#olis_yaqin_ovozlar

Shaharlik…
(Opam tilidan)

Olis qishloq, olis bolalik,
Qaytolmayman bag‘ringga, ona.
Kulcha nonni bo‘lishib yegan,
O‘shal qizcha endi begona.

Girdob ekan bu shahar qurg‘ur,
Yutib ketdi meni benishon.
Betonlardan qurilgan uyim,
Ruhim uchun qafasdir, ishon.

O‘zanidan ayrilgan suvman,
Ildizi yo‘q giyohman asli.
Ayni bahor chog‘imda, ona,
Sochlarimga qo‘ndi qish fasli.

Kun keladi, qaytib boraman,
Sog‘inchlarning yoqasin yirtib.
Shunda alyor aytib boraman,
Bir shaharlik qishloqi bolib…

Mehriddin Sobirjonov

@yoshlikjurnali
yoshlikjurnali.uz