Халықаралық автомагистралдың 240 км аралығында реконструкция жумыслары даўам етпекте

Ҳәзирги ўақытта Қоңырат районы аймағынан өтиўши А–380 “Ғузар-Бухара-Нөкис-Бейнеў» автомагистралының 964–1204-км (240 км) аралығын Азия раўажланыў банки қатнасыўында цементобетон қапламасы менен реконструкциялаў жумыслары әмелге асырылмақта.

Бүгинги күнде Әзербайжанның «North West Construction LLC» ҳәм Қытайдың «CRBC» China Road and Bridge Corporation кесип алып ислеўши компаниялары тәрепинен қурылыс жумыслары даўам еттирилмекте.

Әмелге асырылған жумыслар нәтийжесинде жәми 240 км автомобиль жолының 130 км бөлеги қайта қурылды.

Жойбар бойынша жолдың өткериўшеңлик қәбилети артып, оңлаў ҳәм эксплуатация қәрежетлери дерлик 2,5 есе тежелиўи, халық аралық ҳәм транзит жүк тасыў, соннан, жолаўшы тасыў көлеми бир неше есеге артыўы, аймақлар бойынша жалпы ишки өнимниң өсиўине ерисилиўи күтилмекте.


Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Жоқарғы Кеңес Баслығы «ACWA Power» компаниясы ўәкиллери менен ушырасты

Қарақалпақстан Республикасы Жоқарғы Кеңесиниң Баслығы Аманбай Орынбаев Саудия Арабстанының «ACWA Power» компаниясының Өзбекстандағы басшысы Жон Заиди менен ушырасты.

Онда дәслеп, Жоқарғы Кеңес Баслығы Президентимиздиң Қарақалпақстанда исбилерменликти раўажландырыў ҳәм инвестициялық орталықты жақсылаў бойынша айрықша итибары, бул бағдарда қабыл етилип атырған қарар ҳәм пәрманлар ҳаққында кең түрде атап өтти.

Ушырасыўда «ACWA Power» компаниясы тәрепинен республикамыздағы Үстирт тегислигинде қурылысы басланыўы алдында турған самал электр станциясы жойбарын әмелге асырыў, бул бағдарда компания жумысларын алып барыўды қоллап-қуўатлаў, қурылыс жумысларының басланыўы ҳәм жедел пәтте алып барылыўын тәмийинлеў сондай-ақ, бар болған мүмкиншиликлерден нәтийжели пайдаланыў мәселелери сөз етилди.

Айтып өтиў орынлы, республикамыз аймағы самал электр станцияларын қурыў ушын қолайлы орынлардың бири есапланып, Үстирт тегислиги үлкен мүмкиншилик дереги сыпатында хызмет етеди. Қуяшлы елимиздиң бул әжайып дияры станция ушын ең керекли мүмкиншилик есапланған дерлик тоқтамайтуғын самалы менен ажыралып турады.

Өткерилген ушырасыўда самал электр станциясын қурыў ушын Қарақалпақстанның қолайлықлары, алдағы ўақытта бул тараўды раўажландырыў илажлары, бирге ислесиўди еле де беккемлеў ҳәм кеңейтиў сыяқлы әҳмийетли мәселелер ҳаққында кең түрде пикирлесилди.

Ушырасыў соңында Жоқарғы Кеңес Баслығы ҳәр қандай инвестор республика басшылары тәрепинен қоллап-қуўатланатуғынлығын ҳәм жаңа инвестициялық жойбарларды иске түсириўге қаратылған илажларға барлық мүмкиншиликлер жаратып берилетуғынлығын атап өтти.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Ишки ислер уйымлары хызметкерлери күни мүнәсибети менен байрам салтанаты болып өтти

Бүгин Бердақ атындағы Қарақалпақ мәмлекетлик академиялық музыкалы театрында «Ишки ислер уйымлары хызметкерлери күни» мүнәсибети менен байрам салтанаты болып өтти.

Өткерилген илажда Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, тараў пидайыларын ҳәм ветеранларын бүгинги байрам мүнәсибети менен қутлықлады.

Илажда атап өтилгениндей, тараў хызметкерлериниң жәмийетлик тәртипти ҳәм тынышлықты сақлаў, пуқаралардың ҳуқық ҳәм еркинликлерин қорғаў бағдарында өз тынышлығынан, керек болса жанынан кешип әмелге асырып атырған пидайы хызметлери барқулла қәдирленеди ҳәм айрықша ҳүрметленеди.

Айтып өтиў керек, соңғы жыллары елимизде Ҳүрметли Президентимиздиң басшылығында ишки ислер уйымларының жумыс нәтийжелилигин және де арттырыў, тараўды инсаныйлық ҳәм халықшыл системаға айландырыў, ашық-айдынлық орталығын күшейтиў, бул жолда аянбай мийнет етип атырған тараў хызметкерлерин қоллап-қуўатлаў мəселелерине мəмлекетлик дəрежеде итибар қаратылмақта.

Тараў хызметкерлери өз ўазыйпасын минсиз атқарыў жолында, халқымыздың тыныш-татыў турмысын тәмийинлеў, жынаятшылыққа ҳәм ҳуқықбузарлықларға қарсы гүресиў, жәмийетлик тәртипти ҳәм жол ҳәрекети қәўипсизлигин сақлаў, халқымыздың абадан турмысын тәмийинлеў сыяқлы көплеген бағдарлар бойынша ийгиликли жумыслар алып барып атыр.

Болып өткен байрам салтанатында усындай жуўапкершиликли ўазыйпаларды атқарып киятырған бир қатар тараў ўәкиллери ҳәм ветеранлар Жоқарғы Кеңес Президиумы қарары тийкарында көкирек белгилери ҳәм баҳалы саўғалар менен сыйлықланды.

Байрам салтанаты көркем өнер ҳәм мәденият хызметкерлери атқарыўындағы концерт бағдарламасы менен даўам етти.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter