#EthiopiaAirlines

የኢትዮጵያ አየር መንገድ ለተከታታይ 4 ዓመታት የአለም አየር መንገዶች ብቃት መዛኝና ደረጃ መዳቢ በሆነው ስካይትራክስ የሚሰጠውን "የአፍሪካ ምርጥ አየር መንገድ ሽልማት" አሸነፈ።

ይህ ሽልማት በብዙዎች ዘንድ "የአቪየሽን ኢንዱስትሪው ኦስካር" በመባል ይታወቃል።

ምንጭ፦ የኢትዮጵያ አየር መንገድ

@tikvahethiopia

" መንግስት ትግራይን ጨምሮ በማንኛውም ሀገሪቱ አካባቢዎች ሰራዊቱን የማስፈር መብት አለው " - አምባሳደር ሬድዋን ሁሴን

የኢትዮጵያ መንግስት ህወሓት በሚሸሽባቸው እያንዳንዱ የትግራይ መንደሮች እግር በእግር በመከታተል የመግባት ፍላጎት የሌለው መሆኑን የውጭ ጉዳይ ሚኒስትር ዴኤታ አምባሳደር ሬድዋን ሁሴን ተናገሩ።

አምባሳደር ሬድዋን ይህን የተናገሩት ዛሬ መቀመጫቸውን አዲስ አበባ ላደረጉ የአውሮፓ፣ አሜሪካ፣ ኤስያ እና መካከለኛው ምስራቅ ሀገራት አምባሳደሮችና ዲፕሎማቶች በወቅታዊ ጉዳዮች ዙሪያ ማብራሪያ በሰጡበት ወቅት ነው።

አምባሳደር ሬድዋን ፥ መንግስት ህወሓት በሚሸሽባቸው እያንዳንዱ የትግራይ መንደሮች እግር በእግር በመከታተል የመግባት ፍላጎት የሌለውም፤ ነገር ግን ቡድኑ መቸውም ቢሆን መልሶ ጥቃት የማድረስ አቅሙ የተዳከመ መሆኑ ማረጋገጥ ያስፈልጋል ሲሉ ተናግረዋል።

ከዚህ በተጨማሪ የኢትዮጵያን የግዛት አንድነትን ማስጠበቅ የመንግስት ኃላፊነት እንደመሆኑ መጠን፣ ትግራይን ጨምሮ በማንኛውም ሀገሪቱ አካባቢዎች ሰራዊቱን የማስፈር መብት እንዳለው አስገዝበዋል።

@tikvahethiopia

" ተመጣጣኝ የአፀፋ እርምጃ እንሰጣለን " - ፑቲን

የሩሲያ ፕሬዜዳንት ቭላድሚር ፑቲን አሜሪካ በዩክሬን ጉዳይ ይዛዋለች ላሉት የኃይል አቋም መንግስታቸው ተመጣጣኝ አፀፋዊ እርምጃ እንደሚሰጥ ዝተዋል።

ሩሲያ ጦሯን ወደ ዩክሬን ድንበር ካስጠጋች በኃላ አሜሪካ የምትመራቸው ምዕራባውያን መንግስታት ከሩሲያ ጋር የገቡት አተካራ እየተካረረ መጥቷል።

ፑቲን ዛሬ ከመከላከያ ሚኒስቴር ሹማምንት ጋር ባደረጉት ውይይት እንደተናገሩት አሜሪካ እና የሰሜን አትላንቲክ ጦር ቃልኪዳን ድርጅት (NATO) የሩሲያን ፀጥታ እንደማይጋፉ አስገዳጅ ማረጋገጫ መስጠት አለባቸው ብለዋል።

NATO ወደ ምስራቅ አውሮፓ መስፋፋቱን እንዲያቆም በተለይ ዩክሬንን አባሉ እንደማያደርግ ማረጋገጫ እንዲሰጣት ሩሲያ በተደጋጋሚ ጠይቃለች።

ቭላድሚር ፑቲን አሜሪካ እና NATO ማረጋገጫውን ካልሰጡ መንግስታቸው ተመጣጣኝ ወታደራዊ እና ቴክኒካዊ የአፀፋ እንደሚሰጥ አስጠንቅቀዋል።

ፕሬዜዳንቱ ምዕራባውያን መንግስታት ዩክሬን ውስጥ የሚያደርጉትንና ሊያደርጉ የሚፈልጉትን ጉዳይ በተመለከተ የምናፈገፍግበት ስፍራ እንደሌለ ሊገነዘቡት ይገባል ብለዋል።

ፑቲን " አሁን ዩክሬን ውስጥ የሚደረጉት፣ ሊደረጉ የሚሞከሩት ወይም ያቀዱት ከኛ የመንግስት ድንበር በሺህ ኪ/ሜ ርቀት ላይ አይደለም ደጃፋችን ላይ እንጂ፤ የምናፈገፍግበት ስፍራ እንደሌለ ሊገነዘቡት ይገባል " ሲሉ ነው የተናገሩት።

NATO በቅርቡ ከሩሲያ ጋር ትርጉም ያለው ድርድር እንደሚያደርግ አስታውቋል። የሩሲያ እና የNATO ምክር ቤት ስብሰባ በፈረንጆቹ 2022 አዲስ አመት መጀመሪያ እንደሚካሄድ NATO አሳውቋል።

ምንጭ፦ ዶቼ ቨለ

@tikvahethiopia

#AddisAbaba

ከመስቀል አደባባይ ወደ ቦሌ በሚወስደው መንገድ ቶታል አካባቢ የትራፊክ አደጋ የደረሰ ሲሆን የአንድ ሰው ህይወት አልፏል።

የከባድ እና ቀላል ጉዳት መጠን ቁጥር ለጊዜው አልታወቀም።

የተገጩ ተሽከርካሪዎች ከመንገዱ እስኪነሱ ተዘግቶ የነበረው መንገድ አሁን ክፍት መሆኑን የአዲስ አበባ ትራፊክ ማኔጅመንት ኤጀንሲ አሳውቋል።

@tikvahethiopia

" ፈያ ዳኢ " ለኦስካር ሽልማት ታጨ።

በኢትዮጵያዊ - ሜክሲኳዊቷ ፊልም ሠሪ ጀሲካ በሽር የተዘጋጀው ፈያ ዳኢ 'የሐረር' ፊልም በ94ተኛው የኦስካር ሽልማት በዘጋቢ ፊልም ዘርፍ ነው ለሽልማት የታጨው።

የኦስካር ሽልማት (አካዳሚ አዋርድስ) ትላንት በ10 ዘርፎች የሚያወዳድራቸውን ፊልሞች ይፋ ሲያደርግ የጀሲካ ፊልም መታጨቱ ታውቋል።

ጀሲካ በሽር ይህንን ዘጋቢ ፊልም ለማጠናቀቅ 10 ዓመታት እንደወሰደባት በያዝነው ዓመት መባቻ ከቢቢሲ ጋር ቆይታ ባደረገችበት ወቅት ተናግራ ነበር።

' ፈያ ዳኢ ' ፊልም ስለሱስ፣ ስደት፣ ንግድ ፣ ልጅነት፣ መንፈሳዊነት፣ ፍቅር፣ ተፈጥሮ፣ የፖለቲካ እስር፣ ሴትነት ፣ የነጻነት ትግል፣ ሞት፣ ወጣትነት፣ ተስፋ መቁረጥ፣ ብቸኝነት፣ ህልም፣ ቤተሰብ፣ ማንነት ጉዳዮችን ያነሳል።

ሁለት ሰዓት ገደማ የሚወስደው 'ፈያ ዳኢ' በፊልሙ ዓለም ገናና ስም ያላቸው ሰንዳንስ እና ትሩ/ፎልስ ፌስቲቫሎችን ጨምሮ በበርካታ ዓለም አቀፍ መድረኮች ላይ ታይቷል፤ ተደንቋል፤ ተወዷል።

ስዊዘርላንድ ውስጥ የሚዘጋጀው ታዋቂው 'ቪዥን ዱ ሪል' የዘጋቢ ፊልም ፌስቲቫል ላይ ተሸልሟል። በፉል ፍሬም እና ሆትዶክስ ፌስቲቫሎች ላይም ተሸልሟል።

ምንጭ፦ ቢቢሲ

@tikvahethiopia

" የተመድ ፀጥታው ም/ቤት ስብሰባ ያለ ውጤት ነው የተጠናቀቀው "- አቶ ከበደ ዴሲሳ

ከአንድ ቀን በፊት በተወሰኑ ሀገራት ሀሳብ አመንጪነት ስለ ኢትዮጵያ ጉዳይ ስበስባ የተቀመጠው የተመድ ፀጥታው ምክር ቤት ስብሰባውን ያለ ምንም ውጤት ማጠናቀቁን የኢትዮጵያ መንግስት ኮሚኒኬሽን አገልግሎት አስታወቀ።

የመንግስት ኮሚኒኬሽን አገልግሎት ሚኒስትር ዴኤታ አቶ ከበደ ዴሲሳ ዛሬ መግለጫ ሰጥተዋል።

አቶ ከበደ ዴሲሳ በመግለጫቸው፥ ከአንድ ቀን በፊት የተመድ ፀ/ቤት በተወሰኑ ሀገራት ሀሳብ አመንጪነት ስለኢትዮጵያ ጉዳይ ስብሰባ ተቀምጦ እንደነበርና ስብሰባው ያለውጤት መጠናቀቁን ተናግረዋል።

ሚኒስትር ዴኤታው፥ " የኢትዮጵያ ወዳጅ ሀገራት ስብሰባው ያለ አግባብ የተጠራ እና ኢትዮጵያ ላይ ጫና ለማሳደር ታስቦ የተጠራ መሆኑን በመረዳት ጣልቃገብነቱን ባለመቀበላቸው ጠንከር ያለ ውሳኔ እንዲተላለፍ ተብሎ የተደረገው ስበስባ ያለውሳኔ የተጠናቀቀና ውጤት ያላስገኘላቸው ሆኖኗል " ብለዋል።

አቶ ከበደ ዴሲሳ፥ ከዚህ በፊትም የተመድ ፀጥታው ምክር ቤት በኢትዮጵያ ጉዳይ ስበስባ ሲያደርግ ነበር ሲሉ ያስታወሱ ሲሆን ባልተለመደ ሁኔታ ከ12 ጊዜ በላይ ስብሰባ አድርጓል ሲሉ ተናግረዋል።

አክለው፥ "ም/ቤቱ አንድ ጊዜ በሰብዓዊ መብት ጥሰት ስም ሌላ ጊዜ በታላቁ ህዳሴ ግድብ የማይመለከተው ጉዳይ ውስጥ እየገባ አንዳንድ ኃያላን ሀገራት የፖለቲካ ማስፈፀሚያ/ፍላጎታቸውን በተቋማቱ በኩል ለማስፈፀም ስብሳባ ሲጠሩ ቆይተዋል፤ ከአንድ ቀን በፊትም የተደረገው ስብሰባ ያለ ውጤት ነው የተጠናቀቀው" ብለዋል።

የፀጥታው ም/ቤት ሰኞ በ“any other business” ስር ስለኢትዮጵያ እንደሚወያይና ስብሰባ እንዲካሄድ የጠየቁት ኢስቶኒያ፣ ፈረንሳይ፣ አየርላንድ፣ ኖርዌይ ፣ ዩኬ፣አሜሪካ እንደነበሩ መገለፁ አይዘነጋም።

@tikvahethiopia