#Tolay : ዛሬ በጦላይ ማሰልጠኛ ማእከል መሰረታዊ የፖሊስ ስልጠና የወሰዱ ምልምል የፌደራል ፖሊስ ሰልጣኞች ተመርቀዋል።

በ20ኛ ዙር የተመረቁት ልዩ የፌደራል ፖሊስ ምልምል ሰልጣኞች በፌደራል ፖሊስ ታሪክ ከፍተኛውን ቁጥር የሚይዙና ሃገሪቱ ካለችበት ወቅታዊ ሁኔታ አንፃር የጠላትን የውስጥና የውጭ ጥቃት ለመመከት በፅንሰ-ሃሳብና በአካላዊ ብቃት በጥራት የሰለጠኑ ናቸው ተብሏል።

የኢ.ፌ.ዴ.ሪ ምክትል ጠ/ሚ እና የውጭ ጉዳይ ሚኒስትር ደመቀ መኮንን፣ የሰላም ሚኒስትሩ አቶ ብናልፍ አንዱአለም እንዲሁም የፌደራል ፖሊስ ኮሚሽን ኮሚሽነር ጄነራል ደመላሽ ገ/ሚካኤል እና ከፍተኛ የመከላከያ መኮንኖች በምርቃት ስነስርዓቱ ላይ ተገኝተው እንደነበር ኢብኮ ዘግቧል።

@tikvahethiopia

#UN

የኢትዮጵየ አየር ሃይል ትላንት በመቐለ የአየር ድብደባ መፈፀሙ ይታወሳል።

የጥቃቱ ኢለማ የነበረው የትግራይ ነፃ አውጪ ግንባር /TPLF የወታደራዊ ማሰልጠኛና ማዘዣ ማእከል የሆነውን የቀድሞ የመከላከያ ሰራዊት ማሰልጠኛ ቦታ እንደነበር የኢትዮጵያ መንግስት መግለፁ አይዘነጋም።

በዚሁ እለት ከኢትዮጵያ ፌደራል መንግስት በኩል ፈቃድ የተሰጣቸው 2 የUN የእርዳታ አውሮፕላኖች በመቐለ እንዲያርፉ በስፍራው ካሉ የበረራ ተቆጣጣሪዎች ፍቃድ በመከልከላቸው ወደ አዲስ አበባ ተመልሰው ነበር።

የኢትዮጵያ መንግስት ዛሬ ባወጣው መግለጫ ፥ ትላንት የUN ቃል አቀባይ ስቴፋኒ ዱጃሪክ አውሮፕላኖቹ ከፌደራል መንግስት ፈቃድ የተሰጣቸው እንደሆኑና ወደ አዲስ አበባ የተመለሱትም በኤርፖርቱ የበረራ ተቆጣጣሪዎች ፍቃድ በመከልከላቸው ብቻ መሆኑን አሳውቀዋል ብሏል።

እውነታው ይህ ሆኖ ሳለ አንዳንድ የውጭ መገናኛ ብዙሃን የእርዳታ አውሮፕላኖቹ የተመለሱት በየአየር ጥቃቱ ሳቢያ እንደሆነ በማስመሰል የተሳሳተ ዘገባን አውጥተዋል ሲል ወቅሷል።

የኢትዮጵያ መንግስት በመግለጫው ፥ " የአየር ጥቃቶቹ በከፍተኛ ጥንቃቄ የተወሰዱና የሽብር ቡድኑ ለእኩይ አላማ የሚጠቀምባቸውን የመገናኛና የወታደራዊ ማሰልጠኛዎችን ብቻ ኢላማ ያደረጉ ናቸው" ብሏል።

ነገር ግን TPLF የተሳሳቱ መረጃዎቸን በማውጣት ህብረተሰቡን በሃሰተኛ ምስሎች ለማወናበድ እየሞከረ ነው ህብረተሰቡም ይህንን ተገንዝቦ ጥንቃቄ እንዲያደርግ ሲል በመግለጫው መልዕክት አስተላልፏል።

@tikvahethiopia

#AddisAbaba: አዲሱ የአዲስ አበባ ከተማ አስተዳደር ካቢኔ በዛሬው ዕለት በተለያዩ አጀንዳዎች ላይ ተወያይቶ ውሳኔ አሳልፏል።

ካቢኔው ባካሄደው 1ኛ ዓመት የመጀመሪያ ስብሰባው በከተማዋ የፕላን ትግበራዎች ላይ የታዩ ክፍተቶችን ለማረም በሚያስችሉ የመፍትሄ ሀሳቦች ዙሪያ ተወያይቶ ውሳኔ አሳልፏል።

በተመሳሳይ በህብረተሰቡ ላይ የሚደርሰውን ማህበራዊ እና ኢኮኖሚያዊ ጫና ለማቃለል ለተለያዩ ተቋማት የበጀት ድጎማ እንዲደረግ ውሳኔ አሳልፏል፡፡

በዚሁ መሰረት የከተማ አስተዳደሩ ወቅታዊውን የገበያ ሁኔታ ታሳቢ በማድረግ ለሸገር ዳቦ ተጠቃሚ የህብረተሰብ ክፍሎች የ309 ሚሊዮን 337 ሺህ 500 ብር ድጎማ እንዲደረግ ወስኗል፡፡

የሜድሮክ ኢንቨስትመንት ግሩፕ እህት ኩባንያ የሆነዉ ሆራይዘን ፕላንቴሽንም ለተመሳሳይ ዓላማ የ199 ሚሊዮን 837 ሺህ 500 ብር ድጎማ እንደሚያደርግ ተገልጿል።

በተጨማሪም ካቢኔው የተማሪዎች ምገባ የዋጋ ማሻሻያ ሰነድ ላይ ውይይት በማድረግ ለ2014 የትምህርት ዘመን የ1.9 ቢሊዮን ብር ድጋፍ እንዲደረግ ወስኗል።

በተመሳሳይ በከተማዋ በዝቅተኛ የኑሮ ደረጃ ላይ ለሚገኙ ከ231 ሺህ በላይ የህብረተሰብ ክፍሎች የጤና መድህን ሽፋን አገልግሎት ለመስጠት የ144 ሚሊዮን ብር ድጋፍ እንዲደረግ ወስኗል።

በተጨማሪም የአዲስ አበባ ከተማ እግር ኳስ ቡድንን የፋይናንስ አቅም ለማጠናከር የሚያስችል የ70 ሚሊዮን ብር ድጋፍ እንዲደረግ ካቢኔው ውሳኔ አሳልፏል።

ምንጭ፦ የአዲስ አበባ ከተማ ፕሬስ ሴክሬተሪያት

@tikvahethiopia

#Turkey : ቱርክ የአሜሪካንን ጨምሮ የ10 አገራት አምባሳደሮች አገሯን ለቀው እንዲወጡ አዘዘች።

እንደ ሮይተርስ ዘገባ ከሆነ የቱርክ ፕሬዘዳንት ረሲፕ ጣይብ ኤርዶሃን ባስተላለፉት ውሳኔ የአሜሪካንን ጨምሮ የ10 የአውሮፓ አገራት አምባሳደሮች አንካራን ለቀው እንዲወጡ ተወስኗል።

አምባሳደሮቹ እንዲባረሩ የተወሰነው በፈረንጆቹ 2016 ዓመት ከተካሄደው እና ከከሸፈው የመፈንቅለ መንግስት ሙከራ ጀርባ እጁ አለበት በሚል ተጠርጥሮ ጉዳዩ በፍርድ ሂደት ላይ ያለ አንድ ግለሰብ ከእስር እንዲፈታ መጠየቃቸውን ተከትሎ ነው።

ኦስማን ካቫላ የተሰኘው ይህ የመፈንቅለ መንግስት ተጠርጣሪ በፈረንጆቹ 2013 ዓመት በቱርክ ረብሻ እንዲከሰት የገንዘብ ድጋፍ አድርጓል እና በ2016ቱ የከሸፈው መፈንቅለ መንግስት እጁ አለበት በሚል በእስር ላይ ይገኛል።

ግለሰቡ ባሳለፍነው ሳምንት የፍርድ ቤት ቀጠሮ የነበረው ሲሆን በአንካራ የሚገኙ የአሜሪካ፣ ጀርመን፣ ፈረንሳይ፣ ፊንላንድ፣ ስዊድን፣ ዴንማርክ፣ ኖርዌይ፣ ሆላንድ፣ እና ኒውዝላንድ አምባሳደሮች የፕሬዘዳንት ረሲፕ ኤርዶሀን መንግስት ተከሳሹን በአስቸኳይ ከእስር እንዲለቀቅ በጋራ ጠይቀዋል።

የቱርክ ውጭ ጉዳይ ሚኒስቴርም አምባሳደሮቹን ጠርቶ ስለጉዳዩ እንዲያብራሩ የጠየቀ ሲሆን ድርጊቱ ፍጹም ተቀባይነት የሌለው እና በአገር ውስጥ ጉዳይ ጣልቃ መግባት መሆኑን ጠቅሶ ውድቅ አድርጎታል።

ፕሬዘዳንት ኤርዶሃን በአምባሳደሮቹ ድርጊት መበሳጨታቸውን ገልጸው በአስቸኳይ አገሪቱን ለቀው እንዲወጡ መወሰኑን ተናግረዋል።

የአሜሪካ፣ ጀርመን እና ፈረንሳይ በጉዳዩ እስካሁን ያሉት ነገር እንደሌለ ሮይተርስ በዘገባው አክሏል።

ምንጭ፦ አል ዓይን / ሮይተርስ
Photo Credit : AFP

@tikvahethiopia

#Bahridar : በባህር ዳር ከተማ እየተገነባ የሚገኘውን የአባይ ድልድይ የግንባታ ብረት የሰረቁት ግለሰቦች በቁጥጥር ዋሉ።

ከ50 ዓመት በላይ አግልግሎት የሰጠው የባህርዳር ከተማ አባይ ድልድይ በእድሜ ብዛት ወቅቱን የሚመጥን የትራፊክ ፍሰትን ማስተናገድ ተቸግሯል።

ይህንን ለመቅረፍ በከፍተኛ በጀት አዲሱ ድልድይ በአባይ ወንዝ ላይ እየተገነባ ነው።

የባህር ዳር ከተማ ፖሊስ ፥ "ይህንን የህዝብ ሀብት ለግል ጥቅም ማዋል የፈለጉ ስግብግብ ግለሰቦች የተለያዩ የስርቆት ወንጀል መፈፀማቸውን ተረጋግጧል" ብሏል።

በአካባቢው ቅኝት ሲያደርጉ የነበሩት የሁለተኛ ፖሊስ ጣቢያ ባልደረቦች በ12/02/2014 ዓ/ም ምሽት የድልድዩን የግንባታ ብረት ሰርቀው ሊያጓጉዙ የነበሩ ግለሰቦች በቁጥጥር ሥር አውሎ ምርምራ እያጣራ ይገኛል ሲልም አክሏል።

አጠቃላይ በስርቆቱ የተሳተፉ እና በቁጥጥር ስር የዋሉ ግለሰቦች ግን በፖሊስ መረጃ ላይ አልተገለፀም።

የባህር ዳር ፖሊስ ፥ " ክልሉ የህልውና ትግል ላይ ባለበት በዚህ ወቅት የሀገርንና የህዝብን ሃብት በመዝረፍ ለግል ጥቅም ለማዋል የሚጥሩትን የውስጥ ባንዳዎች ለመቆጣጠር በሚደረገው ጥረት ህብረተሰቡ የበኩሉን ሊወጣ ይገባል" ሲል ጥሪ አቅርቧል።

@tikvahethiopia

#GONDAR : በጎንደር ከተማ ህግ ተላልፈዋል የተባሉ 53 የፀጥታ አካላት እንዲጠየቁ መደረጉን የጎንደር ከተማ አስተዳደር ሰላምና ፀጥታ መምሪያ ገለፀ።

መምሪያው ይህ ያሳወቀው በመምሪያው ኃላፊ አቶ ፋሲል ሰንደቁ አማካኝነት ለከተማው ነዋሪዎች በወቅታዊ ሀገራዊና ክልላዊ ጉዳዮች ዙሪያ የመወያያ ፅሁፍ ባቀረበበት ወቅት ነው።

በከተማዋ የእገታ ወንደል ህገ ወጥ የጥይት ተኩስ ተጀራጅቶ ዘረፉ ዋና ወና የከተማዋ ወንጀሎች መሆናቸውን አቶ ፋሲል ገልፀዋል።

በዚህ የእገታ ወንጀል ተሳትፈዋል የተባሉ 34 ተጠርጣሪዎች በህግ ቁጥጥር ስር ውለው ጉዳያቸው በህግ እየታየ መሆኑን ተናግረዋል።

4 በእገታ ወንጀል የፍርድ ውሳኔ የተላለፈባቸው መሆኑም ጠቅሰዋል።

በከተማዋ ኃላፊነታቸውን አልተወጡም የተባሉት 14 በየደረጃው በሚገኙ የፀጥታ አመራሮች 20 የፓሊስ አባላትና 14 የሚኒሻ አባላት ተጠያቂ መሆናቸውም አሳውቀዋል።

የመስቀል በዓልን ምክኒያት በማድረግ ጥይት ተኩሰዋል የተባሉ 115 ግለሰቦች በህግ ቁጥጥር ስር መዋላቸውን ተናግረዋል።

የከተማዋን ፀጥታ በመጠበቅ ረገድም ህብረተሰቡ እያበረከተ ያለውን አስተዋፅዎ የሚበረታታ ነው የተባለ ሲሆን የጀመረውን የሰላም የፀጥታ ስራዎችን አጠናክሮ በመቀጠልና በከተማዋ አስተማማኝ ሰላም ለመገንባት ድርሻውን ሊወጣ ይገባል ተብሏል።

መረጃው የጎንደር ኮሚኒኬሽን ነው።

@tikvahethiopia

#Dessie : በዛሬው ዕለት የደሴ ከተማ አስተዳደር ከንቲባ አቶ አበበ ገብረመስቀል ወቅታዊ ሁኔታን ተንተርሶ ለከተማው ህዝብ መልዕክት አስተላልፈዋል።

ከንቲባው ባስተላለፉት መልዕክት " የጸጉረ ልውጦችን እንቅስቃሴ ለመግታት ያመች ዘንድ #ከዛሬ ጀምሮ የሞተር እና የባጃጅ እንቅስቃሴ በከተማዋ ላይ እንዲቆም በጸጥታ ምክር ቤት ውስኗል ሲሉ አሳውቀዋል።

በከተማው የተዘጉ የተለያዩ የንግድ ቤቶች በተለይ መድሀኒት ቤቶች በአስቸኳይ ተከፍተው ለህብረተሰቡ አገልግሎት መስጠት እንዲጀምሩ ያሳሰቡ ሲሆን ይህን በማያደርጉት ላይ አስፈላጊውን የህግ እርምጃ እንደሚወሰድ አስጠንቅቀዋል።

አቶ አበበ ፥ የከተማው ነዋሪ አካባቢውን በንቃት በመጠበቅ ጸጉረ ልውጦችን ለጸጥታ ሀይሉ የማስረከብ ስራ ከምንግዜውም በላይ ተጠናክሮ እንዲቀጥል ሲሉም ጥሪ አቅርበዋል።

ከንቲባው ፥ "ለሰራዊታችን የሚደረገው የምግብና የውሀ አቅርቦት በአደረጃጀት ተጠናክሮ እንዲቀጥል" ያሉ ሲሆን " ወጣቱ ፣ አመራሩ፣ የመንግስት ሰራተኛው፣ እና አጠቃላይ ህዝባችን የጀመረውን የግንባር ደጀንነት አጠናክሮ እንዲቀጥል" ሲሉም መልዕክታቸውን አስተላልፈዋል።

የኬላ እና የውስጥ ከተማውን ጥበቃ በማጠናከር የከተማውን ሰላም ለማስጠበቅ ሁሉም ማህበረሰብ እርብርብ እንዲያደርግ ፤ የከተማዋ ማህበረሰብም በመደራጀት ከጸጥታ አካሉ ጋር በመሆን የከተማውን ቁልፋ እና መለስተኛ በሮች በመዝጋት የጥላት ሰርጎ ገበች እንዳይገቡ መከላከል እንደሚገባም በመልዕክታቸው ገልፀዋል።

አቶ አበበ ፥ " ነዋሪው ከተለመደው የጥላት የሀሰት ወሬ እና ፕሮፖጋንዳ እራሳችንን በማራቅ ከተማችን ላይ ተረጋግተን መቀመጥ አለብን" ብለዋል።

@tikvahethiopia