ህገወጥ የጥይት ተኩስና የንግድ ተግባራት የሚፈፅሙ አካላት ጥብቅ ማሳሰቢያ ተሰጣቸው !

የምስራቅ ጎጃም ዞን የደጀን ወረዳ ፖሊስ ጽህፈት ቤት ህገወጥ የጥይት ተኩስና ህገ ወጥ የንግድ ተግባራትን የሚፈጽሙ ግለሰቦች ከድርጊታቸው እንዲቆጠቡ አሳሰበ።

ከጥቅምት 24 ቀን 2013 ዓ.ም ጀምሮ በወረዳው በተለያዩ ቀበሌዎች በሰርግ፣ በተስካር፣ በልደት እንዲሁም ምሽት ላይ ህገ ወጥ የጥይት ተኩስና ህገ ወጥ የንግድ ዝውውር መበራከቱን ፖሊስ ገልጿል።

የወረዳው ፖሊስ ጽ/ቤት አደረጃጀቶችን በመፍጠር ችግሩን ከምንጩ ለመፍታት እየሰራሁ ነው ብሏል።

በተደረገው እንቅስቃሴም 1 ሺህ 80 ፓልም ባለ 20 ሊትር የምግብ ዘይት፣ 300 ኩንታል ስሚንቶ ፣ 6 ሽጉጥና 1 ክላሽ ከመሰል ጥይቶች ጋር በቁጥጥር ስር ማዋል መቻሉን ጽ/ቤቱ አሳውቋል።

እየተሰራ ባለው ስራ በቤት ሰብሮ ስርቆትና በተቋማት ዘረፋ የተሰማሩ ግለሰቦችን እጅ ከፈንጅ በመያዝ በፍርድ ቤት ቅጣት እንዲተላለፍባቸው ተደርጓል ተብሏል።

ህገ ወጥ ተግባራትን ለመቆጣጠር የሚደረገው እንቅስቃሴ ጠንካራ ቢሆንም የትጥቅ አስተዳደር አዋጁ ክፍተቶች ያሉበት በመሆኑ የጥይት ተኩስን ማስቆም እንዳልተቻለ ፖሊስ ገልጿል።

ህገወጥ ተግባራት ላይ የተሰማሩ ግለሰቦች ከድርጊታቸው ሊቆጠቡ እንደሚገባ ጥብቅ ማሳሰቢያ እንደተሰጠ የደጀን ወረዳ ኮሚኒኬሽን ገልጿል።

@tikvahethiopiaBot @tikvahethiopia

"ትላንት የተገደሉት የኢዜማው አባል ማስፈራሪያ እና ዛቻ ይደርስባቸው ነበር"

የኢትዮጵያ ዜጎች ለማህበራዊ ፍትህ ፓርቲ (ኢዜማ) የቢሾፍቱ ከተማ የአድአ ምርጫ ወረዳ 1 ሊቀመንበር አቶ ግርማ ሞገስ የተገደሉት መኖሪያ ቤታቸው አካባቢ በተተኮሰባቸው ጥይት መሆኑ ተገልጿል።

የኢዜማ ህዝብ ግንኙነት ኃላፊ አቶ ናትናኤል ፈለቀ እንደገለፁት፥ አቶ ግርማ ከዚህ ቀደም በአካባቢው ከሚያደርጉት የፖለቲካ እንቅስቃሴ እንዲታቀቡ ማንነታቸውን ከማያውቋቸው ሰዎች ማስፈራሪያ እና ዛቻ ይደርስባቸው እንደነበር ለፓርቲው ሪፖርት አቅርበው ነበር።

ፓርቲውም በቀረበው ሪፖርት መሰረት ክትትል ሲያደርግ እንደነበርም ተናግረዋል።

ትላንት ምሽት የተፈፀመው ግድያ ሲደርስባቸው ከነበረው ማስፈራሪያና ዛቻ ጋር ይያያዛል ወይስ አይያያዝም ? የሚለውን ጉዳይ ማጣራት እንደሚያስፈልግው አቶ ናትናኤል ገልፀው ኢዜማ ማጣራቱ ተደርጎ እንዳበቃ በይፋ እንደሚገልፅ ዛሬ ምሽት ከቢቢሲ ሬድዮ ጋር በነበራቸው ቆይታ አሳውቀዋል።

ኢዜማ ከግድያው ጋር በተያያዘ ከመንግስት ኃላፊዎች እና ከአካባቢው የፖሊስ ኃላፊዎች ጋር ንግግር እያደረገ እንደሚገኝ አሳውቋል።

@tikvahethiopiaBOT @tikvahethiopia

ዘይቱን ያከማቸው አካል ታወቀ !

ከሰሞኑ በግለሰብ መጋዘን በህገወጣ መንገድ የተከማቸው 2 ሚሊዮን ጀሪከን የፓልም ዘይት መያዙ ሲገለፅ ነበር።

ነገር ግን ይህ ዘይት በማን እንዴት ሊከማች እንደቻለ ይፋዊ መረጃ ከመንግስት በኩል ሳይሰጥ ቆይቷል።

ዛሬ ማለዳ ዘይቱን ያከማቸው አፍሪካ ሃ/የተ/የግ/ማህበርና የሮዛ ዳቦ ባለቤት እንደሆነ ተሰምቷል።

የላፍቶ ክ/ከተማ ነዋሪዎች በተለያየ ግዜ ለወረዳቸው እና ለክፍለ ከተማቸው ሲያሳውቁና ሲጠይቁ መቆየታቸው ተገልጿል።

ነዋሪው አቅርቦት በማጠሩ በተፈጠረው የዋጋ ውድነት የተነሳ ወደ አከፋፋይ ድርጅቱ አፍሪካ ሃ/የተ/የግ /ማህበር በመሄድ ቢጠይቁም ያገኙት የነበረው መልስ የውጭ ምንዛሪ ስላጣን መግዛት አልቻልንም፤ ከወደብ አልተነሣም፤ መንግስት ሁኔታዎችን አላመቻቸልንም የሚል ነበር።

ነገር ግን በድርጅቱ መጋዘን የፓልም ዘይት ሲወርድና ሲራገፍ ፤ እና ከመጋዘኑ በአሳቻ ሰዓት ወደ ተለያዩ አካባቢዎች እየተጫነ ሲጋዝ በተከታታይ ማየታቸውንና ድርጊቱ አግባብ አለመሆኑን በመረዳት ለክፍለ ከተማው መጠቆማቸው ተገልጿል።

በሌላ በኩል ፦

የአፍሪካ ኃ/የተ/የግ/ማ ለንግድና ኢንዱስትሪ ሚኒስትር የኢኒስፔክሽን እና ርጉላቶሪ ዳይሬክቶሬት በቀን 01/06/2013 በላከው ሪፖርት ድርጅቱ በጥር ወር ብቻ በአቃቂ ቃሊቲ እና ንፋስ ስልክ ላፍቶ ክፍለ ከተሞች ባጠቃላይ 1,846,532 ሊትር ፓልም ዘይት ማከፋፈሉን እና በመጋዘኑ የሚገኘው 14,003 ሊትር ብቻ በመሆኑ 3,552,376 ሊትር ፓልም የምግብ ዘይት ወደ አገር ውሥጥ ለማስገባት እንዲፈቀድለት መጠየቁ ታውቋል።

የአዲስ አበባ ከተማ ፕሬስ ሴክሬተሪ በዚሁ ጉዳይ ያሰራጨው ዝርዝር መረጃ : telegra.ph/Addis-Ababa-Press-Sectary-02-16

@tikvahethiopia

ባንክ ቤት ውስጥ የማጭበርበር ድርጊት የፈፀመው ግለሰብ በቁጥጥር ስር ዋለ !

በደብረ ማርቆስ ከተማ ቀበሌ 02 ልዩ ቦታው የኢትዮጵያ ንግድ ባንክ ሸዋበር ቅርንጫፍ ጥር 19 ቀን 2013 ተጠርጣሪው ወደ ባንክ በመሄድ ከሸዋበር ቅርንጫፍ በአቶ አየነው መሃሪ መላኩ ስም ከተከፈተው አካውንት 5 ሺ ብር እና ከዋናው ንግድ ባንክ 24 ሺ ብር በአጠቃላይ 29 ሺ ብር የማጭበርበር ወንጀል ፈጽሟል።

ተጠርጣሪው ወንጀሉን እንዴት ፈፀመው ?

የደብረ ማርቆስ ከተማ አስተዳደር ፖሊስ ጽ/ቤት የሙስና ወንጀሎች ምርመራ ክፍል ሀላፊ ምክትል ኮማንደር አበበች አምሳሉ ሲያስረዱ ፦

ተጠርጣሪው ግለሰብ ባንክ በመሄድ የገንዘብ ወጪ ፎርም የሚሞሉ ግለሠቦችን ፎርሙን በሞባይል በማንሳት እና ፎርም ሞልተው ሲሳሳቱ የሚጥሉትን በማንሳት የአካውንት ቁጥሩን በመውሰድና ፊርማውን ጊዜ ሰጥቶ በመመለማመድ በተጨማሪም በአካውንት ባለቤቱ ስም የራሱን ፎቶ ግራፍ ያለበት ሀሠተኛ መታወቂያ በማዘጋጀት ወረፋ በሚበዛበት ጊዜ በመሄድ የማጭበርበር ተግባሩን ፈፅሟል።

በተጨማሪም የካቲት 5/6/2013 ዓ,ም ተጠርጣሪው ግለሠብ በአቶ ችሎት አበበ ጸጋዬ ስም የተዘጋጀ የሀሰት ሰነድ በማዘጋጀት 40 ሺ ብር ለማጭበርበር ሲሞክር ከባንኩ ሰራተኞች ለፖሊስ በደረሰ ጥቆማ መሠረት ተጠርጣሪው በቁጥጥር ስር ውሎ አስፈላጊው የምርመራ ስራ እየተሰራ ነው ተብሏል።

ፖሊስ ህብረተሰቡ በእንደዚህ አይነት ወንጀል ሰለባ እንዳይሆን ገንዘብ ወጪ በሚያደርጉበት ግዜ ፎርሙን ከሰው እይታውጭ አድርጎ መሙላት እና ወረፋ በሚያሲዙበት ግዜ መታወቂያቸውን እንዲጠቀሙ ገልጸው የባንክ ሰራተኞችም ተገቢውን ጥንቃቄ እንዲያደርጉ አሳስቧል።

መረጃው የደ/ማርቆስ ከተማ ፖሊስ ነው።

@tikvahethiopiaBOT @tikvahethiopia

ፌዴራል ፖሊስ በ3 አይሱዙ የጭነት መኪና በሕገ-ወጥ መንገድ ከአዲስ አበባ ሊወጣ የነበረ ዘይት በቁጥጥር ሥር ማዋሉን ገለፀ !

በሦስት አይሱዙ የጭነት መኪና በሕገ-ወጥ መንገድ ከአዲስ አበባ ሊወጣ የነበረ ዘይት በቁጥጥር ሥር መዋሉን ፌዴራል ፖሊስ ኮሚሽን ማስታወቁን የኢትዮጵያ ቴሌቪዥን ዘግቧል።

ቁጥጥር ሥር የዋለው ዘይት የካቲት 6 ቀን 2013 ዓ.ም ጀሞ ሚካኤል ልዩ ስሙ አንበሳ ጋራዥ አካባቢ በፌዴራል ፖሊስ ቁጥጥር ስር ከዋለው 2 ሚሊዮን ሊትር በላይ ዘይት ቀድሞ ሊወጣ የነበረ መሆኑን ነው ፖሊስ የገለጸው።

"አፍሪካ ኃላፊነቱ የተወሰነ የግል ማኅበር" በተሰኘው ድርጅት ከውጭ ወደ ሀገር ውስጥ የሚገባው የፓልም ዘይት በመንግሥት ፈቃድ ያገኘው በአዲስ አበባ ከተማ ብቻ እንዲያከፋፍል ነበር ተብሏል።

ሆኖም በሦስት አይሱዙ የጭነት መኪና ተጭኖ ወደ ጅማ ሊወጣ ሲል በኮልፌ ቀራኒዮ ክፍለ ከተማ ጅማ በር ፖሊስ ጣቢያ እና በፌዴራል ፖሊስ ትብብር በቁጥጥር ስር ውሏል።

በቁጥጥር ሥር የዋለው ዘይት 994 ጀሪካን ባለ 20 ሊትር እና 3 ሺህ ጀሪካ ባለ 3 ሊትር ፓልም ዘይት እንደሆነ ፌዴራል ፖሊስ አስታውቋል።

@TikvahethiopiaBot @tikvahethiopia