#Update

" ሕዝበ ሙስሊሙ ያቀረባቸውና የሚያቀርባቸው የመስጂድ ጥያቄዎች #በፕላኑ መሠረት ምላሽ ይሰጣል " - አቶ ሽመልስ አብዲሳ

ከኢትዮጵያ እስልምና ጉዳዮች ጠቅላይ ምክር ቤት ጋር በተደረገው ውይይት በክልሉ ፕሬዝዳንት አቶ ሽመልስ አብዲሳ በኩል የተጠቀሱት ነጥቦች የሚከተሉት ናቸው ፦

1. ቀደም ብሎ በጉዳዩ ላይ ዉይይት አለመደረጉ ስህተት መሆኑን ገልጸዋል።

2. በተፈጠረው ሁኔታ ሕይወታቸውን ላጡት ሙስሊሞች ማዘናቸውን ገልጸዋል።

3. የሸገር ከተማ የሃይማኖትን እሴትን መሠረት አድረጎ እንደሚገነባ እና የእሰልምናን ጨምሮ የሌሎችም ቤተእምነቶችም ተቋማት በብዛት በሸገር ከተማ ፕላን ዉስጥ እንደተካተቱ።

4. አስፈላጊውን የቤተእምነት መሥሪያ መሬቶችን በፕላኑ መሠረት ለምዕመኑ እንደሚሰጥና በቆርቆሮ ሳይሆን የከተማዋን ፕላን የሚመጥን በርካታ ዘመናዊ መስጊዶች በከተማው እንዲሰሩ እንደሚፈልጉ።

5. በሸገር ከተማ ላይ በሀገር ደረጃ ሊጠቀስ የሚችል ትልቅና ዘመናዊ መስጂድና ለሌሎች እምነት ተቋማት መሥሪያ ቦታ እንደሚሰጥ።

6. በሸገር ከተማ ለኢስላማዊ ዩኒቨርሲቲ ግንባታ የሚሆን መሬት እንደሚሰጥ።

7. ሸገር ከተማ ከ20 እስከ 30 ሚሊዮን ነዋሪዎች ያላት፥ ዘመናዊና በፕላን ብቻ ግንባታ የሚካድባት ከተማ ሆኖ ለመግንባት ሕግ ወጥ ግንባታን መከላከል፥ የተገነቡትን #ማፍረስ_እንደሚቀጥል ለዚህ ሂደት የእምነት ተቋማት ተባባሪ እንዲሆኑ እንፈልጋለን ብለዋል።

8. አዲሱ የሸገር ከተማ ፕላን ወደ ተግባር እስኪገባ ድረስ ሙሉ ለሙሉ መኖሪያ ቤቶች ባልፈረሱባቸው አከባቢዎች ለሚኖሩ ሙስሊሞች በጊዜያዊነት የሚሰግዱባቸው መስጊዶች የኦሮሚያ ክልል መጅሊስና የሸገር ከተማ አስተዳደር በጋራ በመጋገር መስጂድ መሥሪያ ቦታ እንዲያዘጋጁ።

9. የሸገር ከተማ ማስተር ፕላን በመጪው ሀምሌ ወር ወደ ተግባር ማዋል ከመጀመሩ በፊት በማስተር ፕላኑ ለእምነት ተቋማት የተዘጋጀውን ስፍራዎችን የሙስሊም ተወካዮች ከክልሉ መንግስት ጋር በጋራ ቀድመው ፕላኑን እንዲመለከቱና እንዲያረጋግጡ፡፡

10. በሸገር ከተማ ሕዝበ ሙስሊሙ ያቀረባቸውና የሚያቀርባቸው የመስጂድ ጥያቄዎች በፕላኑ መሠረት ምላሽ እንደሚሰጥ።

11. ሸገር ከተማን ጨምሮ በመላው ኦሮሚያ ክልል ከዚህ ቀደም ሲደረግ እንደነበረው የእምነት ተቋማት እና የመቃብር ሥፍራ መስጠት እንደሚቀጥል።

12. በሸገር ከተማ ዉስጥ ካሉት ስምንት መቶ (800) የሁሉም እምነት ተቋማት መካከል 656(ስድስት መቶ ሀምሳ ስድስት) የሚሆኑት ከፕላን ዉጭ የተሠሩ በመሆናቸው እነዚህን የሚገነባውን ከተማ ፕላን የማይመጡትን የተለያዩ ቤተእምነቶችን ወደ በሕጋዊና ከተማውን በሚመጥኑ ተቋማት ለመተካት የሚደረገውን ሂደት የኦሮሚያ ክልል መጅሊስም ባለበት የኦሮሚያ ክልል የሃይማኖት ተቋማት ጉባኤ አቅሙን በማጠናከር በዉይይት የእምነት ተቋማቱ ራሳቸው መፍረስ ያለባቸውን እንዲያፈርሱ እንጂ ከአሁን በኋላ መንግስት በራሱ ማፍረስ እንደሚያቆም ገልጸዋል።

ምንጭ፦ የኢትዮጵያ እስልምና ጉዳዮች ጠቅላይ ምክር ቤት

@tikvahethiopia

" ያለምንም ልዩነት የታሠሩ ሙስሊሞች በጠቅላላው እንደሚፈቱ እንጠብቃለን " - የኢትዮጵያ እስልምና ጉዳዮች ጠቅላይ ምክር ቤት

የታሰሩ ሙስሊሞች ያለምንም ልዩነት እንደሚፈቱ እንደሚጠብቅ የኢትዮጵያ እስልምና ጉዳዮች ጠቅላይ ምክር ቤት ገልጿል።

ካለፉት ሁለት ሳምንታት ጀምሮ እስከ ትናንት ድረስ የታሠሩትን ሙስሊሞችን መፈታትን አስመልከቶ ዛሬ ከቀኑ ዘጠኝ ሰዓት ጀምሮ ከፌደራልና አዲስ አበባ ፖሊስ አመራሮች ጋር ዉይይት እንደሚደረግ ዛሬ በተሰጠው መግለጫ ላይ ተነግሯል።

በዚህም ውይይት ፤ ያለምንም ልዩነት የታሠሩት ሙስሊሞች በጠቅላላው እንደሚፈቱ እንደሚጠብቅ ጠቅላይ ምክር ቤቱ ገልጿል።

በሌላ በኩል ፤ ባለፉት ሁለት ሳምንታት በአንዋር እና ኑር መስጂድ በሸገር ከተማ የፈረሱትን መስጂዶችን በመቃወም ላይ እያሉ የተገደሉ ሙስሊሞችን ቤተሰቦችን አላህ መጽናናቱን እንዲሰጣቸው ለሟቾች ደግሞ አላህ የሸሂደትነት (ሰማዕትነትን) ደረጃ እንዲለግሳቸው ምክር ቤቱ ተማፅኗል።

በሸገር ከተማ በፈረሱት መስጂዶች ምትክ ከሚሠሩት መስጂዶች መካከል አንዱ የ " ሸሒዶች መስጂድ " ተብሎ እነርሱን ለማስታወስ እንደሚሰየም ተገልጿል።

በመስጂዱ ቅጥር ጊቢ ዉስጥም የሟቾች ስም ዝርዝር በጉልህ በሚታይ መልኩ እንደሚፃፍ ተመላክቷል።

@tikvahethiopia

በነዳጅ ማደያዎች ለዲጂታል ነዳጅ ግብይት ድጋፍ ሲያደርጉ የነበሩ ባለሙያዎች እንዲነሱ ውሳኔ ተላልፏል።

በነዳጅ ማደያዎች ለዲጂታል ነዳጅ ግብይት ድጋፍ ሲያደርጉ የነበሩ ባለሙያዎች እንዲነሱ ውሳኔ መተላለፉን የነዳጅ እና ኢነርጂ ባለስልጣን አስታውቋል።

ዲጂታል ነዳጅ ግብይት ውሳኔ ተግባራዊ መደረጉን ተከትሎ በኢትዮጵያ ንግድ ባንክና በኢትዮ ቴሌኮም ሽያጭ ባለሙያዎችና ወኪሎች በነዳጅ ማደያዎች ግብይቱን ለማፋጠን ሲሰጥ የነበረ ድጋፍ ከዛሬ ሰኔ 1/2015 ዓ.ም ጀምሮ #እንደሚያቆሙ ባለስልጣን መ/ቤቱ አሳውቋል፡፡

የነዳጅ ግብይት በኤሌክትሮኒክስ የክፍያ ዘዴ ብቻ ከመፈፀሙ ጋር ተያይዞ አሰራሩን ለማለማመድ ሲደረግ የነበረው ድጋፍ የአሰራር ለውጥ መደረግን ተከትሎ የሚከሰቱ ችግሮችን ለማቃለል ከፍተኛ አስተዋእፆ እንደነበረው ተገልጿል።

በቀጣይ ተጠቃሚው መተግበሪያዎችን መጠቀም መለማመድና ክፍያውን በራሱ መፈጸም ለማስቻል ሲባል ድጋፍ ሲሰጡ የነበሩ አካላት እንዲነሱ የሚል ውሳኔ ተላልፏል፡፡

ምንጭ፦ የነዳጅ እና ኢነርጂ ባለስልጣን

@tikvahethiopia

አሜሪካ በኢትዮጵያ የምታደርገው የምግብ እርዳታ እንዲቋረጥ ወሰነች።

የአሜሪካ መንግሥት የዓለም አቀፍ ልማት ተራድኦ ድርጅት (USAID) በኢትዮጵያ የሚያቀርበው የምግብ እርዳታ " ለተረጂዎች ሳይደረስ ሌላ ጥቅም ውሏል " በሚል እንዲቋረጥ መወሰኑን አስታውቋል።

USAID እዚህ ውሳኔ ላይ የደረሰው " ለኢትዮጵያ ሕዝብ መቅረብ የነበረበት የምግብ እርዳታ በከፍተኛ መጠን እና በተቀናጀ ሁኔታ ከታቀደለት አላማ ውጪ ጥቅም ላይ በመዋሉ " መሆኑን ገልጿል።

ውሳኔው ከኢትዮጵያ መንግሥት ጋር በመቀናጀት የተወሰደ መሆኑን የገለጸው የተራድኦ ድርጅቱ፣ ይህንን የምግብ እርዳታ አቅርቦትን ወደ ሌላ አቅጣጫ በማዞር ተሳታፊ የሆኑ ወገኖችን እንዳልጠቀሰ ሮይተርስ ዘግቧል።

ድርጅቱ " የተደረገውን አገር አቀፍ ቅኝት ተከትሎ USAID በእርዳታ አቅርቦቱ ላይ ለውጥ እስኪደረግ ድረስ በዚህ ሁኔታ መቀጠል ስለማይቻል፣ አስቸጋሪ ነገር ግን አስፈላጊ ውሳኔ አሳልፈናል " ብሏል።

ባለፉት ሁለት ወራት የተካሄደ ምርመራ በለጋሾች የተገዛ የምግብ እርዳታ ከታለመለት አላማ ውጪ መዋሉን እና ለገበያ መቅረቡን እንዲሁም በአንዳንድ ሁኔታዎችም #ወደ_ውጪ_አገራት መላኩን ደግሞ ብሉምበርግ ተመለከትኩት ያለው ሰነድ አሳይቷል።

ከጥቂት ወራት በፊት ዩኤስኤአይዲ እና የዓለም ምግብ ፕሮግራም በተመሳሳይ ሁኔታ ትግራይ ውስጥ ስርቆት ተከስቷል በሚል በክልሉ ያቀርቡ የነበረውን የምግብ እርዳታ ማቋረጣቸው ይታወሳል።

በሌላ በኩል ፥ ሳዑዲ አረቢያ ውስጥ እየተካሄደ በሚገኝ ስብሰባ ላይ በተጓዳኝ የአሜሪካው የውጭ ጉዳይ መሥሪያ ቤት ኃላፊ አንተኒ ብሊንከን ከኢትዮጵያው የውጭ ጉዳይ ሚኒስትር ደመቀ መኮንን ጋር በዚሁ ጉዳይ ላይ መነጋጋራቸውን የአሜሪካ ውጭ ጉዳይ መ/ቤት ባወጣው መግለጫ አሳውቋል።

ሁለቱ የውጭ ጉዳይ ሚኒስትሮች ከተነጋገሩባቸው ጉዳዮች መካከል የእርዳታ ምግብ ከታለመለት አላማ ውጪ መዋሉ አንዱ ሲሆን፣ የኢትዮጵያ መንግሥት በጉዳዩ ላይ ሙሉ ምርመራ እንዲደረግ ቁርጠኛ በመሆኑ ብሊንከን አድናቆታቸውን ገልጸዋል።

የአሜሪካ የዓለም አቀፍ ልማት ተራድኦ ድርጅት ቃል አቀባይ የእርዳታ አቅርቦቱ ሥርዓት አስተማማኝ መሆኑ ከተረጋገጠ እርዳታውን መልሶ እንደሚጀመር መግለጻቸውን በመግለጫው ላይ ተካቷል።

መረጃው የቢቢሲ/ሮይተርስ/ብሉንበርግ ነው።

@tikvahethiopia

" በእስር ላይ የሚገኙ ሙስሊሞች በሙሉ ከእስር በሚፈቱበት አግባብ ላይ ስምምነት ተደርሷል " - ኡስታዝ አቡበከር አህመድ

ዛሬ ከፌደራል እና አዲስ አበባ ፖሊስ ኮምሽነሮች ጋር ፍሬያማ ውይይት ማድረግ መቻሉ ተገልጿል።

የኢትዮጵያ እስልምና ጉዳዮች ጠቅላይ ምክር ቤት የስራ አመራሮች ሼይኽ ሁሴን ጨምሮ የፕሬዝዳንቱ አማካሪዎች ኡስታዝ አቡበክር አህመድ ፣ ኡስታዝ አህመዲን ጀበል ፣ ኡስታዝ ካሚል ሸምሱ እንዲሁም ከኦሮሚያ መጅሊስ ሼይኽ ሚስባን ጨምሮ ሌሎች አመራሮች ከፌደራል ፖሊስ ኮሚሽን ኮሚሽነር ደመላሽ ገብረ ሚካኤል  ጋር ውጤታማ ውይይት ተካሂዷል።

በውይይቱ ላይ የፈደራል ፖሊስ ኮሚሽን ዋና እና ምክትል ኮሚሽነሮችን ጨምሮ የአዲስ አበባ ፖሊስ ኮሚሽን ኮሚሽነር ጌቱ አርጋው እና ከፍተኛ የፀጥታ ሐይሉ አመራሮች ተካፍለዋል።

በውይይቱ ላይ በሸገር ከተማ የፈረሱ መስጂዶችን ተከትሎ በሁለት ጁምዓዎች በህዝበ ሙስሊሙ ላይ የተወሰዱት ኢ ሰብዓዊ እና ከልክ ያለፉ የኃይል እርምጃዎች ተቀባይነት የሌላቸው እና ህዝበ ሙስሊሙን እጅግ ያሳዘነ መሆኑ ተገልፆል።

ሀገር ወዳድ እና ሰላማዊ ለሆነው ህዝበ ሙስሊም ህጋዊ ጥያቄ በሰላማዊ መንገድ በማቅረቡ በምላሹ በፀጥታ ኃይሉ የተወሰደው የኃይል እርምጃ  በምንም መመዘኛ የሚገባው እንዳልነበር እና ጥፋት እንደሆነ ለፀጥታ አመራሮቹ ማብራሪያ ተሰጥቷቸዋል።

በፀጥታ ኃይሉ በኩልም የሙስሊሙን ህጋዊ ጥያቄ ሽፋን በማድረግ የራሳቸው አጀንዳ ለማራመድ የሞከሩ ኃይሎች መኖራቸውን መረጃ እንዳላቸው በማንሳት የነበራቸውን ስጋት ገልፀዋል።

በውይይቱ መቋጫ ላይ በሁለቱ ጁምዓዎች በተወሰደው የኃይል እርምጃ በእስር ላይ የሚገኙት ሙስሊሞች በሙሉ ከእስር በሚፈቱበት አግባብ ላይ ከስምምነት ላይ መድረስ መቻሉ ተገልጿል።

ከህግ አግባብ ውጪ የኃይል እርምጃ የወሰዱ የፀጥታ ሀይሉ አባላትም በህግ  አግባብ እንዲጠየቁ ኮሚቴ ተዋቅሮ የማጣራቱ ስራ እየተሰራ እንደሚገኝ ተመላክቷል።

ህዝበ ሙስሊሙ ያቀረባቸው ህጋዊ ጥያቄዎቹ በኦሮሚያ ክልል መንግስት በኩል መፍትሄ ለመስጠት ቃል በመገባቱ እና ይህም መፍትሄ ተግባራዊ እስኪሆን ድረስ ህዝበ ሙስሊሙ በተለመደው ጨዋነቱ በትዕግስት በመጠበቅ ከመሪ ድርጅቱ መጅሊሱ ጎን በመቆም በተቋሙ የተሰጡትን መመሪያ እና የመፍትሄ አቅጣጫ በመተግበር እና በዱዓ በማገዝ የበኩሉን እንዲወጣ ጥሪ ቀርቧል።

ከፀጥታ አመራሩ ጋር የተደረገው ፍሬያማ ውይይት በመግባባት የተቋጨ ሲሆን በቀጣይ ባሉ ጁምዓዎች ላይ ከመቼውም ጊዜ በላይ ህዝበ ሙስሊሙ አንድነቱን በማጠናከር እና በዱዓ በመበርታት መደበኛ የጁምዓ ሰላቱን ብቻ እንዲያከናውን ጥሪ ቀርቧል።

በሸገር ከተማ መስጂድ ፈረሳ ጋር በተያያዘ ሙስሊሙ ማህበረሰብ ያቀረበው ጥያቄ የመፍትሄ አቅጣጫ የተቀመጠለት በመሆኑ በሁሉም መሳጂዶች ከቁኑት ዱዓ ውጪ  የተቃውሞ እንቅስቃሴዎች አስፈላጊ ባለመሆናቸው ህዝበ ሙስሊሙ የተለመደ ታዣዥነቱን በማሳየት የጁምዓ ሰላቱን ሰግዶ ብቻ መመለስ እንዳለበት ማሳሰቢያ ተላልፏል።

Via ኡስታዝ አቡበከር አህመድ

@tikvahethiopia

#AddisAbaba

የዛሬው የጁምዓ ሶላት ያለምንም የፀጥታ ችግር በሰላም ተሰግዶ ህዝበ ሙስሊሙም ወደየቤቱ መግባቱ ተገልጿል።

ባለፉት ሁለት የጁምዓ ሶላት ወቅቶች ላይ በሸገር ከተማ ውስጥ ከተፈፀመው የመስጂድ ፈረሳ ጋር በተያያዝ የፀጥታ ኃይሎች በወሰዱት እርምጃ የሰው ህይወት ማለፉና ጉዳት መድረሱ የሚዘነጋ አይደለም።

ይህንም ተከትሎ የኢትዮጵያ እስልምና ጉዳዮች ጠቅላይ ም/ቤት ከኦሮሚያ ክልላዊ መንግስት እንዲሁም ከፌዴራል ፖሊስና አዲስ አበባ ፖሊስ ጋር ተከታታይ ውይይቶች ማድረጉና መግባባት ላይ መደረሱ የሚታወቅ ነው።

በሸገር ከተማ ከመስጂድ ፈረሳ ጋር በተያያዘ ሙስሊሙ ማህበረሰብ ያቀረበው ጥያቄ የመፍትሄ አቅጣጫ የተቀመጠለት በመሆኑም በሁሉም መስጂዶች ከቁኑት ዱዓ ውጪ የተቃውሞ እንቅስቃሴዎች አስፈላጊ ባለመሆናቸው ህዝበ ሙስሊሙ የተለመደ ታዣዥነቱን በማሳየት የጁምዓ ሰላቱን ሰግዶ ብቻ መመለስ እንዳለበት ትላንት ማሳሰቢያ መተላለፉት ይታወቃል።

በዚህም ዛሬ የነበረው የጁምዓ ሶላት በሰላም ተከናውኖ ህዝበ ሙስሊሙ ወደቤቱ ገብቷል።

@tikvahethiopia

" ህዝበ ሙስሊሙ ሁልጊዜም ሰላም ፈላጊ እና የሰላም ዘብ መሆኑን እንደወትሮ ሁሉ ዛሬም አስመስክሯል " - ኡስታዝ አቡበከር አህመድ

በታላቁ አንዋር መስጂድ ህዝበ ሙስሊሙ እንደወትሮ ሁሉ የጁምዓ ሰላቱን ሰግዶ በሰላም ወደ መጣበት መመለሱን ኡስታዝ አቡበከር አህመድ ገልጸዋል።

" ባለፉት ሁለት ጁምዓዎች በተፈጠሩ ችግሮች በርካታ ሙስሊሞች ከህይወት መስዋትነት አንስቶ ብዙ ዋጋ ከፍለዋል " ያሉት ኡስታዝ አቡበከር " የነሱ መስዋትነት ሁልጊዜም በልባችን ውስጥ ሲታወስ የሚኖር ነው " ብለዋል።

" ህዝበ ሙስሊሙ ሁልጊዜም ሰላም ፈላጊ እና የሰላም ዘብ መሆኑን እንደወትሮ ሁሉ ዛሬም አስመስክሯል " ያሉት ኡስታዝ አቡበከር " ለህዝበ ሙስሊሙ ሰላም የእምነቱ መርህ እና መመሪያው በመሆኑ ሰላሙን ለመጠበቅ ሁሌም ዝግጁ እና ንቁ ነው " ሲሉ ገልጸዋል

በዛሬው ጁምዓ ቁጥሩ ከፍተኛ የሆነ የመንግስት የፀጥታ ኃይል በመስጂዱ ዙሪያ ለጥበቃ በመሰማራቱ በህዝበ ሙስሊሙ ዘንድ ስጋት ፈጥሮ የነበረ ሲሆን ከሚመለከተው የፀጥታ አመራሮች ጋር በመነጋገር ዙሪያውን ከቦ የነበረው የፀጥታ ኃይል ወደኃላ እንዲመለስ በማድረግ ህዝበ ሙስሊሙ ፀጥታውን በራሱ በምእመናን እና በአስተባባሪዎቹ እንደወትሮ በማስጠበቅ የጁምዓ ሰላቱ በሰላም ተሰግዶ ማጠናቀቅ መቻሉ ተገልጿል።

ኡስታዝ አቡበከር ፤ የዛሬው ጁምዓ በሰላም እንዲጠናቀቅ አስተዋፅኦ ላበረበተው ህዝበ ሙስሊም እንዲሁም የፀጥታ መዋቅሩ በድርሻው ህዝበ ሙስሊሙ በራሱ ሰላሙን ማስጠበቅ እንደሚችል እምነት በማሳደር የበኩላቸውን በመወጣታቸው ምስጋና አቅርበዋል።

በቀጣይም የፀጥታ ኃይሉ በትብብር እና በመናበብ ከህዝበ ሙስሊሙ እና ከአመራሩ ጋር ተቀራርቦ በመስራት የጋራ ሰላማችንን ማስጠበቅ እንደሚቻል ከዛሬው ጁምዓ ትምህርት መውሰድ ይቻላል ብለዋል።

@tikvahethiopia