Социаллық қорғаўға мүтәж пуқаралардың үйлери оңланып, жарамсызлары қайта қурып берилмекте

Министрлер Кабинетиниң 52-санлы арнаўлы қарары менен аўыр турмыс шараятындағы шаңарақларға тийисли уйлерди оңлаў, төбесин бастырыў ҳәмде жасаўға жарамсыз авариялық жағдайдағыларын жаңадан қурыў белгиленген.

Қарар тийкарында Әмиўдәрья районында 49 аўыл ҳәм мәҳәлледе дизимге алынған 1868 үйден 1856 үйдиң төбеси шиферланып бериледи. Сондай-ақ, жасаўға жарамсыз авариялық жағдайдағы 12 үй қайтадан қурылады. Қалған 190 үй толық оңлап бериледи.

"Бозжап" аўыл пуқаралар жыйынында жасаўшы А.Базарбаевтиң үйи де қарар шеңберинде қайта қурып берилмекте. Буннан тысқары, "Қызылшалы" мәҳәллесинде жасаўшы Н.Сейтмамутованың үйи де қайтадан қурылып жаңадан бой тикледи.

Соның менен бирге, арнаўлы қарар менен Қарақалпақстанның қубла районларындағы ишки жолларды оңлаў бойынша жәми 2000 км топырақ жолларды қум-щебень араласпалы жолларға айландырыў режелестирилген. Усы тийкарда да райондағы ишки жолларды оңлаў жумыслары алып барылмақта.

Президентимиз басшылығында алып барылып атырған бундай ийгиликли жумыслар ҳәр бир шаңарақтың абадан турмысын тәмийнлеў жолында еле де даўам еттириледи.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Нөкис халықаралық аэропорты аймағында "Сәркардалық-диспетчерлик пункти"ниң (СДП) салтанатлы ашылыў мәресими болып өтти

Бүгин Нөкис халықаралық аэропорты аймағында "Өзаеронавигация" орайы мәмлекетлик унитар кәрханасының Нөкис ҳаўа ҳәрекетин бақлаў ҳәм басқарыў ханасы болған "Сәркардалық-диспетчерлик пункти"ниң салтанатлы ашылыў мәресими болып өтти.

Онда тараў ўәкиллери, жуўапкер мәкемелер басшылары ҳәм кең жәмийетшилик ўәкиллери қатнасты.

Айтып өтиў орынлы, объектти жойбарлаў Қарақалпақстанға хызмет көрсеткен архитектор Орынбай Торениязов тәрепинен басланған Архторус ислеп шығарыў-техникалық устаханасы тәрепинен әмелге асырылды. Жойбар Н.Торениязов тәрепинен жуўмағына жеткерилди.

Бул объект иске түсирилиўи менен бир қатар имканиятлар жаратылды:

-Ушыў-қоныў жолы, таксилер жоллары ҳәм самолётлар ҳәрекети, техникалық қураллар, ушыў, қоныў ўақтында, пәрўәзлар ўақтында қәўипсизликти тәмийинлеў ушын еледе визуал көринис тәмийинленеди;

-Нөкис аймағында ҳаўа ҳәрекетин басқарыў бөлими хызметкерлериниң жумыс алып барыўы ушын қолайлы шараят жаратылады;

-Алдынғы барлық объектлер түрли орынларда болғанлығы себепли ҳаўа ҳәрекетин тәмийинлеў ҳәм пәрўазларды радиотехникалық қоллап-қуўатлаў менен байланыслы машқалаларды сапластырыў имканияты жаратылады.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Жоқарғы Кеңес Баслығы өзи аталыққа алған жаслар менен ушырасты

Президентимиз басламасы менен 14-30 жас аралығындағы жаслар социаллық жағдайы, қәбилети ҳәм қызығыўшылықларынан келип шығып, үш категорияға ажыратылды. Мәмлекеттиң итибары ҳәм жәрдемине мүтәж болған жаслар Жоқарғы Кеңес Баслығы, сектор басшылары, министрликлер менен қала ҳәм район ҳәкимлери, сектор басшыларына бириктирилди. Усы тийкарда республикамызда жаслар менен индивидуал ислеў системасы жаратылмақта.

Қарақалпақстан Республикасы Жоқарғы Кеңесиниң Баслығы Аманбай Орынбаев өзи аталыққа алған жаслардың машқала ҳәм усынысларын тыңлаў мақсетинде бир қатар жаслар ҳәм олардың ата-аналары менен екинши мәрте ушырасты.

Өткерилген ушырасыўда жаслар менен жақыннан пикирлесилип, олардың тилек-өтинишлери, сондай-ақ, турмысында ушырасып атырған машқалалары тыңланды.

Атап айтқанда, денсаўлығын беккемлеў ушын әмелий жәрдем көрсетиў, бәнтлигин ҳәм өзин өзи бәнт етиўин тәмийинлеў, социаллық қоллап-қуўатлаў, оқыў ушын контракт пулларын төлеп бериў, оқыўға кириў ушын арнаўлы таярлаў курсларында оқыў ушын қаржылай жәрдем бериў сыяқлы бир қатар мәселелер жаслар ҳәм олардың ата-аналары тәрепинен көтерилди.

Сол орынның өзинде бир неше жаслардың өзин-өзи бәнт етиўи ушын тигиў машиналары, сантехника буйымлары, кепсерлеў үскенелери жыйнағы менен тәмийинлеў бойынша жуўапкерлерге тапсырма берилди. Сондай-ақ, жумыссыз пуқаралардың бәнтлигин тәмийинлеў мақсетинде кәсип-өнерге бағдарлаў бойынша арнаўлы курсларда оқытыў белгилеп алынды.

Жоқарғы Кеңес Баслығы бул машқалаларға шешим табыў бойынша тийисли тараў басшылары менен бирге арнаўлы “Жол картасы”н ислеп шығыў ҳәм тез пурсатта шешим табыў мәселесинде тапсырмалар берди.

Ашық-айдын жақыннан пикирлесиў усылында өткерилген ушырасыўда жаслар өзлеринин пикирлерин емин-еркин билдирди.

Ушырасыў жуўмағында ўазыйпалар белгилеп алынды.

Толық мағлыўмат


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Алыс Белтаў аўылында жаңа өмир басланған

Қарақалпақстан Республикасы Жоқарғы Кеңесиниң Баслығы Аманбай Орынбаев Тахтакөпир районындағы алыс аймақларда аўыл хожалығы егислик майданларынан нәтийжели пайдаланыў бойынша әмелге асырылып атырған жумысларды барып көриў мақсетинде Белтаў аўыл пуқаралар жыйыны аймағында болды.

Онда Өзбекстан Республикасы Президентиниң Кеңесгөйи Т.Худайбергенов, Қарақалпақстан Республикасы Министрлер Кеңесиниң Баслығы Ф.Эрманов, Республика прокуроры Э.Таджиев, Ишки ислер министри Б.Торебеков ҳәм басқа да бир қатар жуўапкерлер қатнасты.

Пуқаралардың абадан турмысын тәмийинлеў бағдарында республикамыздың алыс аймақларында жасаўшы пуқараларды ишимлик суўы менен тәмийинлеў, олардың күнделикли турмысында пайдаланыўы ушын суў жеткерип берилиўин жолға қойыў да усы тийкардағы жумыслардан болып, тайнапыр бурғылаўшы техникалар жәрдеминде артезиан қудықларын қазыў жумыслары Тахтакөпир районының алыс Белтаў АПЖ аймағынан басланған еди. Ҳәзирги ўақытта аўыл пуқаралар жыйыны аймағынан үлкен көлемдеги артезиан қудықлары қазылып, 500-600 мт тереңликтен суў шығарыўға ерисилди.

Сондай-ақ, аймақта жаңа егислик жерлерин ашыў мақсетинде 2000 гектар жер майданы таярланды. Бул ушын зәрүрли барлық техникалар мобилизация етилди. Соның менен бирге, усы егислик майданларына тамшылатып суўғарыў жолы менен суў жеткерип берилиўин тәмийинлеў мақсетинде 12 орында жасалма суў сақлаўшы бассейнлерди қазыў жумыслары алып барылды. Нәтийжеде жыллар даўамында қараўсыз қалған егислик майданлары қайта жанланды.

Бул әмелге асырылып атырған жумыслар нәтийжесинде аўыл турғынлары суў менен тәмийинленди, ең баслысы, жаңа жерлер ашылыўы менен аўыл халқы ушын жаңа жумыс орынлары да жаратылып, аймақ турғынларының турмыс абаданлығы жақсыланыўы ушын бар мүмкиншилик жаратылды.

Аўыл ҳәзирги ўақытта жаңадан өмир баслаған.

Толық мағлыўмат


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter