Zomin aeroporti foydalanishga topshirildi

Ochilish marosimida viloyat hokimi Ergash Saliyev, Zomin tumani hokimi Alisher Abdugʻaniyev, keng jamoatchilik va ommaviy axborot vositalari vakillari ishtirok etishdi. 

“Prezidentimiz tashabbusi bidan amalga oshayotgan ushbu loyihaning amalga oshirilishi Zomin aholisi daromadining koʻpayishiga va yoshlar bandligini taʼminlashga xizmat qiladi. Zero loyiha ortidan mahalliy aholi ishlab, daromad topadigan koʻplab infratuzilmalar, jumladan, umumiy ovqatlanish, transport, suvenirlar, restoranlar, kafelar va boshqa xizmat koʻrsatish turlari rivojlantiriladi”, - deya taʼkidladi viloyat hokimi Ergash Saliyev.

“Tres 001” qurilish tashkiloti tomonidan bunyod etilgan Zomin aeroporti 30 oʻringa moʻljallangan yoʻlovchi terminaliga ega boʻlib, qurish uchun 60 gektar yer maydoni ajratilgan.

Obyektda jami 200 dan ziyod xodimlar va 110 ta texnikalar bilan ishlar olib borilmoqda.

Shuningdek, hozirda aeroport infratuzilmasi, muxandislik kommunikatsiyasi, uchish-qoʻnish, xarakatlanish yoʻlaklari va perronni loyihalash hamda qurilish, uchish va qoʻnishni taʼminlash boʻyicha radio va aeronavigatsiya uskunalarini xarid qilish, oʻrnatish va ekspluatatsiya qilish ishlari belgilangan reja asosida olib borilmoqda.

Turizm sohasining eng muhim va e'tibor talab etadigan muhim bir jihatlardan biri bu - transport infratuzilmasidir.

Hududga tashrif buyuruvchi mahalliy va xorijiy sayyohlar uchun transport infratuzilmasi qanchalik qulay va samarali boʻlishi ularning sayohat davomiyligini uzaytirishiga sabab boʻladi.

2022-yilning oktyabr oyidan boshlab Zominning Dashtobod shaharchasi temir yoʻl bekatiga “Afrosiyob” tezyurar poyezdi toʻxtashi tashkil etilgan edi.

Bu orqali sayyohlarning tumanga kelib-ketishida qulaylik yaratilgan boʻlsa, bugun foydalanishga topshirilayotgan Aeroport va aviaqatnovlar orqali  respublikamizning olis hududlaridan mahalliy sayyohlarni, poytaxt Toshkent shahri va boshqa viloyatlardan xorijiy sayyohlarning tashriflarini samarali tashkil etish imkoniyatini yaratadi.