ҚОРАҚАЛПОҒИСТОН РЕСПУБЛИКАСИ ЖЎҚОРҒИ КЕНГЕСИ РАИСИ БЕРУНИЙ ТУМАНИДА ЁШЛАР БИЛАН УЧРАШУВ ЎТКАЗДИ

Қорақалпоғистон Республикаси Жўқорғи Кенгеси Раиси Мурат Камалов Беруний туманидаги Маданият саройида Элликқалъа, Тўрткул ва Беруний туманлари ёшлари билан учрашув ўтказди.

Маданият саройининг фойесида турли миллат вакилларининг куй-қўшиқлари ижро қилиниб, меҳмонлар кутиб олинган бўлса, маданият марказидаги 28 та тўгарак фаолияти билан ҳам танишилди. Доира, миллий қўшиқчилик, хареография, рубоб, эстрада, спортнинг бадиий гимнастика ва каратэ йўналишлари бўйича тўгарак иштирокчилари ўз маҳоратларини намойиш этди.

Жўқорғи Кенгес Раиси томонидан марказ кутубхонасига 1000 та китоб совға қилинди ва марказ тасарруфидаги музей экспонатлари ҳамда берунийлик рассомлар Собир Қутлимуратов, Сахий Джанахмедовнинг кўргазмалари билан ҳам танишди. Ижодкорларга бугунги ёш авлодни рассомчилик санъатига қизиқишларини янада орттириш мақсадида устоз-шогирд анъанасини давом эттиришлари учун Жўқори Кенгес Раиси тавсияларини бериб ўтди.

Олис ҳудудлардан мактабларга қатновчи ўқувчиларга 20 дона вилосипед совға қилинди.

Жўқорғи Кенгес Раисининг Маданият саройи залида ўтказилган ёшлар билан учрашуви савол-жавобларга бой бўлди. Дастлаб ZOOM дастури орқали Хитой, Беларусь ва Россия университетларида таълим олаётган ёшлар билан ўзаро фикр алмашилди. Шундан сўнг 3 та туман ёшлари мурожаатлари тингланди. Жўқори Кенгес Раиси томонидан кам таъминланган оила фарзандларига шартнома тўловлари учун сертификатлар, фан олимпиадаларида юқори натижаларга эришган ёшларга ноутбуклар совға этилди.

Учрашувдан сўнг ёшлар учун Қорақалпоғистон санъат усталари ижросида гала концерт намойиш этилди.

Беруний тумани ҳокимлиги ахборот хизмати

https://t.iss.one/beruniy_news