#КК_Поэзия

🐦‍⬛️Соһуччу түгэн
Ааптар: Мухин Дамир, М.К. Аммосов аат. Хатырык орто оскуолатын 7 кл. үөрэнээччитэ
Салайааччыта–Татаринова Л.С.

🐦‍⬛🐦‍⬛🐦‍⬛
Күлүм күннээх сарсыарда
Таһырдьаны одуулуубун.
Арай түннүк тааһыгар,
Чыычаах түһэн саалынна.

Ойон тахсан көрдүм мин,
Кини охтон сытарын
Олуус-олус аһынным,
Кыра чыычаах доҕорбун.

Чоҕулуспут харахтара,
Битигирээбит сүрэҕэ,
Оҥой-соҥой көрбүтэ,
Киһи уйулҕатын хамсатар.

Илиибэр ыламмын имэрийэн,
Бүөбэйдээн,аһатан көрдүм мин,
Сэниэ,күүс -уох ылынан,
Көппүтэ күөх куйаар халлааҥҥа.

Күөрэй ыраах дьурулуу,
Күнү кытта сырсыһа,
Көтүүй үөһээ дьырылыы,
Дьол тойугун туойа!

📍https://t.iss.one/kiin_kyorat_gazeta

#КК_Поэзия

С.Есенин
“КЛЕН ТЫ МОЙ ОПАВШИЙ”
А.Постников-Сындыыс көҥүл тылбааһа

Мууһура кырыарбыт
Кубаххай күлүөнүм,
Тибиигэ тоҥоҥҥун
Бөкчөччү тутуннуоҥ?

Эбэтэр таһырдьа
Чэччийэ сылдьаҥҥын,
Дьылҕа Хаан уурааҕын
Истэҥҥин соһуйдуоҥ?

Итиэннэ итирик
Хаардаах суол күрдьүгэр,
Атаххын үлүтэн
Хаахыныы муннаҕыҥ...

Ол эрэн мин эмиэ
Тиийэрим биллибэт,
Дьиэм сылаас оһоҕор
Доҕоттор ыыппаттар.

Силлиэҕэ бигэтэр
Холуочук киэһэҕэ,
Хоруобум бэһигэр
Сайыны ыллыыбын.

Эн курдук томороон
Тоҥ мастыы сананан,
Күөх лабаа чэчириир
Сай түүнүн түһүүбүн.

Уонна, дьэ, буккулла
Төбөбүн сүтэрэн,
Көссүүбүн көрдөнө
Хатыҥмын кууһабын...

https://t.iss.one/kiin_kyorat_gazeta

#КК_Поэзия

БИЛЭҔИН ДУО?

Билэҕин дуо, хантан саҕаланарый тыал?
Онно үөскээбит дииллэр саамай бастакы тыл...

Биһиги билэбит:
Хоту- соҕуруу,
Илин - арҕаа,
Кини бас билэрэ:
СЫРДЫК,
КЫРДЬЫК,
уонна ХАЛЛААН.

Кыра да
бэриллибит
киһиэхэ - хардыы.
Бэйэбит
ычабытынан
хаамабыт -
хаардыы.

Ким эрэ биһигинэн
үөһэттэн
оонньуур,
Суолбутунан туох эрэ дьиктини
ойуулуу сатыыр.

Онно эн кыһаллыма
-АЙ,
Дьылҕаҕын хас
биирдии дьоллоох түгэни кытта
ыксары баай.

Бу олох доҕоччугум, олус кэрэ,
Хас сарсыарда аайы күнү кытта
төрүүр - ЭРЭЛ...

Борис Кэм

https://t.iss.one/kiin_kyorat_gazeta

#КК_Поэзия

АЛААСПАР АЛЫ
          ГЫННАТТАРА
 
Тиийиэхпин баҕарабын
              төрөөбүт өтөхпөр
Барыгытыттан алы
                      гыннаттара,
Сииктээх салгыннаах,
                        үрүҥ туманнаах
Дойдум күөҕүнэн
            тунаарар буолактара,
Чуумпу дэриэбинэм,
                          алаһа дьиэм,
Оҕо сааһым доҕотторун
                  оонньоон ааспыт
                             боруоктара,
Күлүмүрдэс от үрэх,
                    адаархай талахтар
Миигин умнан
             биэрбэккэ илиилэрин
         өрө уунан туруохтара...
 
Хаһан эрэ дойдум
     дьоно мантан
        миигин атаарбыттара,
Суолу билиэххин
    баҕардаххына атаххынан
          кээмэйдиэхтээххин диэн
               быһаарбыттара,
Күн сирин тилийиэххин
       баҕарар буоллаххына
   тилэххинэн
           мээрэйдиэхтээххин
              диэн алҕаабыттара,
Ханна да тиий,
     дойдугун түһэн биэриэ
            суохтааххын диэн
      кэс тылларын
                       анаабыттара.
 
Айан аргыстаах,
Суол доҕордоох,
Олох түһүүлээх-тахсыылаах.
Эр киһи байанайдаах,
Дьылҕата мүччүргэннээх,
Күн саһарҕалаах,
Түүннээх-күнүстээх,
Киириилээх-тахсыылаах...
 
Туох буолуой,
Бэйэм киэнигэр эппиэттиэм,
Дьону эрэ түһэн биэрбэтэх киһи,
Бэйэм тус кыахпын тутуһуом
Бар дьоммун таҥнарбыта эрэ
                    дэттэрбэтэх киһи.
 
Күн сирин дохсун,
                 айаас аттара,
Күлүмүрдэс,
              чаҕылхай уоттара,
Тумаҥҥа тунаарар
   чыпчыҥныыр сулустара,
Сымыйа, кырдьык
                    быраабылалара,
Олох балысхан
               муоратыгар устар
      Үп-үрүҥ хараабыллара...
Хаарты хараҕыныы
              халтархай суоллара,
Бииртэн биир көстөр
                        моһоллоро,
Албын-көлдьүн тоҕойдоро
Эн кимҥин- туоххун
            күн аайы
                тургуталлара.
 
Баара буолуо дуо,
              олоххо уоскулаҥ,
Биэтэккэ кэллим
      диэбитиҥ саҥаттан
             саҕалааһын буолар,
Дьэ сынньаныам
        диэбитиҥ сэргэҕэ
    атын ат бааллан турар...
Бэйэм эрэ киэнэ
      эбитэ буоллар баҕар,
              тохтуом этэ,
Атын киһи олоҕо
     миэниннээҕэр сыаналаах,
Эппит тыл,
               Ытык иэс,
                              Андаҕар
Эр киһиэхэ
            туолбатаҕына
                         иэстэбиллээх.
 
Бырастыы гын,
             ити барыта – уйан,
Барытын быһаарыа
          улуу ирдэбил –
                                  Айан.
Алы гын,
Үөһэттэн миигин
                баһыйар баар,
Халлаантан миигиттэн
      ыйыппат туох
                        эрэ баар.
 
Тииийиэхпин баҕарабын
 сииктээх салгыннаах,
              үрүҥ туманнаах
Төрөөбүт дойдум
       күөҕүнэн
             тунаарар буолактара,
олорор олохпун
                  дьиҥнээҕинэн,
        хайдах баарынан
                   ырыттара,
миэхэ көмөлөспүт,
                  күүс биэрбит
      Айыылары ыйыттара,
Доҕотторбун сураһа,
Уон араас
    кустуктаах,
түһүүлээх-тахсыылаах
                  дууһабын
             алы гыннаттара...
 
                     Борис Кэм
 
 
 https://t.iss.one/kiin_kyorat_gazeta

#КК_Поэзия

Күнү тутан ыламмын

Күнү тутан ыламмын
Сырдыы түстэ санаам,
Тула өттүм сандааран
Үөрэн мөҕүстэ сүрэҕим.

Оо, кэрэ да эбит!
Тулам күнтэн сырдаабыта,
Сылаас тыынынан илгийбитэ
Дьикти түгэҥҥэ угуйбута.

Киһи үөрүөх эйгэтэ
Дууһабын ыга кууспута,
Үөһээ көтүтэн таһаарбыта
Сири күннүү көрдөрбүтэ.

Ыра санаам тиллиэҕин
Күннүү күндү буолуоҕун,
Сырдаа, тулалыыр эйгэм!
Сырдаа, үөрүү кыымынан!

Олох күндү бэлэҕэ
Күнтэн кэлиий, дуу миэхэ,
Сырдык сылаас сыдьаайынан
Олох угуйар күүһүнэн!

Күнү тутан ыламмын
Бар дьоммор ыытабын,
Сырдык ыра санаабын
Сүрэҕим эйэҕэс сылааһын!

Кэһиилээх Уола
10.12.2024

https://t.iss.one/kiin_kyorat_gazeta

#КК_Поэзия


САҤА ДЬЫЛ ВАЛЬСА

Олохпутун
остуоруйаларынан
киэргэтиэххэ,
Төбөбүтүн
һампааныскайынан
туймаардыахха,
Ааспыт сылга
ким үөрбүтүн,
ким хомойбутун
Көрдөөх
мааскаларга
саһыарыахха.
Бүгүн эн хотойгун,
барытын
үөһэттэн
көрөҕүн,
Очуос саамай
үрдүгэр олороҕун,
Эһэ буолан баайы-дуолу
баппаҕайгыттан
эмэҕин,
Онтон Эн...
онтон эн ханнык да
дьылга кэрэҕин,
Эдэргин хаһан да
сүтэрбэккин.
Уоттаах бакааллар
дьолунан
туоллуннар,
Күлүмүрдүү
оонньоотуннар
гирляндалар,
Ыра санаалар
салют буолан
халлааҥҥа
көттүннэр!
Арай харыйа
анныттан биир
хобуоччу хаххан,
Хаар быыһыттан
оронон тахсан,
Этиэ,
саҥа дьыл бүтүө,
Кэлиэ олох
мөккүөрэ,
эриирэ,
Уйгу-быйаҥ
эккирэтиһиитэ.
Туох буолуой,
киириэхпит
олох бүппэт
вальсыгар,
Кэрэ остуоруйаны
кэтэһэ,
Дьолу-соргуну
сураһа,
Сири кытта
өссө биирдэ
күнү тула эргийэ.

Борис Кэм

https://t.iss.one/kiin_kyorat_gazeta

#КК_Поэзия

❄️🎄❄️❄️🎄❄️🎄
Тоҕус былас туманнаах,
Томороон тымныылаах,
Тохсунньулуур ыйбыт,
Тирээн кэллэ,доҕоттоор..
Таһырдьа тахсартан,
Куттанан,дьаарханан,
Халлааммыт сымныырын,
Кэтэһэр курдукпут..
Быйылгы тымныыга,
Үөрэнэ иликпит,
Сымнаҕас халлааҥҥа
Махтана хаампыппыт..
Дьэ,доҕор, тымныйда,
Чысхаанын биллэрдэ,
Бөһүөлэк чуумпурда,
Ыал бары чуҥкуйда..
Биир дьиэҕэ хаайтарда
Оҕолуун-уруулуун,
Оһоҕу манаата.
Сүөһүлээх ыалларбыт,
Хотоҥҥо тахсаллар,
Сүөһүнү уулата,
Ойбоҥҥо үүрэллэр..
Сүөһүлэр сырсаллар,
Уулаары сүүрэллэр,
Ыттар тоҥон үрбэттэр,
Суордар тоҥон,көппөттөр..
Харыстаныҥ,доҕоттор,
Айанныыртан туттунуҥ,
Чугас дьоҥҥут таһыгар,
Көмө,туһа дьон буолуҥ!
Арай күммүт уһаата..
Кыратык да буоллар,
Санаабытын чэпчэтэр,
Дууһабытын долгутар..
Сахам дьоно,тулуйуох,
Тымныы күнү тулуһуох,
Күммүт өссө уһуоҕа,
Сылаас күнү ыытыаҕа!

❄️2/01-2024 ❄️ Раиса ❄️



https://t.iss.one/kiin_kyorat_gazeta

#КК_Поэзия

Бириэмэ көтүмэ, көтүмэ...

Бириэмэ көтүмэ, көтүмэ
Үргүбүт табалыы түһүмэ!
Өссө да эдэрбин дэниим ээ
Өссө да көрүлүү түһүүм ээ.

Тулабар сибэкки тэтэрдин
Үрдүбэр күөрэгэй битийдин
Биир ыйга эдэр саас уһаарыый
Биир сылга кырдьар кэм бытаарыый.

Алааска хаарын да күртэххэ
Ааспат ээ кырыалаах кыһыҥҥы
Төбөҕө бэргэһэ кэттэххэ
Төннүбэт баттаҕыҥ харата.

Бириэмэ көтүмэ, көтүмэ
Эйиэхэ хойутуур үлэҥ суох.
Кырдьары кымньыылаан биэримэ
Кырдьарга тиэтэйэр ким да суох!

Бүөтүр Тобуруокап

https://t.iss.one/kiin_kyorat_gazeta

#КК_Поэзия


Күннүүн аргыстастым


Аммабыттан сарсыарда
Айан суолун тутарбар,
Аламайкаан күнүкэм,
Аламаҕай кыыс курдук:
«Арҕаа барар буолларгын,
Аргыстаһыах!» — диэбитэ.

Алыс сыыдам сырыылаах
Аптамабыыл аппынан
Алааһынан, сыһыынан
Айаннатан иһэрбэр,
Алаарыйар халлаантан
Аралыйа тыкпыта.

Симилэхтээх систэргэ
Сирдиргэтэн киирбиппэр:
«Силис-мутук охсуоҕа,
Сэрэн, оргууй!» — диэбиттии,
Сэбирдэҕи силэйэн,
Сипсийэргэ дылыта.

Куула-күлүк суолунан
Куугунатан барбыппар,
Куоттараары гынным диэн
Хомойбуттуу туттунан,
Хоннохторго тоһуйан,
Кууспаҕалыыр курдуга.

Этэҥҥэтик эргиллэн
Элиэнэбэр кэлбиппэр:
«Эбэбитин биһиги
Эмиэ бииргэ туоруох!» — диэн,
Эрэһэлээх долгуҥҥа
Эрдиилэнэн испитэ.
 
Киэһэ, суолбун түмүктээн,
Кэргэттэрбин булбуппар,
Кэрэ Чочур-Мураантан:
«Кэлэр күҥҥэ дылы!» — диэн,
Кэтэҕириин түннүкпэр
Килбиэннэнэ кыыспыта.

Үйэлэргэ өрүүтүн
Үтүөтүнэн үөдүйэр
Үрүҥ күнүм — аргыһым —
Үчүгэйэ бэрдиттэн —
Үөрүүбүттэн, дьолбуттан
Үөһэ тыынан ылбытым...

Күннүк Уурастыырап

https://t.iss.one/kiin_kyorat_gazeta

#КК_Поэзия

СӨ Норуодунай поэта Иван Гоголев - Кындыл эдэр сааһынааҕы хоһоонноруттан:

ТӨРӨӨБҮТ ТЫЛ

Ийэҥ сылаас үүтүн кытта
Бу тылы ыймахтаабытыҥ,
Эн билбитиҥ бу тылтан
Саха буолан айыллыбыккын.

Баҕар, түһэн биэриэ доҕор,
Ийэҥ, баҕар, хоргутуоҕа,
Төрөөбүт тыл эн олоххор
Мэлдьи аргыс буолуоҕа...

Өстөөххүн ох таптаҕына -
Баҕар, бааһа оһуоҕа,
Уот тылгынан хаарыйдаххына -
Өрүттүө эрэ суоҕа.

Баҕар, умнуоҥ ырааттаххына -
Төрөөбүт сайылыккын,
Төрөөбүт тылгын умуннаххына -
Эн киһи буолбатаххын.

📍https://t.iss.one/kiin_kyorat_gazeta

#КК_Поэзия

СӨ Норуодунай поэта Иван Гоголев - Кындыл эдэр сааһынааҕы хоһоонноруттан:

САХА ТЫЛЫНАН

Төрөөбүппэр аал уот үөрэн
Тигинэччи умайбыта,
Аастыйбыт астаах эбэм
Ботугураан алҕаабыта
Аптаах саха тылынан.

Ийэм куобах суорҕанынан
Дьыбар киэһэ суулуу-суулуу,
Кынаттаах ат туһунан
Ыллыыр этэ оргууй-оргууй
Намыын саха тылынан.

Оҕуурдаан туппатаҕым
Уон сэттэбэр ол аты,
Биир чох хара харахтааҕы
Мин дьолум диэн ааттаабытым
Сылаас саха тылынан.

Көңүл кыраай күөрэгэйэ
“Ыллыах!” диэн ыңырбыта,
Хомус курдук, дьиэрэһийэн
Мин сүрэҕим хардарбыта
Уоттаах саха тылынан.

Бар дьонуом, хаһан эмэ
Сырдык, санньыар күҥҥэ арыт
Мин элэккэй, мин сэмэй
Ааппын ахтан аһараарыҥ
Таптыыр сахам тылынан.

📍https://t.iss.one/kiin_kyorat_gazeta

#КК_Поэзия

Иван Гоголев-Кындыл

ДЬОЛЛООХ БУОЛУҤ!

Таптыыр дьонуом, биир суолу
Көрдөһөбүн олустук,
Дьоллоох буолуҥ, дьоллоох буолуҥ,
Бары дьоллоох буолуҥ куруук.

Дьол диэн быччыҥ, иҥиир ыллыыр
Үлэтиттэн үөскүүр чэр,
Дьол - сылаастык буруолуур сыыр,
Дьол - көннөрү, истиҥ мичээр.

Дьол сиргэ сүрдээх элбэх,
Перепись да ыыттыннар,
Муҥутаабыт сэбирдэх
Суугунунан ыҥырар.

Дьол күүтэр, күүтэр мэлдьи
Буларгытын, кууһаргытын,
Сулус эмти барыар диэри
"Дьоллоохпут!" диэн ыллыыргытын.

Дьол хараҕа суох дииллэр,
Сымыйа! Дьол кыраҕы,
Хорсуҥҥа кини кэлэр,
Таптыыр ыраас суобастааҕы.

Бүтэй хоско дьолу хаайан
Чуҥкутумаҥ, доҕотторуом,
Күндү көбүөр быылыттан
Тэтэркэй имэ кууруо.

Кыра тирии кумааһынньыкка,
Сундуукка эрэ батар
Кыра дьолтон биир да чааска
Астынымаҥ ый анныгар.

Сүрэххэ уонна түөскэ
Төрүт баппат улахан
Улуу дьолу - илистибэккэ
Көрдөөҥ, көрдөөҥ дьаныйан.


📍https://t.iss.one/kiin_kyorat_gazeta

#КК_Поэзия

Сэмэн Данилов

***

Алааскар эн мас үүннэрэн хааллардаххына-
Хас саас аайы сэбирдэх буолан тыллыаҥ,
Күнүҥ сирин таптаан ыллаабыт буоллаххына-
Күн аайы, күнү кытта эн тиллиэҥ.

Ийэ дойдугар тугу, ханныгы дьайаргынан-
Кырыыска да туруоҥ, ырыаҕа да ылланыаҥ,
Төрөөбүт тылгын төһө таптыыргынан
Ой дуораана буолан өлбөт үйэлэниэҥ.

Өбүгэлэргин кэриэстээбит эбит буоллаххына-
Кэлэр кэнчээри ыччаккар кэрэтик ахтыллыаҥ,
Бар дьонуҥ туһугар олорбут эбит буоллаххына-
Бар дьонуҥ кэхтибэт кэс тылыгар дуораһыйыаҥ.

https://t.iss.one/kiin_kyorat_gazeta

#КК_Поэзия

Бүөтүр Тобуруокап

Саргы-дьаалы
Сахам тыла,
Айхал-алгыс
Сахам тыла,
Уруй олук
Сахам тыла,
Күн бэлэҕэ
Сахам тыла,
Эйигин мин ыҥырыаҕым
«Ийээ!» диэммин хаһыытыаҕым. Тоҕойдору туораан ис,
Арҕастары ааһан ис,
Саргы дьайаан
Сахам тыла,
Сарыал санаа —
Сахам тыла!

📍https://t.iss.one/kiin_kyorat_gazeta

#КК_Поэзия

КҮНҮ УҺУГУННАРЫЫ

Сарсыарда ким да иннинэ
уһуктуом,
Оргууй туран үүттээх
кофе оҥостуом,
Саҥа күнү сүрэхпинэн
кэтэһэ
Эргэ кириэһилэбэр
олоруом.
Халлаан сиигэ арыллыа
тыаһа суох,
Сырдык туран кэлиэ
миигиттэн
көҥүллэппэккэ
эрэ,
Уһуктан кэлиэхтэрэ
аан дойду бары
чыычаахтара,
Көҥүл ырыалаахтара,
чуор бэлэстээхтэрэ.
Ону кытта уһуктуохтара
мин саамай
таптыыр
дьоннорум,
Хаһан эрэ, ханна эрэ
көрсүөхтээх
доҕотторум.
Кинилэр бары туспа
түбүктээх
буолуохтара,
Эн бааргар отой да
кыһаллыахтара
суоҕа,
Арай эн күлүккэр
үөрэ имнэниэҥ
Бу күнү мин
уһугуннардым
диэн.

Борис Павлов


https://t.iss.one/kiin_kyorat_gazeta

#КК_Поэзия

Айылҕа дьэргэйэр
... кэрэ да кэмнэр

Уһуктууну арбааннар,
Сарсыарданы аймааннар
Сааскы оонньуу тилийдэ,
Көрдөөх күлүү тэнийдэ.

Бастаан күммүт ылыста,
Тыалы көрөн сырыста
Сардаҥанан кыыратта,
Биирэ куотта быыратта.

Тыалбыт үөҥҥэ тилиннэ,
Ньургуһуҥҥа имнэннэ,
Дьээбэлээҕи санаата,
Салгын кыыһы манаата.

Салгын сыыһа харбатта,
Кэдэс гынан аһарда,
Тыалга хаары уоптарда,
Доҕууругар хаптарда.

Хамсаабатын билэннэр,
Бары сырсан кэлэннэр
Хаары кынньаан бардылар,
Дьээбэлээннэр кыайдылар.

Хаарбыт олус ыксаата,
Абатыйан ытаата,
Чалбах буолан тоҕунна,
Харалдьыкка оҕунна.

Сааскы көрдөөх араллаан
Ньургуһуну айхаллаан
Чалбах уутун килэттэ,
Харалдьыты тэниттэ.

Н. Пахомов
24.04.2025 с.

https://kiinkuorat.ru/articles/nikolay-pahomov-olohput-biir-cha-ylhay-keme-bam-tutuututtan-sa-alammyta

https://t.iss.one/kiin_kyorat_gazeta

#КК_Поэзия

Ааптар: норуот суруйааччыта Наталья Михалева - Сайа

🌷☀️🌱ЫАМ ЫЙА
Ыам ыйыгар өрүс эстэр,
Ыам ыйыгар кэҕэ этэр -
Ыам ыйыгар бары кэрэ
Сир үрдүгэр биирдэ кэлэр.

Ыам ыйыттан силис тарпыт
Ньургуһуннуу хоодуоттук,
Ыам ыйыгар үрдээн хаалбыт
Күөх халлаанныы холкутук
Мин олохпор ыам ыйын
Илгэ тыынын иҥэриэм,
Ыам ыйыныы сыдьаайдаах
Ырыа буолан долгутуом.

Ыам ыйыттан ньургуһуну,
Ыам ыйыттан мутукчаны,
Ыам ыйыттан кистэлэҥи
Ыйыппакка ылбыппын
Ыам ыйыныы ол ырыам
Иэйиитинэн төннөрүөм.


https://t.iss.one/kiin_kyorat_gazeta

#КК_Поэзия

ЧӨРКӨӨХ ДАЛБАР ХОТУТТАРА

Устан ааспыт үйэттэн
Аптаах аты мэҥэстэн
Илэ кэлбит курдуктар
Толуу-мааны хотуттар.

Көрдөөх-нардаах көстүүнэй
Олус мааны муодунай
Сэлээппэтэ, киэргэлэ
Хотуттарга буолунай.

Хаарыс солко халадаай
Хаһыаччыга харчылаах,
Уобараска барсар баай
Кэбиһэрдээх, кириэстээх.

Уран тарбах ойуулаан
Куруһуба кытыылаан,
Оҕуруонан оһуордаан
Оҥорбутуон нарылаан!

Дьоһун-мааны хотуттар
Олорбуттар, турбуттар
Хаама сылдьар хаартыска,
Кэрэ кэпсэл буолбуттар...

Ытык Чөркөөх иһигэр
Дьиҥнээх олох сиэригэр
Айыыһыттар эбиттэр
Сэргэх далбар дьүөгэлэр.

Үрүҥ дьиэҕит иһигэр
Таҥас бэрдин наар тиктиҥ,
Үйэ быыһын сэгэтэр
Үгэскитин тэнитиҥ!

Арылы Дуйдаах


https://t.iss.one/kiin_kyorat_gazeta

#КК_Поэзия

Кыыс кэтэһэр ыһыаҕы...

Ааптар: Наталья Харлампьева

Кыыс кэтэһэр ыһыаҕы
Саҥа таҥас таҥнаары,
Мэник уолан батыһа көрбүтүн
Тапталга кубулутаары.

Дьахтар кэтэһэр ыһыаҕы
Саҥа ытарҕа кэтээри,
Дьоһун дьолун бар дьоҥҥо
Итэҕэтэн ааһаары.

Эмээхсин кэтэһэр ыһыаҕы
Саҥа былаат баанаары,
Түһүлгэҕэ тиийэн олорон
Былыргытын санаары.

https://t.iss.one/kiin_kyorat_gazeta

#КК_Поэзия

Ааптар: Норуот поэта Наталья Михалева-Сайа

Манчаары...
Тоҕо бу эн аатыҥ
Долгутар бар дьоҥҥун,
Үйэттэн үйэҕэ
Үрдэтэр эн дьиҥҥин?

Хара банаар харахтаах
Хабыр халлаан харгыһа
Маҥан былыт баарыстаах
Эн ыраҕын ыспатах.
 
Хара буруй хаймыылаах
Хатан дьылҕа ыйааҕа
Маҥан акка баҕалаах
Хаҥыл куккун хаайбатах.
 
Хара баттал балыырдаах
Халыан олох дьалкыыра
Көҥүл тыынар мөккүөрдээх
Түгэннэргин күөйбэтэх.
 
Ол да иһин сүүрбэһис
Сүтүктэрдээх үйэҕэ
Эн ааккыттан эрдийбит
Эр дьоннордоох этибит.
 
Кырдьык уонна Көҥүл бииргэ
Туругурбут олоҕун
Туруулаһан охтубут
Туруу дьонноох этибит.
 
Барҕарыынан таһымныыр
Бардам тылы көтөхпүт,
Батыйаны килбэппит
Бастыҥ дьонноох этибит...
 
...Хара маска таһыллар,
Хара хаана халыйар
Кырдьык эмиэ Көҥүлүн –
Манчаарытын ыҥырар,
 
Харах уута оһуордаах,
Хаппыт маска холоонноох
Тойон сэргэ доҕорун –
Маҥан атын кэтэһэр...

https://t.iss.one/kiin_kyorat_gazeta