Қоңырат районы ҳәкимлигиниң расмий каналы @qongiratrkuz
https://t.iss.one/qongiratrkuz

Биз бенен социаллық тармақларда бирге болың!
Қоңырат районы ҳәкимлигиниң расмий каналы:

qonirat_rayoni_janaliqlari
https://www.instagram.com/qonirat_rayoni_janaliqlari?r=nametag

Ana tilim – arım meniń
Ana tilim aq denemniń arısań,
Qaraqalpaq – milletiniń janısań,
Sen jasasań millet jasar kórkeyip,
Tamırımda aǵıp turǵan qanımsań.

Qásterleymen kózdiń qarashıǵınday,
Ómirimde tánha jalǵız anamday,
Ákem kibi qádirliseń, jan tilim,
Mángi jasa, jarqıraǵan juldızday!

Sózlerimdi marjan yańlı dizeyin,
Tilim ushın júregimdi úzeyin,
“Posqan el” den miyras qalǵan tilimseń,
Tirilikte qádirińe jeteyin.

Maǵan ilham – yosh beretin usı til,
Barlıq waqta kúsh beretin usı til,
Babalarım qan maydanǵa shıqqanda,
“Ya Alla” – dep ayttıratın ana til!

Qaraqalpaq til biyligin alǵanı,
Belgilener hár jıl sayın bayramı,
Ómir jasıń uzaq bolsın jan tilim,
Qutlıqlayman bayram menen xalqımdı!

Qońırat rayonı XBB qaraslı 41- sanlı mekteptiń qaraqalpaq tili hám ádebiyatı páni oqıtıwshısı Barlıqbaeva Abadan Рaraxatovna

@qongiratrkuz

Қоңырат районы ХББ қараслы 41-санлы мектептиң Қарақалпақ тили ҳәм әдебияты пәни оқытыўшысы Барлықбаева Абаданның "Тарийхымсаң, тағдиримсең, келешегимсең ана тилим!" атамасындағы қарақалпақ тилиниң 31 жыллық байрамына тайярланған видеоролиги.

@qongiratrkuz

Ana tilim – altın ǵaziynem

Insan alla taala tárepinen jaratılǵan ullı káramat. Jaratqan iyemizdiń qúdireti menen bul jaqtı dúnyanı kóriw, onnan lázzet alıw, mazmunlı ómir súriw hárbirimizdiń maqsetimiz. Eń birinshi tilge kelgenimizde ata- anamız sóylegen sózlerdi eliklep ana tilimizdi de áste úyrene baslaymız. Basqa millet wákilleriniń perzentleri de mine usı tárizde ózleriniń ana tilinde sóyley baslaydı.
Meniń de kóz ashıp bilgenim, júregimnen súygen óz ana tilim – qaraqalpaq tilim. Adam ata- anasın qanshelli jaqsı kórse Watanın, Milletin , Tilin sonshelli qádirlep ,qásterleydi eken. Dúnyada watan , millet, til siyaqlı tákirarlanbas túsinikler bar. Ne ushın xalqımız “ Ana Watan”, “ Ata mákan”, “Ana tilim” dep aytadı!?
Sebebi, watan, til, millet anamızday jalǵız hám atamızday qádirli bolǵanı ushın “ana” , “ata” sózlerin qosıp aytamız.
Millettiń kórki , tımsalı bolǵan til , ásirler boyı qáliplesip, rawajlanıp keledi. Onıń kóp jıl ómir súriwi sol xalıqtıń awızeki hám jazba sawatqanlıǵına baylanıslı. Til jasasa, millet jasaydı degenindey qaraqalpaq tilide kóp jıllardan berli milletimizdiń ar –namısına ,júregine aylanıp qalǵan.
Xalıq awızeki dóretpelerinde til haqqında kóplegen naqıl- maqallar keltirilgen. “ Tilge itibar – elge itibar” , “ Til bigen – el biledi”, “ Til súyeksiz- oy túpsiz” bul danalıqlardıń ata- babalarımız tárepinen aytılǵanlıǵı bizler ushın biybaha baylıq . Sonlıqtan ata – babalarımız bizge miyras etip qaldırǵan ana tilimizdi, sol tilde jazılǵan hárbir miynetti hám dóretpelerdi kóz qarashıǵımızday asırap , endigi keleshek áwladlarımızǵa taza halında jetkerip beriwimiz shárt . Óytkeni , til jasasa, millet jasaydı!

Qońırat rayonı xalıq bilimlendiriw bólimine qaraslı 41-sanlı mekteptiń qaraqalpaq tili páni oqıtıwshısı Barlıqbaeva Abadan.

@qongiratrkuz