#USA

በአሜሪካ ሀገር ካሊፎርኒያ ግዛት ሳክራሜንቶ ከተማ በተከፈተ ተኩስ በትንሹ 6 ሰዎች ሲገደሉ 12 ሰዎች ጉዳት ደርሶባቸዋል።

ድንገተኛው የተኩስ እሩምታ መጠጥ ቤቶች እና ምግብ ቤቶች በሚበዙበት አካባቢ የተከፈተ ሲሆን ሰዎችም እራሳቸውን ለማዳን በየጎዳናዎቹ ሲሯሯጡ እና የድረሱልን ጥሪያቸውን ሲያሰሙ ነበር ተብሏል።

ፖሊስ በደረሰው ጥቆማ በቦታው ሲደርስ በርካታ ሰዎች በአካባቢው ተሰብስበው እንደነበር የገለፀ ሲሆን እስካሁን ድረስ ምንም አይነት ተጠርጣሪ በቁጥጥር ስር እንዳልዋለ አመልክቷል።

የሟቾች ቁጥር አሁን ከተጠቀሰውም በላይ ሊጨምር እንደሚችል ተገምቷል።

የከተማዋ አስተዳዳሪ የሆኑት ዴረል ሰቲንበርክ በጥቃቱ ሕይወታቸው ያለፈና ጉዳት የደረሰባቸውን ሰዎች ቁጥር ማሰብ በጣም አስቸጋሪ እንደሆነ ገልጸዋል።

አክለውም ፤ " በጦር መሳሪያ የሚፈጸሙ ጥቃቶች የከተማችን፣ የግዛታችን እንዲሁም የአገራችን ስጋት ነው። ይህንን ለመቀነስ የሚደረጉ ማንኛውም አይነት እርምጃዎችን እደግፋለው " ማለታቸውን ቢቢሲ በደረገፁ አስነብቧል።

እንደ Gun Violence Archive ድረገፅ መረጃ በአሜሪካ ሀገር ከጦር መሳሪያዎች ጋር በተያያዘ በየዓመቱ #አርባ_ሺህ (40,000) ሰዎች የሚሞቱ ሲሆን ይህ ደግሞ በመሳሪያዎች እራሳቸውን የሚያጠፉ ሰዎችን ያካታታል።

@tikvahethiopia

#MoE

ከሚቀጥለው ዓመት 2015 ዓ/ም ጀምሮ ተግባራዊ የሚደረገው የዩኒቨርሲቲ " መውጫ ፈተና " የከፍተኛ ትምህርት ተቋማቱ አቅማቸው እስኪጎለብት፣ አካዳሚክ እና ተቋማዊ ነጻነታቸው ሙሉ በሙሉ እስኪረጋገጥ ድረሰ ፈተናው #በጊዜየዊነት በትምህርት ሚኒስቴር እንደሚሰጥ ተገልጿል።

ይህ የተገለፀው በአሁን ሰዓት የትምህርት ሚኒስቴር ከከፍተኛ ትምህርት ተቋማት ፕሬዝዳንቶች ጋር በመውጫ ፈተና አሰጣጥ ዙሪያ አውደ ጥናት እያካሄደ በሚገኝበት መድረክ ነው።

በአውደጥናቱ ላይ የመውጫ ፈተናን አስመልክቶ በተለያዩ ምሁራን ጥናታዊ ጽሁፎች ቀርበው ውይይት ተደርጎባቸዋል።

የከፍተኛ ትምህርት ተቋማት የመውጫ ፈተና ከመጪው ዓመት ጀምሮ እንዲሰጥ ለማድረግ ተገቢው ቅድመ ዝግጅት እየተደረገ መሆኑ እየተካሄደ በሚገኘው መድረክ ላይ መገለፁን ከትምህርት ሚኒስቴር የተገኘው መረጃ ያመለክታል።

@tikvahethiopia

#ዘይት

ዛሬ የንግድና ቀጣናዊ ትስስር ሚኒስቴር ከፍተኛ አመራሮች በዘይት አምራች ፋብሪካዎች የመስክ ጉብኝት አድርገው ፤ ከባለሃብቶች ጋርም ውይይት አድርገው ነበር።

ጉብኝቱ የተገደረገው በፊቤላ ዘይት ማምረቻ ኢንዱስትሪ እና በደብሊው ኤ (WA) ዘይት ፋብሪካ ነው።

በዚህም ወቅት በቀን 1 ሚሊዮን 500 ሺ ሊትር ዘይት የማምረት አቅም ያለው ፊቤላ የዘይት ፋብሪካ ፦ በግብዓት አቅርቦት ችግር እና በመብራት መቆራረጥ ምክንያት ካለው የማምረት አቅም ከ40 በመቶ በታች እያመረተ መሆኑን አሳውቋል።

ፊቤላ ዘይት ፋብሪካ ስራ ከጀመረ አንድ አመት ያስቆጠረ ሲሆን በዚህ ጊዜ ውስጥ ከ70 ሚሊዮን ሊትር በላይ ዘይት በማምረት ለህብረተሰቡ እንዳሰራጨ ገልጿል።

በተመሳሳይ የደብሊው ኤ (WA) ዘይት ፋብሪካ በግብዓት አቅርቦት እና በካፒታል እጥረት ምክንያት ካለው የማምረት አቅም እስከ 30 በመቶ ብቻ እያመረተ እንደሆነ አሳውቋል።

የንግድና ቀጣናዊ ትስስር ሚኒስቴር ሚኒስትር ደኤታ አቶ ሀሰን መሀመድ በፋብሪካው በአካል በመገኘታቸው የችግሮችን ጥልቀት መረዳታቸውን ገልፀዋል።

ሀገር በቀል የሆነ ዘይት እንዲመረት መንግስት አስፈላጊውን ድጋፍ እንሚያደርግ ተናግረው ፤ የተነሱትን የመብራት፣ የካፒታል እጥረት እና የግብዓት አቅርቦት ችግሮች በአጭር ጊዜ ለመፍታት ከሚመለከታቸው አካላት ጋር በመነጋገር ጥረት እንደሚደረግ አሰረድተዋል፡፡

አሁን እየተስተዋለ ያለውን የዘይት እጥረት ለመቅረፍ መንግስት በልማት ድርጅቶች በቀጥታ ተገዝቶ እንዲቀርብ እያደረገ እና 322 ባለሀብቶች በፍራንኮ ቫሉታ ያለቀለት የምግብ ዘይት እንዲያስገቡ እየተደረገ መሆኑንና ፍትሀዊ ስርጭት እንዲኖር እየተሰራ መሆኑን ገልፀዋል።

@tikvahethiopia

#ሚያዚያ

የቤንዚን እና የናፍጣ ምርቶች ዋጋ ባለበት ይቀጥላል።

የንግድ እና ቀጠናዊ ትስስር ሚኒስቴር ፥ የሚያዚያ ወር የቤንዚን እና የናፍጣ ምርቶች የችርቻሮ መሸጫ ዋጋ በመጋቢት ወር ላይ ሲሸጥበት በነበረው እንደሚቀጥል አስታውቋል።

የአውሮፕላን ነዳጅ ፣ የከባድ ጥቁር ናፍጣ እና የቀላል ጥቁር ናፍጣ የመሸጫ ዋጋ በዓለም አቀፍ ዋጋ መሰረት ተሰልቶ የመጣው ወደ ተጠቃሚው እንዲተላለፍ መወሰኑን ኤፍ ቢ ሲ ዘግቧል።

@tikvahethiopia

#Bale📍

የረመዷን ፆም ባለፈው ቅዳሜ ተጀምሯል። ይህን ታላቅ ወር ህዝበ ሙስሊሙ በጾም በዱአ እያሳለፈ ይገኛል።

በባሌ ዞን በድርቅ ውስጥ ያሉ የማኅበረሰብ ክፍሎች ግን " የሚጠጣ ና የሚበላ ስላሌለን ለዘንድሮ ለረመዳን ፆም ሰግተናል " ሲሉ ያለውን ችግር ያስረዳሉ።

የራይቱ ገልቢ ወረዳ ነዋሪ የሆኑት ሀጂ አሊዪ ለቢቢሲ አፋን ኦሮሞ በሰጡት ቃል ፥ "እንደዚህ ዓይነት ሁኔታ አይተን አናውቅም። ባሌ የጥጋብ ሀገር ፣ ሌሎችን የምትቀልብ ሀገር ነበረች። አሁን የሚበላ እና የሚጠጣ የለንም። ድጋፍ የማይደርስልን ከሆነ ለመፆም እንቸገራለን" ብለዋል።

አባታችን ሃጂ አሊዪ የረመዳን ወር ውስጥ እንደዚህ አይነት ችግር ገጥሞን አያውቅም ያሉ ሲሆን "የኛ ህዝብ ረመዳንን በደስታ ለመቀበል ይጠብቁ ነበር፣ አሁን ግን በስጋት የተሞላ ነው" ብለዋል።

ሌላኛው የዚሁ አከባቢ ነዋሪ የሆኑት አቶ አብዱራህማን ሃጅ አሊዪ፥ "ፈጣሪ በተዓምራቱ መፍትሔ ከበጀልን እንጂ፣ በዚህ እጥረት ውስጥ ሆነን እንፆማለን ለማለት እንደ ራይቱ ይከብዳል" ሲሉ ያስረዳሉ።

በደርቅ በተጎዳችው በባሌ ዞን በምትገኘው የራይቱ ወረዳ ወደ 60 ሺ ከሚገመቱ ከብቶች ከግማሽ በላይ እንዳለቁ እና ሌላው ደግሞ መሰደዱን ከዞኑ አስተዳደር የተገኘው መረጃ ያመለክታል።

በአጠቃላይ ድርቁ በተከሰተባቸው የኦሮሚያ አከባቢዎች እስካሁን 800 ሺ የሚጠጉ ከብቶች የሞቱ ሲሆን 300 ሺ የሚሆኑ ከብቶች ደግሞ መድከማቸውን የቡሳ ጎኖፋ ኦሮሚያ ኃላፊ አቶ ሙስጠፋ ከድር ተናግረዌ።

ሀጂ አሊዪ ከሰሞኑ የተወሰነ ዝናብ መዝነቡን ጠቁመው ዝናቡ ቀጥሎ ቢዘንብ የምንዘራው ዘር ፣ የምናርስበት ከብት ፤ የምንቆፍርበት ጉልበት የለንም ሲሉ የሚመለከተው አካል እንዲተባበራቸው ጠይቀዋል።

ያንብቡ : telegra.ph/BALE-04-05

@tikvahethiopia

#AddisAbaba 📍

ፍሬን የበጠሰ ታክሲ ባደረሰው አደጋ ህፃናት ተማሪዎችን ጨምሮ የ6 ሰዎችን ህይወት ቀጠፈ።

በጉለሌ ክ/ ከተማ ወረዳ 1 አስተዳደር በደረሰ የትራፊክ አደጋ የ6 ሰዎች ህይወት አልፏል።

የትራፊክ አደጋው የደረሰው ኮድ 3 A02166 አዲስ አበባ የሆነ ሚኒባስ ታክሲ ፍሬን በመበጠሱ ሲሆን ባደረሰው ጉዳት ህጻናት ተማሪዎችን ጨምሮ የ6 ሰዎች ህይወት አልፏል።

ታክሲው ከቁስቋም ሽሮ ሜዳ በመጓዝ ላይ ነበረ።

ከሟቾቹ መካከል ሁለቱ ተማሪዎች ሲሆኑ አጠቃላይ በ6 ሰዎች ላይ የሞት አደጋ እንዲሁም ሁለት ሰዎች ላይ ከባድ እና ሁለት ሰዎች ላይ ቀላል ጉዳት ደርሷል፡፡

በአደጋው የደረሰው የጉዳት መጠንና መንስኤውን ለማወቅ ተጨማሪ ምርመራ በመጣራት ላይ እንደሚገኝ ፖሊስ አሳውቋል ሲል የጉለሌ ክፍለ ከተማ ኮሙዩኒኬሽን ዘግቧል።

More : @tikvahethmagazine

በኦሮሚያ ክልል ምዕራብ አርሲ ዞን እና በሲዳማ ክልል አዋሳኝ ቦታዎች ላይ እሁድ ምሽት በተቀሰቀሰ ግጭት ቢያንስ 5 ሰዎች ተገደሉ።

የሲዳማ ክልል የሰላምና ጸጥታ ቢሮ ኃላፊ አቶ አለማየሁ ጢሞቲዎስ ፥ ግጭት የተቀሰቀሰው በሲዳማ ክልል፣ ጪሪ ወረዳ፣ ሀሌላ ቀበሌ ነዋሪዎች ዘንድ ታዋቂ የሆኑ የሀገር ሽማግሌ መገደላቸውን ተከትሎ ነው ብለዋል።

አዴ ሎኬ ዮኔ የተባሉት እኚሁ አባት እሁድ ምሽት 4 ሰዓት ገደማ የተገደሉት " ለጊዜው ማንነታቸው ባልታወቁ ታጣቂዎች ነው " ብለዋል። 

ጥቃቱ ከተፈጸመ በኋላ በሀሌላ ቀበሌ የተቀሰቀሰው ግጭት ወደ አጎራባች ቀበሌዎች ተስፋፍቶ በሲዳማ ክልል ጪሪ ወረዳ ሱጫ ቀበሌን እና በኦሮሚያ ክልል ሻምበልና ውሮ ቀበሌዎችን አዳርሷል።

በግጭቱ እስካሁን ከሲዳማ በኩል የሀገር ሽማግሌውን ጨምሮ ቢያንስ 2 ሰዎች ሲገደሉ፤ በኦሮሚያ በኩል የ3 ሰዎች ህይወት እንዳለፈ ገልጸዋል።

ከቦናና በዳዬ ሆስፒታል በተገኘው መረጃ 15 ሰዎች በጥይት ቆስለዋል። ቦና ከገቡ 7 ሰዎች 3ቱ በብርቱ የቆሰሉ ናቸው። በዳዬ ደግሞ 9 ሰዎች ቆስለው የገቡ ሲሆን አንዱ ህክምና እርዳታ ላይ እያለ ህይወቱ አልፏል።

ሰው ላይ ከደረሰ ጉዳት ባለፈ በርካታ ቤቶች ወድመዋል።

የመንግስት የጸጥታ ኃይሎች ግጭቱን ለማርገብ እርምጃዎች መውሰዳቸውን የተገለፀ ሲሆን ከዚህ በተጨማሪ የሁለቱ ክልል ኃላፊዎች፣ በአባ ገዳዎች እና በሲዳማ ሀገር ሽማግሌዎች የታገዘ ምክክር በማድረግ ግጭቱ እንዲቆም ማድረጋቸውን አቶ አለማየሁ ገልፀዋል።

የጥቃቱን ፈጻሚዎች ማንነት በተመለከተ ታጣቂዎቹን ለመለየት ማጣራት እየተደረገ ነው ሆኖም ግን "በኦሮሚያ ክልል ታጥቀው የሚዞሩ ታጣቂዎች ሊሆኑ ይችላሉ" ብለዋል።

ለጊዜው ከኦሮሚያ በኩል አስተያየት ሊገኝ እንዳልተቻለ ዘገባውን ያሰራጨው 👉ኢትዮጵያ ኢንሳይደር ገልጿል።

@tikvahethiopia

#BenishangulGumuz📍

በኢትዮጵያ በተለያየ አቅጣጫ በጦርነት እና በግጭት ምክንያት እጅግ በርካታ ወገኖቻችን ተፈናቅለው ይገኛሉ።

በርካታ ተፈናቃይ ወገኖቻችን ከሚገኙባቸው አካባቢዎች አንዱ የቤኒሻንጉል ጉሙዝ ክልል ነው።

በክልሉ በተለያየ ጊዜ በተከሰተ የፀጥታ ችግር ከሞቀው ቄያቸው ተፈናቅለው እርዳታ የሚጠባበቁ ወገኖቻችን ቁጥር እየጨመረ ሲሆን ከክልሉ የአደጋ ስራ አመራር ኮሚሽን እንደተገኘው መረጃ አሁን በክልሉ ከ400 ሺህ በላይ ተፈናቅይ ይገኛል።

ከመኖሪያቸው ከተፈናቀሉ ጀምሮ በርካታ ችግር እየደረሰባቸው እንደሆነ የሚናገሩት ተፈናቃይ ወገኖቻችን ዝናብ እና ፀሃይ እየተፈራረቀባቸው መሆኑን እና የሚደረግላቸው ድጋፍ በቂ እንዳልሆነ አስረድተዋል።

ከተፈናቃዮቹ ብዛት ያላቸው ሴቶች፣ ህፃናት ፣ ተማሪዎች የሚገኙ ሲሆን በእድሜ የገፉ አረጋዊያን በመጦሪያ እድሜያቸው ተፈናቅለው እየተንገላቱ ናቸው።

እርዳታ እየተደረገላቸው እንደሆነ የሚገልፁት ተፈናቃዮች ግን በቂ እንዳልሆነ ምግብ፣ የህክምና፣ አልባሳት ድጋፍ እንደሚያስፈልጋቸው ገልፀዋል።

ክልሉን የሚያስተዳድሩት አቶ አሻድሊ ሀሰን ለኢትዮጵያ ብሄራዊ ቴሌቪዥን ጣቢያ በሰጡት ቃል፤ በክልሉ ከደረሰው ጉዳት እና ካለው ተፈናቃይ ቁጥር አንፃር የሚደረገው ድጋፍ ተጠናክሮ ሊቀጥል እንደሚገባ ገልፀው ለመንግስታዊ እና መንግስታዊ ያልሆኑ ድርጅቶች ፣ አጋር አካላት ድጋፋቸውን እንዲያጠናክሩ ጠይቀዋል።

እየቀረበ ካለው ጥሪ ጋር በተያያዘ ፤ Action for Social Development and Environmental Protection Organization (ASDEPO) የተባለ ድርጅት ከ100 ሺህ በላይ ሰዎችን ለመድረስ 40 ሚሊዮን ብር በጀት የተያዘለት ፕሮጀክት ይፋ ማድረጉን ከብሄራዊ ቴሌቪዥን ጣቢያ ያገኘነው መረጃ ያሳያል።

@tikvahethiopia