#AAU

" ... የዩኒቨርሲቲው ተማሪ ያልሆኑ ግለሰቦች በግቢው ረብሻ ለመቀስቀስ ሞክረዋል። በአሁኑ ሰዓት አንድም የታሰረ ተማሪ የለም " - የአ.አ.ዩ የፕሬዝዳንት ጽ/ቤት አማካሪ

@tikvahuniversity በአዲሰ አበባ ዩኒቨርሲቲ ትላንትና እሁድ ስለተከሰተው ነገር የዩኒቨርሲቲው ፕሬዝዳንት ጽ/ቤት የኮሚዩኒኬሽን አማካሪ ኢንጂነር ውባየሁ ማሞን ጠይቋል።

ኢጂነር ውባየሁ ማሞ ፦ " ላለፉት ስድስት ቀናት የተለያዩ ነገሮች በግቢው አስተውለናል። ከተማሪዎቻችን ጋር ስንወያይ ቆይተናል። በመጨረሻ ከተማሪዎች አጀንዳ ውጪ የሆነ ነገር እንዳለ ስናውቅ እርምጃ ወስደናል " ብለዋል።

አማካሪው ፤ " ትላንት የዩኒቨርሲቲው ተማሪ ያልሆኑ አልፈው ገብተው ረብሻ ለመቀስቀስ የሞከሩ ስምንት ግለሰቦች ተይዘው በሕግ ክትትል ስር ይገኛሉ " ሲሉም ገልፀዋል።

" ግለሰቦቹ የፖለቲካ አጀንዳ ይኖራቸዋል። " ያሉት ኢ/ር ውባየሁ " ንጹሀን ተማሪዎች ላይ ያልተገባ ነገር ለመፈጸም እንደገቡ ስላወቅን ግለሰቦቹን ለይተን ይዘናል " ሲሉ አስረድተውናል።

" በአሁኑ ሰዓት አንድም የታሰረ ተማሪ የለም። አንድም ከትምህርት ገበታው ያቋረጠ ተማሪ የለም። የመማር ማስተማር ሂደቱ ሙሉ በሙሉ እየሄደ ነው " ሲሉም ተናግረዋል።

ኢ/ር ውባየሁ ፥ " በተለያዩ ማህበራዊ መገናኛ ብዙሃን እየተወራ ያለው ሀሰት ነው። ትክክለኛ መረጃ እየወጣ አይደለም። ተማሪዎችንና ቤተሰብን የሚረብሽ ነገር ነው እየወጣ ያለው። " ብለዋል።

አማካሪው ፤ ትላንትና ግለሰቦቹ ለማምለጥ ሲሞክሩ ለመያዝ የተሰራ ነገር ነበር ያሉ ሲሆን በዚህም ምክንያት የተፈጠረው ችግር ወዲያው ከመንግስት አካላት ጋር በመሆን ተፈቷል ሲሉ ገልፀዋል።
 
@tikvahethiopia

#Russia

ሩስያ ከዛሬ ማክሰኞ ጀምሮ ስንዴ፣ በቆሎ፣ አጃ፣ እና ስኳር ወደ ውጭ እንዳይላክ አገደች።

ሩስያ እህል ለቀድሞ የሶቪየት ሀገራት እንዳይላክ እና በአብዛኛው የስኳር ምርት ወደሌሎች ሀገራት እንዳይላክ ለጊዜው ማገዷ ተሰምቷል።

እገዳው እኤአ እስከ ሰኔ 30 ይቆያል ተብሏል።

ነገር ግን በልዩ የኤክስፖርት ፈቃድ አሁን ባለው የኮታ ሥርዓት ለነጋዴዎች መከፋፈሉ እንደሚቀጥል ተገልጿል።

ሩስያ እህል እና ስኳር እንዳይላክ ለጊዜው ማገዷ መሰማቱን ተከትሎ ከወዲሁ የዋጋ ጭማሪ እየተስተዋለ መሆኑ ተነግሯል።

ሩስያ በዓለማች ላይ ከፍተኛ እህል ላኪ ሀገር ስትሆን ቱርክ እና ግብፅ ደግሞ ከሩስያ በመግዛት ቀዳሚውን ስፍራ ይይዛሉ።

@tikvahethiopia

" በዚህ አመት 152 ሺህ ተማሪዎች የመንግስት ዩኒቨርስቲዎችን ይቀላቀላሉ " - ትምህርት ሚኒስቴር

የ2013 ዓ.ም የ12ኛ ክፍል መልቀቂያ ፈተናን ከወሰዱ ተማሪዎች ውስጥ 152 ሺህ 14 ተማሪዎች በመንግስት ዩኒቨርስቲዎች በመደበኛው ፕሮግራም ምደባ እንደሚያገኙ ተገልጿል።

ይህም በአማካይ በአጠቃላይ በሁለቱም ዙር ፈተናውን 50 ከመቶና ከዚያ በላይ ካመጡት ውስጥ 53 ፐርሰንት ያህል መሆኑ ተነግሯል።

በመንግስት ተቋማት ምደባ ከሚያገኙት ተማሪዎች ውስጥ 63ሺ 833 የሚሆኑት ሴት ተማሪዎች መሆናቸውም ነው የተገለፀው።

የዩኒቨርስቲ መግቢያ አነስተኛ ነጥብ እና ከዚያ በላይ ውጤት ያላቸው ሌሎች 135ሺ209 ተማሪዎች በተለያዩ አማራጮች ከፍተኛ ትምህርት መማር እንደሚችሉም ተነግሯል።

የ2013 ዓ.ም የ12ኛ ክፍል መልቀቂያን ፈተናን በሁለቱም ዙር የወሰዱ 598ሺ 679 ተማሪዎች ሲሆኑ ከዚህም ውስጥ 50 ከመቶና ከዚያ በላይ ያመጡ ተማሪዎች 287 ሺ 223 ናቸው ።

የትምህርት ሚኒስቴር በሁለት ዙር የተሰጠውን የ2013 ዓ.ም የዩኒቨርስቲ መግቢያ ፈተና ውጤትን ይፋ ማድረጉ ይታወሳል።

ምንጭ፦ ትምህርት ሚኒስቴር

@tikvahethiopia

" በአፍሪካ የስንዴ እጥረት ሊከሰት ይችላል " - ተመድ

በሩሲያ እና በዩክሬን ጦርነት ምክንያት በአፍሪካ የስንዴ እጥረት ሊከሰት እንደሚችል የተባበሩት መንግሥታት አስጠነቀቀ።

የተባበሩት መንግሥታት ዋና ፀሐፊ አንቶኒዮ ጉቴሩዝ በጦርነቱ ምክንያት በዓለም አቀፍ ደረጃ "የረሃብ ወጀብ" እና የምግብ ዋስትና እጦት ሊያስከትል እንደሚችል አስጠንቅቀዋል።

በርካታ የአፍሪካ አገራት እና ድሃ አገራት በሩሲያ እና በዩክሬን የስንዴ ምርት ላይ ጥገኛ መሆናቸውን የገለፁት ዋና ፀሐፊው አሁን ግን በጦርነቱ ምክንያት ስጋት ውስጥ ወድቀዋል ብለዋል።

ከእነዚህ አገራት መካከል ቀድሞውኑም ሕዝባቸውን ለመመገብ የሚታገሉት ቡርኪና ፋሶ፣ ሶማሊያ እና የመን ይገኙበታል።

የተመድ ዋና ፀሀፊ ጉተሬዝ የዓለም የምግብ አቅርቦት ሥርዓትን ከመንኮታኮት ለመታደግ አስቸኳይ የተኩስ አቁም እንዲደረግ ጠይቀዋል።

ከዚህ በተጨማሪም ጉተሬዝ እየተካሄደ ባለድ ጦርነት ሳቢያ ረሃብ፣ የውሃና የመድኃኒት አቅርቦት ችግር እየገጠማቸው ላሉ በሚሊየን የሚቆጠሩ ዩክሬናውያን ለመርዳት 40 ሚሊየን ዶላር እርዳታ እንደሚያስፈልግ ማስታወቃቸውን ቢቢሲ ዘግቧል።

@tikvahethiopia

#OLF

" ... በእጃችን ከሚሞት ብለው ነው የሰጡን " - ሚሎ ኡርጌሳ

የኦሮሞ ነጻነት ግንባር (ኦነግ) ቃል አቀባይ የነበሩት አቶ በቴ ኡርጌሳ ከ1 ዓመት እስር በኋላ የዋስትና መብታቸው ተከብሮ ከእስር ተለቀዋል።

ምንም እንኳን አሁን አቶ በቴ ከእስር ቢለቀቁም በከፋ ህመም ላይ መሆናቸውን ቤተሰቦቻቸው ተናግረዋል።

በቅርቡ እስር ላይ እያሉ ከሌሎች የታሰሩ ባልደረቦቻቸው ጋር የርሀብ አድማ አድርገው እንደነበር ተነግሯል፤ ከዚህ በኃላ ነው የጤናቸው ሁኔታ የከፋው።

የአቶ በቴ ወንድም ሚሎ ኡርጌሳ " በእስር ቤቱ ህመሙ ሲጠናበት ነው የቡራዩ ፖሊስ መምሪያ ቤተሰብ መጥተው እንዲወስዱ ያለው፡፡ " ያሉ ሲሆን አቶ ባቴ ካለፈው ቅዳሜ አንስቶ አዳራ በተባለ ሆስፒታል ተኝተው እየታከሙ መሆኑን ገልፀዋል።

አቶ በቴ ህመሙ የጠናባቸው አስቀድሞ ህክምና ባለማግኘታቸው እንደሆነ ወንድማቸው አስረድተዋል።

አቶ በቴ ከዚህ በፊት ታስረው ለፍርድ ቤት እንደቀረቡ በሁለተኛው ቀጠሮ የዋስትና መብት የተጠበቀላቸው ቢሆንም ፖሊስ ግን ከቤተሰብም ሰውሮ በተለያዩ እስር ቤትና ማዕከላት እንዳቆዩት ወንድማቸው ተናግረዋል።

ቡራዩ፣ አዋሽ እና ገላን የታሰሩባቸው ስፍራዎች ናቸው።

በዚህ ሁሉ ሂደት ላይ በመጨረሻ ከሌሎች ጓደኞቻቸው ጋር ሆነው የርሃብ አድማ በማድረጋቸው ለህመም መዳረጋቸውን የሚገልፁት ወንድማቸው ሚሎ የርሃብ አድማውን ተከትሎ ከገላን ወደ ቡራዩ ከተወሰዱ በኋላ ከቤተሰብ ጋር ተገናኝተው ምርመራ ሲያደርጉ ለከፋ ህመም የዳረጋቸው በሽታ እንደተገኘባቸው ገልፀዋል።

" ከዚህም በኋላም ቢሆን መልሰው አስረዋቸው ነበረ ቢሆንም በመጨረሻ በእጃችን ከሚሞት ብለው ነው የሰጡን " ሲሉ ወንድማቸው ሚሎ ኡርጌሳ ለጀርመን ድምፅ ሬድዮ ተናግረዋል።

ያንብቡ : telegra.ph/DW-03-15

@tikvahethiopia

ሩስያ በይፋ ከአውሮፓ ምክር ቤት ጋር ተፋታች።

ሩስያ ከድርጅቱ መውጣቷን ለአውሮፓ ምክር ቤት በይፋ አሳውቃለች።

የሩስያ ዱማ ምክትል አፈጉባዔ ፒዮትር ቶልስቶይ ዛሬ ማክሰኞ እንዳስታወቁት ከሆነ የውጭ ጉዳይ ሚኒስትር ሰርጌ ላቭሮቭ ደብዳቤ ለድርጅቱ ዋና ፀሃፊ ተላልፏል።

" ከአውሮፓ ምክር ቤት ጋር የሚደረገውን ውይይት ለማቋረጡ ሁሉም ሃላፊነት በNATO አባል ሀገራት ላይ ነው " ያሉት ቶልስቶይ " ይህን ሁሉ ጊዜ በሰብአዊ መብቶች ርዕስ የራሳቸውን ጂኦፖለቲካዊ ፍላጎቶች ለማሟላት እና በሀገራችን ላይ ለሚሰነዘሩ ጥቃቶች ሲጠቀሙበት ቆይተዋል " ብለዋል።

አክለውም ፤ " ከዚህ በፊት ታይቶ በማይታወቅ መልኩ በተጣለው ማዕቀብና በፖለቲካዊ ጫናዎች " ምክንያት ሩስያ ዓመታዊውን ክፍያ ለአውሮፓ ም/ቤት አትከፍልም ሲሉ አሳውቀዋል።

ቶልስቶይ ሩሲያ ድርጅቱን ለቃ የምትወጣው " በራሷ ፈቃድ " እንደሆነ ገልፀው ውሳኔው ሚዛናዊ እና የታሰበት ነው ብለዋል።

@tikvahethiopia

" በትምህርት ሚኒስቴር የተቆረጠው ማለፊያ ነጥብ የአካባቢውን ነባራዊ ሁኔታ እና ችግር ታሳቢ ያላደረገ ነው " - አቶ አለሙ ደባሽ

በዋግ ኽምራ ብሔረሰብ አስተዳደር በጋዝጊብላ ወረዳ የ12ኛ ክፍል ብሔራዊ ፈተና ከወሰዱ 229 ተማሪዎች 30 ተማሪዎች ወይም 13 በመቶ ብቻ ማለፋቸውን የወረዳው ትምህርት ጽ/ቤት አስታውቋል።

በወረዳው ቤላ አምባ ሁለተኛ ደረጃ ትምህርት ቤት ለፈተናው ከተቀመጡ 44 የተፈጥሮ ሳይንስ ተማሪዎች ሁለት ተማሪዎች ብቻ ያለፉ ሲሆን ፈተናውን ከወሰዱ 139 የማኅበራዊ ሳይንስ ተማሪዎች 28 ተማሪዎች ብቻ አልፈዋል።

በተመሳሳይ በወረዳው በመሪ ሁለተኛ ደረጃ ትምህርት ቤት ለፈተናው ከተቀመጡ 10 የተፈጥሮ ሳይንስ እና 36 የማኅበራዊ ሳይንስ ተማሪዎች ምንም ተማሪ ማለፍ አለመቻላቸውን የወረዳው ትምህርት ጽ/ቤት ኃላፊ አለሙ ደባሽ ገልጸዋል።

አካባቢው ከአንድ ዓመት በላይ በጦርነት ቀጠና ውስጥ መቆየቱ እና ፈተናው በሚሰጥበት ወቅት ተማሪዎቹ ሙሉ ጊዜያቸውን እና ህይወታቸውን ለጦርነት አሳልፈው በመስጠት ላይ የነበሩ በመሆኑ ለፈተናው ያለበቂ ዝግጅት መቀመጣቸውን ኃላፊው ገልጸዋል።

ተማሪዎቹ የነበሩበት ሁኔታ እየታወቀ በትምህርት ሚኒስትር ውሳኔ ካሉበት እና ተፈናቅለው ከተሰደዱበት እንዲመጡ በማድረግ ያለምንም ዝግጅት ለፈተና መቀመጣቸውን ኃላፊው ተናግረዋል።

በትምህርት ሚኒስቴር የተቆረጠው ማለፊያ ነጥብ የአካባቢውን ነባራዊ ሁኔታ እና ችግር ታሳቢ ያላደረገ መሆኑን ጠቁመዋል።

በመሆኑም ሚኒስቴር ለአካባቢው የተወሰነውን የከፍተኛ ትምህርት ማለፊያ ነጥብ #በድጋሜ_በማጤን ማስተካከያ እንዲያደርግ ሲሉ ጠይቀዋል።

More : @tikvahuniversity

#NewsAlert

የኦሮሞ ነጻነት ግንባር (ኦነግ) ሊቀ መንበር አቶ ዳውድ ኢብሳ ከዓመት በኋላ ከቤታቸው ውጪ መታየታቸው ተሰምቷል።

አቶ ዳውድ ዛሬ ረፋድ ላይ ከብሔራዊ ምርጫ ቦርድ ጋር ስብሰባ ለመቀመጥ ወደ ብሔራዊ ምርጫ ቦርድ አምርተው እንደነበር ቢቢሲ ዘግቧል።

ምርጫ ቦርድ ከቀናት በፊት የኦነግ የረጅም ጊዜ ሊቀ መንበር አቶ ዳውድ ኢብሳ አንድ ዓመት ለሚጠጋ ጊዜ ከቤታቸው እንዳይወጡ ተከልክለው በቁም እስር ላይ እንደቆዩ ባደረገው ማጣራት ማረጋገጡን ገልጾ ነበር።

ይህም ድርጊት ከሕግ ውጪ መሆኑን በመጥቀስ በሊቀ መንበሩ ላይ የተጣለው የመንቀሳቀስ ገደብ በአፋጣኝ እንዲነሳ ቦርዱ ለፌደራል ፖሊስ ኮሚሽን እና ለብሔራዊ መረጃና ደኅንነት አገልግሎት በደብዳቤ መጠየቁ ይታወሳል።

ከአቶ ዳውድ የቁም እስር በተጨማሪ በርካታ የፓርቲው ከፍተኛ አመራሮች በእስር ላይ ይገኛሉ።

የፓርቲው ሥራ አስፈጻሚ ኮሚቴ አባላት የሆኑት አቶ ሚካኤል ቦረን እና አዮ ኬነሳ አያና ጭምሮ የኦነግ ከፍተኛ አመራሮች የሆኑት አቶ ዳዊት አብደታ እና አቶ ለሚ ቤኛ አሁንም በእስር ላይ እንደሚገኙ ቢቢሲ በዘግባው አመላክቷል።

@tikvahethiopia

ፎቶ ፦ UNICEF የአስቸኳይ ጊዜ የህክምና ግብዓቶች ትግራይ ክልል መዲና መቐለ ገብተው መሰራጨታቸው ዛሬ አሳውቋል።

UNICEF የአስቸኳይ ጊዜ መድሃኒት፣ ምግብና ሌሎች የህክምና ቁሳቁሶችን ጨምሮ የህክምና ግብዓቶች ናቸው መቐለ ደርሰው መሰራጨታቸውን በይፋዊ የትዊተር ገፁ ላይ ገልጿል።

የህክምና ግብዓቶቹ ኣይደር ሆስፒታልን ጨምሮ በክልሉ ተደራሽ ለሆኑ 40 የጤና ተቋማት መሰራጨታቸው ተገልጿል።

በዚህም 100 ሺህ ህፃናት እና ቤተሰቦቻቸው እንዲሁም 3,333 የተመጣጠነ ምግብ እጥረት ያጋጠማቸው ህፃናትን ህይወት ለመታደግ ያስችላል ብሏል።

#UNICEFEthiopia

@tikvahethiopia