#Муҳим #Бугуннинг_гапи

ЁШЛАР ДАВЛАТДАН ҚАНДАЙ ҚИЛИБ ЕР ОЛИШИ МУМКИН?

⁉️ Қандай қилиб давлатдан ер олиш мумкин? Қуйидаги мақолада, тушуниш осон бўлиши учун, содда тилда, жорий қонунлар мазмунидан келиб чиқиб тушунтириш берилади.

Биринчи йўл:

📑 Давлат раҳбарининг 2021 йил 23 ноябрдаги қарорига мувофиқ, туман ҳокимлиги (яъни давлат) захирасида турган ер майдонларидан деҳқон хўжалиги ташкил этиш истагидаги фуқароларга 10 сотихдан 1 гектаргача бўлган ер берилади. Аммо шарти бор. Eр олган томон сабзавотчилик, полиз, дуккакли, мойли экинлар, картошка етиштириш билан шуғулланиши лозим. Ерни электрон танлов орқали ижарага беришда ўз томорқасида мева-сабзавотчилик, полиз маҳсулотларини етиштириш ва узумчиликда яхши натижаларга эришган, ушбу соҳалардан бирида таянч мутахассисликка эга бўлган фуқароларга, шунингдек, “Темир дафтар”, “Аёллар дафтари” ва “Ёшлар дафтари”да рўйхатда турган эҳтиёжманд оилаларга алоҳида устуворлик бор. Яъни дафтарларда рўйхатда турган ёшларга электрон имзо бепул берилади, аукционда қатнашишда бошланғич тўлов сўралмайди. Тизим дафтарларнинг электрон базаси билан интеграция қилинган, алдаб бўлмайди.

ℹ️ Маълумот ўрнида, Президент қарорига кўра, Тошкент вилояти бўйича 2022-2025 йилларда жами 13 830 гектар ер фуқароларга очиқ электрон танлов орқали ижара ҳуқуқи асосида берилади. Хусусан, бу йил 5531 гектар ер аҳолига (аукциондаги иштирокига кўра, ёшларга) берилади.

📌 Қўшимча маълумот учун: Ёшлар ишлари агентлиги вилоят бошқармаси шўъба мудири Муҳриддин Ҳамзаев
Телефон: 99-858-84-81

Иккинчи йўл:

👨‍🌾 Фермер хўжалиги ташкил қилиш ва тендерда қатнашиб, ер олиш. Бунинг учун қатъий талаблар бор. Хусусан, малака, ихтисослашган мутахассис, техника билан таъминланганлик ва ҳоказо (тўлиқ ҳужжат бу ерда). Энг асосийси, ерларга эгалик қилишда кластер тизимига ўтилаётган пайтда фермер хўжалиги ташкил қилиш қийин бўлса керак. Анча пайтдан буён тендерлар очиқ ўтказилмаяпти, сувли майдонлар аллақачон банд. Хуллас, бундай усулда ер олиш машаққат. Амалда имкони йўқ (яна билмадик, бошида шохи борларга жавоб бериш қийин🙈).

📌 Қўшимча маълумот учун: Вилоят фермер, ер эгалари ва томорқа хўжаликлари кенгаши раҳбари ўринбосари Зойир Эшнаев
Телефон: 99-632-66-00

Учинчи йўл:

✅ Агар сиз ёш бўлсангиз ва мавсумий экин экиб, даромад топмоқчи бўлсангиз, дарров маҳаллангиздаги ҳоким ёрдамчиси ёки ёшлар етакчисига учрашинг. Улар сизга такрорий экин экиш учун ер олишда амалий ёрдам беришади. Сектор раҳбарлари, туман ҳокимлари бу ишда сизга ёрдам беради. Баъзи ҳудудларда ерни ёшларга ағдариб, мола тортиб, экишга тайёр қилиб беришаётган бўлса, айрим жойларда экинни экиш ва биринчи сув олишга ҳам ёрдам беришмоқда. Бу усулда сиздан харажат, ҳужжатбозлик талаб қилинмайди. Меҳнат ва экин экиш учун сармоя кифоя. Аммо ерни кузда бўшатиб беришингиз керак. Август арафасида турганимизни инобатга олсак, дуккакли экинлар, сабзи, турп сингари маҳсулотлар экишга ҳали вақт бор.

📌Қўшимча маълумот учун: Ёшлар билан ишлаш бўйича вилоят штаби телефони: 70-764-66-16; 70-764-66-15.

Тўртинчи йўл:

♻️ Ёшлар кичик саноат зоналарида тадбиркорлик фаолиятини йўлга қўйиш. Бунинг учун маълум бир талаблар ва сармоя керак бўлади. Давлат раҳбарининг 2021 йил 21 апрелдаги қарори билан Тошкент вилоятида 19 та Ёшлар кичик саноат зонаси ташкил этиш белгиланган. Вилоят ҳокимлиги Инвестициялар ва ташқи савдо котибияти мудири Шерали Бегматовнинг маълум қилишича, ҳозирда ерлар ҳисоби олиниб, аукционга чиқарилган. Аукционда 18-30 ёшгача бўлган Тошкент вилояти ёшлари қатнашиши мумкин. Бошқа саноат зоналаридан фарқи: ер арзон нархда аукционга чиқарилади ва ниҳоятда қулай имтиёзли кредит берилади. Бу йўналишда дафтарларда рўйхатда турувчи ёшларга алоҳида имтиёз кўзда тутилмаган.

📌 Қўшимча маълумотлар учун: "Тошкент вилояти Кичик саноат зоналари" дирекцияси раҳбари Фозил Аҳроров
Телефон: 94-948-87-12.

®️ "Ёшлар кундалиги".

Каналга уланиш:
https://t.iss.one/+tcc8Accr_k80OGNi