#Xotira

Inson xotira bilan tirik, qadr bilan ulug‘

Xotira va qadrlash kuni oldidan marhumlarni xotirlab qo‘yish barchamiz uchun ham qarz ham farzdir.

Soliq tizimida kasbiga mehr qo‘yib, davlat koriga yaraydigan xizmatchi ekanligidan faxrlanadigan hamkasblarimiz juda ko‘p. Marhum hamkasbimiz Mushtariy Aslonova ham ana shunday mehnatsevar soliq xizmati xodimlaridan biri edi.

-U yoshligidan soliqchi bo‘lishni orzu qilgan edi deydi, -Mushtariy Aslonovaning onasi Marziya Sharipova. – Ana shu orzusiga yetishish uchun soliq kollejiga o‘qishga kirdi, o‘qishni bitirish arafasida soliq inspeksiyasida amaliyot o‘tadi va tirishqoqligi bois tezda ishga ham qabul qilindi. Lekin, to‘g‘risini aytaman soliq xodimlarining ishini qiyin deb o‘ylaganim bois, qizimga doim boshqa sohadan ish izlashni tavsiya qilardim. Lekin u o‘z ishini, jamoasini yaxshi ko‘rgani uchun shu sohadan boshqasini tanlamadi.

Kogon tuman soliq inspeksiyasida 2013-yildan 2021-yilgacha faoliyat olib borgan marhum Mushtariy Aslonovani hamkasblari doim iliq xotiralar bilan yodga olishadi. Sababi, Mushtariy Aslonova yosh bo‘lishiga qaramay o‘ziga topshirilgan vazifani astoydil bajarib ko‘pchilikka o‘rnak bo‘lib kelayotgan edi.

Tizimda yoshlarga bo‘lgan e’tibor va ishonch tufayli u ham tez fursatda soliq organlarida o‘zining iqtidorini ko‘rsata oldi. Ayniqsa, Kogon tumanida soliq to‘lovchilarga soliq ma’murchiligini to‘g‘ri tushuntirish orqali soliq tushumlarining to‘g‘ri hisoblanishi va ularning davlat byudjetiga kelib tushushida uning munosib hissasi bor edi. Ammo, taqdir ekan, Mushtariy Aslonova 2021-yil sog‘ligidagi jiddiy xavf tufayli 28 yoshda bevaqt olamdan o‘tdi.

Hamkasbimiz Mushtariy Aslonovani Xotira va qadrlash kuni oldidan eslash, uning tizimdagi fidoyi xizmatlarini e’tirof etish bizga faxr-iftixor tuyg‘usini bag‘ishlaydi. Negaki, ana shunday jassur, fidoyi va kasbini ardoqlagan sobiq hamkasbimizning yagona farzandi ham soliqchi bo‘lish orzusida ulg‘aymoqda.
Buni qarangki, bugun undan yaxshi xotiralar va uning kasbiga yoshligidan mehr qo‘ygan qizaloq qoldi.

🌐Тelegram 🌐Facebook 🌐Instagram

#Xotira

Hamkasblarimiz xotirasi barhayot

Buxoro shahrining “Imom Buxoriy” mahallasidagi 1-uyga har yili soliq xizmati xodimlari hamkasblari va ustozlari sanalgan Maxmud aka Komilovni so‘roqlab borganlarida u kishining o‘zlari peshvoz chiqardilar. Biroq ming afsuski, mana 4 yildirki u kishi oramizda yo‘q.

Maxmud Komilov boshqalardan mehnatkashligi, aqliy va tashkilotchilik qobiliyati bilan ajralib turardi. U Buxoro shahar davlat soliq inspeksiyasining navbatchilik qismi navbatchisi, huquqshunos-maslahatchisi, inspeksiya boshlig‘i o‘rinbosari va soliq tizimida sodir etilishi mumkin bo‘lgan nojo‘ya xatti-harakatlar, suiiste’molchilik va korrupsiya holatlarining barvaqt oldini olishga mas’ul lavozimlarda 15 yildan ziyod samarali mehnat qildi. Maxmud aka aslida soliq organlarigacha boshqa tashkilot va tuzilmalarda faoliyat olib borgan. Hayot yo‘llarida soliq tizimida ham ishlash nasib qilgan ekan uzoq yillar viloyat soliq organlarida mehnat faoliyatini olib bordi.

Maxmud Komilov umrining asosiy qismi o‘tadigan ish joyini muqaddas deb bilib, yurt manfaatini o‘z manfaatidan ustun qo‘yadigan, davlat xizmatchisi sifatida o‘ziga yuklatilgan vazifalarni sidqidildan bajaradigan haqiqiy vatanparvar insonlardan biri edi.

Shuning uchun ham soliq xodimlarining siyosiy ongi, ma’naviy va intellektual salohiyatini yuksaltirish, ularda vatanparvarlik, kasbiga nisbatan sadoqat va yuqori mas’uliyat hislarini oshirish maqsadida tashkil etiladigan turli ma’naviy-ma’rifiy ishlarning tashabbuskori ham o‘zi bo‘lardi.

Maxmud aka Komilov nafaqaga chiqqanidan keyin ham ko‘p yillar viloyat soliq boshqarmasida “Faxriylar kengashi” raisi sifatida soha xodimlari va yoshlarni vatanparvarlik ruhida tarbiyalashda katta hissa qo‘shdilar.

U kishining kasbiga sadoqati, o‘z ustida tinimsiz ishlab soliq qonunchiligini mukammal egallagab, hamkasblar va shogirdlariga o‘rnak bo‘lganligi soliq to‘lovchilar bilan uchrashuvlarda va yoshlarga to‘g‘ri yo‘lni ko‘rsatishda yaqqol namoyon bo‘lar edi.
Yaxshi insonlar haqida xotira uyg‘onsa go‘zaldir.

71 yoshida bu yorug‘ olamni tark etgan Mahmud akani eslaganda ham ko‘pchilik hamkasblari va oila a’zolari u kishini har bir qadamini aql bilan, vijdon va iymon bilan bosganini, jamiyatga, odamlarga hamisha mehr ko‘zi bilan qaraganini eslashadi.
Maxmud Komilov hayot yo‘lining har bir daqiqasini mazmunli va unumli o‘tgazishga harakat qilib, farzandlari va shogirdlariga halol mehnat bilan topilgan luqma totli bo‘lishini, bu bilan inson umrining oxirida ham vijdoni oldida pok va xotirjam bo‘lishini tez-tez takrorlab turardi.

Darhaqiqat, Maxmud Komilov o‘ziga berilgan umrni mazmunli o‘tab ketgani rost. U kishi yashagan umrini behuda sarflamadilar. Ana shuning uchun ham Maxmud Komilovni davralarda yaqinlari, hamkasblari va shogirdlari hurmat-izzat va yaxshi nom bilan tilga olishadi. Bugun u kishidan hayotda yaxshi ot, solih farzandlar qoldi.

Buxoro viloyati soliq boshqarmasi
Matbuot xizmati.

🌐Тelegram 🌐Facebook 🌐Instagram

#Xotira

Yaxshi insonlar xotirasi abadiydir

Buxoro viloyati soliq xizmati organlarida hamkasblarni qadrlash, dunyodan o‘tganlarni xotirlab turish an’anasi yaxshi yo‘lga qo‘yilgan.

Ayniqsa, soliq xodimlari Xotira va qadrlash kuni oldidan o‘z kasbini ulug‘lagan ustozlari, bevaqt olamdan o‘tgan hamkasblari yodini xotirlab qo‘yishni aslo esdan chiqarishmaydi.

Viloyat soliq boshqarmasi rahbariyati tashabbusi bilan tayyorlangan ushbu videorolik ularning yorqin xotirasiga bag'ishlanadi.

Xotira – abadiy, qadr – muqaddas.

🌐Тelegram 🌐Facebook 🌐Instagram