" ኮድ 2 ተሽከርካሪዎች በፈረቃ እንዲንቀሳቀሱ ይደረጋል፤ ከ2 እስከ 3 ወር ባለው ጊዜ ወደ ተግባር ይገባል " - የአ/ አ ትራፊክ ማኔጅመንት ባለስልጣን

በአዲስ አበባ ከተማ ጥዋትና ማታ የሚታየውን የትራፊክ መጨናነቅ ለመቀነስ ኮድ 2 ተሽከርካሪዎች በፈረቃ እንዲንቀሳቀሱ ሊደረግ ነው።

ጎዶሎ ቁጥር እና ሙሉ ቁጥር የኮድ 2 ተሽከርካሪዎችን በፈረቃ እንዲንቀሳቀሱ የሚያደርግ የሕግ ማዕቀፍ መዘጋጀቱ ተነግሯል።

የአዲስ አበባ ትራፊክ ማኔጅመንት ባለስልጣን ፥ በሁለት እና በሶስት ወር ጊዜ ውስጥ በከተማው ከፍተኛ ቁጥር ያላቸው ኮድ 2 ተሽከርካሪዎች ወደ ፈረቃ እንዲገቡ ይደረጋል ብሏል።

" ጥዋት ስራ መግቢያ እና ስራ መውጫ ሰዓት አካባቢ ከፍተኛ የትራፊክ መጨናነቅ ይታያል " ያለው መ/ቤቱ " ይህንን ለመቀልበስ ባለስልጣን መ/ቤቱ ከሌሎች ባለድርሻ አካላት ጋር በመሆን ጥናት አስጠንቶ በአዲሱ ዓመት ተግባራዊ የሚደረጉ የፍሰት ማሻሻያዎች አሉ " ብሏል።

ከነዛ ውስጥ አንዱ የኮድ 2 ተሽከርካሪዎች በፈረቃ የሚንቀሳቀሱበት እንደሆነ ገልጿል።

የኮድ 2 ተሽከርካሪዎች በፈረቃ እንዲንቀሳቀሱ ቅድመ ዝግጅት መደረጉንና የሕግ ማዕቀፍም መዘጋጀቱን በጣም ከዘገየ ከ2 እስከ 3 ወር ወደ ተግባር እንደሚገባ አስረድቷል።

" ይሄ ፍሰቱን ያሻሽላል " ያለው መ/ቤቱ " ፒክ ሀወር / ስራ መግቢያ እና መውጫ ሰዓት ጎዶሎና ሙሉ ቁጥር ተብሎ ፕሮግራም ወጥቶለት ለምሳሌ ዛሬ ሙሉ ቁጥር የሚንቀሳቀስ ከሆነ ነገ ጎዶሎ ቁጥር በፈረቃ እንዲንቀሳቀስ የሕግ ማዕቀፍ ረቂቅ ተዘጋጅቷል ሌሎችም ቅድመ ሁኔታዎች እየተመቻቹ ነው " ሲል አሳውቋል።

የኦሮሚያ እና ፌዴራል ታርጋ ሳይጨምር የአዲስ አበባ ታርጋ ብቻ ያላቸው ተሽከርካሪዎች ከ755 ሺህ በላይ እንደሆኑ የተገለጸው የትራፊክ ማኔጅመንት ባለስልጣን ከነዚህ ውስጥ የሚበዙት ኮድ 2 ተሽከርካሪዎች በመሆናቸው ነው ጥዋት እና ማታ በፈረቃ እንዲንቀሳቀሱ የሚደረገው ብሏል።

ይህ መረጃ ባለቤትነቱ የሸገር ኤፍ ኤም 102.1 ሬድዮ ጣቢያ ነው።

#AddisAbaba #ኮድ2

@tikvahethiopia

#Update!

" መሬቱ ጭራሽ በNGO እጅ ገብቶ አያውቅም ከመጀመሪያው ጀምሮ የቤተ ክርስቲያኗ እጅ የነበረ ነው " - ቤተ ክርስቲያኗ

የኢትዮጵያ ቃለ ሕይወት ቤተ ክርስቲያን 40 በመቶ የሚሆነው የኩሪፍቱ ማዕከል ይዞታዋን የቢሾፍቱ ከተማ አስተዳደር " በጉልበት ሊወስደው ነው " ስትል በተደጋጋሚ መግለጿ ይታወቃል።

ለቤተ ክርስቲያኗ ቅሬታ ምላሽ እንዲሰጥ ቲክቫህ ትላንት የጠየቅነው የቢሾፍቱ ከተማ አስተዳደር ደግሞ፣ "መሬቱ በNGO እጅ የነበረ ነው" የሚል ምላሽ ሰጥቶ ነበር።

ቤተ ክርስቲያኗ ምን አለች ?

የከተማ አስተዳደሩ የሰጠውን ምላሽ በተመለከተ ዛሬ ለቲክቫህ ኢትዮጵያ ቃሏን የሰጠችው ቤተ ክርስቲያኗ፣ " ቦታው በNGO እጅ ጭራሹኑ ያልነበረ ከመጀመሪያው ጀምሮ የቤተ ክርስቲያኗ እጅ የነበረ ነው " ብላለች።

" ' መሬቱ ከዚህ በፊት በNGO እጅ የነበረ ነው። በቤተ ክርስቲያን ጥያቄ ለአምልኮ ወይም ለመቃብር ቦታ የተሰጠ አይደለም' " የሚለው የከተማ አስተዳደሩ ምላሽ " የተሳሳተ መረጃ ነው " ነው ያለችው።

የኢትዮጵያ ቃለ ሕይወት ቤተ ክርስቲያን ዋና ፀሐፊ ስምኦን ሙላቱ (ዶ/ር)፣ ለቲክቫህ ኢትዮጵያ በሰጡት ቃል፣ " ይሄ መሬት የተሰጠው ከመጀመሪያ ከ1981 ዓ/ም ጀምሮ ለኢትዮጵያ ቃለ ሕይወት ቤተክርስቲያን ነው " ሲሉ ተናግረዋል።

" መሬቱ በNGO እጅ ገብቶ አያውቅም።  እሳቸው (የከተማ አስተዳደሩ አካል ማለታቸው ነው) የሚያወሩት ስለምን መሬት እንደሆነ አውቃለሁ። ሌላ ጉዳይ ነው ፤ የሌላ ቤተ እምነት ነው " ብለዋል።

" በደርግ መንግሥት ጊዜ በህፃናት ኮሚሽን በተፃፈ ደብዳቤ መቼ እንደተረከብነው፤ Every detail በመጀመሪያው መግለጫ ተሰጥቷል " ነው ያሉት።

" ስለዚህ እሳቸው (ከከተማ አስተዳደሩ ምላሽ የሰጡትን አካል ማለታቸው ነው) የሰጡት መልስ ስለሌላ ቦታ እንጂ ስለኩሪፍቱ የቃለ ሕይወት ቤተ ክርስቲያን አይደለም " ብለዋል።

ቲክቫህ ኢትዮጵያም ፣ ከተማ አስተዳደሩ ምላሽ የሰጠው ቤተክርስቲያኗ ' ሊወሰድብኝ ነው ' ስላለችው ኩሪፍቱ ማዕከል ነው፤ እርስዎ ምላሽ ተሰጠበት ያሉት የትኛው ቦታ ነው ታዲያ ? ሲል ጥያቄ አቅርቧል።

ዋና ፀሐፊው፣ " የሌላ ቤተ እምነት ነውና አሁን ስለሌላ ቤተ እምነት ማውራት ለእኔ ጥሩ ስላልሆነ ነው። የዚህ ነው የዛ ነው ባልልም እነርሱ ያውቁታል በትክክል " የሚል ምላሽ ሰጥተዋል።

" ምክንያቱም በሁለቱም ጉዳዮች ከንቲባ ጽሕፈት ቤትም ስንመላለስ ነበር፤ ያኛው ሌላ ጉዳይ ነው " ሲሉ አክለዋል።

ከተማ አስተዳደሩ ጉዳዩ የሚመለከታት የቢሾፍቱ ቃለ ሕይወት ቤተክርስቲያን እያለች የ35 ሚሊዮን ወንጌላዊያን የመብት ጥሰት አድርጎ ማቅረብ ልክ እንዳልሆነ ስለሰጠው ምላሽ ቤተክርስቲያኗ፣ ጉዳዩ የሁሉም የቃለ ሕይወት አማኞች እንደሆነ አጸፋ ሰጥታለች።

" 20 ሄክታሩን ወስደዋል፤ የቀረውን 20 ሄክታሩንም 'በላዩ ላይ አፍርሱ፣ የቀረውን ደግሞ ወደ መሬት ሊዝ ይግባ' እየተባለ ብዙ ነገር እየገፋ ነው ያለው " ብለዋል።

#TikvahEthiopiaFamilyA

@tikvahethiopia

#Update

" ለኮንሶና አካባቢው የመብራት ችግር አርባምንጭ ላይ ተጨማሪ የመብራት ማስተላለፊያ ሰብስቴሽን ይገነባል " - የደቡብ ኢትዮጵያ ክልል ርእሰመስተዳድር አቶ ጥላሁን ከበደ

" ለኮንሶ ዞን የራሱ የሆነ ሀይል ማሰራጫ ነው የሚያስፈልገው " -  የኮንሶና አካባቢው ወጣቶች

ከሰሞኑ የኮንሶና አካባቢዉ ማህበረሰብ በመብራት ኃይል መቆራረጥና መጥፋት ስራ እስከመዝጋት መድረሳቸዉን ገልጸዉ  መንግስት መፍትሄ እንዲሰጣቸዉ ለቲክቫህ ኢትዮጵያ ቅሬታ ማሰማታቸው ይታወሳል።

ከሰሞኑ በተካኬደው የደቡብ ኢትዮጵያ ክልል ም/ቤት ስብሰባ ወቅት ጉዳዩን ያነሱት የክልሉ ርእሰመስተዳድር አቶ ጥላሁን ከበደ " ለኮንሶና አካባቢው የመብራት ችግር አርባምንጭ ላይ ተጨማሪ የመብራት ማስተላለፊያ ሰብስቴሽን ይገነባል " ማለታቸው ተሰምቷል።

" በርእሰ መስተዳድሩ ንግግር ቅር ተሰኝተናል " ያሉ ግለሰቦች " በኮንሶና አካባቢዉ ሰላማዊ ሰልፍ እናካሂዳለን " በማለት በሶሻል ሚዲያ ቅስቀሳ ሲያደርጉ ተስተውለዋል።

ወጣቶቹ ለቅሬታቸዉ ምንጭ የሆነው የርእሰመስተዳድሩ ንግግር መሆኑን ጠቅሰዉ " ለኮንሶና አካባቢው ከባድ የመብራት ኃይል ችግር መፍትሄው ኮንሶ ላይ እንጅ አረባምንጭ ላይ ተጨማሪ ሰብስቴሽን መገንባት አይደለም "  ብለዋል።

በጉዳዩ ዙሪያ ያነጋገርናቸዉ የኮንሶ ዞን መንግስት ኮምዩኒኬሽን ዳይሬክቶሬት ዳይሬክተሩ አቶ ሰራዊት ቲቶ ፥ " የርእሰመስተዳድሩን ንግግር ተከትሎ የሶሻል ሚዲያ እንቅስቃሴዎች ቢኖሩም ከተማዋ ፍጹም ሰላማዊ መሆኑን ገልጸው ሁኔታውን በመጠቀም ችግር ለመፍጠር የሚያሴሩ እንዳሉ እናውቃለን " ብለዋል።

ኃላፊዉ አክለውም የመብራት ችግሩን ለመቅረፍ ከሚመለከታቸው የክልል አመራሮችና ከፍተኛ የመብራት ኃይል  ባለስልጣናት ጋር ዉይይት እንደተካሄደ በመጥቀስ የአጭርና የረጅም ጊዜ እቅድ በማውጣት በአጭር ጊዜ ቅስጥ መፍትሄ ለመስጠት ተወስኖ እንቅስቃሴ መጀመሩን ለቲክቫህ ኢትዮጵያ ገልጸዋል።

#TikvahEthiopiaFamilyHW

@tikvahethiopia

#EAES

የ2016 ዓ.ም የ12ኛ ክፍል ሀገር አቀፍ መልቀቂያ ፈተና መጠናቀቁን የትምህርት ምዘናና ፈተናዎች አገልግሎት አሳውቋል።

ፈተናው በወረቀት እና በበይነ መረብ መሰጡቱን ገልጿል።

ዛሬ ፈተናቸውን ያጠናቀቁ የተፈጥሮ ሳይንስ ተማሪዎች ወደ ቤተሰቦቻቸው እየተመለሱ ናቸው።

በተመሳሳይ መልኩ በትግራይ ክልል እየተሰጠ ያለው የመልቀቂያ ፈተና ነገ ከሰዓት በፊት ይጠናቀቃል።

@tikvahuniversity

ወላጆች ልጆቻችሁን ጠብቁ !!

በክረምት የእረፍት ጊዜ ወላጆች ለልጆቻቸው በቂ ጥበቃ እንዲያደርጉ የአዲስ አበባ ከተማ አስተዳደር የእሳትና ሥራ አመራር ኮሚሽን ለቲክቫህ ኢትዮጵያ በሰጠው ቃል አሳሰበ።

የኮሚሽኑ የህዝብ ግንኙነት ባለሙያ አቶ ንጋቱ ማሞ፣ ዛሬ (ሐምሌ 11 ቀን 2016 ዓ.ም) ከቀኑ 8 ሰዓት ገደማ በቦሌ ክ/ከተማ ወረዳ 12 ወረገኑ እየተባለ በሚጠራው አካባቢ ውሃ ባቆረ ጉድጓድ የገባ ታዳጊ ህይወቱ ማለፉን ገልጸዋል።

" ውሃ ባቆረ ጉድጓድ ዋና ለመዋኘት የገባ የ13 ዓመት ታዳጊ ህይወቱ አልፏል" ያሉት አቶ ንጋቱ፣ "የኮሚሽኑ ጠላቂ ዋናተኞች የታዳጊውን አስከሬን አውጥተው ለፖሊስ አስረክበዋል " ብለዋል።

" በአዲስ አበባ ታዳጊዎችና ወጣቶች በቂ የዋና ችሎታ ሳይኖራቸው ለዋና በሚል ውሃ ባቆሩ ጉድጓዶች እየገቡ ህይወታቸውን ያጣሉ " ነው ያሉት።

አሁን ትምህርት ቤቶች ዝግ ስለሆኑ ታዳጊዎችና ወጣቶች ለጨዋታ በሚል ድርጊቱን ስለሚፈጽሙ ወላጆች በቂ ጥበቃ እንዲያደርጉላቸው አሳስበዋል።

ኮሚሽኑ አደጋውን ለመከላከል የሚያሰችሉ በሚል በተደጋጋሚ የሚያስተላልፋቸውን የጥንቃቄ መልዕክቶች ህብረተሰቡ፣ በተለይ ወላጆች፣ ታዳጊዎችና ወጣቶች  እንዲተገብሩ ጠይቋል።

ችግሩ እየተደጋገመ መሆኑ የተመላከተ ሲሆን፣ በዚህ አደጋ ምን ያህል ታዳጊዎች ህይወታቸውን እንዳጡ በቀጣይ የሚዳሰስ ይሆናል።

#TikvahEthiopiaFamilyAA

@tikvahethiopia