Улуг чедиишкинче базымнар ...

Владимир хоорайда Россияның кулаа дыңнавас улустуң спортунуң талазы-биле бирги чери дээш маргылдаа доозулган. Аңаа Спорттуң адаптивтиг хевирлериниң талазы-биле спортчу школазының кижизидикчизи Кежик Донгак 16-17 харлыг элээди оолдар аразынга 45 кг деңзи чергелиг «хостуг хүреш»  хевиринде «алдынны» чаалап алган.

Кежик Донгак Кулаа дыңнавас уругларның школа-интернадында 9 класста өөренип турар. Хостуг хүреш хевирин ол 5 класстан тура, сонуургай берген. Тренери Артыш Доржунуң демдеглеп турары-биле, Кежик – оожум, кичээнгейлиг болгаш чурумнуг спортсмен. Элээди мөгениң арга-мергежилин ооң бирги чер дээш мурнуку тиилелгелери бадыткап турар.

Бо чылын Кежик маргылдааның үш дакпыр тиилекчизи болганын сагындыраалыңар, 2021 чылда ол бирги чер дээш вице-чемпион турган.

Кежик школаның президентизи, школаның болгаш класстан дашкаар хемчеглерниң идепкейжизи. Хостуг хүрешке чедиишкиннеринден аңгыда, ол «Абилимпикс-2021» национал чемпионадының «Обувное дело» мергежилиниң тииилекчизи база «Пифийские игры-2022» регионалдыг чаданың I чергезиниң дипломантызы.

💬 «Келир чылын Кежик школаны доозар. Бистиң кижизидикчивиске сонуургаары өөредилге черинче кирип алырынче күзеп, бодунуң ынак хандыкшылын, хостуг хүрешти, кагбайн, оон-даа улуг түңнелдерни – Сурдолимпийжи оюннарның база делегейниң чемпионаттарының черлерин чедип алырын күзедивис» - деп, тренер Артыш Алексеевич күзээн.

Чурукту интернет четкизинден алган.

#минобразованиятыва #успехидетей #чемпион #гордимся #опекатыва #вольнаяборьба #спорт