#планерка

✅ Территориальнай быыбардыыр хамыыһыйа бэрэссэдээтэлэ Россия Президенин быыбарыгар ыытыллар үлэлэри билиһиннэрдэ.

Улуус 34 быыбардыыр учаастагар видеорегистратордар туруоруллуохтара.

Олунньу 9 күнүттэн саҕалаан быыбар хамыыһыйаларын үлэһиттэрэ хас биирдии быыбардааччыны дьиэнэн сылдьан көрсөн иһитиннэриилэри оҥоруохтара.

Тэйиччиттэн олорон (дистанционнай) электроннай куоластааһын үлэлиэҕэ.

"Үөһээ Бүлүү" хаһыат

#планерка

✅ Үөһээ Бүлүү улууһун баһылыгын бастакы солбуйааччытынан Егор Дмитриевич Иванов үлэлии кэллэ.

Өргүөт нэһилиэгиттэн төрүттээх эдэр салайааччы эрдэ Хаҥалас улууһун дьаһалтатын тутуу салаатыгар, онтон СӨ Транспорт уонна суол-иис хаһаайыстыбатыгар үлэлээн олорбут.

"Үөһээ Бүлүү" хаһыат

#планерка

✅ Үөһээ Бүлүү нэһилиэгин баһылыга Максим Силигиянов Москва куоракка ыытыллыбыт бастакы Бүтүн Россиятааҕы олохтоох бэйэни салайыныы форумугар кыттыыны ылан кэлбитин туһунан иһитиннэрдэ.

"Малая родина - сила России" форума 7,5 тыһыынча муниципальнай уопсастыба бэрэстэбиитэлин түмпүт эбит буоллаҕына, Саха сириттэн 155 баһылык, оттон Үөһээ Бүлүү улууһуттан Максим Филиппович Силигиянов соҕотох делегат быһыытынан бу улахан мунньахха кыттыыны ылла.

Форумҥа муниципальнай сулууспалаахтарга аналлаах порталы билиһиннэрдилэр.

"Национальнай бырайыактарга күүскэ үлэлэһэн, улууспут сайдыытын туһугар кыһаллыахха, тэтимнээхтик хамсаныахха эрэ наада" - диэтэ.

"Үөһээ Бүлүү" хаһыат

#планерка

✅ Үөрэх управлениетын салайааччыта Спиридон Борбуев үөрэх эйгэтин сонуннарын кылгастык сырдатта.

Труд уонна ОБЖ предметтэр саҥа үөрэх дьылыттан үөрэх бырагырааматыгар киириэхтэрэ.

"Воин" хамсааһыҥҥа болҕомто ууруллан, байыаннай инструктор хас биирдии оскуолаҕа баар буолуохтааҕын, улуус киинигэр бу хамсааһыны салайар дьон ананыахтара.

Үөрэнээччилэр спартакиадалара быйылгыттан сыл ахсын ыытыллар буолуоҕа. Быйыл Нам улууһугар тэриллэрэ былааннанар. Оҕолор 20 араас спорт көрүҥүнэн күрэхтэһиэхтэрэ.

Оҕо сайыҥҥы сынньалаҥар болҕомто ууруллан, сынньалаҥынан хас биирдии оҕону хабан, хааччыйыы 40% хаачыстыбаҕа тахсыахтаах диэн сорудах туруоруллубут.

"Үөрэҕирии" национальнай бырайыак 2024 сылынан түмүктэнэр.

Методическай үлэҕэ болҕомто ууруллан, үлэ күүһүрүөхтээх диэн. "Методическая сеть" пилотнай бырайыак Бүлүү бөлөх улуустарыттан саҕаланыаҕа.

СГО (Сетевой город. Образование) электроннай сурунаалга Үөһээ Бүлүү улууһа 100% киирэн олорор.

Ааспыт нэдиэлэҕэ улууска Чурапчы улууһуттан делегация кэлэн ыалдьыттаан барда.

Олунньу 1 күнүгэр киэһэ 18:00 чааска БКЭ талар сайабылыанньаны тутуу түмүктэнэн, уопсай база сабыллыаҕа. Бу кэннэ эбии ханнык да предмети талар кыаллыбат.

"Үөһээ Бүлүү" хаһыат

#планерка

✅ Култуура департаменын салайааччыта Сардаана Ильинова СӨ култуура уонна духуобунай сайдыы миниистирэ Афанасий Ноевтыын көрсүһүү туһунан сырдатта.

Пушкин картатыгар холбонуу туругун көрдөрүүтэ мөлтөһүөр соҕуһа бэлиэтэммит. 2024 сылга хас биирдии култуура сынньалаҥ киинэ Пушкин картатынан үлэлиэхтээх диэн ирдэбил туруоруллубут.

Култуура бары тэрилтэлэрэ госпабликтарга күүскэ үлэлииллэрэ ирдэммит.

Аммаҕа ыытыллыахтаах Олоҥхо Ыһыаҕар уонна "Азия оҕолоро" норуоттар икки ардыларынааҕы спортивнай оонньууларга улуустан маассабай кыттыы былааннанар.

Кэнтик нэһилиэгин 125 сыллаах үбүлүөйүн бэлиэтиир тэрээһиннэр сарсыҥҥаттан, тохсунньу 30 күнүттэн саҕаланыахтара.

Олунньу 10 күнүгэр оройуон төрөөбүт күнүн тэрээһинэ былааннанар.

"Үөһээ Бүлүү" хаһыат

#планерка

✅ Физическэй культура уонна спорт салаатын салайааччыта Егор Николаев:

Иван Ярыгин турнира буолан ааста. Манна Владимир Банковскай кыттыыны ылла.

Иван Шологонов Дьокуускай куорат мас тардыһыытын чемпионатыгар 85 кг бастаата.

Ааспыт нэдиэлэҕэ оҕолорго хапсаҕай күрэҕэ буолла. Маҥан 100 оҕо кытынна.

Субуота күн көҥүл тустууга 2011-12 сыллааҕы төрүөх оҕолорго улуус иһиттэн 75 оҕо күрэхтэстэ.

Бэҕэһээ хотуг многоборьеҕа Бүлүү бөлөх улуустарын икки ардыларыгар ыытыллыбыт күрэххэ 112 оҕо кытынна.

Тэрилтэлэр икки ардыларыгар ыытыллар спартакиада балаһыанньатын улуус баһылыга Валерий Николаев көрөн бигэргэтэрэ күүтүллэр.

Тэрилтэлэр үлэһиттэрэ спортивнай саалаҕа, манежка сылдьалларыгар тэрилтэлэр профсойуустара төлөөн көмөлөһөн эрэллэр. Номнуо икки тэрилтэ сыллааҕы дуогабары оҥорсубут. Бу спорду өрө тутар үлэһиттэргэ олус көмөлөөх буолуо этэ.

Оскуола оҕолорун спартакиадатын Ил Дархан Айсен Николаев бэйэтинэн салайар. Манна улуустан үгүс оҕо кыттар. Дьарыктара тэтимин ыһыктыбакка ыытыллар. Кэлии-барыы ороскуотугар, взнос төлөбүрүгэр күчүмэҕэйдэр көстөллөр. Ол курдук, Оҕо спортивнай оскуолата взнос төлөбүрүгэр кыаммат эбит.

Хаҥалас хапсаҕайыгар бэлэмнэнии бара турар. Сыллата бу күрэх ыыра кэҥээн иһэр. Тас дойдуттан тиийэ кэлэн күрэхтэһэр буоллулар. Хас биирдии ыйааһыҥҥа 5-тии эрэ спортсмен кыттара ирдэммит.

Олунньуга Буучугурас бирииһигэр хапсаҕай күрэҕэ буолара былааннанан турар.

"Үөһээ Бүлүү" хаһыат

#планерка

✅ Ис дьыала отделын бэрээдэги бөҕөргөтөр салаа салайааччыта Владислав Поскачин ааспыт нэдиэлэ түмүгүн иһитиннэрдэ.

Ааспыт нэдиэлэ устата ис дьыала отделын дьуһуурунай чааһыгар уопсайа 54 иһитиннэрии киирбит.

Мантан эт-хаан эчэйиитэ - 11, түөкүннээһин - 9, уоруу - 4.

9 административнай боротокуол толоруллубут. ГАИ сотрудниктара нэдиэлэ устата 86 боротокуолу оҥорбуттар. Арыгы испит туруктаах суоппар уруулга олорон тутуллуута - 1 түгэн бэлиэтэммит.

Дьуһуурунай чааска 6 киһи тутуллан киирэн тахсыбыт.

"Үөһээ Бүлүү" хаһыат