Энди катта ёшдагилар ҳам қонунан қўшимча таълим
олишлари мумкин бўлади

Куни кеча Олий Мажлис Қонунчилик палатасининг навбатдаги мажлисида таълим хизматларини кўрсатиш соҳасини такомиллаштиришга қаратилган қонун лойиҳаси кўриб чиқилди.
Ҳозирда мамлакатимизда таълим соҳасида мактабдан ташқари таълим тизимининг ҳуқуқий асосларини такомиллаштириш ва ёшлар учун қўшимча шароитлар яратиш борасида салмоқли ишлар амалга оширилмоқда.
Агар аксарият ўқув марказлари фаолиятига назар соладиган бўлсак, уларда катта ёшдагиларга ҳам таълим бериб келинаётганлигини гувоҳи бўламиз. Бу эса, албатта, катта ёшдаги фуқароларнинг ҳам бундай масканларга ташриф буюришлари учун аниқ ҳуқуқий асосларни яратиш ва уларни мустаҳкамлашни талаб этади.
Муҳокама этилган қонун лойиҳаси билан болалар учун қўшимча таълим бериш, уларнинг истеъдоди ва қобилиятини ривожлантириш билан бир қаторда, айнан катта ёшдагиларнинг ҳуқуқларини таъминлаш мақсадида айрим қонун ҳужжатларига нодавлат таълим хизматларини кўрсатиш соҳасини такомиллаштиришга қаратилган ўзгартириш ва қўшимчалар киритилмоқда.
Хусусан, “Ўзбекистон Республикасининг фахрий унвонларини таъсис этиш тўғрисида”ги, “Таълим тўғрисида”ги, “Ногиронлиги бўлган шахсларнинг ҳуқуқлари тўғрисида”ги, “Лицензиялаш, рухсат бериш ва хабардор қилиш тартиб-таомиллари тўғрисида”ги ҳамда “Педагогнинг мақоми тўғрисида”ги Қонунларга ўзгартириш ва қўшимчалар киритиш назарда тутилмоқда.
Мазкур қонунларда “мактабдан ташқари” атамаси “қўшимча таълим”га алмаштирилмоқда. “Таълим тўғрисида”ги Қонунда қўшимча таълим болалар учун таълим ва катта ёшдагилар учун қўшимча таълим турларига ажратилмоқда. Ҳужжат болалар ва катта ёшдагиларнинг ижодий қобилиятларини шакллантириш, касбий кўникмаларини ривожлантириш, соғлом турмуш тарзини шакллантириш ва бўш вақтларини самарали ташкил этиш мақсадларини назарда тутади.