አንጋፋው የኢትዮጵያ አርቲስት ክቡር ዶ/ር አሊ ቢራ #በህይወት አለ።

በማህበራዊ ሚዲያዎች ላይ አንጋፋው የሀገራችን አርቲስት ክቡር ዶክተር አሊ ቢራ " አረፈ / ከዚህ ዓለም በሞት ተለየ " እየተባለ የሚሰራጨው መረጃ ሀሰተኛ ነው።

ክቡር ዶ/ር አርቲስት አሊ ቢራ ባጋጠመው የጤና እክል የተነሳ በአዳማ ጄነራል ሆስፒታል ለላፉት ቀናት #የሕክምና_ክትትል እየተደረገለት ይገኛል።

የ75 ዓመቱ አርቲስት አሊ ቢራ ፤ ከዚህ ቀደምም የጤና እክል አጋጥሞት በአዲስ አበባ እና አዳማ ከተሞች በሚገኙ ሆስፒታሎች የውስጥ ደዌ ህክምና ተደርጎለት ነበር።

ከዚህ ቀደም ህክምና ላይ እያለ ህይወቱ እንዳለፈ በማህበራዊ ሚዲያ ላይ ሀሰተኛ መረጃዎች ተሰራጭተው የነበረ ሲሆን በዚህ ሀሰተኛ መረጃ ቤተሰቦቹ እጅግ #መጎድታቸው እና #ማዘናቸውን መግለፃቸው ይታወሳል።

ሳናረጋግጥ የምናወራው ወሬ ምን ያህል የሰዎችን ህይወት እንደሚበጠብጥ እናውቀው ይሆን ?  ሁሉ ነገር ስርዓት አለው ፤ የሰውን ሀዘን ለማርዳት ይሄን ያህል መቸኮል ምንድነው ? ቤተሰብ ዘመድ አዝማድ ወዳጅ ይደነግጣል አይባልም ? በችኮላ እና መረጃ አደረስኩ ለማለትና ለዩትዩብ ገንዘብ መሰብሰቢያ ሲባል ያልተረጋገጠ መረጃ ማሰራጨት ፍፁም ስርዓት የጎደለው ተግባር ነው።

#ውድ_ቤተሰቦቻችን ፤ በማህበራዊ ሚዲያዎች ላይ የምትመለከቱትን ሀሰተኛ መረጃ ከማጋራት ተቆጠቡ።

@tikvahethiopia

#Update

የአሜሪካ የውጭ ጉዳይ ሚኒስትር አንቶኒ ብሊንከን ከጎረቤታችን ኬንያ ፕሬዜዳንት ዶክተር ዊሊያም ሩቶ ጋር ተወያዩ።

ውይይቱ ፤ በኢትዮጵያ እና በመላው ምስራቅ አፍሪካ ቀጠና ሰላም እና ደህንነት ዙሪያ ኬንያ ስላላት ወሳኝ ሚና ላይ ያተኮረ እንደነበር የአሜሪካ የውጭ ጉዳይ ሚኒስቴር አሳውቋል።

ሚኒስትሩ ፤ በታህሳስ ወር ለማካሄድ ከታቀደው የአሜሪካ-አፍሪካ የመሪዎች ጉባኤ ዕቅዶች ዙሪያም ውይይት ማድረጋቸው ተመላክቷል።

በሰሜን ኢትዮጵያ እየተካሄደ ለሚገኘው ጦርነት በአፍሪካ ህብረት መሪነት ሰላማዊ መፍትሄ እንዲገኝ አሜሪካ ድጋፍ እንደምታደርግ ማሳወቋ ይታወቃል።

ነገ ሰኞ / ጥቅምት 14 በደቡብ አፍሪካ በአፍሪካ ህብረት መሪነት በኢትዮጵያ መንግስት እና በህወሓት መካከል የሰላም ንግግር ለማድረግ ቀጠሮ መያዙ አይዘነጋም።

@tikvahethiopia

#EthiopianAirlines

የኢትዮጵያ አየር መንገድ ግሩፕ ካፒታሉን ወደ 300 ቢሊዮን ብር ለማሳደግ የካፒታል ማሻሻያ ጥያቄ ለኢትዮጵያ ኢንቨስትመንት ሆልዲንግ ማቅረቡን ሪፖርተር ጋዜጣ አስነብቧል።

አየር መንገዱ አሁን ያለውን 100 ቢሊዮን ብር ካፒታል ለማሳደግ ያቀረበው ጥያቄ ለኢትዮጵያ ኢንቨስትመንት ሆልዲንግ ቦርድ ቀርቦ እየታየ ሲሆን ቦርዱ ተወያይቶ ውሳኔ ይሰጥበታል ተብል።

የኢትዮጵያ አየር መንገድ ግሩፕ ዋና ሥራ አስፈጻሚ አቶ መስፍን ጣሰው ፤ " አሁን ያለንን 100 ቢሊዮን ብር ካፒታል ማሳደግ የፈለግንበት ምክንያት፣ ወሮታችን ከፍ እያለ በመምጣቱ ሲሆን፣ በቅርቡ ያፀድቁልናል ብለን እናስባለን " ሲሉ ተናግረዋል።

የአየር መንገዱ የካፒታል ማሻሻያ ጥያቄ ለኢትዮጵያ ኢንቨስትመንት ሆልዲንግ ቦርድ ቀርቦ እየታየ እንደሚገኝ ጋዜጣው ከኢትዮጵያ ኢንቨስትመንት ሆልዲንግ ግሩፕ ማረጋገጡን አመልክቷል።

አቶ መስፍን የካፒታል ማሻሻያ ጥያቄውን ምክንያት በተመለከተ፤ " የምናንቀሳቅሰው ገንዘብ እያደገ በመምጣቱና የካፒታል ማሻሻያ ከሌለ ትክክለኛ የፋይናንስ አያያዝ ለመፍጠር ስለሚያስቸግር " ነው ብለዋል።

" በተጨማሪም አሁንም አዳዲስ አውሮፕላኖች እያስመጣን ነው፡፡ በምናስመጣበት ወቅት የዕዳና ካፒታል ምጣኔ መመጣጠን አለበት፡፡ አብዛኛውን ጊዜ የአውሮፕላን የሚገዛው በብድር ስለሆነ አበዳሪዎቹ ጋ ተቀባይነት እንዲያገኝ ከፍ ያለ የሀብት መጠን መድረስ አለበት። ብለዋል፡፡

የዕዳ እና ካፒታል ምጣኔ ተቋሙ ካለው ካፒታል አንፃር ሲታይ ምክንያታዊ ካልሆነ አበዳሪዎቹ ለማመን እንደሚቸገሩ አቶ መስፍን መግለፃቸውን ሪፖርተር ጋዜጣ አስነብቧል።

@tikvahethiopia

#Update

" በሰላም ንግግሩ ላይ የሚሳተፈው የኢትዮጵያ የልኡካን ቡድን ዛሬ ጠዋት ወደ ደቡብ አፍሪካ አምርቷል " - የኢትዮጵያ መንግስት

የኢትዮጵያ ሀገር መከላከያ ሠራዊት ቁልፍ የሚባሉ የትግራይ ከተሞችን መቆጣጠሩን ቀጥሏል ሲል የመንግሥት ኮሙኒኬሽን አገልግሎት ገልጿል።

" ይህንን ሲያደርግ የኢትዮጵያ መከላከያ ሠራዊት በከተሞች ውጊያ ሳይደረግ የህወሓትን ወታደራዊ ዐቅም ለማሽመድመድ የሚያስችል ስልት ተጠቅሟል " ብሏል።

በዚሁ መግለጫ የኢትዮጵያ መንግሥት ከሰብአዊ የርዳታ ተቋማት ጋር በመቀናጀት በተቆጣጠራቸው አካባቢዎች ሰብአዊ ርዳታ እንዲደርስ እየሠራ እንደሚግኝ አመልክቷል።

የአገልግሎት ሰጪ ተቋማት በእነዚህ አካባቢዎች አገልግሎት ለመጀመር የሚያስችል ዝግጅት እንዲያፋጥኑ እያደረገ መሆኑንም አሳውቋል።

ከየአካባቢው ማኅበረሰብ ጋር በመነጋገር ሕዝባዊ አስተዳደር የሚቋቋምበትንና ማኅበራዊ አገልግሎቶች የሚጀምሩበትን መንገድ እያመቻቸ እንደሚገኝ አመልክቷል።

ይህ በእንዲህ እንዳለ በአፍሪካ ኅብረት በኩል በደቡብ አፍሪካ በሚደረገው የሰላም ንግግር የሚሳተፍ መሆኑንም ገልጿል።

መንግስት አጋጣሚውንም የሰላም ንግግሩን ግጭቱን በሰላም ለመፍታት የሚቻልበት ዕድል አድርጎ ይመለከተዋል ብሏል።

" በመከላከያ ኃይላችን መሥዋዕትነት እየተስተካከለ የመጣውን ሁኔታ የበለጠ ለማጠናከር ምቹ አጋጣሚ የሚፈጥር አድርጎ ይወስደዋል " ሲል አክሏል።

" በሰላም ንግግሩ ላይ የሚሳተፈው የኢትዮጵያ የልኡካን ቡድን ዛሬ ጠዋት ወደ ደቡብ አፍሪካ አምርቷል " ሲል የመንግስት ኮሚኒኬሽን በመግለጫው አሳውቋል።

@tikvahethiopia

#Update

አፍሪካ ህብረት የሚመራው የኢትዮጵያ መንግስት እና ህወሓት የሰላም ንግግር ዛሬ በደቡብ አፍሪካ ይጀምራል ተብሎ ጥበቃል።

ለዚሁ የሰላም ንግግር የህወሓት ልዑክ ስፍራው መድረሱ ተነግሯል። ከዚህ በፊት ህወሓት የሰላም ድርድር የሚያደርጉት አቶ ጌታቸው ረዳ እና ጄነራል ጻድቃን ገብረትንሳይ እንደሆኑ መግለፁ የሚዘነጋ አይደለም።

በኢትዮጵያ መንግስት በኩል፤ የሰላም ንግግሩ ተካፋዮችን ወደ ደቡብ አፍሪካ ዛሬ ማቅናታቸውን አመልክቷል።

ከወራት በፊት የፌዴራል መንግሥት የሰላም ተደራዳሪ ቡድን አባላቱ አቶ ደመቀ መኮንን (ሰብሳቢ)፣  ዶ/ር ጌድዮን ጢሞቲዎስ (አባል)፣ አቶ ተመስገን ጥሩነህ (አባል) ፣ አምባሳደር ሀሰን አብዱልቃድር (አባል)፣ አምባሳደር ሬድዋን ሁሴን (አባል) ሌ/ል ጀኔራል ብርሀኑ በቀለ (አባል)፣ ዶ/ር ጌታቸው ጀምበር (አባል) መሆናቸውን መግለፁ ይታወሳል።

@tikvahethiopia

#የመከላከያ_ሠራዊት_ቀን

የኢ.ፌ.ዴ.ሪ መከለካያ ሚኒስቴር ከዚህ ዓመት ጀምሮ የኢትዮጵያ መከላከያ ሠራዊት ቀን በየዓመቱ " ጥቅምት 15 " ቀን እንዲከበር ወስኗል። ቀኑ " የሠራዊት ቀን " ተብሎ እንዲሰየም ሚኒስቴሩ የተለያዩ ታሪካዊ ኩነቶችን መቃኘቱን ገልጿል።

በኢትዮጵያ የሠራዊት ቀን ሲከበር የመጀመሪያው ነውን ?

ቀዳማዊ ኃይለ ሥላሴ በ1950 ዓ.ም ግንቦት 20 የተካሄደው የስፖርት ውድድር በሠራዊታቸው ውስጥ የፈጠረው መነቃቃት አስደስቷቸው ዕለቱ የጦር ኃይሎች ቀን ሆኖ በየ 3 ዓመቱ እንዲከበር ውሳኔ አስተላልፈዋል።

ከ1966 ዓ/ም በኋላ የጦር ኃይሎች ቀን አንዴ ሲከበር አንዴ ሲቋረጥ ቆይቷል።

ከ1987 ዓ/ም ጀምሮም የኢ.ፌ.ዴ.ሪ መከላከያ ሠራዊት በአዋጅ የተቋቋመበትን ቀን ለማሰብ የካቲት 7 ቀን የሠራዊት ቀን ሆኖ ሲከበር ቆይቷል።

ጥቅምት 15 ለምን ተመረጠ ?

ይኽ ቀን " የሠራዊት ቀን " ሆኖ ሲመረጥ የተለያዩ ታሪካዊ ኩነቶች ከግምት ውስጥ መግባታቸው ተጠቅሷል።

በዚህም የኢትዮጵያ ሠራዊት እንደ አንድ የሀገሪቱ ተቋም ሆኖ በሚኒስቴር መስሪያ ቤትነት ደረጃ የተቋቋመበት ጥቅምት 15 ቀን 1900 የሠራዊት ቀን እንዲሆን ውሰኔ ላይ ተደርሷል።

አጼ ምኒሊክ 1900 ካቋቋሟቸው ሚኒስቴር መስሪያ ቤቶች አንዱ የጦር ሚኒስቴር ሲሆን ፊታውራሪ ሀብተጊዮርጊስ ዲነግዴ በሚኒስትርነት ተሾመውም ነበር።

ንጉሱም ይህንን ዜና በይፋ ለዓለም ሀገራት ማሳወቃቸውን ተከትሎ በአሜሪካና በእንግሊዝ ጋዜጦች ጭምር ታትሞ ወጥቷል።

ዘንድሮ ቀኑ በፖናል ውይይት እንዲሁም በመጽሐፍ ምረቃ ብቻ የሚከበር ሲሆን በቀጣይ "ለማይታወቁ ጀግኖች" እንዲሁም ብሔራዊ የመከላከያ ሰራዊት የቀብር ሥፍራ ለማዘጋጀት ሥራዎች እየተሰሩ ነው ተብሏል።

@tikvahethiopia

#UK #China

ሪሺ ሱናክ የዩናይትድ ኪንግደም ቀጣዩ ጠቅላይ ሚኒስትር ሊሆኑ ነው።

ሊዝ ትረስ በተሾሙ በሰባት ሳምንት ስልጣን በቃኝ ያሉ ሲሆን እሳቸውን ለመተካት በተደረገው ውድድር ሪሺ ሱናክ አሸናፊ ሆነዋል።

ሱናክ ፤ የዩናይትድ ኪንግደም #የመጀመሪያው " እስያዊ " ዝርያ ያላቸው ጠቅላይ ሚኒስትር ይሆናሉ።

ጠ/ሚ ቦሪስ ጆንሰንን ለመተካት ከሰባት ሳምንታት በፊት በተደረገ ፉክክር ሪሺ ሱናክ ተወዳድረው የነበረ ቢሆንም በሊዝ ትረስ ሊሸነፉ ችለዋል።

ሊዝ ትረስ ' ግብር እቀንሳለሁ፤ ንግድን አሳልጣለሁ " ያሉት አዲስ ፖሊሲ ፍጹም ያልተጠበቀ የገበያ ምስቅልቅልና ብሔራዊ ጦስ ይዞባቸው መጥቶ ነው ሥልጣን እንዲለቁ የሆኑት።
 
ለ45 ቀናት ያህል ስልጣን ላይ የቆዩት ሊዝ ትረስ በዩናይትድ ኪንግደም ታሪክ ለአጭር ጊዜ የቆዩ ጠቅላይ ሚኒስትር ሆነው ተመዝግበዋል። 

በሌላ መረጃ ፥  የቻይና ገዥ የሆነው ኮሚኒስት ፓርቲ ትላንት ባደረገው ጉባኤ ዢ ዢንፒንግን ዋና ጸሓፊ አድርጎ መምረጡን ተከትሎ ለ3ኛ ጊዜ ስልጣናቸው ተራዝሟል።

የፓርቲው #ዋና_ጸሃፊ በሃገሪቱ የመሪነት ቦታ የሚያስገኝ ሲሆን መጋቢት በሚደረገው የብሄራዊ ህዝቦች ጉባኤ በይፋ ስልጣናቸው ይጸድቃል ተብሎ እንደሚጠበቅ ቢቢሲ አስነብቧል።

@tikvahethiopia

#Update

በደቡብ አፍሪካ የሚካሄደው የኢትዮጵያ መንግስት እና የህወሓት የሰላም ንግግር ዛሬ ተጀምሯል።

የደቡብ አፍሪካ ፕሬዝዳንት ቃል አቀባይ ቪንሰንት ማግዌንያ ፤ የሰላም ንግግሩ እስከ እሁድ ጥቅምት 20 እንደሚዘልቅ አሳውቀዋል።

ፕሬዝዳንት ራማፎሳ የደቡብ አፍሪካ መንግስት በኢትዮጵያ ፌደራላዊ ዴሞክራሲያዊ መንግስት እና ህወሓት መካከል የሚካሔደውን የሰላም ንግግር እንድታስተናግድ በመመረጧ ክብር ተሰምቷቸዋል ብለዋል።

ፕሬዝዳንት ሲሪል ራማፎሳ ደቡብ አፍሪካ የሰላም ንግግሩን እንድታስተናግድ ስትጋበዝ " ያለ ማቅማማት ተስማምተዋል " ያሉት ቃል አቀባዩ ፤ እንዲህ አይነት ንግግር አፍሪካ " ደህንነቷ የተረጋገጠ እና ግጭት የሌለበት አህጉር " እንድትሆን ከሚሻው የአገራቸው የውጭ ግንኙነት ፖሊሲ ዓላማ ጋር የተስማማ እንደሆነ ገልጸዋል።

አውዳሚው የትግራይ ግጭት ሰላማዊ እና ዘላቂ መፍትሔ ለማፈላለግ የተጀመረው የሰላም ንግግር በአፍሪካ ህብረት የአፍሪካ ቀንድ ልዩ መልዕክተኛ ኦሊሴጉን ኦባሳንጆ አመቻችነት የሚካሄድ ነው።

በሰላም ንግግሩ ላይ የቀድሞ የኬንያ ፕሬዝዳንት ኡሁሩ ኬንያታ እና የቀድሞዋ የደቡብ አፍሪካ ምክትል ፕሬዝዳንት ዶክተር ፑምዚ ለምላምቦ በደጋፊነት ይካፈላሉ።

" ደቡብ አፍሪካ ለአመቻቺው ቡድን መልካሙን ትመኛለች " ያሉት የደቡብ አፍሪካ ፕሬዝዳንት ቃል አቃባይ፤ የሰላም ንግግሩ " የእህት አገር ኢትዮጵያ ህዝቦችን ሁሉ ወደ ዘላቂ ሰላም የሚመራ ስኬታማ ውጤት " ያመጣል የሚል ተስፋቸውን ገልጸዋል።

#ኢትዮጵያ_ኢንሳይደር

@tikvahethiopia

#Update

የትምህርት ሚኒስቴር ሚኒስትር ፕሮፌሰር ብርሃኑ ነጋ በዛሬው ዕለት በሰጡት መግለጫ ፤ " ፈተና አንፈተንም " ያሉ ተማሪዎች በመደበኛው የፈተና አሰጣጥ በሚቀጥለው ዓመት ፈተና መውስድ  እንደማይችሉ አረጋግጠዋል፡፡

በግል መፈተን እንደሚችሉ ገልጸዋል፡፡

በ2014 ዓ.ም የ12ኛ ክፍል ፈተና 948 ሺህ 322 ተማሪዎች ተመዝግበው ከ937 ሺህ በላይ ተማሪዎች ፈተና መውሰዳቸው ተገልጿል፡፡

በተለያዩ ምክንያቶች ፈተና ያልተፈተኑና በተለያዩ #አደጋዎች ፈተና ላይ ያልተቀመጡ፣ የወለዱ ተማሪዎች #ከአንድ_ወር ባልበለጠ ጊዜ ውስጥ ፈተና ይወስዳሉ ተብሏል።

የፈተና ዉጤት በተለያዩ ምክንያቶች ያልተፈተኑ ተማሪዎች በወጣላቸዉ ፕሮግራም መሰረት ከተፈተኑ በኋላ የሁለቱንም ዉጤት ተጠቃሎ እንደሚገለፅ ትምህርት ሚኒስቴር አሳውቋል።

@tikvahethiopia

#Jigjiga

ዛሬ ከሰዓት በጅግጅጋ ፤ " ጋራድ ዊልዋል  ኤርፖርት " በተከፈተ ተኩስ የአንድ ሰው ህይወት ሲያልፍ 3 ሰዎች መቁሰላቸውን ለመስማት ችለናል።

የኤርፖርቱ የፀጥታ ኃይል አባል የሆነው ግለሰብ በከፈተው ተኩስ የክልሉ ፓርላማ አባል ጁዋሪያ ሱብዕስ ህይወታቸው ያለፈ ሲሆን ሌሎች ሶስት ሰዎች ቆስለዋል።

በኤርፖርቱ በተከፈተ ተኩስ ሰለባ የሆኑት ተጓዦች እንደሆኑ ተመላክቷል።

የነበረው ሁኔታ ላይ ፖሊስ ምርመራ እያደረገ ሲሆን ምርመራው እንደተጠናቀቀም ውጤቱን ለህዝብ እንደሚያሳውቅ ገልጿል።

በጁዌሪያ ህልፈት ሀዘን እንደተሰማው የሶማሊ ክልል ፖሊስ አመልክቷል።

የድርጊቱ ተሳታፊ የሆነው የፀጥታ ኃይል አባል በፖሊስ ቁጥጥር ስር እንዲውል ከተደረገ በኃላ በኤርፖርቱ የነበረው እንቅስቃሴ ወደ መደበኛነት የተመለሰ መሆኑን የክልሉ ፖሊስ መረጃ ያሳያል።

@tikvahethiopia