የ2012 ዓ/ም የዩኒቨርሲቲ መግቢያ ፈተና ውጤት በአጭር ጊዜ ነው ይፋ የተደረገው ፥ ፈተናው እንዴት በዚህ ፍጥነት ታርሞ ይፋ ሊሆን ቻለ ?

የሀገር አቀፍ ትምህርት ምዘናና ፈተናዎች ኤጀንሲ ዳይሬክተር ዶ/ር ዲለሞ ኦቶሬ በትላንትና ምሽት የቢቢሲ ሬድዮ ስርጭት ላይ ቀርበው ከላይ በተነሳው ጥያቄ ዙሪያ ማብራሪያ ሰጥተዋል።

እሳቸው እንዳሉት የመጀመሪያው ምክንያት በሰላም መጠናቀቁ ነው። ፈተናው በሰላም ባይጠናቀቅ ኖሮ የሚጣራ ጉዳይ፣ በፖሊስ የተያዘ ጉዳይ፣ የዝርፊያ ሁኔታ ስለሚኖር የእርማቱ ጊዜ እንዲዘገይ ያደርገዋል ብለዋል።

ሁለተኛው የሰዓት አጠቃቀም ሲሆን፥ ፈተናው ሲታረም የነበረው በፈረቃ 24 ሰዓት ነው። ተማሪዎች በፈተናው መዘግየት ስለተጎዱ ሌላው ቢቀር ውጤቱ በቶሎ ይገለፅ የሚል አቋም ተወስዶ ነው ፈተናው የታረመው ሲሉ ገልፀዋል።

ፈተናውን ለማረም ምንም አይነት አዲስ ቴክኖሎጂ በትግበራ ላይ ያልዋለ ሲሆን እንደከዚህ ቀደሙ በDRS ሲስተም (በማሽን) ነው የታረመው አሳውቀዋል።

በሌላ በኩል የ2013 ፈተና በኦንላይን እንዲሰጥ ውጤቱም እዛው በኦንላይ እንዲታወቅ የሚደረግበትን ቴክኖሎጂ ተግባራዊ ለማድረግ እየተሰራ መሆኑን አሳውቀዋል።

ከ2013 የፈተና ዝግጅት ጋር በተያያዘ ፦

- የቀረው የታብሌት መግባት ብቻ ነው።

- ታብሌቶቹ ከሆንግኮንግ የሚመጡ ሲሆን በኮቪድ-19 ምክንያት አልገቡም።

- ወደ900 ሺህ ተማሪ ስለሚፈተን፤ 900 ሺህ ታብሌት እንዲመጣ እየተደረገ ነው።

- ለሌላ ዓመት ተማሪዎች ታብሌቱን በአግባቡ እንዲቀመጥ ተደርጎ እንዲጠቀሙበትም ማድረግ ይቻላል።

- ከታብሌት ውጭ ሌላው ዝግጅት ያለቀ ነው። ላፕቶፖች ገብተዋል፣ ኢንተርኔት የሚገኝበት ቴክኖሎጂ በየፈተና ጣቢያው ተተክሏል።

PHOTO:NEAEA (2019)
@tikvahethiopia @tikvahethiopiaBOT

የG7 ሀገራት መግለጫ ፡

የካናዳ ፣ ፈረንሳይ ፣ ጀርመን ፣ ጣልያን ፣ ጃፓን ፣ ዩናይትድ ኪንግደም እና ዩኤስኤ የሚገኙበት የቡድን 7 ሀገራት የውጭ ጉዳይ ሚኒስትሮች እንዲሁም የአውሮፓ ህብረት ከፍተኛ ተወካይ የትግራይን ወቅታዊ ጉዳይ በተመለከተ የጋራ መግለጫ አወጡ።

በመግለጫው የቡድን 7 ሀገራት የውጭ ጉዳይ ሚኒስትሮች እና የአውሮፓ ህብረት ከፍተኛ ተወካይ ፣ በቅርቡ ሪፖርት የተደረጉ በትግራይ የተፈፀሙ የሰብአዊ መብት ጥሰቶች እና በደሎች እንዲሁም የዓለም አቀፍ የሰብአዊ ሕግ ጥሰት በጣም አሳስቦናል ብለዋል።

መግለጫው አክሎ በሰላማዊ ዜጎች ላይ የሚደርስ ያለውን “ግድያ ፣ ጾታዊ ጥቃቶችን ፣ ያለ ልዩነት የሚፈጸም ከባድ ድብደባ እና በትግራይ ነዋሪዎች እና የኤርትራ ስደተኞች ላይ የሚፈጸመውን አስገዳጅ መፈናቀል” እንደሚያወግዙ ገልፀዋል።

ሁሉም ወገኖች የዜጎችን ደህንነት ማረጋገጥ እና የሰብዓዊ መብቶችን እና ዓለም አቀፍ ህጎችን ማክበር እንዳለባቸውም አሳስበዋል።

በቅርቡ የኢትዮጵያ መንግስት ለእንዲህ ዓይነት ጥሰቶች ተጠያቂ መሆን ያለባቸውን ለመጠየቅ ላሳየው ቁርጠኝነት እውቅና የሰጠው መግለጫው መንግስት ቃሉን ተግባራዊ እንዲያደርግ ጠይቀዋል።

በቅርቡ ጠ/ሚ ዐቢይ የኤርትራ ኃይሎች ከትግራይ ይወጣሉ በሚል ያወጡትን መግለጫ በደስታ እንደሚቀበሉም መግለጫው ጠቁሟል፡፡ ይህ ሂደት በፍጥነት ፣ ያለምንም ቅድመ ሁኔታ መፈጸም እንዳለበትም ነው የተገለጸው፡፡

የቡድን 7 ሀገራት ፥ “አመጽ እንዲቆም እና ትግራይን ጨምሮ በሁሉም ኢትዮጵያዊያን ዘንድ ተቀባይነት ያለው እና ወደ ተአማኒ ምርጫ እና ወደ ሰፊ ብሔራዊ እርቅ የሚወስድ ግልፅ ፣ ሁሉን አቀፍ የፖለቲካ ሂደት እንዲፈጠር ጥሪ እናቀርባለን” ብለዋል።

More : telegra.ph/AlAIN-04-02-4

ምንጭ፦ አል ዓይን ኒውስ
@tikvahethiopia

የተሰረቁ የመኪና መለዋወጫዎችእና 4 ተጠርጣሪዎች ተያዙ።

የአዲስ አበባ ፖኪስ በአዲስ ከተማ ክፍለ ከተማ ለልማት ተብለው በተዘጋጁ የመንግስት ቦታዎች ላይ ፖሊስ በምሽቱ ክፍለ ጊዜ ባደረገው የአሰሳ ስራ በርካታ የተሰረቁ የመኪና መለዋወጫ እቃዎችን ከ4 ተጠርጣሪዎች ጋር በቁጥጥር ስር ማዋሉን ገልጿል።

የምርመራ ስራም እየተሰራ መሆኑን አሳውቋል።

ተጠርጣሪዎቹ በቁጥጥር ስር የዋሉት በአዲስ ከተማ ክፍለ ከተማ ወረዳ 1 ክልል ልዩ ቦታ አሜሪካን ግቢ እየተባለ ከሚጠራው አካባቢ ነው።

መንግስት ለልማት ብሎ ባዘጋጀቸው ቦታዎች ላይ ግለሰቦቹ በህገ- ወጥ መንገድ የሸራ ቤት ወጥረው ለተለያዩ ህገ-ወጥ ተግባርና ለወንጀል መሸሸጊያነት በማዋል ከተለያዩ ቦታዎች የሰረቋቸውን የመኪና እቃ መለዋወጫዎችን በዚሁ የሸራ ቤት ውስጥ አከማችተው በደላላ አማካኝነት በተለምዶ ሱማሌ ተራ እየተባለ ወደሚጠራው አካባቢ በመውሰድ ለሌሎች ግለሰቦች ሲሸጡ እንደነበረ የምርመራ ውጤቱ አመላክቷል።

ከተያዙት የመኪና እቃ መለዋወጫዎች መካከል ፦
- 183 ስፖኪዮ፣
- 122 የመኪና የፍሬን ጉሚኒ፣
- 21 ፍሬቻ ባለመስታወት ፣
- 3 የመኪና ቴፕ፣
- 36 የመኪና ቸርኬ ጌጣጌጥ በኤግዚቢትነት መያዛቸውን ፖሊስ አሳውቋል።

ንብረት የጠፋባቸው ግለሰቦች በወቅቱ ወደ አቅራቢያቸው ፖሊስ ጣቢያ ሄደው ስለማመልከታቸውና የጠፋባቸውን የእቃ አይነት ማስረጃዎችን ይዘው በመቅረብ ንብረታቸውን መውሰድ ይችላሉ ተብሏል።

መረጃው የአዲስ ከተማ ክፍለ ከተማ ፖሊስ መምሪያ መርካቶ አካባቢ ፖሊስ ነው።

@tikvahethiopia

ዘራፊዎቹ ተያዙ።

ከጢስ ዓባይ - ባህር ዳር በተዘረጋው የባለ 132 ኮሎ ቮልት የኃይል ማስተላለፊያ መስመር ምሰሶዎች ላይ ስርቆት የፈፀሙ ሁለት ተጠርጣሪዎች ከሰረቁት ንብረት ጋር እጅ ከፍንጅ መያዛቸው ተሰምቷል።

ህብረተሰቡ ለፀጥታ ኃይሎች በሰጠው ጥቆማ ምሰሶውን በመቆራረጥ በማዳበሪያ ጠቅልለው ከመሸጣቸው በፊት በአማራ ክልል የፀጥታ ኃይሎች የተያዙ ሲሆን ከወንጀሉ ጋር የተገናኙ ሌሎች ተጠርጣሪዎችን ለመያዝ ምርመራ ቀጥሏል ተብሏል።

በጢስ ዓባይ - ባህር ዳር ባለ 132 ኮሎ ቮልት የኃይል ማስተላለፊያ ምሰሶዎች ላይ የተፈፀመው ስርቆት የኢትዮጵያ ኤሌክትሪክ ኃይልን ከ16 ሚሊዮን ብር በላይ ለሆነ ኪሳራ ዳርጎታል።

ከዘረፉት ንብረት ጋር እጅ ከፍንጅ የተያዙት ግለሰቦች ምን አይነት ቅጣት ይጠብቃቸው ይሆን ? የኢነርጂ አዋጁ ምን ይላል : telegra.ph/Ethiopian-Electric-Power-04-03

@tikvahethiopia @tikvahethiopiaBOT

"በአንድ የምርጫ ጣቢያ ላይ የዘረፋ ሙከራ ተደርጓል" - ወ/ሪት ሶሊያና

የምርጫ ቦርድ ኮሚኒኬሽን አማካሪ ወ/ሪት ሶሊያና ሽመልስ ፥ ከሰሞኑን አዲስ አበባ የካ ክፍለ ከተማ ወረዳ ስምንት ምርጫ ጣቢያ ላይ የዘረፋ ሙከራ መደረጉን ተናግረዋል።

ወ/ሪት ሶሊያና እንደተናገሩት ፥ የምርጫ ጣቢያው ቢሮው ተከፍቶ "ብሉ ቦክስ" / እቃዎች ታሽገው የተቀመጡበት ሳጥን ተወስዶ 100 ሜትር ርቀት ላይ ተገኝቷል።

በሙከራው ምንም የተወሰደ ንብረት የሌለ ሲሆን ሳጥኑ እንደታሸገ ነው የተገኘው። እቃው ተመልሶ ምርጫ ጣቢያው ስራውን ቀጥሏል።

በዚህ ጉዳይ ምርጫ ቦርድ ከከተማው አስተዳደር እና ከፖሊስ ጋር የተነጋገረ ሲሆን እንዲህ ያለ ነገር ዳግም እንዳይፈጠር ምርጫ ጣቢያ አካባቢ ጥበቃ እንዲጠናከር አሳስቧል።

በአዲስ አበባ ከተማ የካ ክፍለ ከተማ ፖሊስ መምሪያ ኃላፊ ኮማንደር ደመና ተስፋዬ ፥ ከሰሞኑን አንድ ምርጫ ጣቢያ በሩ ተከፍቶ ንብረት መወሰዱን እና የተወሰደውን ንብረት ሁሉንም ማግኘች መቻሉን እና ወደምርጫ ጣቢያው ምንም ቁሳቁስ ሳይጎድል እንዲመለስ ማድረግ መቻሉን አሳውቀዋል።

በምርጫ ጣቢያው ላይ ይተፈፀመው ተራ ዘረፋ ? ወይስ ሌላ ተልዕኮ ያለው ? በሚል የተጠየቁት የመምሪያው ኃላፊ ፥ "ዘረፋ ነው አይደለም፤ ሌላ ነገር ሆኖ ምርመራ ጀምረን እውነት የሚመስሉ ነገሮችን አግኝተናል" ብለዋል። ይህን ሊሉ የቻሉት ምርመራው በሂደት ላይ ስለሆነ እርግጠኛ መሆን ስላልተቻለ መሆኑን ገልፀዋል።

አሁን ላይ በሁሉም የምርጫ ጣቢያዎች የጥበቃው ሁኔታ መጠናከሩን አሳውቀዋል።

መረጃውን ያገኘነው ከሸገር ኤፍ ኤም ሬድዮ ጣቢያ ነው።

@tikvahethiopiaBot @tikvahethiopia

"የሀገር መከላከያ ሰራዊትና የፌዴራሉ ሰራዊት በ8 ግንባሮች ከፍተኛ ፍልሚያ እያደረጉ ፤ መስዋእትነት እየከፈሉ ነው" - ጠ/ሚ ዶ/ር አብይ አህመድ

ጠቅላይ ሚኒስትር ዶክተር አብይ በሩቅ ያሉ ኢትዮጵያውያን አይችሉም ብለው የሚያስቡ ኃይሎች ሽፍቶችን በመጠቀም ኢትዮጵያውያን ለመከፋፈል እየሰሩ ነው ሲሉ ተደምጠዋል።

ጠቅላይ ሚኒስትሩ ይህንን ያሉት ዛሬ በእንጦጦ ኦብዘርቫቶሪ ምርምር ማእከል ደመናን ወደ ዝናብ የመቀየር ቴክኖሎጂን የማስተዋወቅ መርሃ ግብር ላይ ባደረጉት ንግግር ነው።

ጠ/ሚሩ ፥ "በሩቅ ያሉ ኢትዮጵያውያን አትችሉም ስለዝናብ ስለ ግድብ አታስቡ እናተ በበሬ እያረሳችሁ የጎደላችሁን ስንዴ እኛ እየረዳናችሁ መኖር ብቻ ነው የተፈቀደላችሁ የሚሉ ኃይሎች ከውስጥ ከተገዙ ሽፍቶች ማንነታቸውን የማያውቁ ሽፍቶችን በመጠቀም ኢትዮጵያውያንን እርስ እርስ ለማባላት እና ለማከፋፈል ቀን ከሌት እየሰሩ ይገኛሉ" ብለዋል።

ጠቅላይ ሚኒስትሩ በንግግራቸው 'ሽፍቶችን' እየተጠቀሙ ነው ያሉትን እና ኢትዮጵያውያን አይችሉም የሚሉት ኃይሎች እነማን እንደሆኑ ስም ጠቅሰው አልተናገሩም።

ነገር ግን ተላላኪ የተባሉትን ኃይሎች እና አሸባሪዎችን ጠራርጎ ማጥፋት ከተቻለ ዋናው የላከውን ኃይል መጋፈጥ እና ፍላጎቱን መገንዘብ የሚቻልበት ጊዜ ሩቅ አይደለም ብለዋል።

ጠቅላይ ሚኒስትሩ ፥ ባደረጉት ንግግር የሀገር መከላከያ እና የፌዴራል ሰራዊት በ8 ግንባሮች ፀረ አርሶ አደረ፣ ፀረ ንፁሃን ዜጎች የሆኑ በሰሜን በምዕራብ ተሰልፈው ኢትዮጵያን ሊያባሉ ከተነሱ ኃይሎች ጋር ከፍተኛ ፍልሚያ እያደረጉ እና መስዋዕትነት እየከፈሉ ይገኛሉ ሲሉ ተደምጠዋል።

More : telegra.ph/PM-Dr-Abiy-Ahmed-04-03

@tikvahethiopia