#Update #ችሎት

በአዲስ አበባ የኢድ አልፈጥር በዓል ላይ በፈነዳው የአስለቃሽ ጭስ ቦንብ ጋር በተያያዘ በቁጥጥር ስር የሚገኘው ኮንስታብል አንቡላ ኡቴ ፍርድ ቤት ቀርቧል።

የፌደራል ፖሊስ ኮሚሽን ወንጀል የመከላከል አድማ ብተና አባል የሆነው ኮንስታብል አንቡላ ኡቴ ሶስተኛ ጊዜ በፌደራል የመጀመሪያ ደረጃ ፍርድ ቤት አራዳ ምድብ 2ኛ የጊዜ ቀጠሮ ችሎት ቀረቦ ጉዳዩ ታይቷል።

መርማሪ ፖሊስ ከዚህ በፊት ከግንቦት 10 ቀን ጀምሮ በተሰጠው የ13 ቀን የምርመራ ጊዜ ውስጥ የሰራውን የምርመራ ስራ ሪፖርት ለፍርድ ቤቱ አቅርቧል።

በዚህም ፦

➡️ የተጠርጣሪው ቃል የመቀበል ስራ መሰራቱን

➡️ ለተጠርጣሪው የገንዘብ ድጋፍ መኖርና አለመኖሩን ለማጣራት ለ18 ባንኮች ደብዳቤ መላኩን

➡️ የግል ስልኩ ላይ ለኤሌክትሮኒክስ ምርመራ እንዲደረግ ለብሔራዊ መረጃ ደህንነት ተቋም ደብዳቤ ተልኮ ውጤት እየተጠበቀ መሆኑ

➡️ የስልክ ቁጥር በማን ስም እንደወጣ ለማጣራት በኢትዮ ቴሌኮም በኩል እንዲጣራ መጠየቁን

➡️ የፈነዳውን አስለቃሽ ጭስ ቦንብ ፍንጣሪ በፎረንሲክ ምርመራ እንዲደረግ መላኩንና የምስክር ቃል መቀበሉን ለችሎቱ አስረድቷል።

በፍ/ቤቱ ዳኛ በኩል የስንት ምስክር ቃል እንደተቀበለ ለመርማሪ ፖሊስ ለቀረበ ጥያቄ የአንድ ሰው ምስክር ቃል ተቀብለናል የ3 ምስክር ቃል ይቀረናል በማለት ምላሽ ሰጥቷል።

ምስክሮቹ የፌደራል ፖሊስ አባላት ከሆኑ አስካሁን ለምን አልተቀበላችሁም ? ለሚለው ጥያቄ ደግሞ አንደኛው ምስክር ለስራ ሌላ ቦታ በመሄዳቸውና ሌሎቹም ስራ ላይ በመሆናቸው ምክንያት መቀበል አለመቻሉን መርማሪ መልስ ሰቷል።

ተጠርጣሪው ኮንስታብል አንቡላ በበኩሉ ከሻንጣዬ ጀምሮ ብርበራ ተደርጎል ነገር ግን ምንም ማስረጃ አላገኙብኝም እኔ ምንም ወንጀል አልሰራሁም ከታሰርኩበት ጊዜ ጀምሮ ውሃ እንኳን የሚሰጠኝ ጠያቂ የለኝም አንድ ሳምንት በር ተዘግቶብኝ ታስሬ ነበር ሲል ለችሎቱ ገልጿል።

በአሁን ወቅት ያለበት የስር ሁኔታ ምን ደረጃ ላይ እንዳለ በችሎቱ ዳኛ የተጠየቀው ኮንስታብል አንቡላ አሁን አ/አ ፖሊስ ከሌሎች እስረኞች ጋር እንዲሆን መደረጉን መልስ ሰቷል።

ፍርድ ቤቱ የፖሊስ የምርመራ መዝገብ አስቀርቦ የተመለከተ ሲሆን ፖሊስ በተሰጠው ጊዜ ማስረጃ ማሰባሰቡን እንዲሁም የ3 ሰዎች ምስክር ቃል መቀበልና ቀሪ ማስረጃ መሰብሰብ እንደሚቀረው ማረጋገጡን ፍርድ ቤቱ ገልጿል።

በዚህ መልኩ የጀመረውን ምርመራውን ፖሊስ አጠናቆ እንዲቀርብ ፍርድ ቤቱ የ10 ቀን ተጨማሪ ጊዜ ፈቅዷል። የምርመራ ውጤቱን ለመጠባበቅ ለሰኔ 3 ተለዋጭ ቀጠሮ ተሰጥቷል።

ምንጭ፦ ጋዜጠኛ ታሪክ አዱኛ

@tikvahethiopia