#ሪፖርት

የኢትዮጵያ ሲቪል ማህበራት ድርጅቶች ሕብረት ለምርጫ (CECOE) የመጀመሪያ ደረጃ ሪፖርቱን ይፋ አድርጓል።

የኢትዮጵያ ሲቪል ማህበራት ድርጅቶች ሕብረት ለምርጫ ተጠባባቂ ዳይሬክተር አበራ ኃይለማርያም የመጀመሪያ ደረጃ ሪፖርቱን በተመለከተ ቃላቸውን ሰጥተውናል።

በአጠቅላይ ምርጫው ሰላማዊ መሆኑን መታዘብ እንደተቻለ ፣ የተለያየ የፖለቲካ ፓርቲዎች የውድድሩን ህግ በማክበር ፍፁም ነው ባይባልም የተሻለ ውድድር ስሜት የተፈጠረበት እና የህዝብ መነሳሳት የታየበት አበረታች የሚባል ሂደት ነበር ብለዋል።

ነገር ግን ምርጫው እንከን አልባ እና ፍፁም ነበር ማለት እንዳልሆነ ተጠባባቂ ዳይሬክተሩ አሳውቀውናል።

ምርጫው ላይ የተለያዩ ችግሮች የነበሩ እንደሆነም አንስተዋል።

ተጠባባቂ ዳይሬክተሩ ፥ "የትኛውም ምርጫ ፍፁም ሆኖም አያውቅም፣ ሊሆንም አይችልም፤ ምርጫ ሂደት ነው የምንማርበት ነው ከዚህ ምርጫ የተሻለ አፈፃፀም ደግሞ በሚቀጥለው ይታያል ብዬ አስባለሁ" ብለዋል።

* የመጀመሪያ ደረጃ ሪፖርቱ ከላይ ተያይዟል።

@tikvahethiopia

#EthiopianAirlines

የኢትዮጵያ አየር መንገድ ' ሙሉ በሙሉ ' የኮቪድ-19 ክትባት በወሰዱ ሰራተኞች በረራ ማድረግ መጀመሩን ዛሬ አሳውቋል።

የአየር መንገዱ ዋና ሥራ አስፈፃሚ የሆኑት አቶ ተወልደ ገብረማርያም ፥ በረራዎችን ሙሉ በሙሉ ክትባት በወሰዱ ሠራተኞች በማድረጋችን ተደስተናል ብለዋል።

አክለውም ፥ "ይህንን ማድረጋችን የሰራተኞቻችንን እና የደንበኞቻችንን የጤና ደህንነት በመጠበቅ ረገድ ትልቅ እርምጃ ነው" ሲሉ ገልፀዋል።

አቶ ተወልደ፥ በመላው ዓለም በኮቪድ-19 ክትባት በመተማመን ለንግድ ፣ ለቪኤፍአር እና ለቱሪዝም የሚጓዙ መንገደኞች ቁጥር እየጨመረ በመሄዱ ተበረታተናል ብለዋል።

አየር መንገዱ ለሰራተኞቹ እንዲሁም ለባለድርሻ አካላቱ ከ37,000 በላይ የክትባቶችን ገዝቶ ማስገባቱን አቶ ተወልደ አሳውቀዋል።

በሌላ የኢትዮጵያ አየር መንገድ መረጃ ፦ ወደ ኤርትራ #አስመራ ተቋርጦ የነበረው የመንገደኞች የበረራ አገልግሎት ከዛሬ ሰኔ 16 ቀን 2013 ጀምሮ የሚቀጥል መሆኑን አሳውቋል።

@tikvahethiopia

ፎቶ፦ በመቐለ አይደር ሆስፒታል ዛሬ ረቡዕ ሰኔ 16/2013 ዓ/ም ጉዳት ስለደረሰባቸው የቶጎጋ ነዋሪዎች ቤተሰቦቻቸው መረጃ ሲጠባበቁ።

ዛሬ ጥዋት በተለዋወጥነው መረጃ ትላንት ከመቐለ ከተማ በቅርብ ርቀት በምትገኘው ቶጎጋ በነበረ ጥቃት የሰዎች ህይወት አልፏል፣ የአካል ጉዳት ደርሷል (እስካሁን ትክክለኛ የተጎጂ ዜጎች ቁጥር አይታወቅም) ።

የአየር ድብደባ የተፈፀመው እና ሰዎች ላይ ጉዳት የደረሰው በገበያ ቀን በተፈፀመ ጥቃት መሆኑን የአይን እማኞች ይገልፃሉ። ከጥቃቱ በኃላ አምቡላሶች ሌሎች ተሽከርካሪዎች ወደቦታው እንዳይሄዱ ተከልክለው እንደነበር ከአካባቢው የወጡት ሪፖርቶች ያመላክታሉ።

የኢትዮጵያ መከላከያ ሠራዊት ቃል አቀባይ ኮሎኔል ጌትነት "በገበያ ቦታ ላይ ፈጽሞ የአየር ጥቃት አልፈጸምንም። ይህ እንዴት ሊሆን ይችላል ? ሠራዊቱ ኢላማውን በትክክል የመምታት አቅም አለው" ጥቃቱን ሀሰት ብለውታል።

ኮሎኔሉ ፥ "... የአየር ጥቃቶችን ፈጽመናል ነገር ግን በተመረጡ ውስን ኢላማዎች ላይ ያነጣጠሩ ናቸው። ስለዚህ በገበያ ስፍራ ላይ ጥቃት ተፈጽሟል የተባለው ሙሉ ለሙሉ ውሸት ነው" ሲሉ ለቢቢሲ በሰጡት ቃል ክሱን ውድቅ አድርገውታል።

(ከሰሞኑ በትግራይ ስላሉት ሁኔታዎች ሙሉ መረጃው ከላይ በReply ተያይዟል)

Photo Credit : AFP

@tikvahethiopia

የኢትዮ-ሱዳን ድንበር ጉዳይ ፡

ከሱዳን ድንበር ጋር ያለው ችግር በንግግር እና ውይይት ይፈታል ብለው እንደሚያምኑ የኢትዮጵያ ጠ/ሚ ዶ/ር ዐቢይ አህመድ ተናግሩ።

ጠቅላይ ሚኒስትሩ ይህን ሲናገሩ የተደመጡት የምርጫ 2013 የጥሞና ወቅት መተላለፍ የለበትም ተብሎ የታደውና ዛሬ በተላለፈው ቃለምልልስ ላይ ነው።

ከኢትዮ - ሱዳን ድንበር ጋር በተያያዘ ስላውን ችግር ተጠይቀው ምላሽ የሰጡት ዶ/ር ዐቢይ ፥ ችግሩን በዴፕሎማቲክ መንገድ ማየት ቅድሚያ እንደሚሰጠው ፣ ችግሩን ለመፍታት ከውይይት እና ንግግር ውጭ ያለው መንገድ ለሱዳንም ለኢትዮጵያም የሚበጅ እንዳልሆነ ገልፀዋል።

የድንበርን ጉዳይ ከዚህ ቀደም ኢትዮጵያ ከኤርትራ ጋር ሞክረዋለች ሲሉ ያስታወሱት ዶ/ር ዐቢይ ፥ "በጦርነት አሸንፋ ወደፍርድ ቤት ከሄደች በኃላ የተፈጠረውን ውጤት የምናውቀው ነው ፤ አሁንም ሰው ገድለን ሰው ሞቶብን ፣ መሬት ከያዝን በኃላ ሄዶ ጉዳዩ በዓለም አቀፍ ህግጋቶች የሚታይ ከሆነ ቀድሞ ለውጊያ መሽቀዳደም ጠቃሚ ነው የሚል ሃሳብ የለንም" ብለዋል።

ችግሩን በሰከነ መንፈስ በውይይት፣ ንግግር ፣ በሰጥቶ መቀበል መርህ የሚፈታበትን መንገድ ማየት ይበጃል ከዚህ ውጭ ግን ያለው መንገድ ጉዳቱ ለኢትዮጵያም ለሱዳንም እንደሚሆን ምንም ጥርጥር የለውም ሲሉ ተናግረዋል።

ከሱዳን ጋር ያለው ችግር በንግግር፣ በውይይት፣ በህግ አግባብ ይፈታል ብለው እንደሚያምኑ የተናገሩት ዶ/ር ዐቢይ፥ "ነገር ግን ሁሉም መንገድ ፣ በሁሉም ሙከራ ዝግ ከሆኑ ፣ ሁሉም ትዕግስት የማይመልሳቸው ከሆነ ሱዳን ብቻ ሳይትሆን ማንም ሀገር ከህግ አግባብ ውጪ የኢትዮጵያን አንድ ስንዝር መሬት ወስዶ መቀመጥ አይችልም ፤ ይህንን ሱዳኖችም ያውቁታል እኛም እናውቀዋለን" ሲሉ ተደምጠዋል።

ያንብቡ : telegra.ph/Ethio-Sudan-06-23

@tikvahethiopia

" ...ጥቃቱ ምግበይ በተባለ ግለሰብ የሚመራ የወንበዴ ኃይል ላይ የተወሰደ እርምጃ ነው ፤ ሰላማዊ ሰው ላይ ጥቃት አልተፈፀምም" - ጄኔራል ብርሃኑ ጁላ

ከትላንት በስቲያ ከመቐለ በስተ ምዕራብ አቅጣጫ 25 ኪ.ሜ በምትገኝ እንደርታ ወረዳ ደብረናዝሬት ቀበሌ ተቶጋግ እዳጋ ሰሉስ በምትባል መንደር ለገበያ ተሰብስበው የነበሩ ሰዎች በነበሩበት ወቅት ተፈፅሟል የተባለውን የአየር ጥቃት መነጋገሪያነቱ ቀጥሏል።

ቶጎጋ እዳጋ ሰሉስ ላይ ተፈፅሟል በተባለው የአየር ድብደባ እስካሁን ቁጥራቸው ያልታወቀ ዜጎች ህይወት አልፏል፤ በርካቶችም ቁስለኛ ሆነዋል።

የአይን እማኞች ድብደባው ማክሰኞ ከቀኑ ስድስት ሰዓት አካባቢ ለገበያ ተሰብስቦ በነበረ ህዝብ ላይ ነው የተፈፀመው ብለዋል። በድብደባው በሰዎች ላይ ከደረሰው ጉዳት በተጨማሪ በእንስሳት ላይ ጉዳት ደርሷል።

የአይን እማኞቹ በቅድሚያ የተመታው ገበያው እንደሆነ በኃላም በቤቶች ላይ እንደነበር አስረድተዋል።

ከቦታው ጉዳት ደርሶባቸው መቐለ አይደር ሆስፒታል የገቡት 5 ሰዎች ሲሆኑ ከእነሱ መካከል አንዷ የ2 ዓመት ከአራት ወር ህፃን ትገኛለች።

ህፃኗ ከፍተኛ የሆኑ ጉዳት የደረሰባት ሲሆን በአሁን ሰዓት መተንፈስ ስለማትችል የመተንፈሻ ቱቦ ተገጥሞላት ይገኛል። በሌላ በኩል የህፃኗ አባት ጉዳት ደርሶበት ወደ ህክምና እንዳይገባ በወታደሮች ተከልክሏል ተብሏል።

አንድ የአይን እማኝ ደግሞ አጠገቡ ሶስት ሰዎች መሞታቸውን ገልጿል። አህዮች ጨምሮ ብዙ እንስሶችም ሞተዋል ብሏል ፤ በአካባቢው ታጣቂዎች እንደነበሩ ተጠይቆ ምንም ታጣቂ አላየሁም ብሏል።

ጉዳት የደረደባቸውን ሰዎች ለማምጣት የአምቡላንስ ሹፌሮች አምስት ጊዜ ተጉዘው አይቻልም ተብለው መመለሳቸውን ገልፀዋል።

ያንብቡ : telegra.ph/Tgoga-Tigray-06-24

@tikvahethiopia