#GERD🇪🇹

ግድቡ ከዚህ በኃላ ውሃ አይዝም ?

" 4ኛና የመጨረሻው ሲባል ከዚህ በኋላ የውሃ ሙሌት አይደረግም ማለት እንዳልሆነ መታወቅ አለበት " - ዶ/ር ኢ/ር ሃብታሙ ኢተፋ

የታላቁ ሕዳሴ ግድብ አራተኛ ዙር ሙሌት መጠናቀቅን ተከትሎ ጠቅላይ ሚኒስትሩ " የመጨረሻ ሙሌት " ሲሉ መግለፃቸውን ተከትሎ በርካቶች " ግድቡ ከአሁን በኃላ ውሃ አይዝም ? " የሚል ጥያቄ ፈጥሮባቸዋል።

ይህንን በተመለከተ ቃላቸውን ለኢትዮ ኤፍ ኤም 107.8 ሬድዮ ጣቢያ የሰጡት የውሃና ኢነርጂ ሚኒስቴር ሚኒስትር ዶክተር ኢንጂነር ሃብታሙ ኢተፋ ተከታዩን ማብራሪያ ሰጥተዋል።

ዶ/ር ኢ/ር ሃብታሙ ኢተፋ ፦

" አራተኛና የመጨረሻው የውሃ ሙሌት የተባለው  አራቱ ዙሮች ከፍተኛ የውሃ መጠን የሚያስፈልጋቸው በመሆኑ ነው።

በእነዚህ አራት ዙሮች ግድቡ መያዝ ያለበትን የውሃ መጠን መያዝ ችሏል።

አራተኛና የመጨረሻው ሲባልም ከዚህ በኋላ የውሃ ሙሌት አይደረግም ማለት እንዳልሆነ መታወቅ አለበት።

ይልቁንም ግድቡ #እየተጠናቀቀ በመሆኑ ፣ ከፍተኛ የውሃ መጠን ሳያስፈልግ ይከናወናል። "

Credit - Ethio FM 107.8

@tikvahethiopia

#OFC

የኦሮሞ ፌዴራላዊ ኮንግረስ (ኦፌኮ) ሊቀመንበር ፕሮፌሰር መረራ ጉዲና አሜሪካ መግባታቸውን ለማወቅ ተችሏል።

ፕሮፌሰሩ በአሜሪካ ለአንድ ወር እንደሚቆዩ የፓርቲው ዓለም አቀፍ ድጋፍ ቡድን አሳውቋል።

በአሜሪካ ቆይታቸው ፦
- ወደ ተለያዩ ግዛቶች በማቅናት ከኦሮሞ ተወላጅ ዳያስፖራዎች ጋር ውይይት ያደርጋሉ።
- ይፋዊ / መደበኛ ባልሆኑ የተለያዩ ግብዣዎች ላይ በመገኘት ከወዳጆቻቸው እና ከፓርቲው ደጋፊዎች ጋር ይነጋገራሉ።
- በኦፌኮ-ዓለም አቀፍ የድጋፍ ቡድን አዘጋጅትነት የሚካሄድ ቨርቹዋል ኮንፈረንስ በመምራት ከዓለም አቀፍ የኦሮሞ ተወላጅ ዲያስፖራዎች ጋር በመገናኘት በወቅታዊ ክልላዊ ፖለቲካ ጉዳዮች ላይ ፤ በወቅታዊ የኢትዮጵያ አሳሳቢ ችግሮች ላይ እንዲሁም የኦሮሞ ህዝብ ትግል አሁናዊና ቀጣይ ሁኔታን በተመለከተ ይመክራሉ።

ፕሮፌሰር መረራ ጉዲና ወደ አሜሪካ ሀገር ያቀኑት የፓርቲው ተቀዳሚ ምክትል ሊቀመንበር አቶ በቀለ ገርባ  ፤ በአሁኑ ወቅት በኢትዮጵያ ያለው ፖለቲካዊ ሁኔታ " በሰላማዊ መንገድ ለመታገል ሆነ በግል በነጻነት ለመኖር " አሳሳቢ በመሆኑ በሄዱበት አሜሪካ ሀገር ጥገኝነት መጠየቃቸውን ካሳወቁ ከ12 ቀናት በኃላ ነው።

ፎቶ - ፋይል

@tikvahethiopia

#Update

የመቐለ ከተማ ፖሊስ ጳጉሜን 2 /ተፎካካሪ ፓርቲዎች ጠርተውት መንግስት ሳይፈቅድ ሰላማዊ ሰልፍ ለማካሄድ በማነሳሳትና በመሳተፍ ምክንያት በቁጥጥር ሰር ያዋላቸውን እፈታ መሆኑን ገልጿል።

የተፎካካሪ የፓለቲካ ፓርቲ አመራሮች ለቲክቫህ በሰጡት ቃል ፤ " ሕክምና የሚያስፈልጋቸው ጨምሮ የፓለቲካ ፓርቲ ሊቃነ መናብርትና ጋዜጠኛ ገና አልተፈቱም " ብለዋል።

ከመቐለ ከተማ ፓሊስ የተገኘ መረጃ እንደሚያስረዳው ፦
✔ ሃፍቶም ኪ/ማርያም 
✔ ኣክቲቪስት ፀጋይ ገ/መድህን 
✔ ሸዊት ውዳሰ 
✔ ፍቕረ ኣሸብር 
✔ ንጉሰ ኣረፈ 
✔ ሃይለኣብ ፊደል
✔ ቴድሮስ ገ/በላይ 
✔ ጋዜጠኛ መሓሪ ካሕሳይ
✔ ከዋኒ ተስፋይ
✔ ጋዜጠኛ መሓሪ ሠለሞን 
✔ ዮሴፍ በርሀ ለምለም 
✔ ገ/ስላሴ ካሕሳይ 
✔ ጠዓመ በርሃኑ 
✔ ኣክቲቪስት ብርቱኳን መብራህቱን 
✔ ሙሉ በርሀ
✔ ዮናሰ ገ/ሚካኤል
✔ ሃይለኣብ ታረቀ 
✔ ሳምራዊት የማነ
✔ ኣሸናፊ ወ/ማርያም 
✔ ፍቓዱና
ሌሎች ጨምሮ 46 በቁጥጥር ስር የነበሩ ተጠርጣሪዎች ቅዳሙ ጳጉሜን 4 /2015 ዓ.ም ተለቀዋል። 

የሳልሳይ ወያነ ትግራይ (ሳወት)  ምክትል ሊቀመንበር አቶ አሉላ ሃይሉና ፣ የውድብ ናፅነት ትግራይ (ውናት) ፅህፈት ቤት ኃላፊ አቶ ሃፍቶም ኪ/ማርያም ለቲክቫህ ኢትዮጵያ በሰጡት መረጃ  ፦
1. የውናት ሊቀመንበር ዶር ደጀን መዝገበ 
2. የሳወት ሊቀመንበር ሃያሉ ጎዱፋይ  
3. የዓረና ለሉአላውነትና ዴሞክራሲ ሊቀመንበር  ዓንዶም ገ/ስላሴ  
4. የባይቶና ዓባይ ትግራይ አስተባባሪ ኪዳነ ኣመነ 
5.  የባይቶና ዓባይ ትግራይ አስተባባሪ ክብሮም በርሀ  
6. የሳወት ከፍተኛ አመራር ዓብለሎም ገ/ሚካኤልና
7. ጋዜጠኛ ተሻገር ፅጋብ ገና አልተፈቱም።

በተለይ በከባድ ድብደባ የተጎዳው ጋዜጠኛ ተሻገር ፅጋብ እስከ አሁን ተገቢ ህክምና አላገኘም ብለዋል።

የትግራይ ግዚያዊ አስተዳደር ፕረዚደንት አቶ ጌታቸው ረዳ ጳጉሜን 1/ 2015 ዓ.ም ለሚድያዎች በሰጡት ቃለመጠይቅ "... ሰልፍ እንዳይካሄድ ለመከልከል ሳይሆን ፤ በተጨባጭ ካለው የፀጥታ ስጋት አንፃር ነው ስልፉ እንዳይካሄድ እያደረግን ያለነው..." ማለታቸው ይታወሳል።  

የትግራይ ግዚያዊ አስተዳደር ፍትህ ቢሮ ጳጉሜን 3 /2015 ዓ.ም ባወጣው የፅሁፍ መግለጫ ፓሊስ በቁጥጥር ስር ያዋላቸውን መብት እንዲጠብቅና እንዲያከብር ጥሪ አቅርቧል።

የትግራይ ዓለም አቀፍ ሙሁራንና ባለሙያዎች ማህበር (GSTS) ጳጉሜ 2/ 2015 በተፎካካሪ የፓለቲካ ፓርቲዎች የተጠራው ሰልፍ ተከትሎ ፓሊስ በዜጎች ላይ የፈፀመው ድብደባና እሰር በመቃወም ህግ እንዲከበር የሚያሳስብ መግለጫ አውጥቷል።

የትግራይ አለም አቀፍ ሙሁራንና ባለሙያዎች ማህበር (GSTS) ጳጉሜን 3 /2015 ዓ.ም በእንግሊዝኛ ቋንቋ ባሰራጨው መግለጫ 
1. የዜጎች የመቃወም መብት እንዲከበር ፤
2. በተጠራው ሰላማዊ ሰልፍ ምክንያት የተጎዱ ዜጎች ህክምና እንዲያገኙ ፤
3. የታሰሩ ፓለቲከኞች ፣ጋዜጠኞችና ስቪሎች በአስቸኳይ እንዲፈቱ ፤
4. ሰልፉ ምክንያት በማድረግ በዜጎች ጥቃት የፈፀሙ የፓሊስ አባላትና አዛዥ ለህግ እንዲቀርቡ፤

በአጠቃላይ የተፈጠረው ጉዳይ በገለልተኛ አካል እንዲጣራ ጥሪ ማቅረቡ የቲክቫህ ኢትዮጵያ አባል ከመቐለ ዘግቧል።

ተጨማሪ ቲክቫህ ትግርኛ @tikvahethiopiatigrigna

@tikvahethiopia

#ነእፓ

የነእፓ ሊቀመንበር ለጠ/ሚኒስትሩ ደብዳቤ ፃፉ።

የነፃነትና እኩልነት ፓርቲ (ነእፓ) ሊቀመንበር ዶ/ር አብዱልቃድር አደም የአዲሱን ዓመት 2016 ተንተርሶ ለጠ/ሚኒስትር ዶ/ር ዐቢይ አህመድ ግልፅ ደብዳቤ ፃፉ።

በዚህ ደብዳቤያቸው እየተጠናቀቀ ባለው 2015 ዓመት እንዲሁም ባለፉት ዓመታት በሀገራችን ስለነበሩ የሰላም እና ጸጥታ፣ የመልካም አስተዳደር፣ የኢኮኖሚ እና ማህበራዊ ችግሮች በወፍ በረር በመዳሰስ ችግሮቹ ወደ አዲሱ አመት እንዳይሸጋገሩ  አሉኝ ያሉትን የመፍትሄ ሀሳቦች እና ጥያቄዎች ለጠቅላይ ሚኒስትሩ ፅፈውላቸዋል።

ከደብዳቤያቸው የወሰድነው ፦

" ለአብዛኛው የሀገራችን ህዝብ ኑሮ እጅግ ከብዷል።

ሰፊው ህዝባችን ጦም እያደረ የፖለቲካ ስልጣን የያዙ እና በነሱ ጉያ ስር የተወሸቁ ጥቂቶች እጅግ የተንደላቀቀ ህይወት የሚኖሩበት አስጊ ሁኔታ ተፈጥሯል።

የሀገራችን ተጨባጭ ሁኔታ ፓርቲዎ እና መንግስትዎ እናሳካለን ብለው ለህዝብ ከሚነግሩት እውነተኛ የብልጽግና ጉዞ እየተለየ መጥቷል። 

ለም መሬት እና ለሌሎች የሚተርፍ ወንዞች ያላት ሀገራችን ለበርካታ ልጆቿ የቀን ጉርስ ማቅረብ ተስኗታል።

በቅዱሳን መጽሀፍት የሰላም እና የፍትህ ምድር በመባል የምትታወቀው ሀገር ሰላም እና ፍትህ ርቋታል።

ለዓለም ተምሳሌት የሚሆን የአብሮነት እና የመተሳሰብ ባህል የነበራቸው ባለ ብዙ ቀለም ህዝቦች በመካከላቸው መተማመን ቀንሶ እርስ በርስ እየተጠራጠሩ መኖር ጀምረዋል።

በዜጎች ፊት ደስታ እና ተስፋ እየራቀ መጥቷል፣ ስጋት በኢትዮጵያ ሰማይ ነግሷል። ማህበራዊ፣ ኢኮኖሚያዊ እና ፖለቲካዊ ችግሮቻችን ልንሸፋፍናቸው ከማንችልበት ደረጃ ላይ ደርሰዋል። 

እንደ ሀገር የገጠሙንን ችግሮች በቅንነት፣ ከፖለቲካ ርእዮት እና ወገንተኝነት ወጥተን በሀገር ልጅነት ስሜት ተወያይተን እና ተጋግዘን ለመፍታት ጊዜ እና ታሪክ አንድ ተጨማሪ እድል ሰጥቶናል።

2015 ተገባዶ አዲስ አመት ለመቀበል ቀናት በቀሩበት ወቅት፣ ሁላችንም ያለፉ ስኬቶቻችንን እና ስህተቶቻችንን ቆም ብለን ልናስተውል ይገባል።

2015ን አገባደን አዲስ ዘመን ለመቀበል እየተሰናዳን ባለንበት ወቅት፣ በተለይም ባለፉት አምስት አመታት በሀገራችን የተከሰቱ እጅግ አውዳሚ ጦርነቶች እና ግጭቶች ቆመው ሰላም የሰፈነባት ሀገር ለመፍጠር ሁላችንም ቃል ልንገባ ይገባል። ይህን አለማድረግ ሁላችንንም በታሪክ ተጠያቂ ያደርገናል። 

ሀገራችን ካለችበት ውስብስብ ቀውስ እንድትላቀቅ፣ ህዝባችንም ሰቅፎ ከያዘው ዘርፈ ብዙ ችግር እንዲላቀቅ ማድረግ የሁላችንም የጋራ ኃላፊነት ቢሆንም፣ #የመንግስት ድርሻ ከፍተኛ ነው።

በየደረጃው ያሉ የመንግስት አካላት ሀገራችን ካለችበት ችግር እንድትላቀቅ ኃላፊነት እና ተጠያቂነት ያለባቸው ሲሆን፣ የመንግስት የአስፈጻሚ አካል መሪ በመሆን የእርስዎ የግል ኃላፊነት እና ተነሳሽነት እጅግ ከፍተኛ እንደሆነ በታላቅ ትህትና እና ወንድማዊ ስሜት ላስታውሶት እወዳለሁ። "

(ሙሉ የደብዳቤያቸው ቃል ከላይ ተያይዟል)

@tikvahethiopia

#ኢትዮጵያ

መንግሥት ነፍጥ አንግበው ከሚፋለሙ ኃይሎች ጋር ለመነጋገር ተነሳሽነቱን እንዲወስድ እና የሰላም ጥሪ እንዲያደርግ የነእፓ ሊቀመንበር ዶ/ር አብዱልቃድር አደም አዲሱን ዓመት 2016 ተንተርሶ ለጠቅላይ ሚኒስትሩ በፃፉት ግልፅ ደብዳቤ ጠይቀዋል።

" ሰላም የሁሉ ነገር መሰረት ነው " ያሉት ዶ/ር አብዱልቃድር " በሁሉም የሀገራችን አካባቢዎች ያሉ ግጭቶች በሰላማዊ መንገድ ይፈቱ ዘንድ መንግስት በሆደ ሰፊነት ዳግም የሰላም እጁን በመዘርጋት ነፍጥ አንግበው ከሚፋለሙ ኃይሎች ጋር ለመነጋገር ተነሳሽነቱን እንዲወስድ እና የሰላም ጥሪ እንዲያደርግ " ሲሉ ጠይቀዋል።

ሌላው ሊቀመንበሩ ህዝብን እየፈተነ ላለው ከፍተኛ የኑሮ ውድነት መንግሥት መፍትሄ እንዲያበጅ ጠየቀዋል።

" የዜጎቻችንን ህይወት እጅግ ከባድ ያደረገው የኑሮ ውድነት ቀንሶ፣ ዜጎች ቢያንስ መሰረታዊ ፍላጎቶቻቸው ተሟልተው መኖር ይችሉ ዘንድ፦
- የመንግስት የወጪ ቅደም ተከተል የሀገርን እና የዜጎችን አንገብጋቢ ችግሮች ያማከሉ እንዲሆን፤
- የመንግስት የገንዘብ እና የፊስካል ፖሊሲዎች የዜጎችን የኑሮ ሸክም ለማቅለል በሚያስችል መልኩ እንዲከለሱ " ጥያቄ አቅርበዋል።

በተጨማሪ ሊቀመንበሩ በህግ ቁጥጥር ስር ለሚገኙ ወገኖች " መንግስታዊ ይቅርታ " እንዲደረግ ጠይቀዋል።

" ሀገር የሚቆመው በመተዛዘን፣ በፍቅር እና በይቅርታ ነው። " ያሉት ዶ/ር አብዱልቃድር ፤ " በተለያዩ ምክንያቶች ተጠርጥረው በህግ ቁጥጥር ስር ለሚገኙ ወገኖች መንግስታዊ ይቅርታ በማድረግ፣ እጅግ የተካረረው የሀገራችን ፖለቲካ እንዲረግብ፣ ህዝባችንም የእርቅ እና የሰላም አየር እንዲተነፍስ መንግስት የይቅርታ እጁን እንዲዘረጋ " ሲሉ ጠይቀዋል።

እንዲሁም ጠቅላይ ሚኒስትሩ በመንግስት ተቋማት ውስጥ ሀገር እና ህዝብ የሰጣቸውን ኃላፊነት በመካድ እና ስልጣናቸውን መከታ በማድረግ፣ በብልሹ አሰራር በዜጎች ላይ የከፋ አስተዳደራዊ በደል በሚፈጽሙ፣ የሀገርን ሀብት እና ንብረት በሚመዘብሩ፣ #የመንግስት_ሹመኞች እና ግበረ አበሮቻቸው ላይ ስር ነቀል እና የማያዳግም እርምጃ በመውሰድ ሀገርን እና ዜጎችን እንዲታደጉ ዶ/ር አብዱልቃድር አደም ጥያቄያቸውን አቅርበዋል።

@tikvahethiopia

#GERD🇪🇹

ኢትዮጵያ በትላንትናው ዕለት አራተኛውን ዙር የውሃ ሙሌት ማጠናቀቋን በይፋ ማሳወቋ ይታወሳል።

የውሃ ሙሌቱን በተመለከተ የኢትዮጵያ ተደራዳሪ ቡድን መሪና በአሜሪካ የኢትዮጵያ አምባሳደር ዶ/ር ኢንጂነር ስለሺ በቀለ ፤ የውሃ ሙሌት ስራው በታችኛው ተፋሰስ አገራት ላይ ምንም አይነት ጉዳት በማያደርስ መልኩ መከናወኑን መግለፃቸው አይዘነጋም።

በተለይ በዘንድሮው ክረምት በግብጽ የሚገኘው የአሰዋን ግድብ ከበቂ በላይ ውሃ በመያዙ ምክንያት በግድቡ ማስተንፈሻ አማካኝነት ውሃ የማፋሰስ ስራ ሲያከናወን መቆየቱን በመጠቆም ታላቁ የህዳሴ ግድብ የሶስቱ አገራት የትብብር ምንጭ ከመሆን ባሻገር በታችኛው ተፋሰስ አገራት የሚያስከትለው ጉዳት እንደሌለ በተግባር ያመላከተ ስለመሆኑ አብራርተዋል።

ግብፅ ግን በግድቡ ውሃ ሙሌት ዜና መበሳጨቷን የሚገልፅ መግለጫ በውጭ ጉዳይ ሚኒስቴሯ በኩል አውጥታለች።

ኢትዮጵያ የግድቡን ውሃ ሙሌት ያከናወነችው መጋቢት 14፣ 2007 ዓ/ም ላይ በግብፅ ፣ ኢትዮጵያ ፣ ሱዳን የተፈረመውን የመርሆዎች ስምምነት በሚጥስ ሁኔታ ነው ብላለች ግብፅ።

" በተፈራረምነው የመርህዎች ስምምነት መሠረት በግድቡ አሞላል እና ኦፕሬሽን ላይ አስገዳጅ ስምምነት ሳይደረስ የውሃ ሙሌት ማድረግ የተከለከለ ነው " ስትል ገልጻለች።

" የኢትዮጵያ የአንድ ወገን እርምጃ በዓለም አቀፍ ሕግ መርሆዎች የተረጋገጡትን የታችኛው ተፋሰስ አገራትን ጥቅምና መብት እንዲሁም የውሃ ደኅንነታቸውን ያላገናዘበ ነው "  ብላለች።

በሥልጣን ሹኩቻ በርስ በርስ ጦርነት ውስጥ የገባችው የታችኛው ተፋሰስ አገር ሱዳን የ4ኛው ዙር የውሃ ሙሌትን በተመለከተ እስካሁን ያለችው ነገር የለም።

ኢትዮጵያ፣ ሱዳን እና ግብፅ የሕዳሴ ግድብ ውሃ አሞላል እና ኦፕሬሽንን በተመለከተ በአዲስ አበባ፣ ካይሮ እና ካርቱም ተደጋጋሚ ድርድሮችን ያደረጉ ቢሆንም እስካሁን ከስምምነት መድረስ ሳይችሉ ቆይተዋል።

በቅርቡም ለሁለት ዓመት ያህል ተቋርጦ የቆየው ድርድር በነሐሴ ወር አጋማሽ ላይ በካይሮ ተካሂዶ ያለውጤት ተበትኗል። ይህ ውይይት በመስከረም 2016 በኢትዮጵያ እንዲቀጥል ከስምምነት ላይ ተደርሷል።

ኢትዮጵያ የውሃ ሙሌቱ እንዲሁም አጠቃላይ የግድቡ ግንባታ፣ በታችኛው የተፋሰስ አገራት ላይ ምንም አይነት ጉዳት እንደማያደርስ በተደጋጋሚ ማሳወቋ ይታወቃል።

@tikvahethiopia

" በ26 ቀበሌዎች ድርቅ ቢከሰትም እስከ ዛሬ በተጨባጭ የተሰጠ ድጋፍ የለም " - የዋግ ኸምራ ብሔረሰብ አስተዳደር የአደጋ መከላከልና ምግብ ዋሰትና ጽ/ቤት

በዋግ ኽምራ ብሔረሰብ አስተዳደር በሦስት ወረዳዎች በሚገኙ 26 ቀበሌዎች ድርቅ ቢከሰትም ከመንግሥትም ሆነ ከተለያዩ የተራድዖ ድርጅቶች እስካሁን (ይህ ዘገባ እስከተጠናቀረበት ጊዜ ድረስ) ድጋፍ እንዳልልተገኘ የዞኑ አደጋ መከላከልና ምግብ ዋስትና ጽሕፈት ቤት ለቲክቫህ ኢትዮጵያ ገልጿል።

የዞኑ አደጋ መከላከልና ምግብ ዋስትና ጽሕፈት ቤት ኃላፊ አቶ ምህረት መላኩ በሰሃላ ሰየምት፣ ዝቋላ እንዲሁም በጻግብጅ ወረዳዎች ድርቅ ቢከሰትም " እስከ ዛሬ በተጨባጭ የተሰጠ ድጋፍ የለም " ብለዋል።

ድርቁ የተከሰተው በዋግ ኸምራ ብሔረሰብ አሰተዳደር ፦
- በሰሃላ ወረዳ በሙሉ (13 ቀበሌዎች)፣
- በዝቋላ ወረዳ (7 ቀበሌዎች)፣
- በአበርገሌ ወረዳ (6 ቀበሌዎች) አጠቃላይ በ26 ቀበሌዎች መሆኑን አቶ ምህረት አክለዋል።

በሦስቱ ወረዳዎች ተከሰተ ለተባለው ድርቅ ምክንያቱን ሲያብራሩም ፤ " የ2015 ክረምት ዝናብ ስርጭቱ ፣ ምንም አለመዝነቡ፣ ዘግይቶ መጀመር ፣ ጀምሮ ማቋረጥ " ሲሉ ገልጸውታል።

ጽሕፈት ቤቱ እንደገለጸው ከሆነ " ወደ 1,236 የተለያዩ እንሰሳት " ሞተዋል።

የጽሕፈት ቤቱ ኃላፊ " ሞቱና ችግሩ እየሰፋ ነው።  እስከ ዛሬ በተጨባጭ የተሰጠ ድጋፍ የለም። የሚሰሩ ቅድመ ዝግጅቶች ግን አሉ ወደ ተግባር ሲቀየሩ እንገልፃለን " ሲሉ አስረድተዋል።

በ2015 ዓ.ም የክረምት ወቅት ምን ባለመዝነቡ ምን ያህል ሄክታር መሬት ሰብል እንተበላሸ ከቴክቫህ ለቀረበላቸው ጥያቄ በሰጡት ምላሽ አቶ ምህረት፣ "የዝናብ ሰርጭት መቋረጡ ምክኒያት 7,360.5 ሄክታር የተለያዩ ሰብሎች ደርቀዋል " ብለዋል።

በሺሕዎች የሚቆጠሩ የዕለት ድጋፍ የሚሹ ወገኖች ድጋፍ እንዳላጉኙ፣ በመቶ ሺሕዎች የሚቆጠሩ እንስሳት ድርቁ  እንደተጋረጠባቸው ለማወቅ ተችሏል።

በ2014 የክረምት ወቅት በዞኑ በሚገኙ በሰቆጣ፤ ዝቋላ፣ ጻግብጅ፣ አበርገሌ ወረዳዎች የእርሻ መሬቶች በወቅቱ በነበረው የሰሜኑ ጦርነት በሰብል እንዳልተሸፈኑና ቡቃያዎችም ከጥቅም ውጪ እንደሆኑ የዞኑ ግብርና መምሪያ በምስከረም ወር 2015 ዓም መግለጹ ይታወሳል።

መረጃውን ያዘጋጀው የአዲስ አበባ የቲክቫህ አባል ነው።

@tikvahethiopia