Jizzaxda “Volkswagen Caddy” tez tibbiy yordam mashinalari foydalanishga topshirildi

Davlatimiz rahbarining tashabbusi bilan, “103” tizimdagi mavjud “Damas” rusumli va xizmat muddatini oʻtagan boshqa turdagi avtotransport vositalarini 2022-2024-yillarda yangilash belgilangan.

Ushbu tashabbus ijrosi doirasida viloyatimiz “103” xizmatiga navbatdagi 16 ta beshinchi avlod “Volkswagen Caddy” tez tibbiy yordam mashinalarining tantanali topshirish marosimi oʻtkazildi.

Marosimda viloyat hokimining oʻrinbosari Akmal Savurbayev, viloyat sogʻliqni saqlash boshqarmasi boshligʻi Ozoda Maxmudova mamlakatimizda tibbiyot sohasining rivojiga koʻrsatilayotgan eʼtibor, aholiga sifatli tibbiy xizmat koʻrsatish borasida amalga oshirilayotgan ishlar haqida gapirdilar.

Mavjud ehtiyojdan kelib chiqib, moshinlar Baxmal, Gʻallaorol tumanlariga ikkitadan, boshqa tumanlardagi tez tibbiy yordam boʻlimlariga bittadan taqsimlandi.

Qayd etish joizki, “Volkswagen Caddy“ yuqori texnik koʻrsatkichga egaligi, harakatlanish qobiliyati yuqoriligi va ixchamligi bilan ajralib turadi.
Mazkur avtomobillarni loyihalash va jihozlashda shifokor hamda bemorlarga imkon qadar qulaylik yaratishga eʼtibor berilgan.