Чорсу
(ижара уй)

Ғоялар туғилар бу ерда
ва зўрланар вояга етмай.
Ҳаммомга бошлар,
Бошлар ҳожатхонага,
аммо
етакламас кўчага биров
фикрни.
Зерикса, қўшиқ қилиб куйлар,
шеър қилиб айтар — сокиин овозда
(Ахир деворнинг ҳам қулоқлари бор)
ё қартадай сузар,
мукофот — чертки!
Пешонага ёзилар орзу,
пешонада ёрилар орзу
қоқсуяк бармоқлар зарбидан.
Алқисса истаган кўйига солар —
ичкарида,
аммо етакламас кўчага биров.

Рамкасига қамалган рассом,
чўнтагидан қадрсиз шоир,
қабри узра туриб бугуннинг
ўтмиш ва келажак ҳақда чиройли
сўзловчи амалдор
қиёфасин кияр ғазабинг.

Тамаки дудидан бўғриққан хона
ланг очиб юборар деразаларин.
Шунда ҳам учиб кетолмас фикр.
Қочмоқ бўлса эшикка томон,
ўлдирамиз суваракдай бошига уриб —
ёпиқ қолсин ёпиғли қозон!

Қарта эса авжига чиқар,
Хавфли қарашлари тўкилмагунча чертилар калла.
"Пагон" олиб қулайди бир ўй,
бошқа хаёл аёл шаклида
ўт қўйиб юборар мавжудлигига
70-йиллардагидек...
Сўнг
"Ай ишқ пайдо қил мани,
Ё ҳувайдо қил мани"*
оҳангида уйқуга чўмар хона.
Уёғи туш — "Фозил одамлар шаҳри".

Фақат мен уйғоқ.
Ҳамма ухлаганига ишонч ҳосил қилгач,
жонсарак фикрларни жамлаб,
яшириб қўяман кундалигимга:
"Аллақачон ўлган Чорсудагилар,
Бироқ ҳали кафанланмаган,
ҳеч ким покламаган юракларини
ҳақиқатнинг қўллари билан..."

Ғоялар туғилар бу ерда
ва зўрланар вояга етмай.

Жонтемир

*Зариф Султоний сатри
@sheriylahzalar

* * *
Мен масту сен ошуфта, элтар бизи ким хона?
Юз бора дедим: кам ич бир-иккита паймона.

Шаҳр ичра кўринмайди ҳушёр бирор кимса,
Бир-бирларидан баттар ҳар биттаси девона.

Жон лаззати гар қасдинг, майхонага кел, жоно,
Жон қувнамагай, сўзлаб лутф этмаса жонона.

Ҳар гўшада бир сархуш, қўл устида қўллар хуш,
Май сунгучи ҳам тутмиш ул соғари шоҳона.

Сен майкада вақфисан, судинг майу сарфинг май,
Ҳушёр кишиларга топширма бирор дона.

Эй уд чалар ҳинду, сен мастмисан, менму?
Эй сен каби сархушга афсуним энг афсона.

Уйдан чиқиб эрдимки, бир маст дучор ўлди,
Ҳар боқишида пинҳон юз гулшану кошона.

Заврақ каби лангарсиз, чайқалгай эди ҳадсиз
Ҳам ҳасратида ўлмиш юз оқилу фарзона.

Дедимки: “Қаён мулкинг?”, кулди-да деди: “Эй жон,
Ярмим бани Туркистон, ярмим бани Фарғона.

Ярмим суву туфроқдан, ярмим дилу жон, боқ, ман ―
Ярми чети дарёнинг, ярми тўла дурдона”.

Дедимки, қариндошман мен сенга, рафиқим бўл,
Дедики, таниш бизга на қондошу бегона.

Мен бесару бедастор, майхона ерим зинҳор,
Айтайми не розим бор, қолсинми у пинҳона?

Бир давра чўлоқ ичра оқсаш санга лозимдур,
Олий Эгадан туйдинг бу пандни ҳайрона.

Маст этса санам ҳар дам, бўлмайсан оғочдан кам,
Ўрлатди фиғон охир ул устуни ҳаннона.

Шамсулҳақи Табрезий, элдан не бу парҳезинг?
Эмдики, сочилмишдир юз фитнайи фаттона.

✍ Мавлоно Жалолиддин Румий
Алишер Сабрий таржимаси

@sheriylahzalar

***

Томоша ҳақида эълон берилди,
Курашга тўпланди бутун оломон.
Бошланди!
Биринчи сониядаёқ
Юзтубан йиқилди тупроққа полвон!

— Ҳалол!!!

Чапаклар портлади сотқин қўлларда,
Бурунги зафарлар эсланмади ҳам.
Мағлуб бўлган полвон яктакни олиб
Чиқиб кетди даврадан.

Кетди-ю косага тўла май қуйди,
Сипқорди, ҳар куни тўхтатмай қуйди.
Орадан вақт ўтиб, одамлар уни
Полвонга ҳам ўхшатмай қўйди.

Қачон томошадан тўйган оломон?!
Полвон ўзгартирди эски машқини.
Қишлоқ кузатарди энди у ҳар шом
Ичиб хотинини дўппослашини.

Жонибек АЛИЖОНОВ,
январь, 2024

@Jonibek_Alijonov

@sheriylahzalar

***
Отанг сени йўқлаб Тошкентга келди,
Энди уйғон, кўзингни оч, тош,
Етмайдими сенга беш йиллик ўлим,
Отанг келтирибди бир халта кўз ёш.

Унга юзингни юв, юрагингни юв,
Қара, бош оёғинг қоп-қора қурум.
Отанг етмиш йилни судраб келибди,
Сени қўйвормайди беш йиллик ўлим.

©Эшқобил Шукур

@Eshqobil_Shukur_ijodi

@sheriylahzalar

​​БОЛАЛИКДАГИ УЙ

Отамнинг қўллари қадоқ бўларди
Қават-қават қадоқ,
Қават-қават дард.
Отам шомда ҳориб ишдан қайтганда
Унинг қўлидаги қабариқларни
эзғилаб ўйнашни яхши кўрардим.
Мен нодон... мен гўдак қайдан билардим
Отам дарди билан ўйнаганимни.

Кўзёшни кўп кўрдим онам кўзида.
Орзу, хавотирга тўла эдим мен.
Қўнғир Ер устида,
Мовий осмон остида
Ҳеч кимимиз йўқ эди Худодан бошқа.

Уфқ эшигида бир уй бор эди.
Шафақни томорқа қилган бир ҳовли...
Девори – дашту дала
Дарвозаси –  дашту дала.
Ҳовлимиз устида кўриб қолардим
Баъзан фаришталар учиб юрганин.

Тунда яккам-дуккам бўри увларди,
Чиқиб келар эди тўқайдан шамол,
Уч юз йилдан бери ялангоёқ кезган
Ғамгин зиёратчи дарвешдай гўё.
Сувнинг нафасини олиб  келарди
Бизнинг уйимизга бу қари дарвеш.

Саратонда салқин шамол қўзғалса,
Онам: "Фаришталар қанот қоқаяпти" дер эди.
Мезонда илк ёмғир томчилаганда
“Момонг йиғлаяпти” дер эди онам.

Опам китобларни яхши кўрарди,
Қизғалдоқни қаттиқ суярди синглим.
Мен эса кун бўйи дала кезишни –
Ўзимни кезишни яхши кўрардим.

Олис бир қишлоқда,
овлоқ қишлоқда
Ёввойи қўрқувни қўлга ўргатган
Одамларни кўрдим. Мардларни кўрдим.
Юрагини тўкин дастурхон қилган
Қашшоқларни кўрдим, дардларни кўрдим.
Кўзёш тўкиб турган буюк тоғларни,
Чинорларни кўрдим бобомдай суюк.
Топганин дунёга сочган боғларни,
Бағирларни кўрдим даштдай кенг... куюк...

Хуллас...
Булутлар, чақмоқлар зуғум қилар чоғ,
Саратон, қаҳратон қаҳр қилар чоғ.
Қўнғир Ер устида,
Мовий осмон остида
Ҳеч кимимиз йўқ эди Худодан бошқа.
Ҳеч кимимиз йўқ эди Худодан бошқа!

✍️ Эшқобил ШУКУР 

@Eshqobil_Shukur_ijodi

@sheriylahzalar

​#tavallud_ayyom_muborak

Оҳлар чекдим,
Дунёсига ўт тушмади.
Сабр қилдим,
Меҳринг тўла юрт тушмади.
Шубҳаларинг печак каби қамраб келар,
Илдизига на ўроқ, на қурт тушмади.

Тушунмайсан.


Гумонларинг зулмат сепар,
Чироқсизман.
Кўзимга оқ тушди.
Ортиқ қароғсизман.
Шўрхок бўлдим пешонамнинг шўробидан,
Гиёҳ унмас...
Босишга-да яроқсизман ―

Ишонмайсан!


✍ Алишер САБРИЙ

@sheriylahzalar

***
Бас, латта ёнмайди, тутайди латта.
Аланга, бир умр сенга ичикдим.
Менинг орзуларим ҳамиша катта,
лекин етишганим доим кичикдир.

Нечун пойгоҳдадир ҳануз истеъдод,
нечун мунофиқлар ўлтирар тўрда?
Нечун амалдорга ҳануз илтифот,
нечун ҳақпарастлар ҳамон озурда?

То ҳануз синмаган порахўр тиши,
оғзи – тилласандиқ, қалби – пулхалта.
Совғалар олишдир севимли иши,
севимли гўшаси – Қирим ё Ялта...

Бу каснинг суянган одами йирик,
баҳайбат булут у – назарга яқин.
Ўзи пуч, дили пуч, қадами йирик,
назарга яқин-у, ҳазарга яқин...

У руҳий қашшоқлар ичра қашшоғи,
лекин чўнтаги – бой, топиши катта.
Амалдор қайнота – суянган тоғи,
сиғинган байроғи – ҳорижий латта.

Латта... О, дарвоқе, наҳот латтаман,
наҳотки тортқилаб ўйнар ҳар кучук?
Мен ахир кўплардан руҳан каттаман,
лекин нима учун имконим кичик?

Токай шуҳратпараст нўноқ бир рассом
даҳо мусаввирнинг сувратин бузиб,
устига ўзининг хом ва беилҳом,
Сурбет андомини қўяди чизиб?

Биламан, Ҳақ – ғолиб, ҳақиқат – устун,
қисқадир сохтанинг умри, қисқаси,
Аслнусха қолиб баъзида нечун
шарафга бурканар унинг нусхаси?..

Бас, латта ёнмайди, тутайди латта.
Аланга, бир умр сенга ичикдим.
Менинг орзуларим ҳамиша катта,
лекин етишганим доим кичикдир...
1981

СУЛАЙМОН РАҲМОН.

t.iss.one/sheriylahzalar

***
Эзгин-эзгин бир наво оқар,
мунгли-мунгли оқар бир наво.
Деразамдан бир савол боқар,
деразамдан боқар бир жавоб.

Типирлайди чалажон уйқу,
типирлайди киприк учида.
Бир олис туш, бир олис туйғу
ва ёлғиз мен хона ичида.

Ғижимлайди бошимни хаёл,
ғижимлайди қўймасдан сира.
Ич-ичимда кезлар бир шамол,
ич-ичимни эзар хотира...

Деразамдан ёз боқар сассиз,
деразамдан мўралар баҳор.
Қараб ўтар кўзларимга куз,
ёғиб ўтар юрагимга қор.

Бахтим эса боқмайди ҳануз...
1966

Сулаймон РАҲМОН

Ижро:
ФЕРУЗШОҲ ва Зуҳра Йўлчиева
t.iss.one/Sulaymon_Rahmon

@sheriylahzalar

Бугун раҳматли катта шоиримиз Омон Матжон туғилган кун!
У кишининг машҳур шеърларидан бирини уч шоир: Шаҳбоз Файзуллаев, Ферузшоҳ ва мен Жонтемир куйга солиб айтиб кўргандик. Бу хом варианти. Телефонда ёзилган. Балки студияда ёзилар, балки шу ҳолида қолиб кетар... Барибир улашиб қўйгим келди.

Хуллас шоирмиз руҳлари шод, ижодлари қиёмат қадар яшовчан бўлсин.

@Jontemir_t

@sheriylahzalar

Sizlar ham shu videoni tomosha qilishingizni istadim!

https://youtu.be/Vl7Bf7v6g4Q?si=QYKIif_6Dc2NIxfg

Баҳор келмоқда...
Тошкент ҳавоси ифлосланиб бораётганини ҳаммамиз бот-бот гапирябмиз, ташвишлаяпмиз.
Келинг, бир ажойиб йўл тутамиз, хар биримиз ховлимизга, кўчамизга, кўп қаватли уйимиз олдига, йўл четига ҳеч бўлмаганда 2 туп дарахт экамиз. Тан олайлик, бу унчалик қийин эмаску, тўғрими ( кўчат 10-20 минг сўм ва ярим соат вақт хамда хохиш бўлса кифоя!)
Энди, ўйлаб кўринг, бир киши иккита, юз киши 200 туп дарахт экаркан.
Ва буни бошқа гуруҳ ва каналларда ҳам оммалаштирайлик, зеро шу Ватан учун ҳаммамиз масъулмиз, фарзандларимиз шу ҳаводан нафас олмоқда!

Қани кеттик!!!
Дарахт экиб, жараённи фотоларини юборсангиз, каналга жойлаш биздан😁.

П.С. Бир жойда ўқиганим ёдимга тушди :
Қиёмат келгани вақтда ҳам хатто, имкон бўлса кўчат экиш керак экан...
(Қайси манбаадан ўқиганим ёдимда йўқ)

https://t.iss.one/dilgamaktublar

#ғолиблар_аниқланди

Ассалому алайкум, ҳурматли каналимиз кузатувчилари.

Бугун Жонтемир шеърлари бўйича ўтказган видеотанлов ғолиблари эълон қилинади.

Юборилган ижроларни қайта-қайта эшитдик, кўрдик.
Катталар яхши, ҳамма қўлидан келганча ижро қилган. Барчаси пишиқ ва бу йўналишда анчагина натижалар ҳам кўрсатган. Ҳаммаси учун раҳмат!

Аммо бир нарсани айтиб ўтиш керакки, сиз ҳам, мен ҳам 11 ё 12 ёшимизда залворли шеър топиб, ёдлашга ва шундай танловга қатнашишга журъат қилганмизми?

Танловга йўлланган ёш йигит-қизларни кўрдингиз. Майли, тушуниб-тушунмай ўқиган бўлишлари мумкин, барибир уларнинг ўқиши бизникидан кўра таъсирлироқ чиқади. Тан олинг. Шу сабаб ёшларни руҳлантириш ва асл шеъриятга қизиқиш уйғотиш учун ҳам ғолибларни асосан ёшлар орасидан танладик. Менимча, сиз бунга қарши бўлмайсиз.


Демак, шоирнинг махсус совғаси қўйилган ўрин учун 11 ё 12 ёш атрофидаги Самарқандлик йигитча — Суҳроббек Қиличов танланди.

Канал админи томонидан қўйилган совғали ўринларга эса
Хоразмлик "Огаҳий" мактаби ўқувчилари: Руҳшона Жабборова ва
Мумтозхон Отабоевани муносиб кўрдик.

Шу жумладан:

Лазизбек Бозоров,
Хондамир,
Сардор Қаландаров,
Мадина Мусахонова,
Сирожиддин Мамиров,
Зуфарбек,
Бобур Ибрагимов,
Ғолибжон Ёриев,
Озода Вафо,
Сулаймон Султон,
Хушнудбек Суюнов,
Аҳмад Нур,
АнненМай
Сарвиноз Отабоева,
Шердор,
Одил Эркинов,
Б. К.
Шокир Мусаев
Дурдона Асророва
М. Рустамовна
Мунира Султон
Лея
Муҳаммадали Солижонов,
Диёр Холбоев,
Шехроз Одил ўғли,
Ислом Султонов,
Руқия Юсуф қизи,
Илҳом Худойназаров,
Нодир Муҳаммад,
Латофат Асролова,
Бедорбахт,
Барчиной Раҳматуллаевна,
Тўлқин Халилов,
Жавоҳир Келдиёров,
Нодира,
Гулруҳ Эшонқулова,
Вазира Султонмахмудова,
Фаҳрия Нур,
Қодир Муртозоев,
Олим Шерматов,
Райҳона,
Музаффар Пўлатов,
Саида
ва бошқаларга миннатдорчилигимизни билдирамиз.

Жонтемир сизлардан чек-чегарасиз миннатдор ва боши ерга теккунга қадар таъзимда эканлигини билдирди.
Биз учун сарфлаган вақтингиз ва меҳнатингизга рози бўлинг.
Шу ўринда ҳар бир ижрони эшитиб, баҳолаб борган кузатувчиларимизга ҳам раҳмат!

Ҳурмат билан @sheriylahzalar

JONTEMIR she’rlari ishtirokidagi tanlovda 3-oʻrinni egallagan ishtirokchi

#Jontemir

"Darvesh qoʻshigʻi" sheʼri
Muallif: Jontemir
Oʻqidi: Mumtozxon Otaboyeva


Tanlov haqida batafsil.

@sheriylahzalar

@Jontemir_t

JONTEMIR she’rlari ishtirokidagi tanlovda 2-oʻrinni egallagan ishtirokchi

#Jontemir

"MAJNUN" sheʼri
Muallif: Jontemir
Oʻqidi: Ruhshona Jabborova


Tanlov haqida batafsil.

@sheriylahzalar

@Jontemir_t

JONTEMIR sheʼrlari ishtirokidagi videotanlovda 1-oʻrinni egallagan ishtirokchi

#Jontemir

"Koʻzyoshingni art..." sheʼri
Muallif: Jontemir
Oʻqidi: Suhrobbek Qilichov, (Samarqandda 3-sinf oʻquvchisi)


Tanlov haqida batafsil.
@sheriylahzalar

@Jontemir_t

Kelinglar, yana bir tanlov qilamiz? Bu gal sizlarning ham fikringizga qiziqdik? Qani qaysi shoir ijodi sizga qiziq boʻlsa ovoz bering!

Qadrli ijodkorlar, kichik bir tadqiqot oʻtkazayotgan edim. Oʻzbek ijodkorlarining xorij nashrlariga, dunyo adabiy bozoriga boʻlgan munosabati haqida. Ozgina vaqtingiz va imkoningiz boʻlsa, 10 savoldan iborat shu soʻrovnomani toʻldirib bersangiz. Har biringizning fikri men uchun qadrli. Oldindan rahmat!

PS Anonim soʻrovnoma

https://forms.gle/DCiUQpFMupAMQHGM8

@authors_and_publish