“ 21 ቤቶች ከአገልግሎት ውጪ ሆነዋል፡፡ አያገለግሉም፤ መልሶም ለማልማትም በጣም አስቸጋሪ ነው ” - የደሴ ከተማ አስተዳደር

በአማራ ክልሏ ደሴ ከተማ ሆጤ ክፍለ ከተማ መስከረም 13 ቀን 2017 ዓ/ም ሌሊት ባተከሰተ የመሬት መንሸራተት አደጋ በሰዎች ሕይወት ላይ ጉዳት ባይደርሰም በመኖሪያ ቤቶች ላይ ውድመት እንደደረሰ ከተማ አስተዳደሩ ለቲክቫህ ኢትዮጵያ ገለጸ፡፡

የከተማዋ የኮሚዩኒኬሽን መምሪያ ኃላፊ አቶ ነስረዲን ኃይሌ “ ቄራ የሚባል አካባቢ ነው የመሬት መንሸራተቱ የተከሰተው ” ብለዋል፡፡

“ መንሸራተቱ ተፈጥሯዊ በሆነ ምክንያት ከክረምቱ ክብደት ጋር ተያይዞ የተከሰተ ነው፡፡ እስካሁን 21 አባወራዎች (በቤተሰብ አባላት ደረጃ 116 ግለሰቦች) ከቦታቸውና ከንብረታቸው ላይ ተፈናቅለው ወደ ካምፕና ዘመድ ቤት ተጠግተዋል ” ሲሉ ተናግረዋል፡፡

“ 21 ቤቶች ከአገልግሎት ውጪ ሆነዋል (እስከ ትላንትና ምሽት ድረስ ዳሜጅ ሆነዋል)፡፡ ኦረዲ አያገለግሉም፡፡ መልሶም ለማልማትም በጣም አስቸጋሪ ነው፡፡ በሰዎች ሕይወት ግን ላይ የደረሰ ጉዳት የለም ” ነው ያሉት፡፡

ከዚህ ቀደም እንዲህ አይነት አደጋ ተከስቶ ያውቃል እዚሁ አካባቢ ? ለሚለው የቲክቫህ ጥያቄ፣ “ እንደከተማ ሦስተኛ ቦታ ላይ ነው ይሄ የመሬት መንሸራተት የተከሰተው ” የሚል ምላሽ ሰጥተዋል፡፡

የአሁኑ የመንሸራተት አደጋ እንደቀጠለ ነው ወይስ ቆሟል ? ምንስ እየተሰራ ነው ? ለሚለው ጥያቄ ፣ “ ችግሩ በመሠረቱ ጨምሯል አሁን፡፡ እዛ አካባቢ ላይ ያሉ ነዋሪዎችን የማንሳት ሥራም የከተማ አስተተዳደሩ ሰርቷል ” ብለዋል።

“ ትላንት ከተከሰተ በኋላ ዛሬ አዳር ላይ ሊከሰት ይችላል ብለን በሰጋንባቸው ቦታዎች ሙሉ ለሙሉ ግለሰቦችን አንስተን በቅርብ ዘመድ ያላቸው ወደ ዘመድ ቤት እንዲሄዱ፤ ካልሆነ ደግሞ ከተማ አስተዳደሩ ካምፕ አዘጋጅቶ እዚያ ካምፕ ላይ እንዲያድሩና አሰፈላጊውን ጊዜያዊ ድጋፍ እያደረግን ነው ” ብለዋል፡፡

" የመሬት መንሸራተቱ የሚያሰጋቸውን
አካባቢዎች የግለሰቦችን ንብረት ጭምር የማሸሽ ሥራ ትላንት ተሰርቷል ” ሲሉ አክለዋል፡፡

ያንብቡ : https://telegra.ph/Tikvah-Ethiopia-09-24-2

@tikvahethiopia

#ቤንዚን

° " ቤንዚን ማግኘት ፈተና ሆኖብልናል " - አሽከርካሪዎች

° " የቤንዚን አቅርቦት ችግር የለም " - የነዳጅና ኢነርጂ ባለስልጣን

አሁን ላይ በአዲስ አበባ ቤንዚን ማግኘት አስቸጋሪ እንደሆነባቸው አሽከርካሪዎች እየገለጹ ናቸው።

የተለያዩ ማደያዎች ላይ " ቤንዚን የለም " የሚል የተለጠፈ ሲሆን ቤንዚን አለባቸው የሚባሉና የሚቀዳባቸው ማደያዎች ላይ እጅግ በጣም ረጅም ሰልፎች ነው ያሉት።

አሽከርካሪዎች ቤንዚን ለመቅዳት ሰዓታትን ለመሰለፍ እየተገደዱ ነው። በዚህም ቀናቸውን በሰልፍ እያሳለፉ በመሆኑ ስራቸው እየተበደለ ነው።

ምንም እንኳን ከሰሞኑን ችግሩ ብሶ ቢታይም ባለፉት ሣምንታት አንዳንድ ቦታዎች ላይ ሰልፎች ይታዩ ነበር።

ለመሆን ምንድነው የተፈጠረው ?

በዚህ ጉዳይ ቲክቫህ ኢትዮጵያ የነዳጅና ኢነርጂ ባለስልጣን መ/ቤትን ማብራሪያ ጠይቋል።

የተፈጠረው ነገር ምንድን ነው ? ስንል ጥያቄ ያቀረብንላቸው የባለስልጣኑ አንድ አካል በሰጡን አጭር ማብራሪያ፣ " የቤንዚን እጥረቱ የለም " ብለዋል፡፡

በከተማዋ ያለውን ችግር በተመለከተ ፤ " የእኛ ልጆች ኢስፔክሽን ሲወጡ ያዩት ነገር አሁን የቴሌ ብር አጠቃቀም ላይ ከፍተኛ ቁጥጥር እየተደረገ ነው፡፡ ምክንያቱም በካሽ ግብይት መፈጸም አይቻልም ፤ ጥብቅ ቁጥጥር እየተደረገ ስለሆነ አብዛኛው ሰው ያንን ሲስተም ሳይጠቀም ቆይቶ በካሽ ትራንሰፈር እያደረገ ነበር፡፡ በዚያ ምክንያት አንዱ ከማደያ ላይ ነዳጅ ቀድቶ ለመውጣት ረጅም ሰዓት ይወስዳል " ብለዋል፡፡

" እናም ረጃጅም ሰልፍ የሚፈጠረው በዛ ነው እንጅ በእጥረት አይደለም " ብለው ለተጨማሪ መረጃ ወደ ሌላ የሚመለከተውን የተቋሙ አካልን የመሩን ሲሆን ሌላኛው አካል ማብራሪያ ለመስጠት ለዛሬ ቀጠሮ ቢሰጡም በቀጠሮ ሰዓት በተደጋጋሚ ስልክ ለማንሳት ፈቃደኛ አልሆኑም፡፡

በሌላ በኩል ፥ ባለስልጣን መ/ቤቱ ለካፒታል ጋዜጣ በሰጠው ቃል ፥ በአዲስ አበባ ከተማ በአማካይ እስከ 1.4 ሚሊየን ሊትር ቤንዚን እያቀረበ መሆኑን አመልክቷል።

" በአዲስ አበባ ከሰሞኑ በነዳጅ ማደያዎች ላይ የተስተዋለው ያልተለመደ ሰልፎች ባለፈው ሣምንት በነበሩት ሁለት ቀናት ከበዓላት ጋር በተያያዘ የአቅርቦት መቀነስ በመኖሩ ነዉ " ብሏል።

ባለስልጣን መ/ቤቱ ፥ " በከተማዋ በቀን በአማካይ እስከ 1.4 ሚሊየን ሊትር ቤንዚን የሚቀርብ ቢሆንም የማደያዎቹ አገልግሎት አሰጣጥ ዝግታ መኖሩ እና የቤኒዚን ምርት ላይ ከፍተኛ የጥቁር ገበያ ፍላጎት መኖር ሠልፎችን ምክኒያት በማድረግ የአቅርቦት ዕጥረት ያለ በማስመሰል አጋጣሚውን ለትይዩ ገበያዉ ለመጠቀም መሞከር ይታያል " ሲል አስረድቷል።

" ከነዳጅ አቅርቦት ጋር በተያያዘ ያለው ሁኔታ በአፋጣኝ እንዲስተካከል የተደረገበት እርምጃ እንዲወሰድ ተደርጓል " ያለዉ መ/ቤቱ " በዚህም በመዲናዋ ከመደበኛ ኮታ ተጨማሪ ቤንዚን እንዲቀርብ ሆኗል " ሲል አስታዉቋል።

" የየቤኒዚን ተጠቃሚ አሽከርካሪዎች አቅርቦት በበቂ ሁኔታ መኖሩን ተረድተው በተለያዩ አከባቢዎች የሚገኙ ማደያዎችን በመጠቀም መገልገል ይችላሉ " ሲል አሳስቧል።

#AddisAbaba #Benzine

@tikvahethiopia

" የተፈጸመው ወንጀል ጭካኔ የተሞላበት አረመኔያዊ ወንጀል ነው " - ፖሊስ

በጫጉላ ምሽት ሚስቱን በአሰቃቂ ሁኔታ የገደለው ተጠርጣሪን በቁጥጥር ስር አውሎ ምርመራ እያካሄደ መሆኑን የሃላባ ዞን ፖሊስ መምሪያ አስታውቋል።

ሟች ሪባቴ ትባላለች።

ሟች እና ወንድሟ በግድያ ተጠርጣሪው ግለሰብ አማካኝነች ቁርዓን እንደሚቀሩ ከሟች እህት አመደልሃዲ አንደበት ለመስማት ተችሏል።

ተጠርጣሪው ሟችን ማግባት እንደሚፈልግና ለሟች ወንድም በጓደኛው አማካኝነት ሃሳቡን ይገልጽለታል።

የሟች ወንድም አብዱልሃዲም ሟች እህቱን " ተስማምተሻል ወይ ? " በሚል መጠየቁንና ከሀፍረት መግለጽ ብትፈራም እንደተስማማች በመረዳቱ ወደ ጋብቻ ቅድመ ሁኔታው ማለፋቸውን ይገልጻል።

ከዚያም ወደ ጥሎሽና ኒካህ ተኪዷል።

ኒካህ ከታሰረ በኃላ ከለሊቱ 10 ሰዓት ገደማ ስልክ ተደወለልኝ የሚለው ወንድሟ " ሪባቴ ታማለች ና " ተብሎ ተነገረኝ ሲል ሁኔታውን አስታውሷል።

ወደ ቤታቸው ሲሄድ ግን ቤቱ በፖሊስ ተከቦ ነበር።

ሌላኛው የሟች ወንድም በርገና  " አባቴ ኒካህ እሰር ብሎ ከወከለኝ ቀን ጀምሮ ያለው ነገር ብቻ ነው ማውቀው ከዚያም ወንድሜን ወከልኩት ኒካሀው ታሰረ አለኝ ከዛ ለሊት 10 ሰዓት ስልክ ተደወለልኝ ቦታው ስንደርስ ቤቱ በፖሊስ ተከቧል " ሲል ገልጿል።

" በጭራሽ ያልገመትነው ነገር ሆኖ አገኘን " የሚለው የሟች ወንድም " ፖሊሶች እኛ ወደ አስክሬኑ እንዳንጠጋ አድርገው አስክሬኑን ወደ ሆስፒታል ወስደው እሱን ወደ ፖሊስ ጣቢያ ወስዱት " በማለት አስረድቷል።

" ለሟች እህታችን ተገቢው ፍትህ ተሰጥቶን ተጠርጣሪው ተገቢውን ቅጣት እንዲያገኝ እንፈልጋለን " ብሏል።

የሃላባ ዞን ፖሊስ መምሪያ በበኩሉ ድርጊቱ ከተፈጸመበት ሰዓት አንስቶ ተጠርጣሪውን በህግ ጥላ ስር አውሎ 5 አባላት ያለው መርማሪ ቡድን በማዋቀር ምርመራ እያካሄደ መሆኑን አመልክቷል።

የተፈጸመው ወንጀል " ጭካኔ የተሞላበት አረመኔያዊ ወንጀል ነው " ሲል ገልጿል።

ፖሊስ የተጠርጣሪውን የእምነት ክህደት ቃል እንደተቀበለና በአጭር ጊዜ ውስጥ ምርመራው አልቆ  ውሳኔ እንዲያገኝ እንደሚሰራ አመልክቷታ።

የሃላባ ህዝብ ተጠርጣሪውን በቁጥጥር ስር ለማዋል እና መረጃ በመስጠት ላደረገው ርብርብ ፖሊስ ምስጋና አቅርቧል።

ይህ መረጃ ባለቤትነቱ የሀሩን ሚዲያ ነው። #HarunMedia

@tikvahethiopia

#USA

ዶላንድ ትራምፕ በቅርብ በሚካሄደው የአሜሪካ ፕሬዜዳንታዊ ምርጫ ካሸነፉና ፕሬዜዳንት ከሆኑ ፥ " በአስቸኳይ የስደተኞችን ወረራ አስቆማለሁ፣ ማንኛውም አይነት የህገወጥ ስደተኞችን በረራ እንዲቆም እንዲሁም በማንኛውም መንገድ ወደ አሜሪካ ምድር እንዳይገቡ አደርጋለሁ " ብለዋል።

ከዚህ ባለፈ በስልጣን ዘመናቸው በአሜሪካ ታሪክ ትልቅ የተባለ ዲፖርቴሽን (ከሀገር የማስወጣት) ስራ እንደሚሰሩ ከወዲሁ ተናግረዋል።

" ከአሜሪካ ምድር ጓዛቸውን አስይዘን ወደ መጡበት እንልካቸዋለን " ያሏቸው ዶክመንት አልባ ህገወጥ ስደተኞችን ነው።

በስድተኞች ጉዳይ ላይ ያላቸው አቋም ከዚህ ቀደምም የሚታወቀው ትራምፕ አሁን ስመጣ " አጠነክረዋለሁ " እያሉ ለደጋፊዎቻቸው ቃል በመግባት ላይ ናቸው።

" ከተሞቻችን አድንላችኋለሁ " እያሉ ያሉት ትራምፕ ቢያንስ ቢያንስ ከ15 እስከ 20 ሚሊዮን ህገወጥ ስደተኞችን ከአሜሪካ ለማስወጣት እቅድ አላቸው ተብሏል።

ምናልባትም ተመርጠው ፕሬዜዳንት ከሆኑ በኃላ ይሄን ሁሉ የሰው ቁጥር እንዴት ከአሜሪካ ዲፖርት እንደሚያደርጉ ለጊዜው በዝርዝር የሚታወቅ ነገር የለም።

#USA #deport

@tikvahethiopia

#Tigray
 
የትግራይ ጊዜያዊ አስተዳደር ፕሬዜዳንት አቶ ጌታቸው ረዳ ፥ በዶ/ር ደብረፅዮን ገ/ሚካኤል የሚመራውን የህወሓት ቡድን አስጠነቀቁ።

ፕሬዜዳንቱ በማስጠንቀቂያቸው " ቡድን " ሲሉ የጠሩት ሃይል የወረዳና የከተማ የህዝብ ምክር ቤቶች ለመረበሽ እየሄደበት ያለው ርቀትና በማድረግ ላይ ያለውን እንቅስቃሴ ማቆም አለበት ብለዋል።

መስከረም 14/2017 ዓ.ም በፕሬዜዳንቱ ፊርማ ተፈርሞ ለሁሉም የወረዳና የከተማ ም/ቤቶች የተፃፈው የማስጠንቀቅያ ደብዳቤ " የህዝብ ምክር ቤቶች የትግራይ ጊዚያዊ መንግስትና የህዝቡ አካል እንጂ የህወሓት መዋቅር አለመሆናቸው አውቆ ' ቡድኑ ' የራሱ መሳሪያ ለማድረግ እያካሄደ ያለውን መሯሯጥና ውንብድና ማቆም አለበት " ይላል።

ስለሆነም ምክር ቤቶቹ የመንግስትና የህዝብ መዋቅር መሆናቸው በማመን ' ቡድኑ' ምክር ቤቶቹ በመጠቀም ያልደገፉትንና ሃሳቡ ያልተቀበሉት የመንግስት ሹመኞች ጥላሸት ለመቀባትና ከሃላፊነት ለማውረድ የሚያደርገው ጥረት መቆም አለበት ሲል አስጠንቅቋል።

ምክር ቤቶቹም ይህንን የመንግሰትና የፓለቲካ ድርጅት የሚቀላቅል ህገ-ወጥ ጣልቃ ገብነት ማውገዝ አለባቸው ብሏል።

" ይህ ሳይሆን ከቀረ ግን ህግና ስርዓት ለማስከበር ሲባል ወደ ህጋዊ ተጠያቂነት መሸጋገር የግድ ይሆናል " በማለት አክለዋል።  

ይህ በእንዲህ እንዳለ በዶ/ር ደብረፅዮን ገ/ሚካኤል የሚመራው ህወሓት ከቀናት በፊት የጊዚያዊ አስተዳደሩ ካቢኔ  ያወጣውን የአቋም መግለጫ የሚቃወም መግለጫ  አውጥቷል።

በዶ/ር ደብረፅዮን የሚመራው ህወሓት መስከረም 14/2017 ዓ.ም ያወጣው  ባለ 4 ነጥብ የተቋውሞ መግለጫ ፤ " ጊዚያዊ አስተዳደሩ ጊዚያዊ  ስራዎች ለመስራት መቋቋሙ ተዘንግቶ ከተቀመጠለት የቆይታ የጊዜ ሰሌዳ በላይ እንዲቆይና ራሱን ወደ ተሟላ የመንግስት ሃላፊነት  ለመለወጥ የሚያደርገው ጥረት ፀረ ዴሞክራሲና ኢ-ህገመንግስታዊ ነው " ብሏል።

ምንም እንኳን " ኢ-ህገመንግስታዊ " ብሎ ቢገልጽም የአገር ወይም የክልሉ ህገ-መንግስት አንቀፆችን አላጣቀሰም።

የእነ ዶ/ር ደብረፅዮን ቡድን " ጊዚያዊ አስተዳደሩ የተሰጠው ተልእኮ ወደ ጎን በመተው ህወሓት ለማፍረስ ፣ ሰራዊት ለማዘዝና የመንግስትና ህዝብ ሃብት በመጠቀም የትግራይ ህዝብ አንድነት ለመበተን እየሄደበት ያለውን የተሳሳተ መንገድ ሊያቆም ይገባል " ሲል አሳስቧል።

#TikvahEthiopiaMekelle

@tikvahethiopia

#እንድታውቁት

አዲስ አበባ ውስጥ ከነገ ማለዳ 12 ሠዓት እስከ ዓርብ ማለዳ 12 ሠዓት ድረስ ሞተር ብስክሌት ማሽከርከር ተከለከለ።

የከተማው ትራንስፖርት ቢሮ ፥ " ለመስቀል ደመራ በዓል አከባበር የመንገድ ትራንስፖርት ደህንነት ሲባል ከመስከረም 16 እና 17 ቀን 2017 ዓ.ም ማለዳ 12 ሠዓት ድረስ በመዲናዋ የሞተር ብስክሌት የትራንስፖርት አገልግሎት ተከልክሏል " ሲል አሳውቋል።

የትራንስፖርትና የትራፊክ ተቆጣጣሪዎች እና የትራፊክ ፖሊሶች አፈፃፀሙን ተግባራዊ እንዲያደርጉም ማሳሰቢያ ተሰጥቷል።

@tikvahethiopia