Муус скульптуратын маастардара үс бастыҥнар кэккэлэригэр киирдилэр.

❄️🧊Сунтаар нэһилиэгин олохтооҕо, уран ууһа Александр Игнатьев уонна Элгээйиттэн төрүттээх Максим Охлопков улуус дьаһалтатын өйөбүлүнэн, Кытайга ыытыллыбыт бэстибээлгэ ситиһиилээхтик кыттан кэллилэр. Барыта 12 дойдуттан 60 маастар бэйэлэрин оҥоһуктарын, дьоҕурдарын, сатабылларын көрдөрдүлэр. Биһиги дьоммут мууска үһүс миэстэни, хаарга "За лучшую технику" номинацияны ситистилэр.

❄️🧊Бу бэстибээл аан бастакытын 1963 сыллаахха ыытыллыбыта. Онтон култуурнай революция кэмигэр тохтуу сылдьан баран 1985 сылтан хос сөргүтүллэн тиһигин быспакка ыытыллар. 39 сыл ынараа өттүгэр сүүнэ улахан, 250 миэтэрэ уһуннаах, 9 миэтэрэ кэтиттээх хаар оҥоһук туран, бу бэстибээл Гиннес рекордугар киирбитэ.

❄️🧊Маннык үрдүк таһымнаах күрэскэ республика хамаандата Саха сирин устуоруйатын кэпсиир, кэрэһэлиир хаарынан мамонт кыылы оттон мууһунан "Бириэмэни курдары ытыы" диэн ис хоһоонноох атынан көтүтэн иһэр бухатыыры оҥордулар.

Киһи сатабыла, баҕата муҥура суох!

🚀 @suntaar_ulus

Сунтаар улууһун бастакы муниципальнай модельнай библиотеката Бүлүүчээҥҥэ арылынна.

📚Библиотека үлэтин көдьүүһүн үрдэтиигэ уонна тупсарыыга туһуламмыт бырайыак көмөтүнэн Бүлүүчээннээҕи олохтоох библиотека «Сунтаар улууһун модельнай библиотеката» диэн статуһу ылла.

📚Улуус дьаһалтата 300 тыһыынча солкуобайдаах үбүлээһини көрөн, библиотека материальнай- техническэй базатын тупсарыыга уонна информационнай ресурсалары саҥардыыга күргүөмнээх үлэ барда. Саҥардыллыбыт ааҕар дьиэ арыллыыта олус истиҥник тэрилиннэ.

📚Манна саҥа кинигэлэри, сурунааллары атыылаһыы эрэ буолбакка, аныгы компьютернай, мультимедийнай оборудованиелар кэлэн турдулар, үрдүк интернет ситимэ киирдэ. Онон нэһилиэнньэ бары араҥатыгар информационнай наадыйыыларын толорууга хаачыстыбалаах өҥөнү оҥорор кыахтаннылар.

🚀 @suntaar_ulus

Сунтаарга саҥардыллыбыт ЗАГС хоһугар үрүҥ көмүс кинигэҕэ 108-с нүөмэринэн Поповтар дьиэ кэргэттэрэ суруйтардылар.

💐🫶Сунтаарга улуустааҕы ыал буолуу, оҕону суруйтарыы кабинета саҥардыллан тупсаҕай көстүүлэннэ. Ол курдук, улуус дьаһалтатын өйөбүлүнэн 20 сыл устата аан бастакытын хаачыстыбалаах өрөмүөн үлэтэ ыытылынна. Үөрүүлээх арыллыыга Надежда Михайловна уонна Иван Владимирович Поповтар 45 сыллаах сапфировай сыбаайбаларынан үрүҥ көмүс кинигэҕэ киирдилэр.

💐Улуус баһылыга Анатолий Григорьев - "Ыал буолуу уонна саҥа төрөөбүт оҕону ааттыыр сиэр-туом, киһи олоҕор биир сүрүн умнуллубат түгэнинэн буолар. Онон бэлиэ күн кэрэ, тупсаҕай усулуобуйаҕа ыытыллыахтаах. Ааспыт сыл Арассыыйаҕа Дьиэ кэргэн, республикаҕа Оҕо саас, улууска Аҕам саастаах дьон сылларыгар сөп түбэһиннэрэн, бу үлэ ыытылынна".

💐Иван Попов улуус кылаабынай бырааһынан 24 сыл устата эҥкилэ суох үлэлээбитэ. Оттон Надежда Попова атыы-эргиэн эйгэтигэр таһаарыылаахтык үлэлии-хамсыы сылдьар Далбар хотун. Маннык нэһилиэк, улуус үлэтигэр көхтөөх дьиэ кэргэттэр үрүҥ көмүс кинигэҕэ суруллар кыахтаналлар.

Улууска холобур буолар саҥа ыал үксүү турдун!

🚀@suntaar_ulus

Арассыыйа 100 бастыҥ бородууксуйатыттан биирдэстэрин Уһун Күөлгэ астыыллар.

🔹Бүтүн дойду үрдүнэн бастыҥ аһынан ааттаммыт арыыны Сунтаар улууһун Уһун Күөлүгэр "Благо" кооператив үүтү тутар уонна астыыр-үөллүүр сыаҕар оҥорон таһаараллар. Москваҕа ыытыллыбыт быыстапкаҕа “Арассыыйа уонна Саха сирин 100 бастыҥ табаарын” ахсааныгар киирэн, анал каталогка киирдэ. Салайааччы Римма Семенова үрүҥ көмүс бэлиэнэн наҕараадаланна.

🔹Сыахха үрүҥ ас эгэлгэтин оҥорон таһаараллар. Ааспыт сылга кооператив 330 туонна үүтү ыата. Ону таһынан, биирдиилээн дьонтон эмиэ туталлар. Уһун Күөл олохтооҕо Эдуард Еремеев - "Ынах арыыта бэйэбитигэр оҥоһуллан тахсара олус үчүгэй. Сибиэһэй, иҥэмтиэлээх аһы оҕолорбутугар, дьоммутугар кэһии гынан ыыта турабыт".

🔹️Хаһаайыстыбаҕа икки хотон муҥунан, барыта 160-ча төбө ынах-сүөһү хараллан турар. Мантан 57-тэ ыанньык. Кэрэхсэнэрэ диэн хотоҥҥо, үүтү астыыр сыахха олохтоох дьон үлэлиир. Биригэдьиир Анатолий Иванов - "Субай сүөһүлэр уонна ыанньык ынахтар хотонноругар 3-түү киһи үлэлиир. Сотору маассабай төрүөххэ эбии үлэһиттэри ылабыт. Манна үлэлиир олус үчүгэй, хамнаспыт кэмигэр кэлэ турар".

🔹️Хаһаайыстыба салайааччыта Римма Семенова аныгы олох тэтимин батыһан саҥа саҕахтары арыйар сатабыллаах салайааччы. Быйыл министиэристибэ гранынан Тыһакыыс курдук быйаҥнаах сиргэ тупсаҕай сайылыгы тутан үлэлэҕэ киллэриэхтэрэ. Маны тэҥэ, уоту кэмчилиир сыалтан, альтернатива быһыытынан газгольдерга көһүөхтэрэ.

Бу курдук, үлэни өрө тутар дьон баарын тухары тыа сирэ сайдар, нэһилиэнньэ тирэхтээх.

📽 Устууга Эдуард Еремеев угуйукка ыҥырар😀👍

🚀@suntaar_ulus

Сунтаар улууһугар 2025 сыл Сергей Зверев - Кыыл Уолун сылынан биллэрилиннэ.

🔹 Сергей Зверев - Кыыл Уолун аатынан норуот айымньытын киинигэр ааспыт сылы түмүктүүр уонна саҥа сылы уруйдуур тэрээһин саҕаланна.

Тэрээһини оскуола үөрэнээччилэрэ Сунтаар улууһун Өрөгөй ырыатынан саҕалаатылар.

🔹Улуус баһылыга Анатолий Григорьев - "Билиҥҥи уустук кэмҥэ 2024 сыл бука барыбытын сомоҕолоото, биир санааҕа түмтэ. Ол курдук, анал байыаннай дьайыыга сулууспалыы сылдьар биир дойдулаахтарбытыгар күргүөмнээх көмөнү оҥордубут, үлэ араас көрүҥэ тиһигин быспакка ыытылынна. Кэлэр сыл эмиэ саҥа саҕахтары арыйдын, байыастарбыт этэҥҥэ төрөөбүт дойдуларыгар эргиллэн кэллиннэр. Быйыл Улуу Кыайыы 80 сылын бэлиэтиир. Онон бу тула тустаах, былааннаах үлэ барыаҕа".

🔹️ Тумулук туттар чулуу киһибит сылын арыллыытыгар сааланы толору киһи муһунна. Бар дьон күн эргиирин тула оһуохайы оройуттан туттулар. Сергей Зверевкэ сыһыаннаах быыстапка турда. Ааспыт сыл түмүгүнэн бастыҥ үлэлээхтэр чиэстэннилэр.

🚀 @suntaar_ulus