Жиззах вилоят ҳокимининг маҳаллий саноатни ривожлантириш масалалари бўйича ёрдамчиси Сарвар Абдуллаев иштирокида “Жиззах вилоятида ички ва ташқи бозорларда рақобатбардош маҳсулотлар ишлаб чиқариш бўйича амалга оширилаётган чора-тадбирлар тўғрисида”ги матбуот анжумани ўтказилди.

2022 йил 1 декабрь ҳолатига кўра вилоятимизда жами 4 469 та саноат корхоналари мавжуд бўлиб, 4 079 таси ёки 91,3 фоизи фаолият кўрсатмоқда.

Шундан йирик саноат корхоналари 30 тани, кичик саноат корхоналари 4 049 тани ташкил этади.

Вилоят саноат салоҳиятини ривожлантириш мақсадида 2022 йилнинг январь-ноябрь ойларида қиймати 1,5 трлн. сўмлик 83 та саноат лойиҳалари амалга оширилиши ҳисобига 2,7 минг нафар янги иш ўринлари яратилди.

Жиззах вилоятида 2022 йил якуни билан жами саноат 10,3 трлн. сўмлик, маҳаллий саноат маҳсулотлари 7,8 трлн. сўмлик, ҳудудий саноат 4,9 трлн. сўмлик маҳсулотлар ишлаб чиқарилиши кутилмоқда.

Ўзбекистон Республикаси Президентининг 2022 йил 24 январдаги ПҚ-99-сонли қарорига асосан, маҳаллийлаштириш дастурида 2022 йилда 50 та корхонада 66 турдаги 1 трлн. 737 млрд. сўмлик ёки 2021 йилга нисбатан 2,4 баробар кўп маҳсулотлар ишлаб чиқарилиши, импорт ўрнини босиш самарадорлиги 158 млн. долларни ташкил этилиши белгиланган.

Дастурга асосан, 2022 йил январь-ноябрь ойларида 50 та корхонада 66 турдаги 3,9 трлн. сўмлик импорт ўрнини босувчи маҳсулотлар ишлаб чиқарилиб, белгиланган прогноз кўрсаткичлари хажми 244 фоизга бажарилди.

Вилоятда янги шакллантирилган 2023-2024 йиллар учун Маҳаллийлаштириш дастурига асосан 62 та корхонада 101 турдаги 9,1 трлн. сўмлик импорт ўрнини босувчи маҳсулотлар ишлаб чиқарилиши режалаштирилмоқда.

Вилоятда саноатни ривожлантириш, шу жумладан, саноат маҳсулотлари ишлаб чиқариш ҳажмини ошириш, импорт ўрнини босувчи янги турдаги саноат маҳсулотларини ўзлаштириш бўйича ишларни тизимли ташкил этиш ва натижадорлигини таъминлаш юзасидан тизимли ишлар йўлга қўйилган.

Матбуот анжумани якунида иштирокчилар ўзларини қизиқтирган саволларга жавоб олишди.

Жиззах вилояти ҳокимлигида Халқ депутатлари Жиззах вилоят Кенгаши котибияти мудири, Коррупцияга қарши курашиш ҳудудий кенгаши котиби Нодира Каримова иштирокида “Жиззах вилояти Коррупцияга қарши курашиш ҳудудий кенгашининг ўтган даврдаги фаолияти бўйича амалга оширилган ишлар” мавзусида матбуот анжумани ўтказилди.

Жиззах вилояти коррупцияга қарши кураш ҳудудий кенгаши аъзолари 38 нафарни ташкил этиб, шундан кенгаш аъзоларининг 11 нафарини ёки 30 фоизини депутатлар, 5 нафар ёки 13 фоизини ҳуқуқни муҳофаза қилувчи идоралар, 10 нафар ёки 24 фоизини корхона ва ташкилотлар, 5 нафар ёки 13 фоизини нодавлат-нотижорат ташкилотлари, 2 нафар ёки 5 фоизини тадбиркорлар, 1 нафар ёки 5 фоизини меҳнат фахрийлар ҳамда 4 нафар ёки 10 фоизини оммавий ахборот воситаларининг вакиллари ташкил этади.

Аҳоли ва давлат хизматчилари ўртасида ижтимоий сўровлар ва тадқиқотлар ташкил этиш борасида ҳудудий кенгаш аъзолари томонидан ўтган давр мобайнида
450 дан ортиқ аҳоли вакиллари билан “Сиз солиқ органларида коррупцион ҳаракатларга дуч келганмисиз?”, “Давлат солиқ хизмати органларидаги қайси соҳада коррупция ҳолатлари кўп учрайди?”, “Давлат солиқ хизмати органларида коррупциянинг қайси кўринишига дуч келгансиз?” каби аноним сўровлар ўтказиб борилмоқда.

Халқ депутатлари вилоят Кенгашининг ўттиз бешинчи сессиясида вилоят коррупцияга қарши курашиш ҳудудий кенгашининг иш режаси ҳамда рейтинг баҳолаш мезонлари ижросини таъминлаш мақсадида “Коррупциясиз соҳа” йўналишида амалга оширилган ишлар бўйича вилоят прокурори ва вилоят ички ишлар бошқармаси бошлиғининг ҳисоботи, ўттиз саккизинчи сессияда вилоят Соғлиқни сақлаш бошқармаси бошлиғининг, қирқинчи сессияда Халқ таълими бошқармаси бошлиғининг ҳисоботлари эшитилди.

Миллий кенгаш томонидан рейтинг баҳолаш натижаларига кўра Жиззах вилояти коррупцияга қарши кураш ҳудудий кенгашининг ўтган даврдаги фаолияти ижобий баҳоланди.

Матбуот анжумани якунида иштирокчилар ўзларини қизиқтирган саволларга жавоб олишди.