Республика тез жәрдем орайы аймақлық филиалының ашылыў мәресими болып өтти

Онда Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, жаңа имарат пайдаланыўға тапсырылыўы мүнәсибети менен жыйналғанларды қутлықлады.

Бәршемизге мәлим, медицина тараўы тиккелей ҳүрметли Президентимиздиң итибарында турған тараўлардан бири.

Соңғы жыллары елимизде Президентимиздиң басшылығында «Медицинадағы реформалар инсан қәдири ушын!» деген идея тийкарында кең көлемли жумыслар әмелге асырылмақта. Өткен қысқа дәўир ишинде тараўға байланыслы қабыл етилген пәрман ҳәм қарарлар бул бағдардағы илажлар көлемин жаңа басқышларға көтерип атыр.

Айрықша атап өтиў керек, ҳүрметли Президентимиздиң 2022-жыл 16-июньдағы арнаўлы қарары тез медициналық жәрдем хызметин раўажландырыўда әҳмийетли орын тутпақта. Усы тийкарда Республика тез медициналық жәрдем орайы шөлкемлестирилди ҳәм тез медициналық жәрдемниң бирден-бир вертикал басқарыў системасы жолға қойылды, материаллық-техникалық базасы беккемленип, зәрүрли үскенелер менен тәмийинленди.

Филиалдың жаңа имараты ушын дерлик 11 млрд. сум қаржы ажыратылып, қурылыс жумыслары сапалы етип питкерилди. Орайды радио-байланыс қураллары менен тәмийинлеў мақсетинде 7,5 млрд. сум, мебеллер менен тәмийинлеў ушын 1 млрд. сум, «Тез жәрдем» автотранспортларын планшетлер менен тәмийинлеў ушын 734 млн. сум қаржы ажыратылды.

Жаңа объектте «Call-orayı», оқыў-симуляция орайы, администрация, ишки дәрихана ҳәм тез медициналық жәрдем бөлими орын алған. Жылына 670 мыңға шамалас шақырыўларға хызмет көрсетиў имканиятына ийе филиалдың иске түсиўи менен 135 жаңа жумыс орны жаратылған.

Буннан соң Жоқарғы Кеңес Баслығы имаратта жаратылған имканиятлар менен жақыннан танысты.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Нөкис қаласындағы Республикалық қыстаўлы медициналық жәрдем илимий орайы Қарақалпақстан филиалы жаңа имаратының ашылыў салтанаты болып өтти

Ашылыў салтанатында Жоқарғы Кеңес Баслығы Аманбай Орынбаев шығып сөйлеп, жаңа имараттың пайдаланыўға тапсырылыўы менен тараў хызметкерлерин қутлықлады ҳәм ҳүрметли Президентимиздиң айрықша итибары менен бундай медициналық орай Өзбекстан көлеминде биринши болып, Қарақалпақстанда бой тиклегенин атап өтти.

Айтып өтиў орынлы елимизде барлық тараўлар қатарында денсаўлықты сақлаў тараўында да үлкен өзгерислер менен жаңаланыўлар жүз бермекте. Тараўды раўажландырыў бойынша қабыл етилип атырған пәрман ҳәм қарарлар, белгилеп берилген ўазыйпалар кең көлемли жумысларға беккем тийкар болып хызмет етпекте.

Усындай ийгиликли ислердиң даўамы сыпатында бүгин Республикалық қыстаўлы медициналық жәрдем орайының жаңа имараты пайдаланыўға тапсырылды.

Ҳүрметли Президентимиздиң арнаўлы қарары менен ажыратылған 61 млрд. сум қаржы тийкарында 4 қабатлы етип қурып питкерилген жаңа имарат заманагөй медициналық әсбап-үскенелер ҳәм зәрүрли инвентарьлар менен тǝмийинленди.

Жаратылған мүмкиншиликлер нәтийжесинде усы күнге шекем Ташкент қаласында өткерилип келинген айырым қурамалы операцияларды Орайда өткериў имканияты жаратылды. Имарат 130 орынға мѳлшерленген болып, буннан тысқары, қосымша 50 орын шөлкемлестирилиўи режелестирилмекте.

Сондай-ақ, сырт елдиң тәжирийбели шыпакерлери емлеўханаға келиўи ҳәм айырым қурамалы операциялардың жасалма интелект жәрдеминде әмелге асырылыўы, Орай шыпакерлериниң Европа ҳәм басқа да дүнья еллерине тәжирийбесин арттырыў мақсетинде жиберилиўи ҳәм усы тийкарда Орайдың өзинде шет елден келген тәжирийбели шыпакерлерден мастер-класслар шөлкемлестирилиўи күтилмекте.

Ашылыў мәресими даўамында Жоқарғы Кеңес Баслығы Орайда жаратылған имканиятлар менен жақыннан танысты.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter