" ወላድ እናቶችን እንኳ ወደ ጤና መዕከል ማድረስ ከብዷል " - የቲክቫህ ቤተሰብ አባላት

በፎቶው የሚታየው ከስልጤ ዞን መዲና ወራቤ ከተማ አልቾ ውሪሮ ወረዳን አቋርጦ ቦዠባር ድረስ ሁለት ጊዜ ሊሰራ ተጀምሮ የተቋረጠ የመንገድ ፕሮጀክት ነው።

መንገዱ ያለበት ሁኔታ አሁን ላይ ማህበረሰቡን ለአስቸጋሪ ሁኔታ እየዳረገው ሲሆን እጅግ ከመቆፋፈሩና ከመቆራረጡ የተነሳ ወላድ እናቶችን እንኳ ወደ ዞን ጤና ማዕከል መውሰድ የከበደበት ሁኔታ ተፈጥሯል።

የመጀመሪያው ተቋራጭ ውሉ እንዲቋረጥ ተደርጎ ሌላ ለሁለተኛ ተቋራጭ ስራው ቢሰጥም በገባው ውል መሰረት መስራት ባለመቻሉ እንዲሁም ባሳየው የአፈፃፀም ዝቅተኝነት ከጥቂት ወራት በፊት በኢትዮጵያ መንገዶች አስተዳደር ኮንትራቱ ተቋርጦ እንዲወጣ ተደርጓል።

ይህ ከሆነ በኃላ ስራው በአጭር ጊዜ ውስጥ እንደሚጠናቀቅ እና ማህበረሰቡም እፎይ እንደሚል ቢነገረም የታየት አዲስ ነገር የለም።

የአካባቢው የቲክቫህ ኢትዮጵያ ቤተሰብ አባል ሰይፈዲን በመንገዱ ጉዳይ " ማህበረሰቡ በትዕግስት የመንግስትን አፋጣኝ ምለሽ ቢጠብቅም ጉዳዩ የውሃ ሽታ ሁኖ ቀርቷል " ብሏል።

" ይባስ ብሎም ከክረምቱ ጋር ተያይዞ መንገዱ ምንም አይነት ተሽከርካሪ ማንቀሳቀስ በማይቻልበት ሁኔታ ላይ ደርሷል " ሲል አክሏል።

የአካባቢው ማህበረሰብ ለዚህ የመንገድ ፕሮጀክት መንግሥት ትኩረት በመስጠት መፍትሄ እንዲፈልግ እና በአፋጣኝ ስራው እንዲጠናቀቅ ድምፃችን ይሰማ ብሏል።

ሰይፈዲን በ @tikvah_eth_BOT መልዕክት መለዋወጫ በኩል።

@tikvahethiopia

#Ethiopia🇪🇹

ዛሬ 82ኛው ዓመት የኢትዮጵያውያን አርበኞች የድል በዓል እየተከበረ ይገኛል።

የአርበኞች የድል በዓል ለምን ይከበራል ?

ጣሊያን የዓድዋን ድል ለመበቀል በሚል በጊዜው ጠቅላይ ሚኒስትሯ ቤኒቶ ሙሶሎኒ አማካኝነት፥ ከ1928 እስከ 1933 ዓ.ም ድረስ ኢትዮጵያን ወራ ነበር።

በወቅቱ የነበሩት ኢትዮጵያውያንም ወራሪውን ሀይል ለአምስት ዓመታት በጽናት ታግለው 1933 ዓ.ም ድል ነስተውታል።

የወቅቱ አርበኞቻችን ለሀገራቸው ነጻነት የከፈሉትን መስዋዕትነት እና ያስገኙትን ድል ለማሰብም ነው በየአመቱ ሚያዚያ 27 የኢትዮጵያ አርበኞች የድል በዓል የሚከበረው።

እንኳን አደረሳችሁ !

@tikvahethiopia

አርቲስት ዳዊት ፍሬው ከዚህ ዓለም በሞት ተለየ።

የክላርኔት ሙዚቃ ተጫዋቹ ዳዊት ፍሬው ከዚህ ዓለም በሞት መለየቱ ተሰማ። የአርቲስቱን ህልፈት ኤፍ ኤም አዲስ 97.1 ሬድዮ ጣቢያ ከቅርብ ወዳጆቹ ማረጋገጡን አሳውቋል።

አርቲስት ዳዊት ፍሬው ለሙዚቃ ስራ ወደ ጣሊያን ሀገር ተጉዞ እንደነበር የሬድዮ ጣቢያው ዘገባ ያለመለክታል።

ክላርኔት ተጫዋቹ እና ሙዚቀኛው ዳዊት ህይወቱ አልፎ የተገኘው #በተኛበት_ክፍል መሆኑና የጣሊያን ፖሊስ የአሟሟቱን ሁኔታ እያጣራ እንደሚገኝ ተገልጿል።

በጣሊያን የሚገኙ ኢትዮጵያዊያን እና የሞያ አጋሮቹ ከሀገሪቱ ፖሊስ ጋር ተነጋግረው የአርቲስቱን አስክሬን በሀገሩ #ኢትዮጵያ ለማሳረፍ እንቅስቃሴ መጀመራቸውን ኤፍ ኤም አዲስ 97.1 አሳውቋል።

ዳዊት ፍሬው የክላርኔት የሙዚቃ መሳሪያውን እየተጫወተ የሰራው ሶስት የሙዚቃ አልበም ያለው ሲሆን የአንጋፋው ድምፃዊ ፍሬው ሀይሉ ልጅ ነው።

ከአርቲስት ዳዊት ፍሬው ስራዎች መካከል አንዱ " ጥላ ከለላዬ " የተሰኘው በመሳሪያ የተቀነባበረ መዚቃ ሲሆን በዚሁ ስራ ይህ ስንኝ ይገኝበታል።

" ጥላ ከለላዬ ፤ #ኢትዮጵያ  ❤ሀገሬ
#ኩራት ይሰማኛል ፤ ካንቺ መፈጠሬ።

@tikvahethiopia

#ባህርዳር

የአማራ ክልል መዲና ባህር ዳር ከተማ በጀግኖች አርበኞች ስም መንገድ ሰየመች።

82ኛው የጀግኖች አርበኞች ቀን በባሕር ዳር ከተማ በልዩ ልዩ ዝግጅቶች ዛሬ ተከብሯል።

በዚህም በባሕር ዳር ከተማ " ከገጠር መንገድ እሰከ ኤርፖርት " ያለው መንገድ በጀግኖች አርበኞች ስም መሰየሙን በአማራ ክልል የጀግኖች አርበኞች ማህበር አሳውቋል።

ዛሬ በነበረው ዝግጅት የአማራ ክልል የጀግኖች አርበኞች ማህበር ፕሬዜዳንት ዳኝነት አያሌው ተከታዩን መልዕክት አስተላልዋል ፦

" ለሀገር በመስዋዕትነት  ከፍለው ሀገር ያጸኑ ጀግኖችን መዘከር ይገባል።

' ጀግናን መፍጠር ጀግናን ከማክበር ይጀምራል' የሀገርን ነጻነት፣ የሀገርን ሉዓላዊነት ያጸኑ ጀግኖቻችን እንኮራባቸዋለን፣ እናከብራቸዋለን።

የዚህ ዘመን ትውልዶች ከድል ታሪኩ በመማር በመከባበር፣ በመደጋገፍ ፣በአንድነት ሀገርን ማጽናት ይገባናል።

በአንድ የኢትዮጵያዊነት መንፈስ በመተባበር ሀገርን ማሻገር ይገባል። ' ሀገሩን የማያውቅ ከብዙ ሴቶች መካከል እናቱን ለይቶ የማያውቅ ሕጻን እንደማለት ነው ' እና ሀገራችን በምንና እንዴት እንደቆመች መረዳት ይገባናል።

በሚጠበቅብን ዘርፍ ሁሉ የአርበኝነት ሚናችን መወጣት ይገባል። "

#AMC

@tikvahethiopia

የጀርመኑ መራሄ መንግስት በኢትዮጵያ ቆይታቸው ከነማን ጋር ተገናኙ ?

የጀርመኑ መራሄ መንግስት ኦላፍ ሹልዝ  በኢትዮጵያ የስራ ገኝታቸው ከኢፌዴሪ ጠ/ሚ ዶ/ር ዐቢይ አህመድ ጋር ተገናኝተው በሁለትዮሽ ጉዳዮች ዙሪያ መክረዋል።

ሹልዝ በኢትዮጵያ ቆይታቸው ከጠቅላይ ሚኒስትሩ በተጨማሪ ከትግራይ ክልል ጊዜያዊ አስተዳደር ፕሬዜዳንት አቶ ጌታቸው ረዳ ጋር ስለመገናኘታቸው ተሰምቷል።

ከአቶ ጌታቸው ረዳ ጋር አ/አ ውስጥ በተገናኙበት በወቅት በፕሪቶሪያ የሰላም ስምምነት ሂደት ዙሪያ በቀሪ ተግባራት ፣ የተፈናቀሉ ዜጎች ወደነበሩበት መመለስ ፣ የሰብአዊ ርዳታ አቅርቦት፣ በትግራይ መልሶ ግንባታ ጉዳይ መምከራቸውን  ተዘግቧል።

@tikvahethiopia

#Sudan

የጎረቤት ሱዳን ዜጎች በሰላም እጦት ሳቢያ የገዛ ሀገራቸውን ለቀው እየተሰደዱ ይገኛሉ።

ሱዳን አሁንም በጦርነት እየታመሰች ሲሆን ተዋጊዎቹ ኃይሎች ውጊያ የማቆም ፍላጎት እያሳዩ አይደለም።

በተደጋጋሚ በተለያዩ ሀገራት ጥረት የተኩስ አቁም እንዲደረግ እንዲሁም ዳጋሎ እና አል ቡርሃን ችግሩን እንዲፈቱ ጥረት ቢደረግም ውጤት አላስገኘም።

ዛሬም በርካቶች የሱዳን ዜጎች ሀገራቸውን ጥለው እየሸሹ ናቸው። የውጭ ሀገር ዜጎችም ባገኙት አጋጣሚ ሁሉ የሱዳንን ምድር እየለቀቁ ይገኛሉ።

በሱዳን ጦርነት ምክንያት እስካሁን ወደ ኢትዮጵያ በመተማ በኩል ፤ የ61 ሀገራት ዜጎች የሆኑ 7726 ሰዎች ገብተዋል።

@tikvahethiopia

#AmharaRegion

የኢትዮጵያ ሰብዓዊ መብቶች ጉባኤ ፤ መንግስትና የሚመለከታቸው አካላት ሁሉ በአማራ ክልል ላሉ ውጥረቶች በቂ ትኩረት እንዲሰጡ ጥሪ አቀረበ።

ይህ ጥሪ ያቀረበው ዛሬ አርብ ባወጣው አስቸኳይ ጋዜጣዊ መግለጫ ነው።

(ሙሉ መግለጫው ከላይ ተያይዟል)

@tikvahethiopia