Сурхондарё вилоятида Тошкент тиббиёт университети Термиз филиали учун умумий қиймати қарийб 63 миллиард сўм бўлган, 1 500 ўринга мўлжалланган замонавий ўқув биноси барпо этилди. Мазкур бино бўлажак шифокорларни тайёрлаш учун барча асбоб-ускуна ва жиҳозлар билан таъминланган. Ахборот технологиялари ва тиббиёт соҳасида қўлланиладиган инновацион ускуналардан фойдаланиш имконияти яратилган.

Бугун янги ўқув биносининг тантанали очилиш маросими бўлиб ўтди. Тадбирда Сурхондарё вилояти ҳокими Улуғбек Қосимов иштирок этиб, профессор-ўқитувчилар ва талабаларни янги имкониятлар билан табриклади ҳамда мустақиллик байрами муносабати билан барчани қутлади.

Вилоят раҳбари нуронийлар, соҳа вакиллари ҳамда олийгоҳ мутасаддилари билан бирга бинодаги шароитлар билан танишди, талабалар ва уларнинг ота-оналари билан суҳбатлашди. Ёшлар таълими ва тиббиёт соҳаси ривожига хизмат қиладиган бу каби иншоотлар учун нуронийлар ва ота-оналар Президентимизга чуқур миннатдорлик изҳор этдилар.

Каналга уланиш: https://t.iss.one/murodbekdavlatov