#Ташаббус

⚡️⚡️⚡️Қишки таътилнинг ажойиб лойиҳаси

Хабарингиз бор, туманимизда кенг кўламда ободонлаштириш ишлари жадаллик билан давом этмоқда.

Мазкур жараёнларда Ўзбекистон Болалар ташкилоти томонидан ташкил этилаётган "Креатив таътил" лойиҳаси доирасида Паркент туман сардорлари ҳашарчиларга ёрдам бериш мақсадида хайрли ишга қўл уришди.

Куни кеча ёш сардорлар марказий йўл бўйи, маҳаллаларда ободонлаштириш ишларини бажараётган ходимларга иссиқ кофе ва ширинликларни тарқатишди.

👉 @PARKENT_TONGI

#Долзарб

⚡️⚡️⚡️ Паркентда қишлоқ хўжалиги маҳсулотларини етиштириш кўпайтирилади

Куни кеча туманимизнинг Заркент ҳудудида “Қишлоқ хўжалиги майдонларидаги қўшимча имкониятлардан фойдаланган ҳолда маҳсулот етиштиришни йўлга қўйиш” мавзусида амалий семинар бўлиб ўтди.

Унда Ўзбекистон фермер, деҳқон хўжаликлари ва томорқа ер эгалари кенгаши раиси ўринбосари Комилжон Собиров, Тошкент вилояти ҳокимининг қишлоқ ва сув хўжалиги масалалари бўйича биринчи ўринбосари Хуршид Қорабоев ва тегишли бошқарма бошлиқлари, шунингдек, Паркент тумани ҳокимлигининг соҳага алоқадор мутасаддилари ҳамда фермер хўжаликлари раҳбарлари иштирок этишди.

Амалий семинарда дала четларида қишлоқ хўжалиги, хусусан, озиқ-овқат маҳсулотлари етиштиришни кўпайтириш ва фермер хўжаликларининг даромад манбаини ошириш ҳамда дала маданиятини йўлга қўйиш ҳақида сўз борди.

Семинарда Хуршид Қорабоев Президентимизнинг 2024 йил
30 декабрдаги “Қишлоқ хўжалиги майдонларидаги қўшимча имкониятлардан фойдаланган ҳолда маҳсулот етиштиришни кўпайтиришга доир чора-тадбирлар тўғрисида”ги ПҚ-465-сонли қарорининг ижросини таъминлаш мақсадида
вилоятда бажарилган ишлар ва келгусида амалга оширилиши лозим бўлган вазифалар ҳақида гапириб берди.

Таъкидланганидек, 2025 йилда дала четлари, каналлар, суғориш ва коллектор-дренаж тармоқларининг атрофларидаги майдонларда, аҳоли томорқаси, хонадонлар ва кўп қаватли уйлар олди ҳамда маҳалланинг ички кўчаларида қишлоқ хўжалиги маҳсулотлари етиштириш мақсадида хатлов ўтказилган.

Натижалар жамланиб вилоят бўйича 1,7 минг гектар дала четларидаги ва 61 гектар канал-коллектор атрофларидаги ер майдонларига қишлоқ хўжалиги маҳсулотлари ва мевали дарахт кўчатларини экиш режалаштирилган.

Семинар давомида дала четларида мевали ва манзарали кўчатларни қай тартибда экиш кўрсатиб берилди.

Шунингдек, баҳор мавсумида экиладиган ҳар бир майдонга намуна асосида ишларни ташкил этиш бўйича вилоятдаги туман ҳамда шаҳарлар ҳокимларининг қишлоқ ва сув хўжалиги масалалари бўйича ўринбосарлари, тегишли мутасадди раҳбарларга кўрсатмалар берилди.

👉 @PARKENT_TONGI

#Сессия

⚡️⚡️⚡️ Депутатларимиз 5 та муҳим масалани кўриб чиқишди

Бугун Халқ депутатлари туман Кенгашининг еттинчи чақириқ, бешинчи сессияси бўлиб ўтди.

Халқ депутатлари туман Кенгаши раиси Сардор Исоқулов бошқариб борган сессияда сектор раҳбарлари, депутатлар, ҳоким ўринбосарлари, тегишли ташкилот бошлиқлари ҳамда ОАВ вакиллари иштирок этишди.

Сессияда туманимиз ҳаётига оид 5 та муҳим масала кўриб чиқилди.

Жумладан, Паркент тумани прокуратурасининг ўтган 2024 йил мобайнидаги фаолияти ҳамда жиноятчиликка қарши кураш борасида амалга оширилган ишлар юзасидан депутатларга ахборот берилди.

Шунингдек, Халқ депутатлари Паркент туман Кенгашининг айрим қарорларига ўзгартириш ва қўшимчалар киритиш юзасидан депутатларга маълумот тақдим қилинди.

Сессияда туман Тиббиёт бирлашмаси томонидан 2024 йил давомида амалга оширилган ишлар ҳисоботи депутатларимиз эътиборига ҳавола қилинди.

Тўртинчи масала – Халқ депутатлари Паркент туман Кенгаши ва унинг ҳузуридаги доимий комиссияларнинг 2025 йилга мўлжалланган иш режаларини тасдиқлаш тўғрисида депутатларга батафсил маълумот берилди.

Бешинчи масала – МФЙларни секторларга қайта бириктириш депутатларимиз томонидан муҳокама қилинди.

Қизғин савол-жавобларга бой ўтган сессия якунида туманимиз ҳаётида муҳим бўлган масалалар атрофлича муҳокама этилиб, тегишли қарорлар қабул қилинди.

👉 @PARKENT_TONGI