Rost24 | Расмий канал

Ўзбекистондаги ҳали рўйхатдан ўтмаган мухолиф партиянинг маслаҳат йиғилиши қандай ўтди?

Бугун Тошкентдаги “Висол” ресторанида Ўзбекистонда янги сиёсий партия — “Ҳақиқат ва тараққиёт” партиясини тузишни мақсад қилган гуруҳнинг йиғилиши бўлиши керак эди. Ютуб каналида эълон қилинган вақт — 2021 йил 29 январь соат 15.00 да ушбу тадбирдан репортаж тайёрлаш учун Rost24.uz мухбирлари ҳам воқеа жойига етиб борди.

Бу пайтда "партия етакчиси" саналган, Термиз давлат университети собиқ ректори Хидирназар Аллақулов бир гуруҳ издошлари даврасида нутқ сўзлаётган эди.

Тадбир ресторан ичкарисида эмас, балки кўчада бўлаётган эди. Чунки, ресторан эгаси бу вақтга бошқа тадбирга буюртма олганини айтиб йиғилиш иштирокчиларини ичкарига киритмаган. Ҳар икки томон ҳам ўзининг ҳақлигини иддао қилмоқда. Яъни партия вакиллари буюртма берган вақтда 3 миллион сўм “залог” берганини даъво қилса, ресторан эгаси улар ўз вақтида тўловни амалга оширмаганини айтмоқда. Нега судга бермайсиз, деган саволимизга эса Хидирназар Аллақулов судга бериб майдакашлик қилиш ниятида эмаслигини маълум қилди. Хуллас бу масала қўшимча ўрганишларни талаб этгани боис буни кейинроқ аниқлаштирамиз.

Ўз вақтида бошланмаган йиғилиш олдидан Аллақулов ўз тарафдорларига мурожаат қилаётган экан.

— Миллий қонунларга таянмаганимда эди, албатта, ютқазмаган бўлар эдим, – дейди у сафдошларига қарата. — Мен ҳақимда роса фельетонлар беришди, ҳеч қачон жавоб бермадим. Мен сабр қилиб кутиб келаяпман.

...Шу гапларни айтаётган Хидирназар Аллақуловга журналистлар савол беришни хоҳлашаётганини айтилди. Лекин партия етакчиси саволларга фақат йиғилишдан кейин жавоб беришини айтди. Бошланиши ҳали аниқ бўлмаган йиғилишнинг якуни қачон бўлишини эса аниқ айтмади. Бундан ташқари ҳар берилган саволга ҳақорат билан жавоб олдик. Буни ўзингиз аудио ёки видео орқали тинглашингиз мумкин.

Аслида ўзини бирор бир сиёсий кучнинг етакчиси сифатида кўраётган ҳар қандай “лидер”, энг аввало, журналистлар билан очиқ мулоқотга тайёр бўлиши керак эмасми? Фақат бақир-чақир ва ҳавойи маърузалар, ўзидан бошқа ҳеч кимнинг фикрини эшитмаслик билан жамиятда ўрин топиш мумкинми? Очиғи ўзини сиёсий амбицияга эга бўлишни истаётган “партия етакчиси”нинг ҳаракатларини тушунмадик.

Rost24.uz ахборот сайти бу партия фаолиятини холис ёндошув асосида ёритмоқчи эди, лекин фақат монологдан иборат бўлган учрашувда мулоқотга кириша олмадик.

Саволларимиз эса очиқ қолаверди:

1. Партия лидери сифатида долзарб мумаммоларни кўтариб чиқаяпсиз ва ҳукуматни қаттиқ танқид қиляпсиз. Лекин ҳозиргача ўзингиз бирор муаммони ечими тўғрисида аниқ таклифлар бермадингиз, партияни дастури ва ғоялари ҳам ҳалигача шакллантирилмаган. Бу ҳолатда қолган партия етакчиларидан сизни нима ажратиб туради?
2. Биз биламизки, ҳозирда «Халқ манфаатлари» партияси ташаббускорлари сиз тузаётган партия сафида бўлишган. Бироқ, улар ўзаро келишмовчилик туфайли ажралиб кетишгани, улар сизни ижтимоий тармоқлар орқали бошқаларнинг фикрини эшитмасликда, ҳурмат қилмасликда айблашган ҳамда шу сабабли партияни тарк этганликларини айтишган. Ваҳоланки, партия лидери сифатида бошқаларнинг фикрига қулоқ солмаслик сизни авторитар лидер сифатида гавдалантирмайдими?
3. Ижтимоий тармоқда сизнинг, «Халқ манфаатлари» партияси ва унинг ташаббускори фаолиятини ДХХ лойиҳаси сифатида баҳолаганингиз тўғрисида хабарлар тарқалди. Бунга қандай изоҳ берасиз.
4. Сайловчилар, яъни биз нима учун сизни қўллаб-қувватлашимиз керак? Ғоя, аниқ таклиф ва фикрлар борми? Умуман кўзингиз етаяптими сайловчилар сизларни қўллаб-қувватлашига?
5. Нима учун орангизда ёшлар йўқ.
6. Нима учун сизга эргашишимиз керак?
7. Барча сиёсий лидерлар ҳар қандай дебатлар омма ва журналистлар билан мулоқотга ўч бўлади нега сизнинг партия мулоқотдан қочади?

Таҳририят яна шуни маълум қиладики, Ўзбекистон сиёсий доирасига янги сиёсий куч сифатида кириш истагидаги партия тарафдорлари ва унинг етакчиси Хидирназар Аллақуловга минбар беришга тайёр. Улар билан соҳамизнинг холислик тамойилига асосланиб журналистиканинг қар қандай форматида мулоқот учун очиқмиз.

Каналга уланиш: ⏬
https://t.iss.one/joinchat/AAAAAEzFHg67aFl6mo0ybg

2.9K views17:52