#AddisAbaba

በሀሰተኛ መረጃዎች ትምህርት አቁመው የነበሩ ት/ቤቶች ወደ መማር ማስተማር ስራቸው መመለሳቸውን ተገለፀ።

ሀሰተኛ መረጃ በማሰራጨት በአዲስ አበባ የሚገኙ የማህበረሰብና ዓለም አቀፍ ትምህርት ቤቶች ጫና አድሮባቸው የመማር ማስተማር ስራቸውን እንዲያቆሙ ለማድረግ ጥረት ሲደረግ እንደነበር የመንግስት ኮሚኒኬሽን አገልግሎት አስታውሷል።

በዚህ ጥረትም ጥቂት ት/ቤቶች የመማር ማስተማር ስራቸውን ለተወሰነ ጊዜ እንዲያቆሙ አድርጓቸው ነበር፤ ይህንንን ትምህርት ሚኒስቴር ባደረገው ምልከታ እና በወላጆች ጥቆማ ለመረዳት ተችሏል።

ትምህርት ሚኒስቴር በተነዛው ሀሰተኛ መረጃ ላይ ተመስርተው የመማር ማስተማሩን ስራ ያቋረጡ 7 የማህበረሰብ ት/ቤቶች እና 19 ዓለም አቀፍ ት/ቤቶች ያለምንም በቂ ምክንያት ትምህርት ስራውን ማቆም እንደማይችሉ በይፋ አሳውቋቸዋል።

ሚኒስቴሩ የመማር ማስተማር ስራውን ያቋረጡ 3 ዓለም አቀፍ እና የማህበረስብ ትምህርት ቤቶች የማስጠንቀቂያ ደብዳቤ እንዲደርሳቸው አድርጓል።

ማስጠንቀቂያ የተሰጣቸው ትምህርት ቤቶች ፦

- ሳንፎርድ ዓለም አቀፍ ት/ቤት
- ቤንግሃም ት/ቤት
- የዓለም አቀፍ ኮሚኒቲ (ICS) በተለምዶ የአሜሪካ ት/ ቤት ናቸው።

ትምህርት ቤቶቹ የተሰጣቸውን ማስጠንቀቂያ ተከትሎ ወዲያው የፊት ለፊት የመማር ማስተማር ስራ እና በኦንላይን ከሀገር የወጡ መምህሮችን በመጠቀም ትምህርት መጀመራቸውን ትምህርት ሚኒስቴር አረጋግጧል።

በህብረተሰቡ ላይ መደናገር ለመፍጠር እየተደረጉ ያሉት ጥረቶች የተቀናጀ ሀሰተኛ መረጃ የመንዛትና ዜጎችን ፍርሃት ውስጥ ለመክተት ጥረቶች እየተደረጉ መሆኑን የሚያሳዩና የሽብር ቡድኑ ህወሓት መጠቀሚያ መሆኑን በግልፅ የታየበት ነው ብሏል የመንግስት ኮሚኒኬሽን አገልግሎት ዛሬ በሰጠው መግለጫ።

@tikvahethiopia

#Sudan

የሱዳን ጦር ወታደራዊ መፈንቅለ መንግስቱን ለመቃወም አደባባይ በወጡ ሰዎች ላይ በወሰደው የኃይል እርምጃ እስካሁን የተገደሉ አጠቃላይ ሰላማዊ ሰዎች ቁጥር በትንሹ 40 ስለመድረሱ ፍራንስ 24ን ዋቢ አደርጎ አል አይን አስነብቧል።

ከሟቾች በተጨማሪ በርካቶች ተጎድተዋል።

የሱዳን የሙያተኞች ማህበር ፥ ሱዳናዊያን ወታደራዊ አመራሩ ስልጣኑን ለሲቪል አስተዳድሩ እስከሚመልስ ድረስ ሰላማዊ ሰልፍ ማድረጋቸውን እንደማያቆሙ አስታውቋል፡፡

የተቃውሞ ሰልፉ አሁን ላይ ከአገሪቱ መዲና ካርቱም ወደ ጎረቤት ከተሞች ባህሪ እና ኦምዱርማን ከተሞች እየሰፋ ሲሆን በቀጣይም ወደ ሌሎች ከተሞች እንደሚሰፋ ማህበሩ ገልጿል።

በዚህ በያዝነው ቅዳሜ እና እሁድን ጨምሮ በቀጣዮቹ ቀናት የተቃውሞ ሰላማዊ ሰልፉ በከሰላ፣ ድንጉላ፣ ወደመደኒ እና ጅኔና ከተሞች የሰላማዊ ሰልፍ ለማድረግ አስቀድሞ ጥሪ ተላልፏል።

የሱዳን ጦር በነዚህ ከተሞች ዋና ዋና መተላለፊያ መንገዶች እና አደባባዮች ላይ ከፍተኛ ቁጥር ያለው ጦር አስቀድሞ መሰማራቱን የፍራንስ 24ን ዘገባ ዋቢ አድርጎ አል ዓይን አስነብቧል።

@tikvahethiopia

#SouthSudan

ኢትዮጵያን ለማዳከም የሚደረግ ጥረት ሁሉ በአጠቃላይ በአፍሪካ ላይ እንደተቃጣ ስጋት የሚቆጠር መሆኑን ደቡብ ሱዳን አስታወቀች።

በደቡብ ሱዳን የኢፌዴሪ ባለሙሉ ስልጣን አምባሳደር ነቢል ማህዲ አዲስ ከተሾሙት የደቡብ ሱዳን የአገር ውስጥ ጉዳይ ሚኒስተር ማሃሙድ ሰለሞን አጎክ ጋር ተወያይተወል።

በዚህ ወቅት አምባሳደር ነቢል ህውሃት እየፈጸመ ያለውን እኩይ ተግባር ለመመከት መንግሥት እደረገ ያለውን ጥረት ለሚኒስትሩ ገልጸውላቸዋል።

በተጨማሪም የምዕራባዊያን የሚዲያ ተቋማት የሃሰት መረጃን በማሰጨት የመንግሥትን ቅቡልነት አጠያያቂ ለማድረግ እየሰሩ መሆኑን ተናግረዋል።

እነዚህ ሚዲያዎች በኢትዮጵያ ያሉ የተለያዩ አገራትና ዓለም አቀፍ ድርጅቶች እንግልት እየደረሰባቸው መሆኑን በመጥቀስ ላይ መሆናቸውን በማስታወስ፣ ይህ ከእውነት የራቀ መሆኑንና ኢትዮጵያ የዲፕሎማቶችን መብትና ጥቅም የሚያስጠብቀውን የቬይና ስምምነት በጥብቅ እንደምታከብር ገልጸዋል።

ሚኒስትሩ በበኩላቸው ኢትዮጵያዊያን ለደ/ሱዳን ነጻነት የሕይወት መሰዋዕት መክፈላቸውን በማስታወስ፣ ይህንንም እራሳቸው በትግል ወቅት በተግባር ያረጋገጡት ሃቅ መሆኑን መስክረዋል።

አያየዘውም የአፍሪካ ህብረት መቀመጫ የሆነችው ኢትዮጵያን ለማዳከም የሚደረግ ጥረት ሁሉ በአጠቃላይ በአፍሪካ ላይ እንደተቃጣ ስጋት የሚቆጠር መሆኑን ገልጸዋል።

ከዚህ የተነሳ ኢትዮጵያ የግጭት መናሃሪያ ሆና ማየት አንደማይሹ መግለፃቸውን ከውጭ ጉዳይ ሚኒስቴር የተገኘው መረጃ ያሳያል።

NB : በማህሙድ ሰለሞን አጎክ ከቀናት በፊት የተሾሙ የደ/ሱዳን ባለስልጣን ሲሆኑ ፤ ፕሬዝዳንት ኪር ፤ የሀገር ውስጥ ጉዳይ ሚኒስትር ፖል ማዮም አኬክን ከስልጣን አስነስተው በማህሙድ ሰለሞን አጎክ መተካታቸውን መረጃ መለዋወጣችን አይዘነጋም።

@tikvahethiopia

#SaudiArabia

ሃውቲዎች በርካታ የሳዑዲ ከተሞች ላይ ያነጣጠሩ የሰው አልባ አውሮፕላን (ድሮን) ጥቃቶች መፈፀማቸውን ገለፁ።

የየመን ሃውቲ ተዋጊዎች ቅዳሜ እለት በርካታ የሳዑዲ ከተሞች 14 የሰው አልባ አውሮፕላኖች (ድሮን) ጥቃት መሰንዘራቸውን የሳውዲ አረቢያ መንግስት የዜና ወኪል ዘግቧል።

ጥቃቱ በጅዳ የሚገኘውን የሳዑዲ አራምኮ ተቋም ላይም ያነጣጠረ እንደነበር የተዘገበ ሲሆን በሳዑዲ የሚመራው ጥምረት በየመን በቡድኑ ላይ ባካሄደው ወታደራዊ ዘመቻ በ13 ኢላማዎች ላይ ጥቃት መሰንዘሩ ተሰምቷል።

የሃውቲ ወታደራዊ ቃል አቀባይ ያህያ ሳሬ ቅዳሜ በቴሌቭዥን በሰጡት ጋዜጣዊ መግለጫ ላይ እንደተናገሩት ቡድኑ በጄዳ የሚገኙትን የአራምኮ ማጣሪያዎችን እንዲሁም በሪያድ ፣ጄዳህ ፣አብሃ ፣ጂዛን እና ናጃራን ወታደራዊ ኢላማዎች ላይ ጥቃት አድርሷል።

ሳሬ፥ ጥቃቱ እየተባባሰ ለመጣው በሳዑዲ የሚመራው የአረብ ጥምር ጦር ወረራ እና የመን ለሚፈፀሙ ወንጀሎችና ከበባ ምላሽ ለመስጠት ነው ብለዋል።

ይሁን እንጂ በሳሬ መግለጫ ስህተቶች ነበሩ ይኸውም ፦ በጄዳ የሚገኘው ዓለም አቀፍ አውሮፕላን ማረፊያ የተሳሳተ ስም እና ለንጉስ ካሊድ ቤዝ የተሳሳተ ቦታን ጠቅሰዋል፤ ሳሬ ሪያድ ያሉ ሲሆን ነገር ግን ቦታው በስተደቡብ በኩል የሚገኝ ነው።

በሳውዲ አረቢያ የሚመራው ጥምር ጦር በድሮን ጥቃቱ ላይ የሰጠው አስተያየት ባይኖርም የሳውዲ ፕሬስ ድርጅት ቅዳሜ ጥምር ጦሩ በየመን መዲና ሰንዓ እንዲሁም ሰዓዳ እና ማሪብ ግዛቶች በፈፀመው ጥቃት የጦር መሳሪያዎች ማከማቻዎች፣ የአየር መከላከያ ዘዴዎች እና የሰው አልባ አውሮፕላኖች የመገናኛ ዘዴዎች ላይ ጉዳት አድርሷል ብሏል።

@tikvahethiopoa

ኢትዮጵያ ከአሜሪካ ውጭ አማራጭ ገበያ እየፈለገች ነው።

አሜሪካ የኢንዱስትሪ ምርቶች ከቀረጥ ነፃ ወደ ሀገሯ ገበያ እንዲገባ ይፈቀድ የነበረው ስምምነት (AGOA) እንዲቋረጠ በፕሬዜዳንቷ ጆ ባይደን አማካኝነት ውሳኔ ማሳለፏ ይታወሳል።

ይህ የአሜሪካ ውሳኔ በርካቶችን ከስራ ውጭ የሚያደርግ ውሳኔ መሆኑ በተደጋጋሚ ተገልጿል።

ኢትዮጵያ በAGOA ምክንያት ይገኝ የነበረው የውጭ ምንዛሬ ለማግኘት አማራጭ ገበያ እየፈለገች መሆኑን የፕላን እና ልማት ሚኒስቴር አስታውቋል።

የፕላንና ልማት ሚኒስትር ዶ/ር ፍፁም አሰፋ ለብሄራዊ ቴሌቪዥን ጣቢያ ፥ " የገበያ መዳረሻዎቻችን በሪፎርም ስራዎች ውስጥ አንዱ ዋና ስራ ተደርጎ ከተወሰዱት የገበያ መዳረሻዎች ማስፋት ነው። ከዚህ አኳያ AGOA በተሰጠን እድል መሰረት አሜሪካ ያለንን የገበያ እድል ሌላ ጋር መፈለግ ማለት ነው። ሌሎች ሀገራት በዚህ አይነት ሁኔታ የተጠቀሙ ብዙ አሉ። ጫናና ማዕቀብ ሲጣልባቸው ከሌሎች ሀገራት ጋር ተደራድረው ያንን ምርቶቻቸውን ሌሎች ሀገራት የተቀበሏቸው አሉ። ኢትዮጵያም ያንን እያሰበችበት ነው " ሲሉ ተናግረዋል።

ሚኒስትሯ አክለው ፤ በኮቪድ-19 ጊዜ የአለም ገበያ ሲዘጋ ለኤክስፖርት ተብለው የተመረቱ እቃዎች በሀገር ውስጥ መሸጥ እንዲችሉ እድሉን መንግስት አመቻችቶ ነበር ይሄም አንዱ መታየት ያለበት መሆኑን አንስተዋል።

ዶክተር ፍፁም አሰፋ ፥ ጦርነቱ ኢትዮጵያ ልማት ላይ ልታውል ያቀደችውን ገንዘብ ለጦርነት እንዲውል ስለሚደረግ ኢኮኖሚያዊ ጉዳቱ ከፍተኛ ነው ብለዋል። ዜጎች ኢኮኖሚውን ለመደገፍ የሀገሪቱን የውጭ ምንዛሬ ግኝት ለማሳደግ በህጋዊ መንገድ ገንዘብ እንዲልኩ ጠይቀዋል።

@tikvahethiopia

" አብዲአዚዝ ለሀገሩ፣ ለወገኑና ለሃይማኖቱ በድፍረት እና ያለ እረፍት የሰራ ታታሪ ጋዜጠኛ እና የሀገር ጀግና ነበር " - ጠቅላይ ሚኒስትር መሀመድ ሁሴን ሮብሌ

አልሸባብን በመተቸት የሚታወቀው ሶማሊያዊ ጋዜጠኛ ትላንት ሞቃዲሾ ውስጥ በተፈጸመ የአጥፍቶ ጠፊ ጥቃት ተገደለ።

አብዲአዚዝ መሀሙድ ጉሌድ ወይም አብዲአዚዝ አፍሪካ በመባል የሚታወቀው ይህ ጋዜጠኛ ትላንት ከቀትር በኋላ በከተማው ከሚገኝ ሬስቶራንት ሲወጣ ኢላማ ተደርጎ ነው የተገደለው።

ከጋዜጠኛው በተጨማሪ በአካባቢው የነበሩ ሁለት ሰዎች በፍንዳታው ቆስለው ወደ ሆስፒታል ተወስደዋል።

በሬድዮ ሞቃዲሾ ይሰራ የነበረው ይህንን ጋዜጠኛ ኢላማ እንዳደረገውና ጥቃቱንም እንዳቀነባበረ #አልሸባብ አስታውቋል።

የአጥፍቶ ጠፊ ቦምብ ጥቃቱ የደረሰው ጉሌድ ከሶማሌ ብሄራዊ ቴሌቪዥን ዳይሬክተር እና አንድ ሹፌር ጋር ሬስቶራንቱ አቅራቢያ በሚገኝ አንድ መኪና ፊት ለፊት መሆኑን የሬድዮ ሞቃዲሾ ድረገፅ የፖሊስ ምንጮችን ጠቅሶ ዘግቧል።

የጋዜጠኛውን ግድያ ተከትሎ የሶማሊያው ጠቅላይ ሚኒስትር መሀመድ ሁሴን ሮብሌ ሃዘናቸውን ለጉሌድ ቤተሰቦች መግለፃቸውን ተዘግቧል።

ጠቅላይ ሚኒስትሩ ፥ "አብዲአዚዝ ለሀገሩ፣ ለወገኑ እና ለሃይማኖቱ በድፍረት እና ያለ እረፍት የሰራ ታታሪ ጋዜጠኛ እና የሀገር ጀግና ነበር" ብለዋል።

ጉሌድ በአልሸባብ ታስረው ከተፈቱ ተጠርጣሪዎች ጋር ባደረገው ቃለ ምልልስ የሚታወቅ ሲሆን የሚያቀርበው ስርጭቱም በርካታ ታዳሚዎችን ይስባል።

መረጃውን ሬድዮ ሞቃዲሾን ዋቢ አድርጎ ያስነብበው ቢቢሲ ነው።

@tikvahethiopia