Afrosiyob poyezdi, manzilimiz Navoiygacha. Mashinadagi 7-8 soatlik masofani 3 soatdan oshiqroq vaqtda bosib o’tyapmiz. Harakat vaqtida klaviaturada yozish qiyin, lekin menda shunga vaqt borligidan xursandman )

Bugun Robbit akademiyasining 11-filiali Navoiy shahrida ochiladi. Kelayotgan hafta shanba kuni Andijon shahrining Yangibozor qismida 12-filial, yakshanba kuni Qarshi shahrida 13-filial ochiladi. Hududiy birlik jihatdan, Buxoro, Jizzax va Toshkent viloyatidan boshqa barcha joylarda Robbitning filialllari ochildi. Jamoa bilan birgalikda biz bu ishni 13 oyda amalga oshirdik.

Agar mendan bir yil oldin, “buning imkoni bormi”, deb so’rashsa ikkilanib javob berardim. Ochig’ini aytaman, strategik sessiya vaqtida (kompaniyalar o’zining avvalgi 3-5 yillik rejalarini aniqlashtirib oluvchi muhim tadbir) bu maqsad qo’yilganda biroz qo’rquv bo’lgan. Sababi, Najot Ta’limda 6 yil davomida 6 ta filial ochganmiz va avvalgi 4 yil davomida Toshkent shahridan tashqariga chiqish bizga qiyinlik qilgan.

Ta’limni hamma filiallarda bir xil tashkil qilish, O’zbekistonning turli joylaridagi yigit-qizlar bilan til topisha olish, jarayondagi biz kutmagan turli xil muammolar to’g’ri maqsad qo’yilsa muammoga aylanmasligiga guvoh bo’ldim.

Bugun Robbitda 6-15 yosh oralig’idagi 2000 nafar bolalar robototexnika va AyTini o’rganishmoqda. Men ushbu natijaga Allohning fazli bilan, butun bir jamoa shaklida erishdik deb hisoblayman. Bir o’zim bu ishlarni qila olishga aqlim ham kuchim ham toqatim ham yetmasdi. Fursatdan foydalanib ushbu loyihada ishlayotgan barcha jamoadoshlarimga o’zimning chuqur minnatdorlichiligimni bildiraman. Biz aniq maqsad yo’lida yoshlarni ertangi kun bunyodkorlari sifatida o’qityapmiz.

Istaymizki, Robbitda o’qigan bolalar, millatiga, vataniga, diniga xizmat qiluvchi avlod bo’lib shakllansin. Bizga kelajakda eng kerak bo’ladigan, muhandis, texnologiya mutaxassisi, qaysi kasb egasi bo’lishidan qat’iy nazar sohasida kreativ fikrlaydigan (ta’lim robototexnikasining asosiy maqsadi ham shu) bo’lib yetishishsin.

Loyiha bo’yicha maqsadlar juda katta, maqsadimiz va harakatimiz yaxshilik yo’lida davom etadi. Alloh taolodan ushbu yo’lda o’zimga va jamoamizga sobitqadamlik so’rayman.