✅Ил Дархан дьиэ кэргэттэр өйөбүллэригэр анаммыт Судаарыстыбаннай сэбиэт түмүктүүр мунньаҕар кытынна

Россия бэрэсидьиэнэ Владимир Путин бэрэссэдээтэллээх дойду дьиэ кэргэттэрин өйөбүллэригэр анаммыт Судаарыстыбаннай сэбиэт түмүктүүр мунньаҕар Саха сирин Ил Дархана Айсен Николаев кыттыыны ылла.

Мунньахха Владимир Владимирович бэйэтин этиитигэр ааһан эрэр сылга Россия уопсастыбатыгар дьиэ кэргэн суолтатын бөҕүргэтэргэ элбэх үлэ ыытыллыбытын иһитиннэрдэ.

Дойду Аҕа баһылыга оҕолоох дьиэ кэргэттэргэ анаан кэккэ саҥа дьаһаллары сырдатта:

— РФ Үлэ Дьоруойун льготаларын Дьоруой Ийэлэргэ тарҕатыы

— 6%-наах дьиэ кэргэн ипотекатын оннунан хаалларыы

— эдэр дьахталларга босуобуйа кээмэйин хат

— оҕолорго биир кэлим босуобуйаны үрдэтии

— эдэр дьахтарга хат буоллаҕына уонна төрөөтөҕүнэ көрүллэр босуобуйа (төлөбүр) кээмэйин тиийинэн олоруу алын кээмэйигэр диэри үрдэтиэхтэрэ

— хампаанньа үлэһиттэригэр төлүүр нолуок тутуллубат уонна страховой усунуос олохтоммот ийэ хапытаалын кээмэйэ 1 мөл. солк.-га диэри үрдүөҕэ

— биэстэн элбэх оҕолоох төрөппүттэргэ пенсионнай быраап хааччаҕын тохтотуу

Ил Дархан Ил Түмэҥҥэ туһаайыытыгар биир сүрүн тиэмэнэн дьиэ кэргэттэри өйөөһүн буолбута. Манна Айсен Сергеевич өрөспүүбүлүкэҕэ өйөбүл дьаһаллара элбээбитин бэлиэтээбитэ. Ол курдук, холобур, 2025 сыл тохсунньу 1 күнүттэн «Дьиэ кэргэн» өрөспүүбүлүкэтээҕи Ийэ хапытаалын үһүс төрөөбүт оҕоҕо биэрэри таһынан төрдүс уонна бэһис төрөөбүт оҕоҕо эмиэ көрүллэр буолуоҕа.

«Россия, Саха сирэ баайа, инникитэ — улахан, кытаанах дьиэ кэргэттэр. Кинилэр биһиги кыһамньыбытын уонна өйөбүлбүтүн толору билэллэригэр бары сырабытын салгыы ууруохпут», — диэн Ил Дархан эттэ.

@nvk_sakha

✅Дьокуускайга Марха 1 №-дээх орто оскуолатын эбии тутуутун арыйдылар

Ахсынньы 21 күнүгэр Марха 1 №-дээх орто оскуолатын эбии тутуутун үөрүүлээх быһыыга-майгыга арыйдылар.

Саҥа эбийиэк «Үөрэхтээһин» бэрэсидьиэн национальнай бырайыагынан туттулар.

Эбии тутуу арыллыыта Россияҕа Дьиэ кэргэн, Саха сиригэр Оҕо саас сылларыгар уонна Марха дьоҕус түөлбэ 165 сыллаах үбүлүөйүгэр ананна.

Бүгүҥҥү күҥҥэ Марха 1 №-дээх орто оскуолатыгар 977 оҕо үөрэнэр. Эрдэ миэстэ тиийбэт буолан оҕолор икки сменанан үөрэнэ сылдьыбыттара. Саҥа корпуска 5-11 кылаас оҕолоро үөрэнэр буолуохтара.

Төрөппүттэр уонна үөрэнээччилэр саҥа тутууну үрдүктүк сыаналатылар.

Оскуола эбии тутуута - 5785 кв.м. иэннээх, 326 миэстэлээх саҥа үөрэх комплекса. Үөрэнэр кэбиниэттэри таһынан саҥа эбийиэккэ үҥкүү хоһо, библиотека, медиатека, спорт саалата уонна мастырыскыай, оҕо көҕүлээһиннэрин киинэ, 300 миэстэлээх актовай саала уонна 160 миэстэлээх остолобуой көрүллүбүт.

@nvk_sakha