" የጥገና ሥራው ከ20 ቀን ያላነሰ ጊዜ ሊወስድ ይችላል " - የኢትዮጵያ ኤሌክትሪክ ኃይል

ከቆቃ-ሁርሶ ባለ 230 ኪሎ ቮልት ጥምር የኃይል ማስተላለፊያ መስመር ላይ በተፈፀመ ስርቆት ኃይል መቋረጡን የኢትዮጵያ ኤሌክትሪክ ኃይል አሳውቋል።

ኃይል የተቋረጠው በአፋር ክልል አዋሽ ፈንታሌ ወረዳ በንቲ ቀበሌ ልዩ ስሙ አዋሽ ፓርክ ተብሎ በሚጠራው አካባቢ በአንድ የኃይል ተሸካሚ ምሰሶ ላይ በተፈፀመ ስርቆት ምክንያት ነው።

የኃይል ማስተላለፊያ መስመሩ ፦
- በምስራቅ የሃገሪቱ ክፍል ለሚገኙ ከተሞችና አካባቢዎች፣
- ለአዲስ አበባ- ጅቡቲ የባቡር መስመር
- ለጅቡቲ የኤሌክትሪክ ኃይል እያቀረበ ነበር።

በደረሰው ጉዳት ምክንያት በተጠቀሱት ቦታዎች የኃይል አቅርቦት መቋረጡ ተገልጿል።

በስርቆት ምክንያት ከወደቀው አንድ ምሰሶ በተጨማሪ ሰባት የኃይል ተሸካሚ ምሰሶዎች በአስጊ ሁኔታ ላይ ይገኛሉ ተብሏል።

ጉዳት የደረሰበትን የኃይል ተሸካሚ ምሰሶ ለመቀየር የቴክኒክ ባለሙያዎች ቡድን ተዋቅሮ ወደ ሥራ መግባቱ ተገልጿል።

ስርቆት የተፈፀመበት የኃይል ተሸካሚ ምሰሶ ጥምር የኤሌክትሪክ መስመሮችን የያዘ በመሆኑ የጥገና ሥራው ከ20 ቀን ያላነሰ ጊዜ ሊወስድ እንደሚችል ተመላክቷል።

የጥገና ሥራው ሙሉ በሙሉ እስከሚጠናቀቅ ድረስም ከመስመሩ ኃይል ሲያገኙ ለነበሩ ከተሞችና አካባቢዎች በፈረቃ ኤሌክትሪክ እንዲያገኙ ለማድረግ ጥረቶች ይደረጋሉ ተብሏል።

ህብረተሰቡ የተፈጠረውን ችግር ተረድቶ በትዕግስት እንዲጠብቅ ተቋሙ መልዕክት አስተላልፏል።

በሌላ በኩል ፥ ከመተሃራ - አዋሽ ባለ 132 ኪሎ ቮልት የባቡር መስመር ላይ በሚገኙ 9 የኃይል ተሸካሚ ምሰሶዎች ላይ ጉዳት መድረሱ ተገልጿል።

የጥገና ሥራዎችን ለማከናወን ርብርብ እየተደረገ ነው ተብሏል።

በአዋሽ ፈንታሌ ወረዳ በኃይል ማስተላለፊያ ተሸካሚ ምሰሶ አካላት ላይ እየተፈፀሙ የሚገኙ የስርቆት ወንጀሎች መበራከታቸው የገለጸው ተቋሙ ፦
- የአካባቢው ማህበረሰብ፣
- የመስተዳድር
- የፀጥታ አካላት ለኃይል መሰረተ ልማቶቹ ተገቢውን ጥበቃና ትኩረት እንዲሰጡ ጥሪ አቅርቧል።

@tikvahethiopia

#እንድታውቁት

በአዲስ አበባ ከነገ ጀምሮ የሚዘጉ መንገዶች ይፋ ሆነዋል።

ከኢሬቻ ሆራ ፊንፊኔ በዓል ጋር በተያያዘ ለተሽከርካሪ ዝግ የሚሆኑ መንገዶችን የአዲስ አበባ ፖሊስ ይፋ አድርጓል።

የኢሬቻ ሆራ ፊንፊኔ በዓል መስከረም 25/ 2017 ዓ/ም በአዲስ አበባ ይከበራል ፤ ይህን ተከትሎ የሚከተሉት መንገዶች ይዘጋሉ።

- ከቅዱስ ኡራኤል አደባባይ ወደ መስቀል አደባባይ የሚወስደው መንገድ ቅዱስ ኡራኤል አደባባይ ላይ፤

- ከቦሌ አቅጣጫ ወደ መስቀል አደባባይ ለሚመጡ ተሽከርካሪዎች ኦሎምፒያ አደባባይ ላይና ታች እንዲሁም ግራና ቀኝ፤

- ከመስቀል ፍላወር ወደ ኦሎምፒያ የሚወስደው መንገድ ጋዜቦ አደባባይ ላይ፤

- ከአጎና ሲኒማ ወደ መስቀል አደባባይ ለከባድ ተሽከርካሪ አጎና ሲኒማ አጠገብ እንዲሁም ለቀላል ተሽከርካሪ ጥላሁን አደባባይ (አራተኛ ክፍለ ጦር ላይ)፤

- ከለገሀር መብራት ወደ መስቀል አደባባይ ለገሀር መብራት ላይ፤

- ከቴሌ ማቋረጫ ወደ ስታድዮም ለሚጓዙ ቴሌ ማቋረጫ፤

- ከራስ ሆቴል ወደ ስታድዮም ለሚመጡ ተሽከርካሪዎች ራስ ሆቴል ላይ፤

- ከሃራምቤ መብራት ወይም ከአምባሳደር ሲኒማ ወደ መስቀል አደባባይ ሃራምቤ መብራት ላይ፤

- ከብሔራዊ ቤተ መንግስት ወደ መስቀል አደባባይ የሚወስደው መንገድ ብሔራዊ ቤተ መንግስት አጠገብ፤

- ከካዛንቺስ ሼል ወደ ባምቢስ የሚወስደው መንገድ ካዛንቺስ ሼል አጠገብ፤

- ከጁፒተር ሆቴል ወደ ECA የሚወስደው መንገድ ባምቢስ ሳልኮት ህንፃ አጠገብ፤

ከመስከረም 24/ 2017 ዓ/ም ከቀኑ 6፡00 ሰዓት ጀምሮ ፕሮግራሙ እስከሚጠናቀቅ ድረስ መንገዶቹ ለተሽከርካሪ ዝግ እንደሚሆኑ ተገልጿል።

በዓሉ በሚከበርበት ዙሪያና በአካባቢው በግራና በቀኝ ለረጅምም ሆነ ለአጭር ጊዜ ተሽከርካሪ አቁሞ መሄድ ፍፁም የተከለከለ ነው ተብሏል።

ህብረተሰቡ ለፀጥታ ስጋት የሆኑ አጠራጣሪ ነገሮች ሲያጋጥሙት በ011-1-11-01-11 እንዲሁም በ991 ነፃ የስልክ መስመር ጥቆማ መስጠት ይችላል።

#AddisAbabaPolice

@tikvahethiopia

" የሞቱት ሁሉም ኢትዮጵያውያን ናቸው " - በጅቡቲ የሚገኘው የኢትዮጵያ ኤምባሲ

ሰሞኑን በጅቡቲ የባህር ዳርቻ በደረሰው የጀልባ መስጠም አደጋ በአደጋው የሞቱት ዜጎች በሙሉ ኢትዮጵያውያን መሆናቸው መረጋጋገጡን በጅቡቲ የኢትዮጵያ ኤምባሲ አስታውቋል፡፡

መስከረም 21 ቀን 2017 ዓ.ም ማምሻውን ከየመን ወደ ጅቡቲ 320 መደበኛ ያልሆኑ ፍልሰተኞች ይዘው የተነሱት ሁለት የስደተኞች ጀልባዎች በጅቡቲ ባህር ዳርቻ አከባቢ ሲደርሱ በደረሰው አደጋ የበርካቶች ህይወት ማለፉ ይታወሳል።

አደጋውን ተከትሎ 48 ፍልሰተኞች ህይወታቸው ሲያልፍ፣ 197 ፍልሰተኞች ከአደጋው ተርፈው ኦቦክ የሚገኘው ዓለም አቀፉ የስደተኞች ካምፕ መድረሳቸው ተጠቅሷል።

የተቀሩት 75 ፍልሰተኞችን አካል የማፈላለጉ ስራ በነፍስ አድን ሠራተኞች መቀጠሉ ተጠቁሟል። 

እስከአሁን በስፍራው በተደረገው የዜጎች ማጣራት ሂደት ሁሉም ፍልሰተኞች ኢትዮጵያውያን መሆናቸውን ከሚመለከተው አካላት በተገኘው መረጃ ማወቅ መቻሉን በጅቡቲ የኢትዮጵያ ኤምባሲ ገልጿል።

@tikvahethiopia

#ደመወዝ

" የደመወዝ ጭማሪ ዝርዝሩ በቅርቡ በሲቪል ሰርቪስ ኮሚሽን በኩል ይፋ ይደረጋል " - የገንዘብ ሚኒስቴር

የገንዘብ ሚኒስቴር ሚኒስትር አህመድ ሽዴ ፤ ከመስከረም ወር 2017 ጀምሮ የሚጨመር ደመወዝ በካቢኔ መፅደቁን አሳውቀዋል።

ዝቅተኛ ገቢ ያላቸውን ትኩረት ያደረገ የተወሰነ የደመወዝ ጭማሪ መደረጉን አመልክተዋል።

አቶ አህመድ " የተወሰነ የደመወዝ ጭማሪ ለኑሮ ድጎማ ጭምር እንዲሆን ታሳቢ ተደርጎ በካቢኔ ፀድቋል ከመስከረም ወር ጀምሮ ታሳቢ ይደረጋል። የደመወዝ ጭማሪው ከ91 እስከ 92 ቢሊዮን ብር መካከል ተጨማሪ በጀት የሚጠይቅ ይሆናል " ብለዋል።

በነባሩ በጀት የተወሰነ መግባቱን ፤ በተጨማሪ በጀትነትም የሚታወጅ መኖሩን ጠቁመዋል።

" ሲቪል ሰርቫንቱ አጠቃላይ የመንግሥት ሰራተኛው በሁሉም መስክ በፀጥታም በሌሎችም ዘርፍ ያሉትን የኑሮ ጫና ለመቋቋም የሚያስችለውን ድጋፍ ለማድረግ መንግሥት በከፍተኛ ቁርጠኝነት ተገባበት ነው " ሲሉ አቶ አህመድ ተናግረዋል።

" የባለፉት ሁለት ወራት የኢንፍሌሽን አፈጻጸም በሚታይበት ጊዜ እንደተሰጋው አይደለም። የተረጋጋ የዋጋ ሁኔታ ነው ያለው። የተወስነ ጭማሪ በአንዳንድ እቃዎች ላይ እንጂ በአብዛኛው የተረጋጋ ሁኔታ ነው ያለው። " ብለዋል።

" እንደዛም ሆኖ የደመወዝ ጭማሪው እጅግ አስፈላጊ ስለሆነ የሰራተኛውን ቋሚ ደመወዝተኛ ገቢ ያለውን ዝቅተኛውን ትኩረት አድርገን የዝቅተኛውን በጣም ከፍተኛ ጭማሪ አድርገናል የላይኛውን ዝቅተኛ ጭማሪ አድርገን ነው የተሰራው ዝርዝሩ በቅርቡ በሲቪል ሰርቪስ ኮሚሽን በኩል ይፋ ይደረጋል " ሲሉ ተደምጠዋል።

@tikvahethiopia

" የ5 ተማሪዎቻችን ህይወት አልፏል " - መቅደላ አምባ ዩኒቨርሲቲ

በቀን 22/01/2017 በግምት ከጥዋቱ 4:00 ገደማ የመቅደላ አምባ ዩኒቨርስቲ ተማሪዎችን አሳፍሮ ሲጓዝ በነበረ በተለምዶ " አባዱላ " የሚባለው መኪና ላይ በደረሰ የመገልበጥ አደጋ የ7 ሰዎች ህይወት አልፏል።

እንደ አማራ ፖሊስ መረጃ ፤ አደጋው የደረሰው በሰሜን ወሎ ዞን ጉባላፍቶ ወረዳ 015 ቀበሌ ደቦት ልዩ ቦታው እቧዮች ኪዳነምህረት አካባቢ ነው። መኪናው ከባህር ዳር ወደ ወልድያ መስመር ወደ መቅደላ አምባ ዩኒቨርሲቲ ሲጓዝ ነበር።

መኪናው በወቅቱ 21 ሰው ጭኖ ሲጓዝ እንደነበር ተነግሯል።

ከተሳፋሪዎቹ 7 ሰዎች ሲሞቱ 14 ሰዎች ላይ ጉዳት አጋጥሟል።

የመቅደላ አምባ ዩኒቨርሲቲ 5 ተማሪዎቹ በአደጋው እንደሞቱበትና በ13 ተማሪዎቹ ላይ ቀላልና ከባድ ጉዳት እንደደረሰ አሳውቋል።

ህይወታቸው ያለፈው ተማሪዎች ፥ አሜሪካ ሙሉ፣ ይርጋ ወርቁ፣ ሰናይታ ካሳ፣ አቤል ግደይ ፣ በላይነሽ ሽፈራው እንደሆነ ገልጿል።

ነፍስ ይማር !

@tikvahethiopia

#Tigray

" የህወሓትን ህጋዊነት መመለስ አስመልክቶ ከፌደራል መንግስት እና የአፍሪካ ህብረት ፓነል የሚወያይ ልኡክ እንደ አዲስ ይደራጃል ሲል " በአቶ ጌታቸው ረዳ የሚመራ ህወሓት ገለጸ።

በህወሓት ምክትል ሊቀመንበር የሚመራው ህወሓት ከመስከረም 20 አስከ 22 /2017 ዓ.ም ለሦስት ቀናት ያካሄደውን የማእከላዊ ኮሚቴ እና የከፍተኛ ካድሬዎች ስብሰባ ማጠቃለሉ በማስመልከት የአቋም መግለጫ አውጥቷል። 

በዚህም ፥ " የህወሓት ህጋዊነት ለመመለስ ከፌደራል መንግስት እና የአፍሪካ ህብረት ፓነል የተጀመረው ውይይት ተጠናክሮ እንደሚቀጥል " ገልጿል።

" ውይይቱን የሚያስቀጥል የትግራይ የሰላም ልኡክ አንደ አዲስ እንዲደራጅና በሰው ሃይል እንዲጠናከር ይደረጋል " ብሏል።

" ተጀምሮ በተለያዩ ምክንያቶች የዘገየው የሪፎርም እቅድ በተጠናከረ መንገድ ይቀጥላል " ሲልም ገልጿል።

አቶ ጌታቸው የሚመሩት ህወሓት " ድርጅቱን በማጠናከር የህዝብ ጥያቄ ለመመለስ እንሰራለን " ብሏል። 

በትግራይ የሚታየው ቀላል የማይባል የህግ ጥሰት ስርዓት ለማስያዝና የህግ የበላይነት ለማረጋገጥ ልዩ ትኩረት ተሰጥቶት እንደሚሰራ በመግለፅም የፀጥታ መዋቅርና የህዝብ ድጋፍ ጠይቋል።

በአቶ ጌታቸው የሚማራው ህወሓት " ከጎረቤቶች ጋር የሚደረግ ግንኙነት ለማሻሻል ሰላማዊ ዝምድና ለማጠናከር ከሁሉም ጎረቤቶች በጋራ እንሰራለን " ብሏል።

ቡድኑ ባካሄዘው የ3 ቀን ውይይት በሊቀመንበር ዶ/ር ደብረፅዮን ገ/ሚካኤል የሚመራው ህወሓት ባካሄደው 14ኛው ጉባኤ ለመሳተፍ ፍቃደኛ ያልሆኑ የማእከላዊ ኮሚቴ አባላትና ከሰባቱ  የትግራይ ዞኖች የተወጣጡ ከፍተኛ ካድሬዎች መገኘታቸው ቲክቫህ ኢትዮጵያ የመቐለ ቤተሰብ ዘግቧል።

@tikvahethiopia