#xalqaro_hamkorlik

KOREYA TA’LIM MARKAZI BILAN HAMKORLIK MASALALARI MUHOKAMA QILINDI

Ixtisoslashtirilgan ta’lim muassasalari agentligiga Koreya Respublikasi elchixonasi qoshidagi Koreya ta’lim markazi direktori Lee Young Woong tashrif buyurdi.

Tashrif doirasida tashkil etilgan uchrashuvda Agentlik direktori Alisher Ubbiyev Oʻzbekiston va Koreya Respublikasi oʻrtasida barcha sohalar kabi taʼlim yoʻnalishida ham hamkorlik aloqalari tobora rivojlanib borayotganligini alohida ta’kidladi.

Joriy yilda Agentlik va Koreya ta’lim markazi hamkorligida "Incheon ta’lim festivali", "Tabiiy fanlar festivali", koreys tili bo‘yicha Respublika olimpiadalari kabi qator loyihalar amalga oshirildi.

Shuningdek, Agentlik tizimidagi maktablar oʻqituvchilari va oʻquvchilari Koreya Respublikasida tashkil etilgan ta’lim festivallari, malaka oshirish dasturlarida ishtirok etdi. Xususan, 19-xalqaro standartlar olimpiadasida oʻquvchilarimiz ilk bor qatnashib 3 ta oltin va 3 ta kumush medallarni qoʻlga kiritishdi.

Uchrashuvda Agentlik tizimidagi maktablar ta’lim jarayoniga STEM va koreys tili fanidan xalqaro toifadagi oʻqituvchilarni jalb qilish, xalqaro olimpiadalarga oʻquvchilarni tayyorlash, akademik tajriba va milliy-madaniy ma’lumotlar almashishni koʻzda tutuvchi seminar-treninglarni tizimli tashkil etish kabi masalalar yuzasidan fikr va takliflar almashildi.

Tashrif doirasida mehmonlar Agentlik tizimidagi Muhammad al-Xorazmiy nomidagi ixtisoslashtirilgan maktabda ham boʻlib, bu yerda yaratilgan zamonaviy ta’lim sharoitlari bilan yaqindan tanishdi.

Telegram | Facebook | Instagram | YouTube

#xalqaro_hamkorlik

XITOY XALQARO MAKTABI VAKILLARI BILAN UCHRASHUV

Ixtisoslashtirilgan ta’lim muassasalari agentligida Xitoyda faoliyat ko‘rsatib kelayotgan "Yinghua Academy Tianjin" xalqaro maktabi vakillari bilan uchrashuv bo‘lib o‘tdi.

Uchrashuv avvalida mamlakatlarimiz o‘rtasida ko‘plab sohalar qatori ta’lim yo‘nalishida ham o‘zaro hamkorlik aloqalari rivojlanayotgani alohida ta’kidlandi.

Muloqot doirasida Agentlik mas’ul xodimlari mehmonlarni tizimdagi maktablar, oliy ta’lim muassasalari, tuzilmalar faoliyati bilan yaqindan tanishtirib, joriy yilda erishilgan natijalar, istiqboldagi rejalar borasida ma’lumot berdi.

O‘z navbatida "Yinghua Academy Tianjin" xalqaro maktabi vakili Yan Zhou ham o‘z ta’lim muassasasi haqida taqdimot o‘tkazdi.

Qayd etilganidek, mazkur Xalqaro maktab 2000-yilda tashkil etilgan bo‘lib, unda bir vaqtning o‘zida Kembrij xalqaro ta’lim tashkiloti va Xitoy milliy dasturlaridan foydalangan holda dars berib kelinmoqda. Ta’lim muassasasi xorijlik yoshlar uchun ham o‘quv dasturlari, kurslar taklif qiladi.

Uchrashuv davomida ta’lim sohasida o‘zaro hamkorlikni yo‘lga qo‘yish, o‘quvchilar almashinuvi dasturi, o‘qituvchilar tajriba almashinuvi, xitoy tili mutaxassislarini jalb qilish borasida takliflar ilgari surildi.

Telegram | Facebook | Instagram | YouTube

#Ixtisoslashtirilgan_maktablar
#International_Baccalaureate
#Xalqaro_hamkorlik

IB DASTURI KOʻNIKMALARI OʻRGANILDI

Agentlik tizimidagi Muhammad al-Xorazmiy hamda Mirzo Ulugʻbek nomidagi ixtisoslashtirilgan maktablari Xalqaro bakalavriat (IB) dasturini joriy etish boʻyicha muhim bosqichlardan oʻtgan boʻlib ayni yoʻnalishdagi ishlarning davomi sifatida har ikkala taʼlim muassasasi oʻqituvchilari uchun navbatdagi seminar-trening tashkil etildi.

Muhammad al-Xorazmiy nomidagi ixtisoslashtirilgan maktabida oʻtkazilgan mazkur seminar-terningda ishtirokchilar IB asosidagi oʻrta yosh dasturini joriy etishda qoʻshimcha resurslar va manbalardan foydalanish boʻyicha bilimlarini oshirdi.

Shuningdek, seminar-trening doirasida IB boʻyicha topshiriqlarni yaratishda sun’iy intellektdan oqilona foydalanish boʻyicha ham yoʻriqnoma oʻtkazildi. Qayd etilganidek, sun’iy intellektdan samarali foydalanish oʻquv jarayonini soddalashtirib, moslashtirilgan oʻquv materiallari va mashqlarni taklif qilishi mumkin.

Shuningdek, oʻyinlar, simulyatsiyalar va boshqa interfaol vositalar yordamida oʻrganishni yanada qiziqarli va samarali qilishi mumkin. Bu esa oʻquvchilarning motivatsiyasini oshiradi va ularning bilim olishga boʻlgan qiziqishini kuchaytiradi.

Maʼlumot oʻrnida, Agentlik huzuridagi Pedagogik mahorat va xalqaro baholash ilmiy-amaliy markazi hamda Xalqaro bakalavriat (IB) tashkiloti oʻrtasida shartnoma imzolangan.

Xalqaro IB dasturi maktablarda tadqiqot koʻnikmalarini rivojlantiradi va bolaning ijodiy salohiyatini ochib beradi. Oʻquvchilar turli xil maʼlumot manbalari bilan ishlashni oʻrganadilar, dunyoqarashlarini kengaytiradilar va muloqot koʻnikmalarini rivojlantiradilar.

Shuningdek, IB dasturi oʻquvchilarda dunyodagi deyarli har qanday universitetga kirish uchun imkoniyat beradi. Maxsus IB diplomi nafaqat xorijiy universitetga kirishga qaror qilgan talabalar uchun foydalidir balki oʻquvchilarda global dunyo muammolarini muhokama qilishga, mustaqil oʻrganishga, tanqidiy fikrlashga va muammolarni hal qilishga ijodiy yondashishga undaydi.

Telegram | Facebook | Instagram | YouTube

#xalqaro_hamkorlik

HAMKORLIK MEMORANDUMI

Ixtisoslashtirilgan ta'lim muassasalari agentligi hamda Rossiya Federatsiyasining Letovo xalqaro maktabi oʻrtasida hamkorlik memorandumini imzolash marosimi boʻlib oʻtdi.

Mazkur memorandum doirasida:

– Agentlik tizimidagi maktablar hamda Letovo maktabi oʻrtasida oʻquvchilarga chuqur nazariy bilim, koʻnikma va malakalar berish hamda ularning kasbiy bilimlarini rivojlantirishga qaratilgan birgalikdagi faoliyatni amalga oshirish;

– taʼlim tizimining ustuvor yoʻnalishlari boʻyicha oʻquvchilar ishtirokida qoʻshma seminarlar, davra suhbatlari, uchrashuvlar, shuningdek olimpiadalar, tanlovlar va koʻrgazmalar tashkil etish;

– pedagog kadrlarning malakasini oshirish, oʻzaro almashish va oʻquv amaliyotini boyitish maqsadida qoʻshma oʻzaro amaliyotlar, konferensiyalar, mahorat darslari va boshqa tadbirlarni tashkil etish rejalashtirilgan.

Maʼlumot oʻrnida, joriy yilning sentyabr oyida Agentlik delegatsiyasi Letovo xalqaro maktabida boʻlib, taʼlim muassasasi faoliyatini yaqindan oʻrgangan edi.

Telegram | Facebook | Instagram | YouTube

#xalqaro_hamkorlik

OXFORD AQA VAKILLARI BILAN MUZOKARALAR

Ixtisoslashtirilgan taʼlim muassasalari agentligida Buyuk Britaniyaning Oxford AQA taʼlim tashkiloti vakillari bilan uchrashuv boʻlib oʻtdi.

Agentlik direktori Alisher Ubbiyev mehmonlar bilan muloqotda mamlakatimizda taʼlim sohasida xalqaro va milliy tajribalar, yangi innovatsiyalarga asoslangan islohotlar olib borilayotgani, ayni jarayonda ixtisoslashtirilgan taʼlim yo‘nalishida yuqori natijalarga erishilayotganini alohida taʼkidladi.

Uchrashuvda Oxford AQA vakillari eʼtiboriga Agentlik tizimidagi taʼlim muassasalari, oliygohlar va boshqa tashkilotlarga oid muhim maʼlumotlar va barcha faoliyat yo‘nalishlarida erishilayotgan natijalar yuzasidan taqdimot havola etildi.

Ikki tomonlama muzokaralarda o‘zaro hamkorlik asosida Agentlik tizimidagi taʼlim muassasalari rahbar xodimlari, o‘qituvchilarning kasbiy malakalarini oshirish masalalari yuzasidan taklif va tashabbuslar ilgari surildi.

Maʼlumot o‘rnida, Oxford AQA (Assessment and Qualifications Alliance) bu xalqaro darajada tan olingan o‘quv dasturlar, imtihon tizimlari va sertifikatlarni taqdim etuvchi tashkilot hisoblanadi.

Oxford AQA sertifikatlari dunyo bo‘ylab ko‘plab universitetlar va ish beruvchilar tomonidan tan olinadi.

Telegram | Facebook | Instagram | YouTube