#Мақола #Раддия #Бузғунчилик

ТЕРРОР - ИСЛОМ АҚИДАСИГА ЗИД

Террор сўзи луғатда қўрқитиш деган маънони англатади. Барча бандалар
Аллоҳдангина қўрқишлари лозим. Қуръони каримнинг “Бақара” сураси 40-оятида:
  وَإِيَّايَ فَارْهَبُونِ
Фақат мендангина қўрқингиз, - дея марҳамат қилинади. Аммо шаръий бир сабабсиз қўрқитиш қатъиян ҳаромдир. Негаки, ислом тинчлик динидир. У адоват ва ҳужумни биринчи бошламайди. Зарурат бўлмаган ҳолатда ўзини хатарга қўйишдан кўра, муаммони тинч йўл билан ҳал қилишни афзал билади. Аллоҳ таоло марҳамат қилиб дейди:
يَا أَيُّهَا الَّذِينَ آَمَنُوا ادْخُلُوا فِي السِّلْمِ كَافَّةً وَلَا تَتَّبِعُوا خُطُوَاتِ الشَّيْطَانِ إِنَّهُ لَكُمْ عَدُوٌّ مُبِينٌ
Эй, мўминлар, тинчликка батамом кирингиз, шайтон йўлларига эргашмангиз. Зеро, у (шайтон) сизларга очиқ душмандир (“Бақара” сураси, 208-оят).
Қўлларига қурол олиб террорчилик қилиб, инсонларни қўрқитиш ҳақида Пайғамбар алайҳиссалом шундай дейдилар: Биронтангиз, зинҳор ўз биродарига қурол билан ишора қилмасин (ўқталмасин), чунки, у билмайдики, шайтон унинг қўлини бузиши мумкинлигини (яъни унинг қалбига васваса солиб, мусулмонга қарата оттириши мумкин). Оқибатда эса у одам дўзах чоҳига қулайди. Одамларнинг тинчлигини турли баҳоналар билан бузиб, қўрқувга солиш инсоний биродарлик тамойилига зид келувчи таъқиқланган ишлардан эканини билиш учун ушбу келтириб ўтилган далиллар кифоя қилади.
Ислом дини таълимоти, қонун-қоида ва амалларидан бешта бош мақсад кўзда тутилган:
1. Инсон ҳаѐтини муҳофаза қилиш;
2. Инсон ақлини муҳофаза қилиш;
3. Инсон динини муҳофаза қилиш;
4. Инсон наслини муҳофаза қилиш;
5. Инсон мол-мулкини муҳофаза қилиш.
Террор эса айнан ушбу мақсадларнинг барчасига қарши қаратилган фаолиятдан иборатдир.

✍✍✍ Узун тумани "Домла Маҳмуд" жомеъ масжиди имом-хатиби Сирожиддин Самадов
https://t.iss.one/surxonmuslimuz