#Долзарб

⚡️⚡️⚡️ "Туманимизда содир этилган жиноятларнинг қарийб 80 фоизи фош қилинди, лекин..." – туман прокурори

Бугун туман ҳокимлигида прокурор Жасурбек Ҳайитбоевнинг ўтган 2023 йил мобайнида туманимизда қонун устуворлигини таъминлаш, жойларда жиноятчиликка қарши курашиш борасида олиб борилган ишлар ҳақидаги ҳисобот йиғилиши бўлиб ўтди.

Туманимиз ҳокими Шоҳрух Шоаҳмедов бошчилигида ўтган йиғилишда сектор раҳбарлари, “маҳалла бешлиги”, давлат ва жамоат ташкилотлари бошлиқлари иштирок этишди.

Танқидий-таҳлилий руҳда ўтган йиғилишда жиноятчиликка қарши курашиш борасида йўл қўйилган камчиликлар, бу борада эришилган айрим ютуқлар ҳақида сўз борди.

Жумладан, туманимизда содир этилган жиноятларнинг қарийб 80 фоизи фош қилинди, қидирувдаги 34 нафар шахснинг 24 нафари ёки 90 фоизи ушланиб, тергов ва судга жалб этилди.

Прокурорнинг таъкидлашича, содир этилган жиноятлар ичида олдини олиш мумкин бўлган жиноятлар сони 234 тани ёки 60,7 фоизни ташкил этса-да, жиноятни жиловлашга қаратилган бошқа чора-тадбирлар фақат қоғозда чиройли бўлиб кўринмоқда.

Ташвишли томони шундаки, қотиллик жиноятини содир этган шахсларнинг 2 нафари эр-хотин, 1 нафари бошқа яқин қариндошлар томонидан, 1 нафари илгари судланганлар томонидан содир этилганлиги маълум бўлди.

“Маҳалла бешлиги” ўз вазифасига виждонан ёндошмаганлиги оқибатида ўтган 2023 йилда муқаддам судланиб, тегишли жазоларни олган 37 нафар шахс томонидан қайта 33 та жиноят содир этилган.

– Хотин-қизлар масалалари бўйича масъулларнинг ҳуқуқбузарликлар профилактикасини ташкил этиш борасидаги фаолияти ҳам кутилган самарани бермади. Оқибатда хотин-қизлар томонидан 36 та жиноят содир этилгани ташвишли ҳолат, – деди туман прокурори.

Бундан ташқари, айрим ташкилотларнинг мутасаддилари томонидан йўл қўйилган камчиликлар танқид қилинди. 

Йиғилиш сўнггида камчиликларни тузатиш, жойларда жиноятчиликни жиловлаш юзасидан масъулларга топшириқлар берилди.

👉 @PARKENT_TONGI