ሚኒስቴር የጥቃቱን ዝርዝር ሁኔታ እያጣራ መሆኑን ገልጿል።

በሩስያ በኩል እስካሁን የተባለ ነገር የለም።

በሌላ መረጃ ከዩክሬን ጦርነት ጋር በተያያዘ ጃፓን በሩስያ ላይ የግለሠቦችን፣ የባንኮችን ሀብት ማገድ ጨምሮ ሌሎችንም ማዕቀቦች ጥላለች።

@tikvahethiopia

#ASTU #AASTU

ሁለቱ የኢትዮጵያ ሳይንስ እና ቴክኖሎጂ ዩኒቨርሲቲዎች የ12ኛ ክፍል ብሄራዊ ፈተና ተፈትነው ወደ ከፍተኛ የትምህርት ተቋማት የሚያስገባ ነጥብ ያዝመዘገቡ ተማሪዎችን ለመቀበል በዛሬው ዕለት ጥሪ አቅርበዋል።

ዩኒቨርሲቲዎቹ የ2014 ዓ.ም መግቢያ ፈተና የምዝገባ ጥሪ አውጥተዋል።

የመመዝገቢያ መስፈርቱ የሲቪክስ ትምህርትን ሳይጨምር የስድስት ትምህርት ድምር ውጤት ከዚህ በታች እንደተገለፀው ነው።

• ለታዳጊ ክልሎች (አፋር፣ ሱማሌ፣ ቤ/ጉሙዝ ፣ ጋምቤላ) ፦

- ኢንጂነሪንግ ለወንድ 395 ለሴት 390
- አፕላይድ ሳይንስ ለወንድ 385 ለሴት 380

• ለሌሎች ክልሎች ፦

- ኢንጂነሪንግ ለወንድ 400 ለሴት 395
- አፕላይድ ሳይንስ ለወንድ 390 ለሴት 385

የምዝገባ ጊዜው ከየካቲት 21 ቀን 2014 ዓ/ም እስከ የካቲት 30 /2014 ዓ/ም ሲሆን ምዝገባው የካቲት 30 /2014 ዓ/ም ከለሊቱ 6 ሰዓት ላይ ይጠናቀቃል ተብሏል።

ከላይ የተቀመጠውን የምዝገባ መስፈርት የሚያሟሉ ተማሪዎች በማንኛውም ስፍራ ሆነው በኢንተርኔት www.aastu.edu.et እና www.astu.edu.et ላይ መመዝገብ ይችላሉ።

ፈተናው መጋቢት 7 ቀን 2014 ዓ/ም እንደሚሰጥ ተነግሯል።

(ተጨማሪ መረጃ ከላይ ተያይዟል)

@tikvahethiopia

#Tigray

የተባበሩት አረብ ኢምሬትስ (UAE) ወደ ትግራይ ክልል የምግብ እርዳታ ላከች።

ሀገሪቱ 35 ቶን ምግብ የጫነ አውሮፕላን ወደ የትግራይ ክልል መዲና መቐለ በዛሬው እለት መላኳን ገልጻለች፡፡

በኢትዮጵያ የተባበሩት አረብ ኢምሬትስ አምባሳደር ሞሀመድ ሳሊም አልረሽድ ፥ " የተደረገው የምግብ እርዳታ በትግራይ ክልል ያለውን የሰብአዊ ሁኔታ ለመርዳት ነው " ብለዋል፡፡

የተባበሩት አረብ ኢምሬትስ ድጋፍ የምታደርገው ድጋፍ ለሚሹ ሀገራት ሰብአዊ እርዳታ ለማድረግ ባላት ቁርጠኝነት መሰረት መሆኑን አምባሳደሩ ገልጸዋል፡፡

" የምግብ እጥረት ላለበት ህዝብ አስፈላጊ የምግብ ድጋፍ ለማድረግ ኢምሬትስ ትሻለች " ሲሉ የገለጹት አምባሳደሩ " ይህ እርዳታ የተበረከተው ኢምሬትስ አስቸኳይ እርዳታ ለመፈልጉ ሀገራት ለመድረስ ባላት ቁርጠኝነት ነው " ብለዋል፡፡

አምባሳደር ሞሀመድ ሳሊም ረሺድ ፥ የተባበሩት አረብ ኢምሬትስ ከዓለም የምግብ ፕሮግራም ጋር በመተባበር ባለፈው አመት 200 ቶን የአትክልት ዘይትን ጨምሮ 300 ቶን እርዳታ መቐለ ማድረሷን መግለፃቸውን አል ዓይን ኒውስ ዘግቧል።

@tikvahethiopia

#Professor

11 ምሁራን የሙሉ ፕሮፌሰርነት ማዕረግ ተሰጣቸው።

አንጋፋው አዲስ አበባ ዩኒቨርሲቲ ለ11 ምሁራን የሙሉ ፕሮፌሰርነት ማዕረግ ሰጥቷል።

በዩኒቨርሲቲ የውስጥና ውጭ ገምጋሚዎች በጥልቀት ተመርመሮ ፣ በኮሌጆች የአካዳሚክ ኮሚሽኖች ተፈትሾ ፣ በዩኒቨርሲቲው ሴኔት ታይቶና ይሁንታ አግኝቶ የቀረበለትን መረጃ ከተመለከተ በኋላ የየኒቨርሲቲው የሥራ አመራር ቦርድ ለ11 ምሁራን የሙሉ ፕሮፌሰርነት ማዕረግ ሰጥቷል።

የሙሉ ፕሮፌሰርነት ማዕረግ የተሰጣቸው፦

1. ዶ/ር ቁምላቸው የሺጥላ፣  
2. ዶ/ር ሽመልስ አሰፋ፣  
3. ዶ/ር መንግስቱ ለገሰ፣
4. ዶ/ር ጉታ ዘነበ፣
5. ዶ/ር ፋሲል አሰፋ፣  
6. ዶ/ር ጥልዬ ፈይሳ፣
7. ዶ/ር ብሩክ ላምቢሶ፣  
8. ዶ/ር ብርሀኑ ነጋ አለሙ፣  
9. ዶ/ር ዘበነ ክፍሌ፣  
10. ዶ/ር ተረፈ ደገፋ እና
11. ዶ/ር ንጉሴ ደየሳ መሆናቸውን ዩኒቨርሲቲው አሳውቋል።

ምሁራኑ የ #ሙሉ_ፕሮፌሰርነት ማዕረግ የተሰጣቸው
በመማር ማስተማር፣ በጥናትና ምርምር እንዲሁም በማኅበረሰብ ዐቀፍ እና ሙያዊ አገልግሎት የነበራቸው አበርክቶ ተገምግሞ መሆኑ ታውቋል።

@tikvahuniversity @tikvahethiopia

#AfCFTA

ሁለት ኢትዮጵያውያን ሹመት ተሰጣቸው።

የአፍሪካ አህጉራዊ ነፃ ንግድ ስምምነት ሴክሬታሪያት ዶ/ር አርከበ ዕቁባይ እና አቶ ታፈረ ተስፋቸውን የንግድ እና ኢንዱስትሪያል ልማት አማካሪ ምክር ቤት አባል አድርጎ መሾሙን ሪፖርተር ጋዜጣ [እንግሊዘኛው ክፍል] ዘግቧል።

ዶ/ር አርከበ በአሁኑ ወቅት የኢትዮጵያ ጠ/ሚር ዶክተር ዐብይ አህመድ ልዩ አማካሪ ሆነው በመስራት ላይ የሚገኙ ሲሆን ባለፉት 30 ዓመታት በኢትዮጵያ በከፍተኛ የመንግስት አመራርነት እንዲሁም በፖሊሲ ቀረፃ ላይ ተሳትፈዋል፤ በፖሊሲ አውጪው ክበብ ላይም ወሳኝ ድርሻ ያላቸው ቁልፍ ሰው ናቸው።

አቶ ታፈረ ተስፋቸው ደግሞ ከንግድ እና ከልማት ጋር በተያያዙ ጉዳዮች ዓለም አቀፍ አማካሪ ሲሆኑ የተመድ የንግድ እና ልማት ኮንፈረንስ (UNCTAD) በአፍሪካ በኢኮኖሚ ወደ ኃላ የቀሩ ሀገራት ክፍል ዳይሬክተር በመሆን አገልግለዋል።

ከዶ/ር አርከበ ዕቁባይ እና ከአቶ ታፈረ ተስፋቸው በተጨማሪ የተመድ የአፍሪካ ኢኮኖሚክ ኮሚሽን ስራ አስፈፃሚ የነበሩት ካርሎስ ሎፔዝ ከአማካሪ ምክር ቤቱ 14 አባላት መካከል አንዱ ሆነው መሾማቸው ተነግሯል።

አዲስ የተቋቋመው ምክር ቤት የአፍሪካ አህጉራዊ ነፃ ንግድ ስምምነት ትግበራ አካል ሆኖ በተለያዩ ጉዳዮች ላይ የማማከር ስራ ይሰራል ተብሎ ይጠበቃል። የምክር ቤቱ ምስረታ በየካቲት ወር በተካሄደው የመሪዎች እና መንግስታት ጉባኤ ላይ ነበር የፀደቀው።

@tikvahethiopia

ሰሜን ኮሪያ ሚሳኤል አስወነጨፈች።

ትላንትና ለሊት ሰሜን ኮሪያ የተጠረጠረ ባላስቲክ ሚሳኤል ማስወንጨፏን የጃፓን ጠቅላይ ሚኒስትር ፅ/ቤት አሳውቋል።

ፅ/ቤቱ ተጨማሪ መረጃ ሲያገኝ ለህዝብ እንደሚያሳውቅ ገልጿል።

ሚሳኤሉ ወደ ጃፓን ባህር አቅጣጫ መወንጨፉ ነው የተነገረው።

ደቡብ ኮሪያ በበኩሏ ሰ/ኮሪያ ሚሳኤል ማስወንጨፏን ገልጻ ሚሳኤሉ በምስራቅ አቅጣጫ በኩል የተወነጨፈ ነው ብላለች።

ባለፈው ጥር ወር ባልተለመደ ሁኔታ እጅግ በተደጋጋሚ ሚሳኤል እያስወነጨፈች ሙከራ ስታደርግ የነበረችው ሰሜን ኮሪያ አሁን አስወነጨፈች የተባለው ሚሳኤል በዚህ ወር የመጀመሪያዋ ነው።

ስለ ትላንትናው ለሊት የሚሳኤል ማስወንጨፍ ጉዳይ በሰሜን ኮሪያ በኩል የተሰማ ነገር የለም።

ከፔንታጎን ወይም ከአሜሪካ የውጭ ጉዳይ ሚኒስቴር መስሪያ ቤት በኩል ወዲያውኑ የተሰጠም አስተያየት የለም።

ከዚህ ቀደም በዚሁ ጉዳይ ዋሽንግቶን ከሰሜን ኮሪያ ጋር " ያለ ምንም ቅድመ ሁኔታ " ለመነጋገር ዝግጁ ነኝ ብትልም ፒዮንግያንግ " ቅንነት የጎደለው " መሆኑን በመግለፅ እስካሁን የአሜሪካን ጥያቄ አልተቀበለችም።

@tikvahethiopia